سیدہ عائشہ صدیقہ رضی اللہ عنہا بیان کرتی ہیں: ایک بچے کا انتقال ہو گیا۔ میں نے کہا: یہ کتنا خوش نصیب ہے، جو جنت کی ایک چڑیا ہے، تو نبی اکرم صلی اللہ علیہ وسلم نے ارشاد فرمایا: ”کیا تم یہ بات نہیں جانتی ہو کہ بے شک اللہ تعالیٰ نے جنت کو پیدا کیا ہے، اور جہنم کو پیدا کیا ہے، اور اس (جنت) کے لیے بھی اہل پیدا کر دیے ہیں اور اس (جہنم) کے لیے بھی اہل پیدا کر دیے ہیں۔“ (امام ابن حبان رحمہ اللہ فرماتے ہیں:) اس فرمان کے ذریعے نبی اکرم صلی اللہ علیہ وسلم کی مراد یہ ہے: اسلام کی حالت میں مرنے والے کسی بھی شخص کا تزکیہ نہ کیا جائے، یعنی اسے باقاعدہ جنتی قرار نہ دیا جائے، اگرچہ اس شخص کا نیکوکار ہونا اور برائیوں سے بچنا معروف ہو، کیونکہ لوگ بھلائی کے بارے میں زیادہ حریص ہوتے ہیں اور اپنے پروردگار سے زیادہ ڈرتے ہیں۔ اس سے یہ مراد نہیں ہے: مسلمانوں کے فوت ہونے والے کم سن بچے کے جہنم میں جانے کا اندیشہ ہے۔ یہ ایک طویل مسئلہ ہے، جسے ہم نے اس سے متعلقہ فصول میں املا کروایا ہے اور ان روایات کے درمیان تطبیق کتاب «فُصُولُ السُّنَنِ» ”فصول السنن“ میں ہے۔ اگر اللہ نے چاہا تو اس کتاب کے بعد ہم (اپنی دوسری) کتاب «الْجَمْعُ بَيْنَ الْأَخْبَارِ وَنَفْيُ التَّضَادِّ عَنِ الْآثَارِ» ”الجمع بین الاخبار ونفی التضاد عن الآثار“ میں اسے املا کروائیں گے، اگر اللہ تعالیٰ نے چاہا اور اسے ہمارے لیے آسان کیا۔ [صحیح ابن حبان/كتاب الإيمان/حدیث: 138]

سیدنا ابوہریرہ رضی اللہ عنہ بیان کرتے ہیں: جب نبی اکرم صلی اللہ علیہ وسلم پر یہ آیت نازل ہوئی: ﴿لِلَّهِ مَا فِي السَّمَاوَاتِ وَمَا فِي الْأَرْضِ وَإِنْ تُبْدُوا مَا فِي أَنْفُسِكُمْ أَوْ تُخْفُوهُ يُحَاسِبْكُمْ بِهِ اللَّهُ فَيَغْفِرُ لِمَنْ يَشَاءُ وَيُعَذِّبُ مَنْ يَشَاءُ وَاللَّهُ عَلَى كُلِّ شَيْءٍ قَدِيرٌ﴾ [سورة البقرة: 284] ”آسمانوں میں جو کچھ ہے، اور زمین میں جو کچھ ہے، وہ اللہ تعالیٰ کی ملکیت ہے، تمہارے دلوں میں جو کچھ ہے، اگر تم اسے ظاہر کر دیتے ہو، یا پوشیدہ رکھتے ہو، تو اللہ تعالیٰ اس بارے میں تم سے حساب لے گا، اور پھر وہ جس شخص کی چاہے گا مغفرت کر دے گا اور جس کو چاہے گا، وہ عذاب دے گا، اللہ تعالیٰ ہر شے پر قدرت رکھتا ہے“۔ (راوی بیان کرتے ہیں) تو لوگ نبی اکرم صلی اللہ علیہ وسلم کی خدمت میں حاضر ہوئے، وہ گھٹنوں کے بل جھک گئے اور انہوں نے عرض کی: ”ہم اس کی طاقت نہیں رکھتے، ہم اس کی استطاعت نہیں رکھتے، ہمیں ایک ایسی چیز کا پابند کر دیا گیا ہے، جس کی ہم طاقت بھی نہیں رکھتے اور استطاعت بھی نہیں رکھتے۔“ تو اللہ تعالیٰ نے یہ آیت نازل کی: ﴿آمَنَ الرَّسُولُ بِمَا أُنْزِلَ إِلَيْهِ مِنْ رَبِّهِ وَالْمُؤْمِنُونَ﴾ [سورة البقرة: 285] ”رسول اس چیز پر ایمان لایا ہے، جو اس کے پروردگار کی طرف سے اس پر نازل کی گئی ہے، اور اہل ایمان بھی ایمان لاتے ہیں“۔ یہ آیت یہاں تک ہے: ﴿غُفْرَانَكَ رَبَّنَا وَإِلَيْكَ الْمَصِيرُ﴾ [سورة البقرة: 285] ”تجھ سے مغفرت طلب کرتے ہیں اے ہمارے پروردگار! اور بے شک تیری ہی طرف لوٹنا ہے“۔ تو نبی اکرم صلی اللہ علیہ وسلم نے یہ بات ارشاد فرمائی: ”تم لوگ اس طرح نہ کہو، جس طرح تم سے پہلے اہل کتاب نے کہا تھا: «سَمِعْنَا وَعَصَيْنَا» ”ہم نے یہ بات سن لی ہے، ہم اس کی نافرمانی کرتے ہیں“ بلکہ تم لوگ یہ کہو: «سَمِعْنَا وَأَطَعْنَا غُفْرَانَكَ رَبَّنَا وَإِلَيْكَ الْمَصِيرُ» ”ہم نے یہ بات سن لی ہے، اور ہم اس کی فرمانبرداری کرتے ہیں۔ اے ہمارے پروردگار! مغفرت تجھ سے حاصل ہو سکتی ہے، اور تیری طرف لوٹنا ہے“۔“ تو اللہ تعالیٰ نے یہ آیت نازل کی: ﴿لَا يُكَلِّفُ اللَّهُ نَفْسًا إِلَّا وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ رَبَّنَا لَا تُؤَاخِذْنَا إِنْ نَسِينَا أَوْ أَخْطَأْنَا﴾ [سورة البقرة: 286] ”اللہ تعالیٰ ہر نفس کو اس کی استطاعت کے مطابق پابند کرتا ہے، جو وہ کمائے گا، وہ اسے مل جائے گا اور جو وہ خرابی کرے گا اس کا وبال اس کے ذمے ہو گا۔ اے ہمارے پروردگار! اگر ہم بھول جائیں، یا غلطی کریں، تو ہم سے مواخذہ نہ کرنا“۔ پروردگار نے فرمایا: ”جی ہاں!“ (وہ لوگ یہ دعا کریں گے) ﴿رَبَّنَا وَلَا تُحَمِّلْنَا مَا لَا طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنْتَ مَوْلَانَا فَانْصُرْنَا عَلَى الْقَوْمِ الْكَافِرِينَ﴾ [سورة البقرة: 286] ”اے ہمارے پروردگار! تو ہمیں اس چیز کا پابند نہ کرنا، جس کی ہم میں طاقت نہ ہو، اور تو ہم سے درگزر کرنا اور ہماری مغفرت کرنا اور ہم پر رحم کرنا تو ہمارا آقا ہے، اور تو کافر لوگوں کے مقابلے میں ہماری مدد کرنا“۔ تو پروردگار فرمائے گا: ”جی ہاں!“ (یعنی میں ایسا ہی کروں گا)۔ [صحیح ابن حبان/كتاب الإيمان/حدیث: 139]

