سیدہ عائشہ رضی اللہ عنہا بیان کرتی ہیں کہ وحی کے آغاز میں نبی اکرم صلی اللہ علیہ وسلم کو سچے خواب دکھائی دینے لگے، جو آپ نیند کی حالت میں دیکھتے تھے۔ آپ جو بھی خواب دیکھتے تھے، وہ صبح کے نمودار ہونے کی مانند پورا ہو جاتا تھا، پھر آپ کی طبیعت خلوت کی طرف مائل کر دی گئی۔ آپ غار حرا تشریف لے جاتے تھے اور وہاں «التَّحَنُّثُ» (تحنث) کرتے تھے۔ (راوی کہتے ہیں) یعنی آپ وہاں متعدد راتوں تک عبادت کرتے رہتے تھے۔ (سیدہ عائشہ رضی اللہ عنہا بیان کرتی ہیں:) نبی اکرم صلی اللہ علیہ وسلم اپنا زادراہ ساتھ لے جایا کرتے تھے، پھر واپس سیدہ خدیجہ رضی اللہ عنہا کے پاس آتے تھے۔ وہ اسی کی مانند مزید زادراہ تیار کر دیتی تھیں۔ یہاں تک کہ اچانک ایک دن حق آپ کے پاس آ گیا۔ آپ اس وقت غار حرا میں موجود تھے۔ وہاں فرشتہ آپ کے پاس آیا اور بولا: آپ پڑھیے! نبی اکرم صلی اللہ علیہ وسلم فرماتے ہیں: ”میں نہیں پڑھوں گا۔“ نبی اکرم صلی اللہ علیہ وسلم فرماتے ہیں: ”اس نے مجھے پکڑ لیا اور مجھے بھینچ لیا، یہاں تک کہ مجھے دقت کا سامنا کرنا پڑا۔ پھر اس نے مجھے چھوڑ دیا، پھر اس نے مجھ سے کہا: آپ پڑھیے! میں نے کہا: میں نہیں پڑھوں گا۔ اس نے پھر مجھے پکڑ لیا اور دوسری مرتبہ مجھے بھینچ لیا، یہاں تک کہ مجھے دقت کا سامنا کرنا پڑا، پھر اس نے مجھے چھوڑ دیا اور بولا: آپ پڑھیے! میں نے کہا: میں نہیں پڑھوں گا۔ پھر اس نے مجھے پکڑ لیا اور مجھے تیسری مرتبہ بھینچ لیا، یہاں تک کہ مجھے دقت کا سامنا کرنا پڑا۔ پھر اس نے مجھے چھوڑ دیا اور بولا: ﴿اقْرَأْ بِاسْمِ رَبِّكَ الَّذِي خَلَقَ﴾ [سورة العلق: 1] ۔“ یہ آیات یہاں تک ہیں: ﴿عَلَّمَ الْإِنْسَانَ مَا لَمْ يَعْلَمْ﴾ [سورة العلق: 5] ۔ نبی اکرم صلی اللہ علیہ وسلم (یا راوی کہتے ہیں) پھر نبی اکرم صلی اللہ علیہ وسلم سیدہ خدیجہ رضی اللہ عنہا کے پاس واپس تشریف لائے، تو آپ کے جسم پر کپکپی طاری تھی۔ آپ سیدہ خدیجہ رضی اللہ عنہا کے پاس تشریف لائے اور فرمایا: ”مجھے اوڑھنے کے لیے کچھ دو!“ انہوں نے آپ کو اوڑھنے کے لیے کوئی چیز دے دی۔ یہاں تک کہ جب آپ کی یہ کیفیت ختم ہو گئی، تو آپ نے ارشاد فرمایا: ”اے خدیجہ! میرے ساتھ کیا ہوا ہے؟“ پھر آپ نے انہیں پوری بات بتائی۔ آپ نے ارشاد فرمایا: ”مجھے اپنی ذات کے بارے میں اندیشہ ہے“، تو سیدہ خدیجہ رضی اللہ عنہا نے کہا: ہرگز نہیں۔ آپ کے لیے خوشخبری ہے، اللہ کی قسم! اللہ تعالیٰ آپ کو کبھی بھی رسوا نہیں کرے گا۔ بے شک آپ صلہ رحمی کرتے ہیں، سچ بولتے ہیں، بوجھ اٹھاتے ہیں، مہمان نوازی کرتے ہیں اور حق کے کاموں میں مدد کرتے ہیں۔ پھر سیدہ خدیجہ رضی اللہ عنہا نبی اکرم صلی اللہ علیہ وسلم کو ساتھ لے کر ورقہ بن نوفل کے پاس آئیں، جو ان کے چچا تھے، یہ صاحب زمانہ جاہلیت میں عیسائی ہو گئے تھے اور عربی میں تحریر کیا کرتے تھے۔ انہوں نے انجیل کا کچھ حصہ عربی میں نوٹ کیا ہوا تھا۔ یہ ایک بڑی عمر کے صاحب تھے، جو نابینا ہو چکے تھے۔ سیدہ خدیجہ رضی اللہ عنہا نے ان سے کہا: اے میرے چچا! آپ اپنے بھتیجے کی بات سنیے، ورقہ نے کہا: اے میرے بھتیجے! تم نے کیا دیکھا ہے؟ تو نبی اکرم صلی اللہ علیہ وسلم نے جو بات دیکھی تھی اس کے بارے میں انہیں بتایا، تو ورقہ نے کہا: یہ وہ «النَّامُوسُ» (ناموس) ہے، جو سیدنا موسیٰ علیہ السلام پر نازل ہوا تھا۔ اے کاش کہ میں اس وقت موجود ہوتا، یا اس وقت زندہ ہوتا جب آپ کی قوم آپ کو (مکہ سے) نکال دیتی۔ نبی اکرم صلی اللہ علیہ وسلم نے دریافت فرمایا: ”کیا وہ لوگ مجھے نکال دیں گے؟“ ورقہ نے جواب دیا: جی ہاں، آپ جو چیز لے کر آئے ہیں، اس طرح کی چیز جو بھی لے کر آیا، تو اس سے دشمنی کی گئی اور اسے اذیت پہنچائی گئی۔ اگر مجھے وہ دن دیکھنے کو ملا، تو میں آپ کی بھرپور مدد کروں گا۔ (راوی کہتے ہیں) اس کے کچھ عرصے کے بعد ورقہ کا انتقال ہو گیا۔ پھر وحی کے نزول کا سلسلہ منقطع ہو گیا۔ یہاں تک کہ نبی اکرم صلی اللہ علیہ وسلم غمگین ہو گئے۔ آپ کی یہ کیفیت اتنی شدید ہوئی کہ آپ کئی مرتبہ پہاڑ سے چھلانگ لگانے کے ارادے سے تشریف لے گئے۔ جب بھی آپ پہاڑ کی چوٹی سے خود کو نیچے گرانے کا ارادہ کرتے تو جبرائیل علیہ السلام آپ کے سامنے آ جاتے اور آپ سے یہ کہتے: اے محمد صلی اللہ علیہ وسلم ! آپ اللہ کے سچے رسول ہیں۔ اس وجہ سے آپ کی بے چینی کو سکون آ جاتا اور آپ کی جان کو قرار آ جاتا اور آپ واپس تشریف لے آتے، جب وحی کے انقطاع کا سلسلہ طویل ہو گیا، تو ایک مرتبہ آپ اس کی مانند تشریف لے گئے۔ جب آپ پہاڑ کی چوٹی پر پہنچے تو سیدنا جبرائیل علیہ السلام آپ کے سامنے آئے اور انہوں نے آپ کے سامنے اسی کی مانند بات کہی۔ [صحیح ابن حبان/كتاب الوحي/حدیث: 33]

