سیدنا ابوہریرہ رضی اللہ عنہ بیان کرتے ہیں کہ لوگوں نے عرض کی: یا رسول اللہ! ہم میں سے کسی ایک شخص کو ایسے خیالات آتے ہیں، جنہیں بیان کرنا اس کے لیے بہت بڑی بات ہو، تو نبی اکرم صلی اللہ علیہ وسلم نے ارشاد فرمایا: ”کیا تم لوگوں کو یہ صورتحال پیش آتی ہے؟ یہ صریح ایمان ہے۔“ [صحیح ابن حبان/كتاب الإيمان/حدیث: 148]

علی بن عثام بیان کرتے ہیں: میں سعیر بن خمس کی خدمت میں آیا، تاکہ ان سے وسوسے کے بارے میں حدیث کے متعلق دریافت کروں، تو انہوں نے مجھے وہ حدیث بیان نہیں کی، میں روتا ہوا واپس آ گیا، پھر میری ان سے ملاقات ہوئی، تو انہوں نے فرمایا: آگے آؤ۔ مغیرہ نے ابراہیم کے حوالے سے، علقمہ کے حوالے سے، سیدنا عبداللہ رضی اللہ عنہ کا یہ بیان نقل کیا ہے کہ ہم نے نبی اکرم صلی اللہ علیہ وسلم سے ایسے شخص کے بارے میں دریافت کیا جو ایسی چیز کو پاتا ہے (یعنی وسوسہ یا منفی خیال پاتا ہے) کہ اگر وہ آسمان سے نیچے گر جائے، اور پرندے اسے اچک لیں تو یہ بات اس کے نزدیک اس سے زیادہ محبوب ہو کہ وہ اس (وسوسے کے بارے میں) کلام کرے۔ نبی اکرم صلی اللہ علیہ وسلم نے ارشاد فرمایا: ”یہ صریح ایمان ہے۔“ [صحیح ابن حبان/كتاب الإيمان/حدیث: 149]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے ارشاد فرمایا ہے: ”شیطان اس بات کو ترک نہیں کرے گا کہ وہ کسی شخص کے پاس آ کر یہ کہے: آسمانوں اور زمین کو کس نے پیدا کیا ہے؟ تو آدمی جواب دے گا: اللہ تعالیٰ نے، وہ دریافت کرے گا: اللہ تعالیٰ کو کس نے پیدا کیا ہے؟ (نبی اکرم صلی اللہ علیہ وسلم فرماتے ہیں:) جب کسی شخص کو اس صورتِ حال کا سامنا کرنا پڑے، تو وہ یہ کہے: «آمَنْتُ بِاللّٰهِ وَرُسُلِهٖ» ”میں اللہ اور اس کے رسولوں پر ایمان رکھتا ہوں۔“” [صحیح ابن حبان/كتاب الإيمان/حدیث: 150]

سیدنا جابر بن عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھے بھیجتے ہوئے یہ ارشاد فرمایا: ”لوگوں میں یہ اعلان کر دو کہ جو شخص یہ اعتراف کرے کہ اللہ تعالیٰ کے علاوہ اور کوئی معبود نہیں ہے، وہ جنت میں داخل ہو گا۔“ سیدنا جابر رضی اللہ عنہ وہاں سے نکلے، راستے میں سیدنا عمر رضی اللہ عنہ کی ان سے ملاقات ہوئی، تو انہوں نے دریافت کیا: تم کہاں جا رہے ہو؟ میں نے جواب دیا: مجھے نبی اکرم صلی اللہ علیہ وسلم نے اس پیغام کے ہمراہ بھیجا ہے۔ تو سیدنا عمر رضی اللہ عنہ نے کہا: تم واپس جاؤ! میں نے ان کی یہ بات نہیں مانی، تو انہوں نے میرے سینے پر ہاتھ مارا، جس کی تکلیف میں نے محسوس کی۔ میں واپس آ گیا، میرے پاس اس کے علاوہ اور کوئی چارہ نہیں تھا۔ سیدنا عمر رضی اللہ عنہ نے عرض کی: یا رسول اللہ! کیا آپ نے اسے اس پیغام کے ہمراہ بھیجا ہے؟ نبی اکرم صلی اللہ علیہ وسلم نے جواب دیا: ”جی ہاں۔“ سیدنا عمر رضی اللہ عنہ نے عرض کی: یا رسول اللہ! یہ خوشخبری سن کر (لوگ) جنت کی امید رکھیں گے اور وہ ڈریں گے (حاشیے میں وضاحت ہے، یہاں لفظ غلط نقل ہوا ہے۔ اصل لفظ یہ ہے، وہ لوگ خراب ہو جائیں گے) تو نبی اکرم صلی اللہ علیہ وسلم نے (سیدنا جابر رضی اللہ عنہ) سے فرمایا: ”تم بیٹھ جاؤ۔“ [صحیح ابن حبان/كتاب الإيمان/حدیث: 151]

