سیدنا انس رضی اللہ عنہ نے بیان کیا کہ ”نماز عشاء کی اقامت کہی جا چکی تھی کہ ایک شخص کھڑا ہوا اور کہنے لگا: اے اللہ کے رسول! مجھے آپ سے کام ہے۔ چنانچہ وہ آپ صلی اللہ علیہ وسلم سے سرگوشیاں کرنے لگا، حتیٰ کہ قوم کو یا ان میں سے کچھ کو اونگھ آنے لگی، اس کے بعد آپ صلی اللہ علیہ وسلم نے نماز پڑھائی اور (سیدنا انس رضی اللہ عنہ نے) وضو کرنے کا ذکر نہیں کیا۔“ [سنن ابي داود/كتاب الطهارة/حدیث: 201]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم سجدہ کرتے اور (بعض اوقات اس میں) سو جاتے اور خراٹے لینے لگتے، پھر کھڑے ہوتے اور نماز پڑھنے لگتے اور وضو نہ کرتے۔ میں نے (ایک بار) عرض کیا کہ آپ نے نماز پڑھ لی اور وضو نہیں کیا، حالانکہ آپ سو گئے تھے، تو آپ صلی اللہ علیہ وسلم نے فرمایا: ”وضو اس پر ہے جو لیٹ کر سوئے۔“ عثمان اور ہناد نے اضافہ کیا: ”انسان جب لیٹ جاتا ہے تو اس کے جوڑ ڈھیلے ہو جاتے ہیں۔“ امام ابوداؤد رحمہ اللہ کہتے ہیں کہ: ”اس روایت میں یہ ٹکڑا ”وضو اس پر ہے جو لیٹ کر سوئے“ منکر ہے، اسے صرف یزید ابوخالد دالانی نے قتادہ سے روایت کیا ہے، جبکہ اس روایت کا ابتدائی حصہ ایک جماعت نے سیدنا ابن عباس رضی اللہ عنہما سے نقل کیا ہے مگر وہ یہ ٹکڑا بیان نہیں کرتے۔“ اور (عکرمہ) کہتے ہیں کہ نبی کریم صلی اللہ علیہ وسلم (دل کی نیند سے) محفوظ تھے اور سیدہ عائشہ رضی اللہ عنہا کہتی ہیں کہ نبی کریم صلی اللہ علیہ وسلم نے فرمایا: ”میری آنکھیں سوتی ہیں، مگر دل نہیں سوتا۔“ شعبہ کہتے ہیں کہ قتادہ نے ابوالعالیہ سے چار حدیثیں سنی ہیں: پہلی حدیث یونس بن متی علیہ السلام کے متعلق، دوسری سیدنا ابن عمر رضی اللہ عنہما کی حدیث جو نماز کے بارے میں ہے، تیسری وہ حدیث کہ قاضی تین قسم کے ہوتے ہیں اور چوتھی سیدنا ابن عباس رضی اللہ عنہما کی حدیث کہ مجھے معتمد اور پسندیدہ افراد نے حدیث بیان کی ان میں سے ایک عمر رضی اللہ عنہ ہیں اور ان میں سب سے زیادہ قابل اعتماد اور پسندیدہ میرے نزدیک عمر رضی اللہ عنہ ہی ہیں۔ امام ابوداؤد رحمہ اللہ کہتے ہیں کہ: ”میں نے یزید دالانی کی حدیث امام احمد بن حنبل رحمہ اللہ کے سامنے پیش کی تو انہوں نے مجھ کو اس کی (انتہائی) کمزوری کے باعث ڈانٹ دیا اور کہا کہ یزید دالانی کو کیا ہوا کہ مشائخ قتادہ کی روایات میں (وہ کچھ) داخل کر دیتا ہے (جو ان میں نہیں ہوتا) اور اس حدیث کو انہوں نے کوئی اہمیت نہ دی۔“ [سنن ابي داود/كتاب الطهارة/حدیث: 202]

سیدنا علی رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”آنکھیں سرین کا تسمہ ہیں، تو جو سو جائے وہ وضو کرے۔“ [سنن ابي داود/كتاب الطهارة/حدیث: 203]

سیدنا عبداللہ بن مسعود رضی اللہ عنہ نے فرمایا: ”ہم گندگی پر سے چل کر آتے تھے اور وضو نہ کرتے تھے اور نہ (اثنائے نماز میں) اپنے بالوں یا کپڑوں کو سمیٹتے تھے۔“ (اس حدیث کی سند میں) ابراہیم بن ابی معاویہ نے یوں کہا ہے: «عَنْ الْأَعْمَشِ عَنْ شَقِيقٍ عَنْ مَسْرُوقٍ عَنْ عَبْدِ اللهِ» (یعنی مسروق کے اضافے کے ساتھ) نیز یہ بھی کہ یہ سند یا تو «عَنْ الْأَعْمَشِ عَنْ شَقِيقٍ قَالَ قَالَ عَبْدُ اللهِ» (بلفظ «عَنْ») ہے یا «الْأَعْمَشُ حَدَّثَ عَنْ شَقِيقٍ» (بلفظِ تصریحِ تحدیث)۔ [سنن ابي داود/كتاب الطهارة/حدیث: 204]

