ام المؤمنین سیدہ عائشہ رضی اللہ عنہا بیان کرتی ہیں کہ مجھ سے رسول اللہ صلی اللہ علیہ وسلم نے فرمایا: ”مجھے مسجد میں سے چٹائی دے دو۔“ میں نے کہا: میں حیض سے ہوں۔ آپ صلی اللہ علیہ وسلم نے فرمایا: ”تیرا حیض تیرے ہاتھ میں نہیں ہے۔“ [سنن ابي داود/كتاب الطهارة/حدیث: 261]

سیدہ معاذہ رحمہا اللہ نے بیان کیا کہ ایک عورت نے سیدہ عائشہ رضی اللہ عنہا سے سوال کیا کہ ”آیا حائضہ (اپنے ایام حیض کی) نمازوں کی قضاء دے؟“ تو انہوں نے کہا: ”کیا تو حروری ہے؟ بلاشبہ ہم رسول اللہ صلی اللہ علیہ وسلم کے ہوتے ہوئے حیض سے ہوتی تھیں تو ہم کسی نماز کی قضاء نہیں دیتی تھیں اور نہ ہمیں اس کا حکم ہی دیا جاتا تھا۔“ [سنن ابي داود/كتاب الطهارة/حدیث: 262]

سیدہ معاذہ عدویہ رضی اللہ عنہا نے ام المؤمنین سیدہ عائشہ رضی اللہ عنہا سے یہی حدیث روایت کی ہے۔ امام ابوداؤد رحمہ اللہ کہتے ہیں کہ اس میں یہ اضافہ ہے: ”ہمیں روزے کی قضاء کرنے کا حکم دیا جاتا تھا اور نمازوں کی قضاء کرنے کا حکم نہ دیا جاتا تھا۔“ [سنن ابي داود/كتاب الطهارة/حدیث: 263]

سیدنا ابن عباس رضی اللہ عنہما نے نبی کریم صلی اللہ علیہ وسلم سے اس شخص کے بارے میں جو اپنی بیوی سے حالت حیض میں مجامعت کرتا ہے روایت کیا ہے کہ آپ صلی اللہ علیہ وسلم نے فرمایا: ”ایک دینار صدقہ کرے یا آدھا دینار۔“ امام ابوداؤد رحمہ اللہ کہتے ہیں کہ صحیح روایت ایسے ہی ہے کہ ”ایک دینار یا آدھا دینار۔“ لیکن شعبہ اس روایت کو بعض اوقات مرفوع بیان نہ کرتے تھے (بلکہ سیدنا ابن عباس رضی اللہ عنہما پر موقوف کر دیتے تھے)۔ [سنن ابي داود/كتاب الطهارة/حدیث: 264]

سیدنا ابن عباس رضی اللہ عنہما کا ارشاد ہے: ”اگر شوہر اپنی بیوی کے پاس خون حیض کے ابتدائی دنوں میں آئے تو ایک دینار دے اور اگر خون رک جانے کے ایام میں آئے تو آدھا دینار دے۔“ امام ابوداؤد رحمہ اللہ کہتے ہیں: ”ابن جریج نے عبدالکریم سے، انہوں نے مقسم سے ایسے ہی روایت کیا ہے۔“ [سنن ابي داود/كتاب الطهارة/حدیث: 265]

سیدنا ابن عباس رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا: ”اگر کوئی آدمی اپنی اہلیہ کے پاس اس کے ایام حیض میں آئے، تو چاہیے کہ آدھا دینار صدقہ دے۔“ امام ابوداؤد رحمہ اللہ نے کہا: ”علی بن بذیمہ نے مقسم سے، وہ نبی کریم صلی اللہ علیہ وسلم سے مرسلاً بیان کرتے ہیں۔ اور اوزاعی نے یزید بن ابی مالک سے، انہوں نے عبدالحمید بن عبدالرحمٰن سے، انہوں نے نبی کریم صلی اللہ علیہ وسلم سے روایت کیا: آپ صلی اللہ علیہ وسلم نے اسے حکم دیا کہ وہ ایک دینار کا 2/5 صدقہ کرے۔ مگر یہ سند معضل ہے (یعنی اس میں دو راوی یکے بعد دیگرے ساقط ہیں)۔“ [سنن ابي داود/كتاب الطهارة/حدیث: 266]

