جناب جمیع بن عمیر، اور یہ بنی تیم اللہ بن ثعلبہ کے خانوادے سے ہیں، کہتے ہیں کہ میں اپنی والدہ اور خالہ کے ساتھ سیدہ عائشہ رضی اللہ عنہا کے ہاں آیا تھا۔ ان دونوں میں سے ایک نے ان سے پوچھا: ”غسل میں آپ لوگ کیسے کرتے ہیں؟“ تو سیدہ عائشہ رضی اللہ عنہا نے کہا: ”نبی کریم صلی اللہ علیہ وسلم (پہلے) نماز کے وضو کی طرح کا وضو کرتے پھر اپنے سر پر تین بار پانی ڈالتے تھے، مگر ہم اپنی چوٹیوں کی وجہ سے پانچ بار ڈالتی تھیں۔“ [سنن ابي داود/كتاب الطهارة/حدیث: 241]

ام المؤمنین سیدہ عائشہ رضی اللہ عنہا بیان کرتی ہیں کہ ”رسول اللہ صلی اللہ علیہ وسلم جب غسل جنابت کرتے، سلیمان کی روایت میں ہے، ابتدا کرتے تو اپنے دائیں ہاتھ سے بائیں پر پانی ڈالتے۔ اور مسدد کی روایت میں ہے اپنے دونوں ہاتھ دھوتے، برتن کو اپنے دائیں ہاتھ پر اوندھا کرتے۔ اس کے بعد دونوں مشائخ روایت کرنے میں متفق ہیں کہ پھر اپنی شرمگاہ دھوتے اور بقول مسدد اپنے بائیں ہاتھ پر پانی ڈالتے اور بسا اوقات وہ (سیدہ عائشہ رضی اللہ عنہا) شرمگاہ کا ذکر کنایہ سے کرتیں، پھر آپ صلی اللہ علیہ وسلم نماز کے وضو کی طرح کا وضو کرتے، پھر اپنے ہاتھ پانی میں ڈالتے اور اپنے بالوں کا خلال کرتے، جب سمجھتے کہ جلد تر ہو گئی ہے یا صاف ہو گئی ہے تو اپنے سر پر تین لپ پانی ڈالتے (اور آخر غسل میں) اگر کوئی پانی بچ رہتا تو اپنے جسم پر ڈال لیتے۔“ [سنن ابي داود/كتاب الطهارة/حدیث: 242]

ام المؤمنین سیدہ عائشہ رضی اللہ عنہا بیان کرتی ہیں کہ: ”رسول اللہ صلی اللہ علیہ وسلم جب غسل جنابت کا ارادہ کرتے تو اپنے ہاتھوں سے ابتدا کرتے، انہیں دھوتے پھر اپنی شرمگاہ کے گردا گرد دھوتے (یعنی شرمگاہ، چڈے، رانیں اور گھٹنوں کے پیچھے والا حصہ دھوتے) اور اس پر پانی بہاتے پھر (شرمگاہ کی صفائی کے بعد) اپنے ہاتھوں کو صاف کر لیتے تو (مزید طہارت کے لیے) ان ہاتھوں کو دیوار پر مارتے (یعنی مٹی سے ملتے) پھر وضو شروع کرتے اور اپنے سر پر پانی ڈالتے۔“ [سنن ابي داود/كتاب الطهارة/حدیث: 243]

ام المؤمنین سیدہ عائشہ رضی اللہ عنہا نے کہا: ”اگر چاہو تو میں تمہیں رسول اللہ صلی اللہ علیہ وسلم کے دیوار پر ہاتھ مارنے کے نشان دکھا سکتی ہوں جہاں کہ آپ صلی اللہ علیہ وسلم غسل جنابت کیا کرتے تھے۔“ [سنن ابي داود/كتاب الطهارة/حدیث: 244]