یحییٰ بن ابوکثیر بیان کرتے ہیں: میں نے ابوسلمہ سے دریافت کیا کہ سب سے پہلے قرآن کا کون سا حصہ نازل ہوا تھا؟ انہوں نے جواب دیا: ﴿يَا أَيُّهَا الْمُدَّثِّرُ﴾ [سورة المدثر: 1] ۔ میں نے کہا: مجھے تو یہ پتا چلا ہے کہ سب سے پہلے قرآن میں سے یہ سورت نازل ہوئی تھی: ﴿اقْرَأْ بِاسْمِ رَبِّكَ الَّذِي خَلَقَ﴾ [سورة العلق: 1] ”اپنے پروردگار کے نام سے پڑھیے جس نے پیدا کیا ہے۔“ تو ابوسلمہ نے کہا: میں نے سیدنا جابر بن عبداللہ رضی اللہ عنہما سے دریافت کیا کہ سب سے پہلے قرآن کا کون سا حصہ نازل ہوا تھا؟ انہوں نے جواب دیا: ﴿يَا أَيُّهَا الْمُدَّثِّرُ﴾ [سورة المدثر: 1] ۔ میں نے ان سے کہا: مجھے تو یہ پتا چلا ہے کہ سب سے پہلے قرآن میں سے یہ آیت نازل ہوئی تھی: ﴿اقْرَأْ بِاسْمِ رَبِّكَ الَّذِي خَلَقَ﴾ [سورة العلق: 1] ”اپنے پروردگار کے نام سے پڑھیے جس نے پیدا کیا۔“ تو سیدنا جابر رضی اللہ عنہما نے فرمایا: میں تمہیں وہی بات بتاؤں گا جو نبی اکرم صلی اللہ علیہ وسلم نے ہمیں بتائی تھی، آپ صلی اللہ علیہ وسلم نے ارشاد فرمایا: ”میں نے غارِ حرا میں اعتکاف کیا ہوا تھا، جب میرا یہ اعتکاف مکمل ہوا تو میں نیچے اترا اور وادی کے نشیبی حصے میں آ گیا، تو مجھے پکارا گیا، میں نے اپنے سامنے، اپنے پیچھے، اپنے دائیں طرف اور بائیں طرف دیکھا لیکن مجھے کوئی چیز نظر نہیں آئی، پھر مجھے پکارا گیا، میں نے اپنے اوپر دیکھا تو میرے سامنے فرشتہ آسمان اور زمین کے درمیان ایک تخت پر بیٹھا ہوا تھا، تو میں اس سے گھبرا گیا اور میں خدیجہ (رضی اللہ عنہا) کے پاس آ گیا۔ میں نے کہا: مجھے چادر اوڑھا دو، مجھے چادر اوڑھا دو اور مجھ پر ٹھنڈا پانی بہاؤ۔ پھر مجھ پر یہ آیات نازل ہوئیں: ﴿يَا أَيُّهَا الْمُدَّثِّرُ * قُمْ فَأَنذِرْ * وَرَبَّكَ فَكَبِّرْ﴾ [سورة المدثر: 1-3] ”اے چادر اوڑھنے والے! آپ کھڑے ہو جائیے اور ڈرایئے اور اپنے پروردگار کی کبریائی بیان کیجیے۔“”(امام ابن حبان رحمہ اللہ فرماتے ہیں:) سیدنا جابر رضی اللہ عنہما سے منقول اس روایت میں یہ مذکور ہے کہ قرآن میں سب سے پہلے ﴿يَا أَيُّهَا الْمُدَّثِّرُ﴾ [سورة المدثر: 1] نازل ہوئی، جبکہ سیدہ عائشہ رضی اللہ عنہا سے منقول روایت میں یہ مذکور ہے کہ ﴿اقْرَأْ بِاسْمِ رَبِّكَ﴾ [سورة العلق: 1] سب سے پہلے نازل ہوئی۔ ان دونوں روایات میں تضاد نہیں ہے کیونکہ اللہ تعالیٰ نے اپنے رسول صلی اللہ علیہ وسلم پر ﴿اقْرَأْ بِاسْمِ رَبِّكَ﴾ [سورة العلق: 1] اس وقت نازل فرمائی جب آپ صلی اللہ علیہ وسلم غارِ حرا میں تھے، پھر آپ صلی اللہ علیہ وسلم واپس گھر تشریف لے آئے اور سیدہ خدیجہ رضی اللہ عنہا نے آپ صلی اللہ علیہ وسلم کو چادر اوڑھنے کے لیے دی اور آپ صلی اللہ علیہ وسلم پر ٹھنڈا پانی ڈالا، تو سیدہ خدیجہ رضی اللہ عنہا کے گھر میں آپ صلی اللہ علیہ وسلم پر ﴿يَا أَيُّهَا الْمُدَّثِّرُ﴾ [سورة المدثر: 1] نازل ہو گئی، تو ان دو روایات کے درمیان کوئی اختلاف یا تضاد نہیں ہے۔ [صحیح ابن حبان/كتاب الوحي/حدیث: 34]

