سمی مولیٰ ابی بکر رحمہ اللہ سے مروی ہے کہ قعقاع اور زید بن اسلم نے مجھے سعید بن مسیب رحمہ اللہ کے پاس بھیجا کہ ان سے مستحاضہ کے غسل کے بارے میں سوال کروں، تو انہوں نے کہا: ”ظہر سے ظہر تک کے لیے غسل کرے اور (اس کے مابین) باقی ہر نماز کے لیے وضو کرے اور اگر اس پر خون غالب ہو تو کپڑے کا لنگوٹ باندھ لیا کرے۔“ امام ابوداؤد رحمہ اللہ نے کہا: ”ابن عمر رضی اللہ عنہما اور انس بن مالک رضی اللہ عنہ سے (بھی یہی) مروی ہے کہ ظہر سے ظہر تک کے لیے وضو کرے اور ایسے ہی داود اور عاصم نے شعبی رحمہ اللہ سے، وہ اپنی زوجہ سے، وہ قمیر (زوجہ مسروق) سے، انہوں نے سیدہ عائشہ رضی اللہ عنہا سے روایت کیا ہے، مگر داود نے کہا کہ ”ہر روز غسل کرے۔“ اور عاصم کی روایت میں ہے کہ ”ظہر کے وقت غسل کرے۔“ اور یہی قول ہے سالم بن عبداللہ، حسن اور عطاء رحمہم اللہ کا۔“ امام ابوداؤد رحمہ اللہ نے کہا: ”امام مالک رحمہ اللہ کہتے ہیں کہ ابن مسیب رحمہ اللہ کی حدیث ”ظہر سے ظہر تک“ کے بارے میں میرا گمان ہے کہ یہ دراصل ”طہر سے طہر تک“ ہے لیکن کسی کو وہم ہوا تو اس نے اسے ”ظہر سے ظہر تک“ بنا دیا، جبکہ مسور بن عبدالملک رحمہ اللہ نے اس روایت کو ”طہر سے طہر تک“ ہی بیان کیا ہے، مگر لوگوں نے اسے ”ظہر سے ظہر تک“ بنا دیا ہے۔“ [سنن ابي داود/كتاب الطهارة/حدیث: 301]

سیدنا علی رضی اللہ عنہ بیان کرتے ہیں کہ ”مستحاضہ کا حیض جب ختم ہو جائے تو وہ ہر روز غسل کیا کرے اور تھوڑی سی اون گھی یا زیتون کے تیل میں تر کر کے حمول کر لیا کرے۔ (یعنی فرج میں رکھ لیا کرے)۔“ [سنن ابي داود/كتاب الطهارة/حدیث: 302]

محمد بن عثمان رحمہ اللہ نے قاسم بن محمد رحمہ اللہ سے مستحاضہ کے بارے میں سوال کیا تو انہوں نے کہا: ”اپنے حیض کے دنوں میں نماز چھوڑے رکھے، پھر (ان کے ختم ہونے پر) غسل کرے اور نماز پڑھنا شروع کر دے اور پھر ان دنوں کے درمیان (موقع بموقع) غسل کرتی رہے۔“ [سنن ابي داود/كتاب الطهارة/حدیث: 303]

سیدہ فاطمہ بنت ابی حبیش رضی اللہ عنہا سے روایت ہے کہ انہیں استحاضہ ہوتا تھا تو نبی کریم صلی اللہ علیہ وسلم نے ان سے فرمایا ”جب حیض کا خون آئے اور یہ سیاہ رنگ کا ہوتا ہے اور پہچانا جاتا ہے، تو جب یہ شروع ہو تو نماز سے رک جاؤ اور جب دوسرا ہو تو وضو کرو اور نماز پڑھو۔“ امام ابوداؤد رحمہ اللہ نے بیان کیا کہ ابن مثنیٰ نے کہا کہ ہمیں یہ حدیث ابن ابی عدی نے اپنے حفظ سے بیان کی تو اس کی سند میں سیدہ عائشہ رضی اللہ عنہا کا اضافہ کیا (یعنی عروہ عن عائشہ رضی اللہ عنہا عن فاطمہ رضی اللہ عنہا)۔ امام ابوداؤد رحمہ اللہ نے کہا: علاء بن مسیب اور شعبہ رحمہ اللہ سے مروی ہے (دونوں) حکم سے وہ ابو جعفر رحمہ اللہ سے روایت کرتے ہیں۔ علاء نے مرفوعاً نبی کریم صلی اللہ علیہ وسلم سے اور شعبہ نے ابو جعفر رحمہ اللہ سے موقوفاً بیان کیا ”وہ ہر نماز کے لیے وضو کرے۔“ [سنن ابي داود/كتاب الطهارة/حدیث: 304]

