ام المؤمنین سیدہ عائشہ رضی اللہ عنہا سے مروی ہے کہ نبی کریم صلی اللہ علیہ وسلم نے فرمایا: ”سورج اور چاند کسی کی موت یا ولادت کی وجہ سے نہیں گہناتے۔ جب تم یہ (کیفیت) دیکھو تو اللہ عزوجل سے دعا کیا کرو، اس کی تکبیر بیان کرو اور صدقہ دیا کرو۔“ [سنن ابي داود/كتاب صلاة الاستسقاء /حدیث: 1191]

سیدہ اسماء بنت ابی بکر صدیق رضی اللہ عنہا سے مروی ہے کہ نبی کریم صلی اللہ علیہ وسلم ”نمازِ کسوف کے موقع پر غلام آزاد کرنے کا حکم دیا کرتے تھے۔“ [سنن ابي داود/كتاب صلاة الاستسقاء /حدیث: 1192]

سیدنا نعمان بن بشیر رضی اللہ عنہ بیان کرتے ہیں کہ ”نبی کریم صلی اللہ علیہ وسلم کے دور میں سورج کو گرہن لگا تو آپ صلی اللہ علیہ وسلم دو دو رکعتیں پڑھنے لگے اور سورج کے متعلق بھی دریافت فرماتے جاتے تھے حتیٰ کہ وہ صاف ہو گیا۔“ [سنن ابي داود/كتاب صلاة الاستسقاء /حدیث: 1193]

سیدنا عبداللہ بن عمرو رضی اللہ عنہ کا بیان ہے کہ رسول اللہ صلی اللہ علیہ وسلم کے زمانے میں سورج گہن لگا تو رسول اللہ صلی اللہ علیہ وسلم نے قیام کیا، (اتنا لمبا قیام کیا کہ) لگتا تھا کہ آپ صلی اللہ علیہ وسلم رکوع نہیں کریں گے۔ پھر رکوع کیا، (اتنا لمبا رکوع کیا کہ) لگتا تھا کہ آپ صلی اللہ علیہ وسلم رکوع سے سر نہیں اٹھائیں گے، پھر سر اٹھایا، (اتنا لمبا قیام کیا کہ) لگتا تھا کہ آپ صلی اللہ علیہ وسلم سجدہ نہیں کریں گے، پھر سجدہ کیا، (اتنا لمبا سجدہ کیا کہ) لگتا تھا کہ آپ صلی اللہ علیہ وسلم سجدے سے سر نہیں اٹھائیں گے، پھر سر اٹھایا اور (اتنی دیر بیٹھے رہے کہ) لگتا تھا کہ آپ صلی اللہ علیہ وسلم سجدہ نہیں کریں گے، پھر سجدہ کیا (اتنا لمبا سجدہ کیا کہ) لگتا تھا کہ آپ صلی اللہ علیہ وسلم سر نہیں اٹھائیں گے، پھر سر اٹھایا اور دوسری رکعت میں بھی ایسے ہی کیا۔ اور آخری سجدے میں زور زور سے سانس لینے لگے اور «أُفٍّ أُفٍّ» ”اف، اف“ کی آواز نکالی اور کہا: ” «رَبِّ أَلَمْ تَعِدْنِي أَنْ لَا تُعَذِّبَهُمْ وَأَنَا فِيهِمْ؟ رَبِّ أَلَمْ تَعِدْنِي أَنْ لَا تُعَذِّبَهُمْ وَهُمْ يَسْتَغْفِرُونَ؟» ”اے میرے رب! کیا تو نے مجھ سے وعدہ نہیں کیا ہے کہ جب تک میں ان میں موجود ہوں ان کو عذاب نہیں دے گا ﴿وَمَا كَانَ اللَّهُ لِيُعَذِّبَهُمْ وَأَنْتَ فِيهِمْ﴾ [سورة الأنفال: 33] ، کیا تو نے مجھ سے وعدہ نہیں کیا ہے کہ جب تک یہ استغفار کرتے رہیں گے تو ان کو عذاب نہ دے گا ﴿وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ﴾ [سورة الأنفال: 33] ۔““ الغرض رسول اللہ صلی اللہ علیہ وسلم نماز سے فارغ ہوئے تو سورج صاف ہو چکا تھا، اور حدیث بیان کی۔ [سنن ابي داود/كتاب صلاة الاستسقاء /حدیث: 1194]

سیدنا عبدالرحمٰن بن سمرہ رضی اللہ عنہ کہتے ہیں کہ دورِ رسالت کی بات ہے، میں تیر اندازی کی مشق کر رہا تھا کہ سورج گرہن لگ گیا تو میں نے تیر پھینک دیے اور کہا: ”میں بالضرور دیکھوں گا کہ آج سورج گرہن والے دن رسول اللہ صلی اللہ علیہ وسلم کیا نیا کام کرتے ہیں“، چنانچہ میں آپ صلی اللہ علیہ وسلم کے پاس پہنچا اور دیکھا کہ آپ صلی اللہ علیہ وسلم اپنے ہاتھ اٹھائے تسبیح، تحمید اور تہلیل میں مشغول دعا کر رہے تھے حتیٰ کہ سورج صاف ہو گیا۔ اس موقع پر آپ صلی اللہ علیہ وسلم نے دو رکعتوں میں دو سورتیں پڑھیں۔ [سنن ابي داود/كتاب صلاة الاستسقاء /حدیث: 1195]

جناب عبیداللہ بن نضر سے روایت ہے کہ ان کے والد کا بیان ہے کہ سیدنا انس بن مالک رضی اللہ عنہ کی زندگی میں ایک روز (آندھی یا بادل کی وجہ سے) اندھیرا چھا گیا تو میں سیدنا انس بن مالک رضی اللہ عنہ کے پاس آیا اور کہا: ”اے ابوحمزہ! کیا رسول اللہ صلی اللہ علیہ وسلم کے زمانے میں بھی آپ لوگوں کو ایسی کیفیت سے دو چار ہونا پڑتا تھا؟“ انہوں نے کہا: ”اللہ کی پناہ! اگر ہوا بھی تند ہو جاتی تو ہم جلدی جلدی مسجد کا رخ کرتے تھے کہ کہیں قیامت نہ آ جائے۔“ [سنن ابي داود/كتاب صلاة الاستسقاء /حدیث: 1196]

جناب عکرمہ کہتے ہیں کہ سیدنا ابن عباس رضی اللہ عنہ کو خبر دی گئی کہ نبی کریم صلی اللہ علیہ وسلم کی ازواج میں سے فلاں فوت ہو گئی ہیں تو آپ رضی اللہ عنہ سجدے میں گر گئے۔ ان سے کہا گیا کہ کیا آپ اس موقع پر سجدہ کرتے ہیں؟ تو انہوں نے جواب دیا کہ رسول اللہ صلی اللہ علیہ وسلم نے فرمایا ہے: ”جب کوئی بڑا واقعہ یا حادثہ دیکھو تو سجدہ کیا کرو۔“ اور بھلا زوجہ نبی کریم صلی اللہ علیہ وسلم کی وفات سے بڑھ کر بھی کوئی حادثہ ہو گا؟ [سنن ابي داود/كتاب صلاة الاستسقاء /حدیث: 1197]