سیدنا عبداللہ بن عباس رضی اللہ عنہما اللہ تعالیٰ کے اس فرمان ﴿لَا إِكْرَاهَ فِي الدِّينِ﴾ [سورة البقرة: 256] ”دین میں کوئی زبردستی نہیں ہے“ کے بارے میں یہ بیان کرتے ہیں: (پہلے یہ رواج تھا) کہ اگر انصار کی کسی عورت کا کوئی بچہ زندہ نہیں رہتا تھا، تو وہ یہ قسم اٹھایا کرتی تھی کہ اگر اس کا بچہ زندہ رہ گیا، تو وہ اسے یہودی بنا دے گی۔ جب بنو نضیر کو جلا وطن کیا گیا، تو ان کے درمیان کچھ ایسے لوگ بھی تھے، جو انصار کی اولاد تھے۔ انصار نے عرض کی: ”یا رسول اللہ صلی اللہ علیہ وسلم ! ہمارے ان بچوں کا کیا بنے گا؟“ تو اللہ تعالیٰ نے یہ آیت نازل فرمائی: ﴿لَا إِكْرَاهَ فِي الدِّينِ﴾ [سورة البقرة: 256] ”دین میں کوئی زبردستی نہیں ہے“۔ سعید بن جبیر رحمہ اللہ بیان کرتے ہیں، جس بچے نے چاہا، وہ ان یہودیوں (کے ساتھ) مل گیا اور جس نے چاہا وہ اسلام میں داخل ہو گیا۔ [صحیح ابن حبان/كتاب الإيمان/حدیث: 140]

سیدہ عائشہ صدیقہ رضی اللہ عنہا بیان کرتی ہیں کہ رمضان کے مہینے میں ایک دن نبی اکرم صلی اللہ علیہ وسلم باہر (یعنی مسجد میں) تشریف لائے، آپ نے نماز (تراویح) ادا کی اور کچھ لوگوں نے آپ کی نماز کی پیروی کرتے ہوئے آپ کے پیچھے نماز ادا کی۔ اگلے دن صبح لوگوں نے اس بارے میں بات چیت کی تو (اگلے دن) لوگوں کی تعداد زیادہ ہوگئی۔ نبی اکرم صلی اللہ علیہ وسلم دوسرے دن بھی تشریف لائے تو لوگوں نے آپ کی نماز کی اقتدا میں نماز ادا کی۔ اگلے دن لوگوں نے اس بارے میں بات چیت کی تو تیسری رات مسجد میں بہت سے لوگ جمع ہو گئے۔ نبی اکرم صلی اللہ علیہ وسلم باہر تشریف لائے، لوگوں نے آپ کی اقتدا میں نماز ادا کی، جب چوتھی رات آئی تو پوری مسجد بھر چکی تھی۔ اس دن نبی اکرم صلی اللہ علیہ وسلم (تشریف نہیں لائے، آپ) فجر کی نماز ادا کرنے کے لیے لوگوں کے پاس تشریف لائے، جب فجر کی نماز مکمل ہوگئی تو آپ نے لوگوں کی طرف رخ کیا۔ آپ نے کلمہ شہادت پڑھا اور پھر یہ بات ارشاد فرمائی: ” «أَمَّا بَعْدُ» ”امابعد!“ تمہارا یہاں ٹھہرنا مجھ سے مخفی نہیں تھا، لیکن مجھے یہ اندیشہ ہوا کہ یہ تم پر فرض ہو جائے گی اور تم اسے ادا نہیں کر پاؤ گے۔“ (سیدہ عائشہ رضی اللہ عنہا بیان کرتی ہیں:) نبی اکرم صلی اللہ علیہ وسلم لوگوں کو رمضان کے مہینے میں نوافل ادا کرنے کی ترغیب دیتے تھے، تاہم آپ انہیں اس بارے میں باقاعدہ کوئی حکم نہیں دیتے تھے۔ آپ یہ بات ارشاد فرماتے تھے: ”جو شخص ایمان کی حالت میں ثواب کی امید رکھتے ہوئے، رمضان میں نوافل ادا کرے گا، اس شخص کے گزشتہ گناہوں کی مغفرت ہو جائے گی۔