سیدنا جابر بن عبداللہ رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جب قریش نے مجھے جھٹلایا تو میں حطیم میں کھڑا ہو گیا، اللہ تعالیٰ نے میرے سامنے بیت المقدس کو ظاہر کر دیا، تو میں ان لوگوں کو اس کی نشانیاں اسے دیکھ دیکھ کر بیان کرنے لگا۔“ [صحیح ابن حبان/كتاب الإسراء/حدیث: 55]

سیدنا عبداللہ بن عباس رضی اللہ عنہما اللہ تعالیٰ کے اس فرمان ﴿وَمَا جَعَلْنَا الرُّؤْيَا الَّتِي أَرَيْنَاكَ إِلَّا فِتْنَةً لِلنَّاسِ﴾ [سورة الإسراء: 60] کے بارے میں بیان کرتے ہیں (ارشاد باری تعالیٰ ہے): ”ہم نے جو خواب تمہیں دکھائے ہیں، ہم نے انہیں لوگوں کے لیے آزمائش بنایا ہے۔“ سیدنا ابن عباس رضی اللہ عنہما کہتے ہیں: یہ وہ خواب ہیں، جو نبی اکرم صلی اللہ علیہ وسلم کو اس رات دکھائے گئے، جب آپ کو معراج کروائی گئی تھی۔ [صحیح ابن حبان/كتاب الإسراء/حدیث: 56]

سیدنا ابن عباس رضی اللہ عنہما بیان کرتے ہیں: سیدنا محمد صلی اللہ علیہ وسلم نے اپنے پروردگار کو دیکھا ہے۔ (امام ابن حبان رحمہ اللہ فرماتے ہیں:) سیدنا عبداللہ بن عباس رضی اللہ عنہما کے یہ الفاظ: ”سیدنا محمد صلی اللہ علیہ وسلم نے اپنے پروردگار کو دیکھا ہے“ اس سے مراد یہ ہے کہ نبی اکرم صلی اللہ علیہ وسلم نے اپنے قلب کے ذریعے پروردگار کو ایسے مقام پر دیکھا جہاں تک کسی بشر کی رسائی نہیں ہو سکتی، کیونکہ وہ مقام و مرتبہ بہت بلند ہے۔ [صحیح ابن حبان/كتاب الإسراء/حدیث: 57]

عبداللہ بن شقیق عقیلی بیان کرتے ہیں: میں نے سیدنا ابوذر غفاری رضی اللہ عنہ سے کہا: اگر میں نبی اکرم صلی اللہ علیہ وسلم کی زیارت کرتا تو آپ سے ہر چیز کے بارے میں دریافت کرتا، تو انہوں نے دریافت کیا: تم نے نبی اکرم صلی اللہ علیہ وسلم سے کسی چیز کے بارے میں دریافت کرنا تھا؟ تو عبداللہ نے کہا: میں نے نبی اکرم صلی اللہ علیہ وسلم سے یہ دریافت کرنا تھا کہ کیا آپ نے اپنے پروردگار کو دیکھا ہے؟ تو سیدنا ابوذر غفاری رضی اللہ عنہ نے فرمایا: میں نے نبی اکرم صلی اللہ علیہ وسلم سے یہ سوال کیا تھا۔ نبی اکرم صلی اللہ علیہ وسلم نے فرمایا تھا: ”میں نے ایک نور کو دیکھا ہے“۔ (امام ابن حبان رحمہ اللہ فرماتے ہیں:) اس سے مراد یہ ہے کہ آپ نے اپنے پروردگار کو نہیں دیکھا بلکہ آپ نے وہ انوار جو مخلوق ہیں، ان میں سے ”علوی نور“ (یعنی جو مخلوقات سے بلند تر انوار ہیں) اسے دیکھا۔ [صحیح ابن حبان/كتاب الإسراء/حدیث: 58]