یحییٰ بن ابوکثیر بیان کرتے ہیں: میں نے ابوسلمہ سے دریافت کیا کہ قرآن کا کون سا حصہ پہلے نازل ہوا تھا؟ انہوں نے جواب دیا: «يَا أَيُّهَا الْمُدَّثِّرُ» ۔ میں نے کہا: (یہ پہلے نازل ہوا تھا) یا «اقْرَأْ» (پہلے نازل ہوا تھا)؟ تو ابوسلمہ نے کہا: میں نے سیدنا جابر بن عبداللہ رضی اللہ عنہ سے اس بارے میں دریافت کیا تو انہوں نے فرمایا: «يَا أَيُّهَا الْمُدَّثِّرُ» پہلے نازل ہوئی تھی، تو میں نے کہا: (یہ پہلے نازل ہوئی تھی) یا «اقْرَأْ» (پہلے نازل ہوئی تھی)؟ تو انہوں نے کہا: میں تم لوگوں کو وہ بات بیان کروں گا جو نبی اکرم صلی اللہ علیہ وسلم نے ہمیں بیان کی تھی۔ آپ صلی اللہ علیہ وسلم نے ارشاد فرمایا تھا: ”میں نے غارِ حرا میں ایک مہینے تک اعتکاف کیا، جب میں نے اپنا یہ اعتکاف مکمل کر لیا تو میں پہاڑ سے نیچے آیا۔ میں وادی کے نشیبی حصے میں پہنچا تو مجھے آواز دے کر پکارا گیا۔ میں نے اپنے سامنے، اپنے پیچھے، اپنے دائیں طرف اور اپنے بائیں طرف دیکھا لیکن مجھے کوئی نظر نہیں آیا، پھر مجھے پکارا گیا۔ میں نے آسمان کی طرف دیکھا تو وہ (ایک فرشتہ) خلا میں ایک تخت پر تھا۔ اس کی وجہ سے مجھ پر شدید گھبراہٹ طاری ہو گئی۔ میں سیدہ خدیجہ رضی اللہ عنہا کے پاس آیا اور میری ہدایت پر انہوں نے مجھے اوڑھنے کے لیے چادر دی اور پھر مجھ پر پانی بہایا، تو اللہ تعالیٰ نے مجھ پر یہ آیات نازل فرمائیں: ﴿يَا أَيُّهَا الْمُدَّثِّرُ ٭ قُمْ فَأَنذِرْ ٭ وَرَبَّكَ فَكَبِّرْ ٭ وَثِيَابَكَ فَطَهِّرْ﴾ [سورة المدثر: 1 - 4] ”اے چادر اوڑھنے والے! تم اٹھو اور ڈراؤ اور اپنے پروردگار کی کبریائی بیان کرو اور اپنے کپڑوں کو پاک رکھو۔““ [صحیح ابن حبان/كتاب الوحي/حدیث: 35]

سیدنا ابوہریرہ رضی اللہ عنہ بیان کرتے ہیں کہ انہیں نبی اکرم صلی اللہ علیہ وسلم کے اس فرمان کا علم ہوا ہے: ”جب اللہ تعالیٰ آسمان میں کسی معاملے کے بارے میں فیصلہ صادر فرماتا ہے، تو فرشتے اس کے فرمان کے سامنے عاجزی سے سر جھکاتے ہوئے اپنے پر یوں مارتے ہیں، جس طرح ہموار پتھر پر زنجیر ماری جاتی ہے۔ یہاں تک کہ جب ان کے دلوں سے گھبراہٹ دور ہوتی ہے تو وہ دریافت کرتے ہیں: تمہارے پروردگار نے کیا ارشاد فرمایا ہے؟ تو وہ کہتے ہیں: ﴿الْحَقَّ ۖ وَهُوَ الْعَلِيُّ الْكَبِيرُ﴾ [سورة سبإ: 23] ”اس نے حق ارشاد فرمایا ہے، اور وہ بلند و برتر اور سب سے بڑا ہے“۔