سیدہ اسماء بنت ابی بکر رضی اللہ عنہا بیان کرتی ہیں کہ ایک عورت نے رسول اللہ صلی اللہ علیہ وسلم سے پوچھا، اس نے کہا: ”اے اللہ کے رسول! فرمائیے کہ جب ہم میں سے کسی کے کپڑے کو حیض کا خون لگ جائے تو کیسے کرے؟“ آپ صلی اللہ علیہ وسلم نے فرمایا: ”جب تم میں سے کسی کے کپڑے کو حیض کا خون لگ جائے، تو چاہیے کہ اسے کھرچے (چٹکیوں سے رگڑے)، پھر اس پر پانی ڈالے اور اس میں نماز پڑھ لے۔“ [سنن ابي داود/كتاب الطهارة/حدیث: 361]

عیسیٰ بن یونس اور حماد بن سلمہ دونوں نے مذکورہ بالا حدیث کے ہم معنی بیان کیا اور کہا: ”اسے اکھیڑو، پانی ڈال کر چٹکیوں سے رگڑو، پھر (مزید) پانی بہاؤ۔“ [سنن ابي داود/كتاب الطهارة/حدیث: 362]

سیدہ ام قیس بنت محصن رضی اللہ عنہا بیان کرتی ہیں کہ میں نے نبی کریم صلی اللہ علیہ وسلم سے خونِ حیض کے متعلق دریافت کیا جو کہ کپڑے کو لگ جاتا ہے، آپ صلی اللہ علیہ وسلم نے فرمایا: ”اسے کسی لکڑی سے اکھیڑو، پھر بیری کے پتے ملے پانی سے دھو ڈالو۔“ [سنن ابي داود/كتاب الطهارة/حدیث: 363]

ام المؤمنین سیدہ عائشہ رضی اللہ عنہا بیان فرماتی ہیں: ”ہم ازواجِ رسول صلی اللہ علیہ وسلم میں سے ہر ایک کے پاس ایک کرتا ہی ہوا کرتا تھا۔ اسی میں ایامِ حیض گزرتے، اسی میں جنابت ہوتی، پھر اگر اس میں خون کا قطرہ دیکھتی تو اسے لعاب لگا کر ملتی (اور اس کا ازالہ کر دیتی)۔“ [سنن ابي داود/كتاب الطهارة/حدیث: 364]

سیدنا ابوہریرہ رضی اللہ عنہ فرماتے ہیں کہ خولہ بنت یسار رضی اللہ عنہا نبی کریم صلی اللہ علیہ وسلم کے ہاں آئیں اور کہنے لگیں: ”اے اللہ کے رسول! میرے پاس صرف ایک ہی کپڑا ہے اور مجھے اس میں حیض آتا ہے، تو اسے کیسے کیا کروں؟“ آپ صلی اللہ علیہ وسلم نے فرمایا: ”جب تم پاک ہوا کرو تو اسے دھو لیا کرو اور اس میں نماز پڑھا کرو۔“ وہ کہنے لگیں: ”اگر اس سے خون (کا نشان) نہ نکلے تو؟“ آپ صلی اللہ علیہ وسلم نے فرمایا: ”تمہیں خون کا دھو ڈالنا کافی ہے، اس سے داغ اور نشان کا کوئی حرج نہیں۔“ [سنن ابي داود/كتاب الطهارة/حدیث: 365]

سیدنا معاویہ بن ابی سفیان رضی اللہ عنہ نے اپنی ہمشیرہ ام المؤمنین سیدہ ام حبیبہ رضی اللہ عنہا سے پوچھا کہ ”کیا رسول اللہ صلی اللہ علیہ وسلم اس کپڑے میں نماز پڑھ لیا کرتے تھے جس میں وہ صحبت کرتے تھے؟“ انہوں نے کہا: ”ہاں، اگر اس میں کوئی نجاست نہ ہوتی۔“ [سنن ابي داود/كتاب الطهارة/حدیث: 366]

ام المؤمنین سیدہ عائشہ رضی اللہ عنہا سے روایت ہے، وہ بیان کرتی ہیں کہ ”رسول اللہ صلی اللہ علیہ وسلم ہمارے کپڑوں یا لحافوں میں نماز نہ پڑھا کرتے تھے۔“ (یعنی بالعموم) عبیداللہ نے کہا: ” «شُعُرِنَا أَوْ فِي لُحُفِنَا» کے الفاظ میں میرے والد کو شک ہوا ہے۔“ [سنن ابي داود/كتاب الطهارة/حدیث: 367]

ام المؤمنین سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم ”ہمارے لحافوں میں نماز نہیں پڑھا کرتے تھے۔“ حماد رحمہ اللہ نے کہا: ”میں نے سعید بن ابی صدقہ رحمہ اللہ سے سنا، وہ کہتے تھے کہ میں نے محمد بن سیرین رحمہ اللہ سے اس حدیث کے بارے میں پوچھا تو انہوں نے مجھے یہ حدیث بیان نہیں کی اور کہا کہ میں نے اسے ایک مدت پہلے سنا تھا، معلوم نہیں کس سے سنا تھا، وہ ثقہ تھا یا نہیں۔ تم دیگر علماء سے اس کی تحقیق کر لو۔“ [سنن ابي داود/كتاب الطهارة/حدیث: 368]

ام المؤمنین سیدہ میمونہ رضی اللہ عنہا سے مروی ہے کہ ”نبی کریم صلی اللہ علیہ وسلم نے نماز پڑھی، آپ ایک کمبل اوڑھے ہوئے تھے جس کا کچھ حصہ آپ پر اور کچھ ان کی اہلیہ پر تھا اور وہ حیض سے تھیں، آپ صلی اللہ علیہ وسلم اس حالت میں نماز پڑھتے رہے کہ وہ آپ پر تھا۔“ [سنن ابي داود/كتاب الطهارة/حدیث: 369]

ام المؤمنین سیدہ عائشہ رضی اللہ عنہا بیان کرتی ہیں کہ ”رسول اللہ صلی اللہ علیہ وسلم رات کو نماز پڑھتے اور میں آپ کے پاس بازو (پہلو) میں ہوتی اور حیض سے ہوتی، مجھ پر جو چادر یا کمبل ہوتا اس کا کچھ حصہ آپ صلی اللہ علیہ وسلم بھی لیے ہوئے ہوتے تھے۔“ [سنن ابي داود/كتاب الطهارة/حدیث: 370]