سیدنا عبداللہ بن مسعود رضی اللہ عنہ اللہ تعالیٰ کے اس فرمان (ارشاد باری تعالیٰ ہے): ﴿مَا كَذَبَ الْفُؤَادُ مَا رَأَىٰ﴾ [سورة النجم: 11] ”اس نے جو دیکھا، اس کے دل نے اسے جھٹلایا نہیں۔“ کے بارے میں بیان کرتے ہیں، سیدنا عبداللہ بن مسعود رضی اللہ عنہ فرماتے ہیں: نبی اکرم صلی اللہ علیہ وسلم نے سیدنا جبرائیل علیہ السلام کو یاقوت سے بنے ہوئے حلے میں دیکھا تھا، اس وقت سیدنا جبرائیل علیہ السلام نے آسمان اور زمین کی درمیانی جگہ کو بھر دیا تھا۔ امام ابن حبان رحمہ اللہ فرماتے ہیں: معراج کی رات اللہ تعالیٰ نے سیدنا جبرائیل علیہ السلام کو یہ حکم دیا کہ وہ سیدنا محمد صلی اللہ علیہ وسلم کو ان چیزوں کے بارے میں بتائیں جن کا جاننا آپ کے لئے ضروری ہے، جیسا کہ ارشاد باری تعالیٰ ہے: ﴿عَلَّمَهُ شَدِيدُ الْقُوَىٰ * ذُو مِرَّةٍ فَاسْتَوَىٰ * وَهُوَ بِالْأُفُقِ الْأَعْلَىٰ﴾ [سورة النجم: 5-7] ”شدید قوت والے نے اُسے تعلیم دی، جو زبردست ہے، پھر اس نے استواء کیا اور وہ (اس وقت) افق اعلیٰ میں تھا۔“ اس سے مراد سیدنا جبرائیل علیہ السلام ہیں۔ (ارشاد باری تعالیٰ ہے): ﴿ثُمَّ دَنَا فَتَدَلَّىٰ﴾ [سورة النجم: 8] ”پھر وہ قریب ہوا اور زیادہ قریب ہوا۔“ اس سے مراد سیدنا جبرائیل علیہ السلام ہیں۔ (ارشاد باری تعالیٰ ہے): ﴿فَكَانَ قَابَ قَوْسَيْنِ أَوْ أَدْنَىٰ﴾ [سورة النجم: 9] ”تو وہ دو کمانوں کے کناروں کی مانند یا اس سے بھی زیادہ قریب ہو گیا۔“ اس سے مراد سیدنا جبرائیل علیہ السلام ہیں۔ (ارشاد باری تعالیٰ ہے): ﴿فَأَوْحَىٰ إِلَىٰ عَبْدِهِ مَا أَوْحَىٰ﴾ [سورة النجم: 10] ”تو اس نے اپنے بندے کی طرف وہ چیز وحی کی جو اس نے وحی کی۔“ اس سے مراد سیدنا جبرائیل علیہ السلام ہیں۔ (ارشاد باری تعالیٰ ہے): ﴿مَا كَذَبَ الْفُؤَادُ مَا رَأَىٰ﴾ [سورة النجم: 11] ”اُس نے جو دیکھا (اس کے) دل نے جھٹلایا نہیں۔“ اس سے مراد یہ ہے کہ انہوں نے اس معزز مقام پر اپنے قلب کے ذریعے اپنے پروردگار کو دیکھا اور سیدنا جبرائیل علیہ السلام کو یاقوت سے بنے ہوئے حلے میں دیکھا، انہوں نے اس وقت آسمان اور زمین کے درمیان موجود خلاء کو بھر دیا تھا، جیسا کہ سیدنا عبداللہ بن مسعود رضی اللہ عنہ سے منقول اس روایت میں یہ بات مذکور ہے، جسے ہم ذکر کر چکے ہیں۔ [صحیح ابن حبان/كتاب الإسراء/حدیث: 59]