سیدنا علی بن طلق رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”نماز کے دوران میں جو کوئی پھسکی مارے (یعنی بغیر آواز کے اس کے مقعد سے ہوا خارج ہو) تو چاہیے کہ وہ (نماز چھوڑ کر) چلا جائے، وضو کرے اور نماز دہرائے۔“ [سنن ابي داود/كتاب الطهارة/حدیث: 205]

سیدنا علی رضی اللہ عنہ بیان کرتے ہیں کہ مجھے بہت زیادہ مذی آتی تھی۔ میں نے (اس سے) غسل کرنا شروع کر دیا حتیٰ کہ میری کمر (کی کھال بوجہ پانی) پھٹنے لگی، تو میں نے یہ مسئلہ نبی کریم صلی اللہ علیہ وسلم کے سامنے پیش کیا، یا آپ صلی اللہ علیہ وسلم کو بتایا گیا تو رسول اللہ صلی اللہ علیہ وسلم نے فرمایا: ”جب تو مذی کو دیکھے تو غسل نہ کیا کر بلکہ صرف اپنی شرمگاہ کو دھو اور نماز والا وضو کر لیا کر، اور جب تو زور سے پانی نکالے (یعنی منی نکلے) تو غسل کر۔“ [سنن ابي داود/كتاب الطهارة/حدیث: 206]

سیدنا مقداد بن اسود رضی اللہ عنہ کہتے ہیں کہ سیدنا علی رضی اللہ عنہ نے ان سے کہا: ”رسول اللہ صلی اللہ علیہ وسلم سے یہ مسئلہ دریافت کیجیے کہ ایک شخص جب اپنی اہلیہ کے قریب ہوتا ہے تو اس سے مذی نکلتی ہے تو اس پر کیا لازم ہے (وضو یا غسل)؟ چونکہ میرے گھر میں آپ صلی اللہ علیہ وسلم کی صاحبزادی ہے اس لیے میں آپ صلی اللہ علیہ وسلم سے دریافت کرنے میں حجاب محسوس کرتا ہوں۔“ مقداد رضی اللہ عنہ کہتے ہیں کہ میں نے رسول اللہ صلی اللہ علیہ وسلم سے اس بارے میں پوچھا تو آپ صلی اللہ علیہ وسلم نے فرمایا: ”جب تم میں سے کوئی ایسا محسوس کرے تو اپنی شرمگاہ کو دھو لے اور نماز والا وضو کرے۔“ [سنن ابي داود/كتاب الطهارة/حدیث: 207]

سیدنا علی رضی اللہ عنہ نے مقداد رضی اللہ عنہ سے کہا اور مذکورہ بالا حدیث کی مانند ذکر کیا۔ کہتے ہیں کہ چنانچہ مقداد رضی اللہ عنہ نے رسول اللہ صلی اللہ علیہ وسلم سے دریافت کیا تو آپ صلی اللہ علیہ وسلم نے فرمایا: ”چاہیے کہ وہ اپنا «ذکر» اور «خصیتین» کو دھو لے۔“ امام ابوداؤد رحمہ اللہ کہتے ہیں کہ اس حدیث کو ثوری اور ایک جماعت نے بسند «هِشَامٍ عَنْ أَبِيهِ (عُرْوَةَ) عَنْ مِقْدَادٍ عَنْ عَلِيٍّ عَنِ النَّبِيِّ صلی اللہ علیہ وسلم » روایت کیا ہے۔ [سنن ابي داود/كتاب الطهارة/حدیث: 208]

سیدنا علی بن ابی طالب رضی اللہ عنہ کہتے ہیں کہ ”میں نے مقداد رضی اللہ عنہ سے کہا“ اور مذکورہ بالا حدیث کے ہم معنی بیان کیا۔ امام ابوداؤد رحمہ اللہ کہتے ہیں: ”اس کو مفضل بن فضالہ، ثوری اور ابن عیینہ نے «هِشَامٍ عَنْ أَبِيهِ عَنْ عَلِيٍّ» کی سند سے روایت کیا ہے، اور ابن اسحاق نے «عَنْ هِشَامٍ عَنْ أَبِيهِ عَنْ عَلِيِّ بْنِ أَبِي طَالِبٍ وَرَوَاهُ ابْنُ إِسْحَاقَ عَنْ هِشَامِ بْنِ عُرْوَةَ عَنْ أَبِيهِ عَنِ الْمِقْدَادِ عَنِ النَّبِيِّ صلی اللہ علیہ وسلم » کی سند سے روایت کیا ہے اور اس میں خصیتین کے دھونے کا ذکر نہیں کیا۔“ [سنن ابي داود/كتاب الطهارة/حدیث: 209]

سیدنا سہل بن حنیف رضی اللہ عنہ کہتے ہیں کہ مجھے بہت زیادہ مذی آتی تھی اور اس بنا پر غسل بھی بہت زیادہ کرنا پڑتا تھا، لہٰذا میں نے رسول اللہ صلی اللہ علیہ وسلم سے اس بارے میں پوچھا تو آپ صلی اللہ علیہ وسلم نے فرمایا: ”اس کے لیے تمہیں وضو ہی کافی ہے۔“ میں نے کہا: ”اے اللہ کے رسول! اور جو میرے کپڑے کو لگ جائے؟“ آپ صلی اللہ علیہ وسلم نے فرمایا: ”جہاں تو محسوس کرے کہ کپڑے کو لگی ہے وہاں پانی کا ایک چلو لے کر چھڑک لیا کر، یہی کافی ہے۔“ [سنن ابي داود/كتاب الطهارة/حدیث: 210]