“ نبی اکرم صلی اللہ علیہ وسلم فرماتے ہیں: ”پھر چوری چھپے سننے والا کوئی (جن) اس بات کو سن لیتا ہے، تو بعض اوقات اس (جن) کے اسے نیچے پہنچانے سے پہلے ہی شہابِ ثاقب اس تک پہنچ جاتا ہے، اور بعض اوقات شہابِ ثاقب اس تک نہیں پہنچ پاتا، یہاں تک کہ وہ اپنے سے نیچے والے کو وہ بات بتا دیتا ہے۔“ نبی اکرم صلی اللہ علیہ وسلم (یا شاید راوی) فرماتے ہیں: ”وہ لوگ اس طرح ایک دوسرے کے اوپر تلے ہوتے ہیں۔“ سفیان نامی راوی نے اپنے ہاتھ کے ساتھ یہ کر کے دکھایا کہ وہ اس طرح ایک دوسرے کو یہ بات بتاتے ہیں، یہاں تک کہ وہ بات زمین تک پہنچ جاتی ہے اور کاہن یا جادوگر کے منہ میں ڈال دی جاتی ہے۔ وہ (شیطان) اس کے ساتھ ایک سو جھوٹ ملا دیتا ہے، تو کبھی ایسا ہوتا ہے کہ (اصل بات) کی تصدیق کر دی جاتی ہے (یا وہ سچ ثابت ہوتی ہے)، تو یہ کہا جاتا ہے: کیا فلاں دن اس نے یہ بات نہیں کہی تھی؟ تو اس نے سچ کہا تھا۔ [صحیح ابن حبان/كتاب الوحي/حدیث: 36]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب اللہ تعالیٰ کسی وحی کے بارے میں کلام فرماتا ہے تو آسمان پر رہنے والے اس بات کو یوں سنتے ہیں جس طرح گھنٹی کی آواز ہوتی ہے، جیسے کسی زنجیر کو پتھر پر مارا جاتا ہے، پھر وہ بے ہوش ہو جاتے ہیں اور ان کی یہی کیفیت رہتی ہے یہاں تک کہ سیدنا جبرائیل علیہ السلام ان کے پاس آتے ہیں، جب وہ ان کے پاس آتے ہیں تو ان کے دلوں سے گھبراہٹ دور کر دی جاتی ہے، تو وہ کہتے ہیں: اے جبرائیل! تمہارے رب نے کیا ارشاد فرمایا ہے؟ تو وہ کہتے ہیں: «الْحَقَّ» ”حق فرمایا ہے“، تو وہ فرشتے بھی یہی کہتے ہیں: «الْحَقَّ» ”حق فرمایا ہے، حق فرمایا ہے“۔“ [صحیح ابن حبان/كتاب الوحي/حدیث: 37]

سیدہ عائشہ صدیقہ رضی اللہ عنہا بیان کرتی ہیں کہ حارث بن ہشام رضی اللہ عنہ نے نبی اکرم صلی اللہ علیہ وسلم سے سوال کیا، انہوں نے عرض کی: یا رسول اللہ! آپ پر وحی کیسے آتی ہے؟ نبی اکرم صلی اللہ علیہ وسلم نے ارشاد فرمایا: ”بعض اوقات وہ میرے پاس گھنٹی کی آواز میں آتی ہے، اور یہ میرے لیے سب سے زیادہ شدید ہوتی ہے۔ جب میری یہ کیفیت ختم ہوتی ہے، تو فرشتے نے جو کہا ہوتا ہے، میں اسے محفوظ کر لیتا ہوں۔ اور بعض اوقات فرشتہ میرے سامنے آدمی کی شکل میں آتا ہے، اور میرے ساتھ بات چیت کرتا ہے، تو اس کی کہی ہوئی بات کو میں محفوظ کر لیتا ہوں“۔ سیدہ عائشہ رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کو دیکھا ہے، ایک مرتبہ شدید سردی کے دن آپ پر وحی نازل ہوئی، جب آپ کی یہ کیفیت ختم ہوئی، تو آپ کی مبارک پیشانی سے پسینہ پھوٹ رہا تھا۔ [صحیح ابن حبان/كتاب الوحي/حدیث: 38]