“ پھر نبی اکرم صلی اللہ علیہ وسلم دنیا سے تشریف لے گئے تو یہ معاملہ یوں ہی رہا، پھر سیدنا ابوبکر رضی اللہ عنہ کے عہد خلافت میں بھی یہ معاملہ یوں ہی رہا اور سیدنا عمر رضی اللہ عنہ کے ابتدائی دور میں بھی ایسے ہی رہا (یعنی اس کے بعد لوگوں نے تراویح کی نماز باجماعت ادا کرنا شروع کی)۔ [صحیح ابن حبان/كتاب الإيمان/حدیث: 141]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے ارشاد فرمایا ہے: ”تین لوگوں سے قلم اٹھا لیا گیا ہے۔ سوئے ہوئے شخص سے، یہاں تک کہ وہ بیدار ہو جائے، نابالغ بچے سے، یہاں تک کہ وہ بالغ ہو جائے، اور مجنون سے، یہاں تک کہ اسے افاقہ ہو جائے۔“ [صحیح ابن حبان/كتاب الإيمان/حدیث: 142]

سیدنا عبداللہ بن عباس رضی اللہ عنہما بیان کرتے ہیں کہ سیدنا علی رضی اللہ عنہ کا گزر بنوفلاں سے تعلق رکھنے والی ایک پاگل عورت کے پاس سے ہوا، جس نے زنا کا ارتکاب کیا تھا، اور سیدنا عمر رضی اللہ عنہ نے اسے سنگسار کرنے کا حکم دے دیا تھا۔ سیدنا علی رضی اللہ عنہ نے اس عورت کو واپس کر دیا، پھر انہوں نے سیدنا عمر رضی اللہ عنہ سے دریافت کیا: ”اے امیر المؤمنین! کیا آپ اسے سنگسار کرنا چاہتے ہیں؟“ سیدنا عمر رضی اللہ عنہ نے جواب دیا: ”جی ہاں!“ تو سیدنا علی رضی اللہ عنہ نے فرمایا: ”کیا آپ کو یہ بات یاد نہیں ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”تین لوگوں سے قلم اٹھا لیا گیا ہے: ایسا پاگل شخص جس کی عقل مغلوب ہو چکی ہو، سویا ہوا شخص جب تک وہ بیدار نہیں ہو جاتا اور (نابالغ بچہ) جب تک وہ بالغ نہ ہو جائے۔““ تو سیدنا عمر رضی اللہ عنہ نے فرمایا: ”آپ نے سچ کہا ہے۔“ پھر سیدنا عمر رضی اللہ عنہ نے اس عورت کو چھوڑ دیا۔ [صحیح ابن حبان/كتاب الإيمان/حدیث: 143]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم مکہ سے واپس تشریف لائے، جب آپ ”روحاء“ کے مقام پر پہنچے تو کچھ سوار آپ کے سامنے آئے، نبی اکرم صلی اللہ علیہ وسلم نے انہیں سلام کیا اور دریافت کیا: ”آپ لوگ کون ہیں؟“ انہوں نے جواب دیا: ہم مسلمان ہیں، آپ لوگ کون ہیں؟ نبی اکرم صلی اللہ علیہ وسلم نے فرمایا: ”(میں) اللہ کا رسول ہوں۔“ تو ان میں سے ایک عورت تیزی سے اٹھی اور اس نے اپنے پالان میں سے اپنے بچے کو بلند کیا، اس نے اس بچے کے بازو کو پکڑا ہوا تھا، اس نے عرض کی: یا رسول اللہ! (کیا اس بچے کا) حج ہوا ہے؟ نبی اکرم صلی اللہ علیہ وسلم نے فرمایا: ”جی ہاں! اور تمہیں بھی (اس کا) اجر ملے گا۔“ ابراہیم نامی راوی کہتے ہیں: میں نے یہ روایت ابن منکدر کو سنائی، تو انہوں نے اپنے تمام گھر والوں سمیت حج کیا۔ [صحیح ابن حبان/كتاب الإيمان/حدیث: 144]