مسروق رحمہ اللہ بیان کرتے ہیں کہ انہوں نے سیدہ عائشہ رضی اللہ عنہا کو یہ فرماتے ہوئے سنا: وہ شخص اللہ تعالیٰ کی طرف سب سے بڑی جھوٹی بات منسوب کرتا ہے جو یہ کہتا ہے کہ سیدنا محمد صلی اللہ علیہ وسلم نے اپنے پروردگار کو دیکھا ہے، یا جو یہ کہتا ہے کہ سیدنا محمد صلی اللہ علیہ وسلم نے وحی میں سے کوئی چیز چھپائی تھی (آپ صلی اللہ علیہ وسلم نے ساری باتیں بیان نہیں کی ہیں)، یا جو شخص کہتا ہے کہ سیدنا محمد صلی اللہ علیہ وسلم یہ جانتے تھے کہ کل کیا ہو گا؟ ان سے دریافت کیا گیا: اے ام المؤمنین! پھر نبی اکرم صلی اللہ علیہ وسلم نے کسے دیکھا تھا؟ تو سیدہ عائشہ رضی اللہ عنہا نے فرمایا: وہ سیدنا جبرائیل علیہ السلام تھے، جنہیں نبی اکرم صلی اللہ علیہ وسلم نے ان کی اصل صورت میں دو مرتبہ دیکھا ہے۔ ایک مرتبہ اس وقت جب انہوں نے افق کو بھر دیا تھا، اور ایک مرتبہ اس وقت جب انہوں نے آسمان کے افق کو گھیرا ہوا تھا۔ امام ابو حاتم رحمہ اللہ فرماتے ہیں: جو شخص علم حدیث میں مہارت نہیں رکھتا وہ اس غلط فہمی کا شکار ہوتا ہے کہ یہ دو روایات باہم متضاد ہیں حالانکہ ایسا نہیں ہے، کیونکہ اللہ تعالیٰ نے اپنے رسول کو دیگر تمام انبیاء پر فضیلت عطا کی ہے۔ یہاں تک کہ سیدنا جبرائیل علیہ السلام اپنے پروردگار کے اتنا قریب ہو گئے جتنا دو کمانوں کا فاصلہ ہوتا ہے اور اس وقت سیدنا جبرائیل علیہ السلام نے نبی اکرم صلی اللہ علیہ وسلم کو تعلیم دی، اس وقت نبی اکرم صلی اللہ علیہ وسلم نے انہیں (یا شاید اللہ تعالیٰ کو) دل کی آنکھ سے دیکھ لیا جیسے اس نے چاہا۔ سیدہ عائشہ رضی اللہ عنہا سے منقول اس روایت کہ نبی اکرم صلی اللہ علیہ وسلم اس کا ادراک نہیں کر سکتے، کا مفہوم یہ ہے کہ آپ صلی اللہ علیہ وسلم نیند کے عالم میں اور بیداری کے عالم میں ایسا نہیں کر سکتے۔ اللہ تعالیٰ کا یہ فرمان ﴿لَا تُدْرِكُهُ الْأَبْصَارُ﴾ [سورة الأنعام: 103] ”بصارت اس کا ادراک نہیں کر سکتی“ سے مراد یہ ہے کہ بصارت اس کا ادراک نہیں کر سکتی، اس کا دیدار قیامت کے دن ہو گا لیکن بصارت جب اس کا دیدار کرے گی تو اس کا ادراک نہیں کر سکے گی، کیونکہ ادراک کا مطلب احاطہ کرنا ہے اور دیدار کا مطلب دیکھنا ہے اور اللہ تعالیٰ کا دیدار ہو سکتا ہے لیکن اس کی حقیقت کا ادراک نہیں ہو سکتا، کیونکہ ادراک مخلوق کا ہو سکتا ہے اور بندے کی طرف سے پروردگار کو دیکھنا (ممکن) ہو سکتا ہے۔ سیدہ عائشہ رضی اللہ عنہا سے منقول یہ روایت کہ بصارت اس کا ادراک نہیں کر سکتی، اس سے مراد یہ ہے کہ بصارت دنیا اور آخرت میں اس کا ادراک نہیں کر سکتی لیکن اپنے بندوں میں سے وہ جس پر چاہے فضل کر کے اس کا اہل بنا سکتا ہے۔ لفظ دنیا کا اطلاق کبھی زمینوں اور آسمانوں اور ان کے درمیان موجود جگہ پر ہوتا ہے، کیونکہ ان اشیاء سے آغاز ہوا تھا۔ اللہ تعالیٰ نے انہیں اس لیے پیدا کیا تھا تاکہ ان میں آخرت کے لیے نیکیاں کمائی جائیں جو اس آغاز کے بعد ہو گی، تو نبی اکرم صلی اللہ علیہ وسلم نے اپنے پروردگار کا دیدار اس مقام پر کیا ہے جہاں لفظ دنیا کا اطلاق نہیں ہوتا، کیونکہ وہ اس وقت دو کمانوں کے درمیان فاصلے سے بھی زیادہ قریب تھے، اس لیے سیدہ عائشہ رضی اللہ عنہا سے منقول روایت کا مطلب یہ ہو گا کہ نبی اکرم صلی اللہ علیہ وسلم نے دنیا میں اس کا دیدار نہیں کیا، اس لیے ان دونوں روایات کے درمیان کوئی تضاد اور اختلاف نہیں ہے۔ [صحیح ابن حبان/كتاب الإسراء/حدیث: 60]