سیدنا عبداللہ بن عباس رضی اللہ عنہما اللہ تعالیٰ کے اس فرمان ﴿لَا تُحَرِّكْ بِهِ لِسَانَكَ لِتَعْجَلَ بِهِ﴾ [سورة القيامة: 16] کے بارے میں بیان کرتے ہیں کہ ارشاد باری تعالیٰ ہے: ”تم اس کے لئے اپنی زبان کو حرکت نہ دو، تاکہ تم اسے جلدی حاصل کر لو۔“ سیدنا ابن عباس رضی اللہ عنہما بیان کرتے ہیں: نبی اکرم صلی اللہ علیہ وسلم وحی کے نزول کے وقت شدت کا سامنا کرتے تھے اور اپنے ہونٹوں کو حرکت دیا کرتے تھے۔ سیدنا عبداللہ بن عباس رضی اللہ عنہما کہتے ہیں: میں ان ہونٹوں کو حرکت دے کر دکھاتا ہوں جس طرح نبی اکرم صلی اللہ علیہ وسلم حرکت دیتے تھے، تو اللہ تعالیٰ نے اس بارے میں یہ آیت نازل کی: ﴿لَا تُحَرِّكْ بِهِ لِسَانَكَ لِتَعْجَلَ بِهِ * إِنَّ عَلَيْنَا جَمْعَهُ وَقُرْآنَهُ﴾ [سورة القيامة: 16-17] ”تم اس کے لئے اپنی زبان کو حرکت نہ دو، تاکہ تم اس کو جلدی حاصل کر لو، بے شک اس کا جمع کرنا اور اس کی تلاوت ہمارے ذمے ہے۔“ سیدنا ابن عباس رضی اللہ عنہما کہتے ہیں: اس کے جمع کرنے سے مراد ”تمہارے سینے میں اسے جمع کرنا ہے“، پھر تم اس آیت کو تلاوت کرو: ﴿فَإِذَا قَرَأْنَاهُ فَاتَّبِعْ قُرْآنَهُ﴾ [سورة القيامة: 18] ”ہم اسے پڑھتے ہیں: تم اس پڑھے ہوئے کی پیروی کرو۔“ سیدنا ابن عباس رضی اللہ عنہما فرماتے ہیں یعنی ”تم اسے غور سے سنو اور خاموش رہو۔“ ﴿ثُمَّ إِنَّ عَلَيْنَا بَيَانَهُ﴾ [سورة القيامة: 19] ”پھر اس کا بیان ہمارے ذمے ہے۔“ اس سے مراد یہ ہے، پھر تمہارا تلاوت کرنا ہمارے ذمے ہے۔ سیدنا ابن عباس رضی اللہ عنہما بیان کرتے ہیں: پھر جب جبرائیل علیہ السلام نبی اکرم صلی اللہ علیہ وسلم کی خدمت میں حاضر ہوتے تھے، تو نبی اکرم صلی اللہ علیہ وسلم اسے غور سے سنتے تھے، جب جبرائیل علیہ السلام چلے جاتے تھے، تو نبی اکرم صلی اللہ علیہ وسلم اس آیت کو اسی طرح تلاوت کر لیتے تھے، جس طرح سیدنا جبرائیل علیہ السلام نے آپ کے سامنے اسے پڑھا ہوتا تھا۔ [صحیح ابن حبان/كتاب الوحي/حدیث: 39]

سیدنا براء رضی اللہ عنہ بیان کرتے ہیں: جب یہ آیت ﴿لَا يَسْتَوِي الْقَاعِدُونَ مِنَ الْمُؤْمِنِينَ﴾ [سورة النساء: 95] ”اہلِ ایمان میں سے بیٹھے رہنے والے لوگ برابر نہیں ہیں۔“ نازل ہوئی تو نبی اکرم صلی اللہ علیہ وسلم نے ارشاد فرمایا: ”میرے پاس زید کو بلا کر لاؤ۔