سیدنا ابوہریرہ رضی اللہ عنہ بیان کرتے ہیں کہ ایک شخص نے عرض کی: یا رسول اللہ! ہمیں اپنے ذہن میں ایسے خیالات آتے ہیں کہ ہمیں انہیں بیان کرنا پسند نہیں ہے، اگرچہ اس کے عوض ہمیں ساری دنیا مل جائے، تو نبی اکرم صلی اللہ علیہ وسلم نے ارشاد فرمایا: ”کیا تمہیں اس صورتحال کا سامنا کرنا پڑتا ہے؟“ لوگوں نے عرض کی: جی ہاں! نبی اکرم صلی اللہ علیہ وسلم نے فرمایا: ”یہ صریح ایمان ہے۔“ [صحیح ابن حبان/كتاب الإيمان/حدیث: 145]

سیدنا ابوہریرہ رضی اللہ عنہ بیان کرتے ہیں: لوگوں نے عرض کی: یا رسول اللہ! ہمیں اپنے ذہن میں ایسے خیالات آتے ہیں، ہم میں سے کسی ایک کا راکھ ہو جانا، یہ اس کے نزدیک اس سے زیادہ محبوب ہے کہ وہ اس خیال کو بیان کرے، تو نبی اکرم صلی اللہ علیہ وسلم نے فرمایا: ”یہ محض ایمان ہے۔“ (امام ابن حبان رحمہ اللہ فرماتے ہیں:) جب مسلمان اپنے دل میں ایسی چیز پائے یا اس کے ذہن میں ایسا خیال آئے جس کے بارے میں کلام کرنا اس کے لیے جائز نہ ہو، جو اللہ تعالیٰ کی طرف سے آنے والی کیفیت ہو، یا اس کے ساتھ مشابہ ہو، اور پھر وہ صحیح ایمان کے ہمراہ اپنے دل سے اسے مسترد کر دے اور ان میں سے کسی بھی چیز پر پختہ ہونے کو ترک کر دے تو اس کا اس وسوسے کو مسترد کرنا ایمان کا حصہ ہے، بلکہ یہ صریح ایمان ہے۔ (حدیث کے الفاظ سے) یہ مراد نہیں ہے: اس طرح کے خیالات کا آنا ایمان کا حصہ ہے۔ [صحیح ابن حبان/كتاب الإيمان/حدیث: 146]

سیدنا عبداللہ بن عباس رضی اللہ عنہما بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: ہم میں سے کسی ایک شخص کو اپنے ذہن میں سے کوئی چیز (یعنی کوئی وسوسہ) محسوس ہوتا ہے، تو اس کا راکھ ہو جانا اس کے نزدیک اس سے زیادہ پسندیدہ ہوگا کہ وہ آدمی اس وسوسے کو بیان کرے۔ تو نبی اکرم صلی اللہ علیہ وسلم نے ارشاد فرمایا: ” «اَللّٰهُ أَكْبَرُ، اَلْحَمْدُ لِلّٰهِ الَّذِي رَدَّ أَمْرَهُ إِلَى الْوَسْوَسَةِ» اللہ اکبر! ہر طرح کی حمد اس اللہ کے لیے مخصوص ہے، جس نے اس معاملے کو وسوسے کی طرف لوٹا دیا ہے۔“ [صحیح ابن حبان/كتاب الإيمان/حدیث: 147]