ام المؤمنین سیدہ میمونہ رضی اللہ عنہا بیان کرتی ہیں کہ ”نبی کریم صلی اللہ علیہ وسلم اپنی ازواج میں سے کسی ایک کے ساتھ لیٹ جایا کرتے تھے جبکہ وہ حیض سے ہوتی اور اس پر آدھی رانوں تک یا گھٹنوں تک کپڑا ہوتا اور وہ اس کپڑے سے اپنا (زیریں) جسم ڈھانپے ہوتی تھی۔“ [سنن ابي داود/كتاب الطهارة/حدیث: 267]

ام المؤمنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم ”ہم عورتوں کو حکم فرماتے کہ جب ہم میں سے کوئی حیض سے ہو تو اپنی چادر اچھی طرح باندھ لیا کرے۔ پھر شوہر (کو اجازت ہے کہ) اس کے ساتھ لیٹ جائے۔“ اور (شعبہ نے) ایک بار «يُضَاجِعُهَا» کی بجائے «يُبَاشِرُهَا» کا لفظ روایت کیا۔ [سنن ابي داود/كتاب الطهارة/حدیث: 268]

ام المؤمنین سیدہ عائشہ رضی اللہ عنہا کہتی تھیں کہ ”میں اور رسول اللہ صلی اللہ علیہ وسلم ایک ہی چادر میں رات گزارتے اور میں حیض سے ہوتی، اگر آپ کو مجھ سے کچھ لگ جاتا تو اتنی جگہ دھو لیتے اور اس سے آگے نہ بڑھتے اور نماز پڑھ لیتے۔ اور اگر کپڑے کو کچھ لگ جاتا تو بھی اسی قدر جگہ دھوتے اس سے آگے نہ بڑھتے اور اسی میں نماز پڑھ لیتے۔“ [سنن ابي داود/كتاب الطهارة/حدیث: 269]

جناب عمارہ بن غراب کہتے ہیں کہ ان کی پھوپھی نے انہیں بتایا کہ انہوں نے سیدہ عائشہ رضی اللہ عنہا سے سوال کیا، کہا کہ ”ہم میں سے ایک حائضہ ہوتی ہے اور اس کے لیے اور اس کے شوہر کے لیے صرف ایک ہی بستر ہوتا ہے۔“ سیدہ عائشہ رضی اللہ عنہا نے کہا: ”میں تمہیں رسول اللہ صلی اللہ علیہ وسلم کی ایک بار کی بات بتاتی ہوں کہ آپ صلی اللہ علیہ وسلم (گھر میں) تشریف لائے اور مسجد میں چلے گئے، امام ابوداود رحمہ اللہ نے کہا اس سے مراد گھر میں نماز کی جگہ پر، پھر آپ صلی اللہ علیہ وسلم فارغ نہ ہوئے حتی کہ میری آنکھیں بوجھل ہو گئیں (یعنی نیند نے آ لیا) اور آپ صلی اللہ علیہ وسلم کو سردی نے ستایا تو فرمایا: ”میرے قریب ہو جاؤ۔“ میں نے کہا: ”میں حیض سے ہوں۔“ آپ صلی اللہ علیہ وسلم نے فرمایا: ”اپنی رانوں سے کپڑا ہٹاؤ۔“ میں نے اپنی رانوں سے کپڑا ہٹا لیا تو آپ صلی اللہ علیہ وسلم نے اپنا رخسار اور سینہ میری رانوں پر رکھ دیا اور میں بھی آپ صلی اللہ علیہ وسلم پر جھک گئی حتی کہ آپ صلی اللہ علیہ وسلم گرم ہو گئے اور سو رہے۔“ [سنن ابي داود/كتاب الطهارة/حدیث: 270]