یحیی بن ابوکثیر بیان کرتے ہیں: میں نے ابوسلمہ سے دریافت کیا: سب سے پہلے قرآن کا کون سا حصہ نازل ہوا تھا؟
انہوں نے جواب دیا: ” «یا ایھا المدثر» “ میں نے کہا: مجھے، تو پتہ چلا ہے، سب سے پہلے قرآن میں سے یہ سورت نازل ہوئی تھی:
”تم اپنے پروردگار کے نام سے برکت حاصل کرتے ہوئے پڑھو، جس نے پیدا کیا ہے۔“
تو ابوسلمہ نے کہا: میں نے سیدنا جابر بن عبداللہ رضی اللہ عنہ سے دریافت کیا: سب سے پہلے قرآن کا کون سا حصہ نازل ہوا تھا؟ انہوں نے جواب دیا ” «یا یھا المدثر» “”
میں نے ان سے کہا: مجھے تو یہ پتہ چلا ہے، سب سے پہلے قرآن میں سے یہ آیت نازل ہوئی تھی: تم اپنے پروردگار کے نام سے برکت حاصل کرتے ہوئے، یہ پڑھو۔“ تو سیدنا جابر رضی اللہ عنہ نے فرمایا: میں تمہیں وہی بات بتاؤں گا، جو نبی اکرم صلی اللہ علیہ وسلم نے ہمیں بتائی تھی، آپ صلی اللہ علیہ وسلم نے ارشاد فرمایا تھا: ”میں نے غار حرا میں اعتکاف کیا ہوا تھا، جب میرا یہ اعتکاف مکمل ہوا، تو میں نماز سے نیچے اترا، اور وادی کے نشیبی حصے میں آ گیا، تو مجھے پکار کر بلایا گیا، میں نے اپنے سامنے اپنے پیچھے، اپنے دائیں طرف اور بائیں طرف دیکھا، لیکن مجھے
کوئی چیز نظر نہیں آئی۔“
پھر مجھے پکارا گیا، میں نے اپنے اوپر دیکھا، تو میرے سامنے فرشتہ آسمان اور زمین کے درمیان ایک تخت پر بیٹھا ہوا تھا، تو میں اس سے گھبرا گیا اور میں خدیجہ کے پاس آ گیا۔ میں نے کہا: تم مجھے اوڑھنے کے لئے کچھ دو، تم مجھے اوڑھنے کے لئے کچھ دو، تم مجھ پر ٹھنڈا پانی بہاؤ۔
پھر مجھ پر یہ آیت نازل ہوئی:
”اے چادر اوڑھنے والے! تم اٹھو اور ڈراؤ اور اپنے پروردگار کی کبریائی بیان کروں۔“
(امام ابن حبان رحمہ اللہ فرماتے ہیں:) سیدنا جابر رضی اللہ عنہ سے منقول اس روایت میں یہ مذکور ہے کہ قرآن میں سب سے پہلے «يا ايها المدثر» نازل ہوئی جبکہ سیدہ عائشہ رضی اللہ عنہا سے منقول روایت میں یہ مذکور ہے۔ «اقرا باسم ربك» ۔ سب سے پہلے نازل ہوئی۔ ان دونوں روایات میں تضاد نہیں ہے کیونکہاللہ تعالیٰ نے اپنے رسول پر «اقرأ باسم ربك» اس وقت نازل کی جب آپ غار حرا میں تھے۔ پھر آپ واپس گھر تشریف لے آئے اور سیدہ خدیجہ رضی اللہ عنہا نے آپ کو چادر اوڑھنے کے لئے دی اور آپ پر ٹھنڈا پانی ڈالا، تو سیدہ خدیجہ رضی اللہ عنہا کے گھر میں آپ صلی اللہ علیہ وسلم پر «یا ایھا المدثر» نازل ہو گئی، تو ان دو روایات کے درمیان کوئی اختلاف یا تضاد نہیں ہے۔ [صحیح ابن حبان/كتاب الوحي/حدیث: 34]