سیدنا ابوذر غفاری رضی اللہ عنہ بیان کرتے ہیں: میں نے عرض کی: یا رسول اللہ! کون سا عمل زیادہ فضیلت رکھتا ہے؟ نبی اکرم صلی اللہ علیہ وسلم نے فرمایا: ”اللہ پر ایمان رکھنا اور اس کی راہ میں جہاد کرنا۔“ [صحیح ابن حبان/كتاب الإيمان/حدیث: 152]

سیدنا ابوہریرہ رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم سے سوال کیا: یا رسول اللہ! کون سا عمل سب سے زیادہ فضیلت رکھتا ہے؟ نبی اکرم صلی اللہ علیہ وسلم نے ارشاد فرمایا: ”اللہ تعالیٰ پر ایمان رکھنا۔“ اس نے دریافت کیا: پھر کون سا؟ نبی اکرم صلی اللہ علیہ وسلم نے فرمایا: ”پھر اللہ کی راہ میں جہاد کرنا۔“ اس نے دریافت کیا: پھر کون سا؟ آپ صلی اللہ علیہ وسلم نے فرمایا: ”پھر مبرور حج۔“ [صحیح ابن حبان/كتاب الإيمان/حدیث: 153]

شریک بن عبداللہ بیان کرتے ہیں کہ انہوں نے سیدنا انس بن مالک رضی اللہ عنہ کو یہ بیان کرتے ہوئے سنا: ایک مرتبہ ہم لوگ مسجد میں بیٹھے ہوئے تھے کہ ایک شخص اونٹ پر سوار ہو کر آیا، اس نے مسجد میں اس اونٹ کو بٹھایا اور پھر اسے باندھ دیا، پھر اس نے لوگوں سے دریافت کیا: ”آپ میں سے محمد صلی اللہ علیہ وسلم کون ہیں؟“ اس وقت نبی اکرم صلی اللہ علیہ وسلم لوگوں کے درمیان ٹیک لگا کر بیٹھے ہوئے تھے، راوی کہتے ہیں کہ ہم نے اسے کہا: ”یہ سفید رنگت کے مالک، ٹیک لگا کر بیٹھے ہوئے صاحب (نبی اکرم صلی اللہ علیہ وسلم ) ہیں“، اس شخص نے نبی اکرم صلی اللہ علیہ وسلم سے دریافت کیا: ”اے عبدالمطلب کے صاحبزادے!“ نبی اکرم صلی اللہ علیہ وسلم نے اسے جواب دیا: ”میں تمہیں جواب دینے کے لیے تیار ہوں“، اس نے دریافت کیا: ”اے محمد صلی اللہ علیہ وسلم ! میں آپ سے کچھ سوال کروں گا اور سوال کرتے ہوئے ذرا سختی کا اظہار کروں گا، تو آپ مجھ سے ناراض نہ ہوئیے گا“، نبی اکرم صلی اللہ علیہ وسلم نے فرمایا: ”تمہیں جو مناسب لگتا ہے تم پوچھو“، اس نے کہا: ”میں آپ کو آپ کے پروردگار اور آپ سے پہلے لوگوں کے پروردگار کا واسطہ دے کر دریافت کرتا ہوں، کیا اللہ تعالیٰ نے آپ کو تمام بنی نوع انسان کی طرف بھیجا ہے؟“ نبی اکرم صلی اللہ علیہ وسلم نے جواب دیا: «اللَّهُمَّ نَعَمْ» ”اللہ (جانتا ہے) جی ہاں“، اس نے دریافت کیا: ”میں آپ کو اللہ کا واسطہ دے کر دریافت کرتا ہوں، کیا اللہ تعالیٰ نے آپ کو یہ حکم دیا ہے کہ ہم روزانہ پانچ نمازیں پڑھا کریں؟“ نبی اکرم صلی اللہ علیہ وسلم نے فرمایا: «اللَّهُمَّ نَعَمْ» ”اللہ (جانتا ہے) جی ہاں“، اس نے دریافت کیا: ”میں آپ کو اللہ کا واسطہ دے کر دریافت کرتا ہوں، کیا اللہ تعالیٰ نے آپ کو حکم دیا ہے کہ ہم سال میں اس مہینے میں روزے رکھیں؟“ نبی اکرم صلی اللہ علیہ وسلم نے فرمایا: «اللَّهُمَّ نَعَمْ» ”اللہ (جانتا ہے) جی ہاں“، اس نے دریافت کیا: ”میں آپ کو اللہ کا واسطہ دے کر کہتا ہوں کہ کیا اللہ تعالیٰ نے آپ کو یہ حکم دیا ہے کہ آپ ہمارے خوشحال لوگوں سے زکوۃ وصول کریں اور اسے ہمارے غریب لوگوں میں تقسیم کر دیں؟“ نبی اکرم صلی اللہ علیہ وسلم نے فرمایا: «اللَّهُمَّ نَعَمْ» ”اللہ (جانتا ہے) جی ہاں!“ اس شخص نے کہا: ”آپ جو کچھ لے کر آئے ہیں، میں اس پر ایمان لاتا ہوں، میں اپنے پیچھے (موجود) اپنی قوم کا نمائندہ ہوں، میرا نام ضمام بن ثعلبہ ہے، جس کا تعلق بنو سعد بن بکر سے ہے“۔ [صحیح ابن حبان/كتاب الإيمان/حدیث: 154]