“ وہ اپنے ساتھ لوح اور دوات (راوی کو شک ہے شاید یہ الفاظ ہیں) شانے کی ہڈی اور دوات لے کر آئے، پھر آپ صلی اللہ علیہ وسلم نے ارشاد فرمایا: ”تم یہ لکھو: ﴿لَا يَسْتَوِي الْقَاعِدُونَ مِنَ الْمُؤْمِنِينَ وَالْمُجَاهِدُونَ فِي سَبِيلِ اللَّهِ﴾ [سورة النساء: 95] ”اہلِ ایمان میں سے بیٹھے رہ جانے والے لوگ اور اللہ کی راہ میں جہاد کرنے والے لوگ برابر نہیں ہیں۔““ راوی بیان کرتے ہیں: اس وقت نبی اکرم صلی اللہ علیہ وسلم کے پیچھے سیدنا عمرو بن ام مکتوم رضی اللہ عنہ جو نابینا ہیں، وہ موجود تھے، انہوں نے عرض کی: یا رسول اللہ! مجھے آپ کیا حکم دیتے ہیں؟ کیونکہ میں تو نابینا شخص ہوں۔ سیدنا براء رضی اللہ عنہ بیان کرتے ہیں، تو اسی جگہ آیت کے یہ الفاظ ﴿غَيْرُ أُولِي الضَّرَرِ﴾ [سورة النساء: 95] ”جنہیں کوئی ضرر لاحق نہ ہو“ نازل ہوئے۔ [صحیح ابن حبان/كتاب الوحي/حدیث: 40]

سیدنا براء بن عازب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”میرے پاس کندھے کی ہڈی یا لوح لے کر آؤ۔“ پھر آپ صلی اللہ علیہ وسلم نے یہ آیت املا کروائی: ﴿لَا يَسْتَوِي الْقَاعِدُونَ مِنَ الْمُؤْمِنِينَ﴾ [سورة النساء: 95] ”اہل ایمان میں سے بیٹھے رہ جانے والے لوگ برابر نہیں ہیں۔“ تو نبی اکرم صلی اللہ علیہ وسلم نے سیدنا زید رضی اللہ عنہ کو بلایا، وہ شانے کی ہڈی لے کر آئے، انہوں نے اس پر یہ آیت تحریر کی، جب سیدنا ابن مکتوم رضی اللہ عنہ نے اپنی معذوری کی شکایت کی تو یہ الفاظ نازل ہوئے: ﴿غَيْرُ أُولِي الضَّرَرِ﴾ [سورة النساء: 95] ”جنہیں کوئی ضرر نہ ہو۔“ «ذِكْرُ الْخَبَرِ الْمُدْحِضِ قَوْلَ مَنْ زَعَمَ أَنَّ أَبَا إِسْحَاقَ السَّبِيعِيَّ لَمْ يَسْمَعْ هَذَا الْخَبَرَ مِنَ الْبَرَاءِ» ”اس روایت کا تذکرہ جو اس شخص کے موقف کو غلط ثابت کرتی ہے جو اس بات کا قائل ہے کہ ابواسحاق سبیعی رحمہ اللہ نے یہ روایت سیدنا براء بن عازب رضی اللہ عنہ سے نہیں سنی ہے۔“ [صحیح ابن حبان/كتاب الوحي/حدیث: 41]

سیدنا براء رضی اللہ عنہ بیان کرتے ہیں کہ جب یہ آیت ﴿لَا يَسْتَوِي الْقَاعِدُونَ مِنَ الْمُؤْمِنِينَ﴾ [سورة النساء: 95] ”اہل ایمان میں سے بیٹھے ہوئے لوگ برابر نہیں ہیں“ نازل ہوئی تو نبی اکرم صلی اللہ علیہ وسلم نے سیدنا زید رضی اللہ عنہ کو بلوایا، وہ کندھے (کی ہڈی) لے کر آئے اور انہوں نے اس پر یہ آیت تحریر کر دی، پھر سیدنا ابن ام مکتوم رضی اللہ عنہ نے اپنے نابینا ہونے کی شکایت کی تو یہ آیت ﴿غَيْرُ أُولِي الضَّرَرِ﴾ [سورة النساء: 95] ”جنہیں کوئی ضرر لاحق نہ ہو“ نازل ہوئی۔ [صحیح ابن حبان/كتاب الوحي/حدیث: 42]