جناب عکرمہ بیان کرتے ہیں کہ سیدہ ام حبیبہ بنت جحش رضی اللہ عنہا کو استحاضہ شروع ہو گیا تو نبی کریم صلی اللہ علیہ وسلم نے اسے حکم دیا: ”اپنے ایام حیض (کے ختم ہونے) کا انتظار کرے۔ پھر غسل کرے اور نماز پڑھنا شروع کر دے۔ اگر (خون کے علاوہ) کوئی حدث محسوس کرے تو وضو کرے اور نماز پڑھے۔“ [سنن ابي داود/كتاب الطهارة/حدیث: 305]

ربیعہ (ربیعہ بن عبدالرحمٰن، المعروف ربیعہ الرای، تابعی) رحمہ اللہ سے منقول ہے کہ وہ ”مستحاضہ پر ہر نماز کے لیے تجدیدِ وضو کے قائل نہ تھے، الا یہ کہ اسے خون کے علاوہ کوئی اور حدث لاحق ہو تو وضو کرے“۔ امام ابوداؤد رحمہ اللہ بیان کرتے ہیں کہ ”مالک بن انس رحمہ اللہ کا بھی یہی قول ہے“۔ [سنن ابي داود/كتاب الطهارة/حدیث: 306]

سیدہ ام عطیہ رضی اللہ عنہا سے روایت ہے اور انہوں نے نبی کریم صلی اللہ علیہ وسلم سے بیعت کی تھی، بیان کرتی ہیں کہ: ”ہم طہر شروع ہو جانے کے بعد میلے یا پیلے سے پانی آنے کو کچھ نہ سمجھتی تھیں۔“ [سنن ابي داود/كتاب الطهارة/حدیث: 307]

جناب محمد بن سیرین نے سیدہ ام عطیہ رضی اللہ عنہا سے ”اسی کے مثل“ روایت کیا ہے۔ امام ابوداؤد رحمہ اللہ نے کہا: ”ام ہذیل سے مراد حفصہ بنت سیرین ہیں۔ ان کے بیٹے کا نام ہذیل اور شوہر کا نام عبدالرحمٰن تھا۔“ [سنن ابي داود/كتاب الطهارة/حدیث: 308]

جناب عکرمہ رحمہ اللہ نے بیان کیا کہ سیدہ ام حبیبہ رضی اللہ عنہا کو استحاضہ ہوتا تھا اور ان کا شوہر ان سے مجامعت کیا کرتا تھا۔ امام ابوداؤد رحمہ اللہ نے کہا: ”یحییٰ بن معین رحمہ اللہ نے معلی کو ثقہ کہا ہے، جب کہ امام احمد بن حنبل رحمہ اللہ اس سے کچھ روایت نہ کرتے تھے کیونکہ وہ رائے اور قیاس کی طرف مائل تھے۔“ [سنن ابي داود/كتاب الطهارة/حدیث: 309]

عکرمہ رحمہ اللہ، حمنہ بنت جحش رضی اللہ عنہا سے روایت کرتے ہیں کہ ”انہیں استحاضہ آتا تھا اور ان کا شوہر ان سے مباشرت کرتا تھا۔“ [سنن ابي داود/كتاب الطهارة/حدیث: 310]