ام المؤمنین سیدہ عائشہ رضی اللہ عنہا سے روایت ہے، وہ فرماتی ہیں: ”جب مجھے حیض آتا تو میں بستر سے اتر کر چٹائی پر آ جاتی، پھر ہم (زوجات) رسول اللہ صلی اللہ علیہ وسلم کے قریب نہ ہوتی تھیں حتیٰ کہ پاک ہو جاتیں۔“ [سنن ابي داود/كتاب الطهارة/حدیث: 271]

جناب عکرمہ رحمہ اللہ نبی کریم صلی اللہ علیہ وسلم کی کسی زوجہ رضی اللہ عنہا سے راوی ہیں، وہ کہتی ہیں کہ: ”نبی کریم صلی اللہ علیہ وسلم اگر اپنی کسی اہلیہ سے کچھ خواہش کرتے اور وہ حیض سے ہوتی تو اس کی شرمگاہ پر کپڑا ڈال دیتے۔“ [سنن ابي داود/كتاب الطهارة/حدیث: 272]

ام المؤمنین سیدہ عائشہ رضی اللہ عنہا بیان کرتی ہیں کہ ”رسول اللہ صلی اللہ علیہ وسلم ہمارے (یعنی زوجات کے) شدت حیض کے دنوں میں ہمیں حکم دیتے کہ ہم اپنی چادر کس کر باندھ لیں اور پھر ہمارے ساتھ لیٹ جاتے، اور تم میں سے کون ہے جسے اپنے جذبات پر اس قدر ضبط حاصل ہو جیسا کہ رسول اللہ صلی اللہ علیہ وسلم کو تھا؟“ [سنن ابي داود/كتاب الطهارة/حدیث: 273]

ام المؤمنین سیدہ ام سلمہ رضی اللہ عنہا زوجہ نبی کریم صلی اللہ علیہ وسلم کہتی ہیں کہ رسول اللہ صلی اللہ علیہ وسلم کے زمانے میں ایک عورت کو بہت خون آتا تھا تو اس کے لیے سیدہ ام سلمہ رضی اللہ عنہا نے رسول اللہ صلی اللہ علیہ وسلم سے پوچھا تو آپ صلی اللہ علیہ وسلم نے فرمایا: ”اسے چاہیے کہ یہ عارضہ لاحق ہونے سے پہلے، مہینے (میں حیض) کے دنوں اور راتوں کی گنتی کا خیال کرے اور استخاضہ والے مہینے میں اسی اندازے سے نماز چھوڑ دے۔ جب یہ دن گزر جائیں تو غسل کر لے اور کپڑے کا لنگوٹ باندھے رہے اور نماز پڑھتی رہے۔“ [سنن ابي داود/كتاب الطهارة/حدیث: 274]

ایک آدمی نے سیدہ ام سلمہ رضی اللہ عنہا سے روایت کیا کہ ”ایک عورت کو بہت خون آتا تھا۔“ اور مذکورہ بالا حدیث کی مانند بیان کیا، اس روایت میں ہے کہ ”جب یہ دن گزر جائیں اور نماز کا وقت آ جائے (یعنی نماز پڑھنے کے دن آ جائیں) تو چاہیے کہ غسل کرے۔“ باقی روایت سابقہ حدیث کے ہم معنی ہے۔ [سنن ابي داود/كتاب الطهارة/حدیث: 275]

ایک انصاری رضی اللہ عنہ سے روایت ہے کہ ایک خاتون کو بہت زیادہ خون آتا تھا اور مذکورہ بالا حدیث لیث رحمہ اللہ کے ہم معنی بیان کی، کہا کہ: ”جب یہ ایام گزار لے اور نماز کا وقت آ جائے تو غسل کرے“ اور اس کے ہم معنی ذکر کیا۔ [سنن ابي داود/كتاب الطهارة/حدیث: 276]

صخر بن جویریہ رحمہ اللہ، نافع رحمہ اللہ سے لیث رحمہ اللہ کی اسناد سے اور اس کے ہم معنی روایت کرتے ہیں۔ انہوں نے کہا: ”ایام حیض کی گنتی کے مطابق نماز چھوڑ دے۔ پھر جب نماز کا وقت ہو جائے (نماز کے ایام آ جائیں) تو غسل کرے اور کپڑے کا لنگوٹ باندھے اور نماز پڑھے۔“ [سنن ابي داود/كتاب الطهارة/حدیث: 277]

سلیمان بن یسار، سیدہ ام سلمہ رضی اللہ عنہا سے یہی قصہ بیان کرتے ہیں، اس میں ہے کہ ”نماز چھوڑ دے اور اس کے علاوہ میں غسل کرے اور کپڑے کا لنگوٹ باندھے اور نماز پڑھے۔“ امام ابوداؤد رحمہ اللہ نے کہا کہ حماد بن زید نے بواسطہ ایوب یہ روایت بیان کی تو اس میں مستحاضہ خاتون کا نام فاطمہ بنت ابی حبیش رضی اللہ عنہا بتایا۔ [سنن ابي داود/كتاب الطهارة/حدیث: 278]

جناب عروہ سیدہ عائشہ رضی اللہ عنہا سے بیان کرتے ہیں، انہوں نے کہا کہ سیدہ ام حبیبہ رضی اللہ عنہا نے نبی کریم صلی اللہ علیہ وسلم سے خون کے متعلق پوچھا، سیدہ عائشہ رضی اللہ عنہا کہتی ہیں: ”میں نے ان کی لگن دیکھی تھی کہ خون سے بھری ہوئی تھی۔“ رسول اللہ صلی اللہ علیہ وسلم نے ان سے فرمایا: ”اس عارضہ سے پہلے کی عادت کے مطابق نماز سے رکی رہو جیسے کہ باقاعدہ تمہیں حیض روکتا تھا، پھر غسل کر لو۔“ امام ابوداؤد رحمہ اللہ نے کہا: ”قتیبہ نے ایک حدیث میں بین السطور اس روایت کی سند میں جعفر کا نسب ”جعفر بن ربیعہ“ دوسری مرتبہ میں واضح کیا (یعنی انہیں جعفر کے ابن ربیعہ ہونے میں شک تھا) جبکہ علی بن عیاش اور یونس بن محمد نے لیث سے روایت کیا تو ان دونوں نے بصراحت (بغیر شک کے) ”جعفر بن ربیعہ“ کہا۔“ [سنن ابي داود/كتاب الطهارة/حدیث: 279]

جناب عروہ بن زبیر رحمہ اللہ کہتے ہیں کہ فاطمہ بنت ابی حبیش رضی اللہ عنہا نے انہیں بتایا کہ انہوں نے رسول اللہ صلی اللہ علیہ وسلم سے سوال کیا اور خون کی شکایت کی تو رسول اللہ صلی اللہ علیہ وسلم نے ان سے فرمایا: ”یہ ایک رگ (کا خون) ہے، تم ذرا غور سے دیکھو جب تمہارا حیض آئے تو نماز چھوڑ دو اور جب حیض گزر جائے تو طہارت حاصل کرو اور دوسرے حیض کے ایام آنے تک نماز پڑھتی رہو۔“ [سنن ابي داود/كتاب الطهارة/حدیث: 280]