ام المؤمنین سیدہ میمونہ رضی اللہ عنہا نے بیان کیا کہ ”میں نے رسول اللہ صلی اللہ علیہ وسلم کے لیے غسل کا پانی رکھا۔ آپ صلی اللہ علیہ وسلم غسل جنابت کرنا چاہتے تھے، آپ صلی اللہ علیہ وسلم نے برتن کو اپنے دائیں ہاتھ پر اوندھا کیا اور اسے دو یا تین بار دھویا۔ پھر اپنی شرمگاہ پر پانی ڈالا اور بائیں ہاتھ سے اسے دھویا۔ پھر اپنا ہاتھ زمین پر مارا اور اسے دھویا۔ پھر کلی کی اور ناک میں پانی ڈالا، اپنا چہرہ مبارک اور ہاتھ دھوئے، پھر اپنے سر اور جسم پر پانی ڈالا، پھر آپ صلی اللہ علیہ وسلم ایک طرف ہو گئے اور اپنے پاؤں دھوئے۔ پھر میں نے آپ صلی اللہ علیہ وسلم کو رومال دیا مگر آپ نے نہیں لیا اور جسم سے پانی جھاڑنے لگے۔“ (اعمش کہتے ہیں) ”میں نے یہ بات ابراہیم نخعی رحمہ اللہ سے ذکر کی (کہ غسل کے بعد جسم پونچھا جائے یا نہیں) تو انہوں نے کہا: صحابہ اس میں کوئی حرج نہیں سمجھتے تھے لیکن عادت بنا لینے کو برا جانتے تھے۔“ امام ابوداؤد رحمہ اللہ نے کہا: ”مسدد کہتے ہیں کہ میں نے عبداللہ بن داود سے کہا کہ صحابہ کرام (غسل کے بعد کپڑے سے جسم خشک کرنے کو) بطور عادت مکروہ جانتے تھے؟ کہا ایسے ہی ہے لیکن میں نے اپنی کتاب میں اسے اس طرح پایا ہے۔“ [سنن ابي داود/كتاب الطهارة/حدیث: 245]

جناب شعبہ (ابوعبداللہ بن دینار مولیٰ ابن عباس) بیان کرتے ہیں کہ سیدنا ابن عباس رضی اللہ عنہما جب غسل جنابت کرتے تو اپنے دائیں ہاتھ سے بائیں پر سات بار پانی ڈالتے۔ پھر اپنی شرمگاہ دھوتے۔ ایک دفعہ وہ بھول گئے کہ کتنی بار پانی ڈالا ہے تو مجھ سے پوچھنے لگے: ”میں نے کتنی بار پانی ڈالا ہے؟“ میں نے کہا: ”مجھے معلوم نہیں۔“ کہا: ”نہ رہے تیری ماں! جاننے سے تجھے کیا مانع ہوا؟“ پھر وضو کیا جیسے کہ نماز کے لیے ہوتا ہے۔ پھر اپنے جسم پر پانی ڈالتے اور کہتے: ”رسول اللہ صلی اللہ علیہ وسلم اسی طرح سے طہارت حاصل کیا کرتے تھے۔“ [سنن ابي داود/كتاب الطهارة/حدیث: 246]

سیدنا عبداللہ بن عمر رضی اللہ عنہما کہتے ہیں کہ ”(شروع شروع میں) نمازیں پچاس اور غسل جنابت سات سات بار تھا۔ اسی طرح وہ کپڑا جسے پیشاب لگ جاتا، اس کا دھونا بھی سات بار تھا۔ تو رسول اللہ صلی اللہ علیہ وسلم اس بارے میں (تخفیف کا) سوال برابر کرتے رہے، حتیٰ کہ نمازوں کو پانچ اور غسل جنابت اور پیشاب لگے کپڑے کا دھونا ایک بار کر دیا گیا۔“ [سنن ابي داود/كتاب الطهارة/حدیث: 247]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”ہر ہر بال کے نیچے جنابت ہے، لہذا اپنے بالوں کو دھوؤ اور جسم کو صاف کرو۔“ امام ابوداؤد رحمہ اللہ نے کہا: ”حارث بن وجیہ کی (مذکورہ) حدیث منکر ہے اور وہ ضعیف ہے۔“ [سنن ابي داود/كتاب الطهارة/حدیث: 248]

سیدنا علی رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا ”جس نے جنابت میں ایک بال کی جگہ بھی چھوڑ دی اور اسے نہ دھویا تو اس کے ساتھ آگ میں ایسے اور ایسے کیا جائے گا (یعنی عذاب دیا جائے گا)۔“ سیدنا علی رضی اللہ عنہ فرماتے ہیں: ”میں اسی وجہ سے اپنے سر کا دشمن بن گیا ہوں۔ میں اسی وجہ سے اپنے سر کا دشمن بن گیا ہوں۔ میں اسی وجہ سے اپنے سر کا دشمن بن گیا ہوں“۔ آپ اپنے بال منڈائے رکھتے تھے۔ [سنن ابي داود/كتاب الطهارة/حدیث: 249]

ام المؤمنین سیدہ عائشہ رضی اللہ عنہا کہتی ہیں کہ ”رسول اللہ صلی اللہ علیہ وسلم غسل کرتے، دو رکعتیں ادا کرتے اور نماز فجر پڑھتے اور میں نہیں سمجھتی کہ آپ صلی اللہ علیہ وسلم غسل کے بعد وضو کی تجدید کرتے تھے۔“ [سنن ابي داود/كتاب الطهارة/حدیث: 250]