سیدنا انس بن مالک رضی اللہ عنہ بیان کرتے ہیں: ہمیں اس بات سے منع کر دیا گیا کہ ہم نبی اکرم صلی اللہ علیہ وسلم سے کسی چیز کے بارے میں دریافت کریں۔ تو ہماری یہ خواہش ہوتی تھی کہ کوئی دیہاتی نبی اکرم صلی اللہ علیہ وسلم کی خدمت میں حاضر ہو اور آپ سے سوال کرے تو ہم اسے سن لیا کریں۔ ایک مرتبہ ایک دیہاتی نبی اکرم صلی اللہ علیہ وسلم کی خدمت میں حاضر ہوا۔ اس نے عرض کی: اے سیدنا محمد صلی اللہ علیہ وسلم ! آپ کا پیغام رساں ہمارے پاس آیا تھا، اس نے یہ بات بیان کی کہ آپ یہ کہتے ہیں کہ اللہ تعالیٰ نے آپ کو مبعوث کیا ہے۔ نبی اکرم صلی اللہ علیہ وسلم نے فرمایا: ”اس نے ٹھیک کہا ہے۔“ اس شخص نے دریافت کیا: آسمان کو کس نے پیدا کیا ہے؟ نبی اکرم صلی اللہ علیہ وسلم نے جواب دیا: ”اللہ تعالیٰ نے۔“ اس نے دریافت کیا: زمین کو کس نے پیدا کیا ہے؟ نبی اکرم صلی اللہ علیہ وسلم نے جواب دیا: ”اللہ تعالیٰ نے۔“ اس نے دریافت کیا: ان پہاڑوں کو کس نے قائم کیا ہے؟ نبی اکرم صلی اللہ علیہ وسلم نے جواب دیا: ”اللہ تعالیٰ نے۔“ اس نے دریافت کیا: ان میں فائدے کس نے رکھے ہیں؟ نبی اکرم صلی اللہ علیہ وسلم نے جواب دیا: ”اللہ تعالیٰ نے۔“ اس نے کہا: پھر وہ ذات جس نے آسمانوں اور زمین کو پیدا کیا ہے، اور پہاڑوں کو نصب کیا ہے، اور ان میں منافع رکھے ہیں، اس کی قسم دے کر میں (آپ سے دریافت کرتا ہوں) کیا اللہ تعالیٰ نے آپ کو بھیجا ہے؟ نبی اکرم صلی اللہ علیہ وسلم نے جواب دیا: ”جی ہاں۔“ اس نے کہا: آپ کے مبلغ نے یہ بات بتائی ہے کہ ہم پر (روزانہ) پانچ نمازیں پڑھنا لازم ہو گا۔ نبی اکرم صلی اللہ علیہ وسلم نے فرمایا: ”اس نے ٹھیک کہا ہے۔“ اس نے دریافت کیا: اس ذات کی قسم! جس نے آپ کو بھیجا ہے، کیا اللہ تعالیٰ نے آپ کو اس کا حکم دیا ہے؟ نبی اکرم صلی اللہ علیہ وسلم نے جواب دیا: ”جی ہاں!۔“ اس نے کہا: آپ کے مبلغ نے یہ بات بتائی ہے کہ ہمارے اموال میں زکوٰۃ کی ادائیگی لازم ہو گی۔ نبی اکرم صلی اللہ علیہ وسلم نے ارشاد فرمایا: ”اس نے ٹھیک کہا ہے۔“ اس شخص نے کہا: اس ذات کی قسم! جس نے آپ کو مبعوث کیا ہے، کیا اللہ تعالیٰ نے آپ کو اس بات کا حکم دیا ہے؟ نبی اکرم صلی اللہ علیہ وسلم نے فرمایا: ”جی ہاں!۔“ اس نے کہا: آپ کے مبلغ نے یہ بات بھی بتائی ہے کہ ہم پر پورے سال میں ایک مہینے کے روزے رکھنا فرض ہو گا۔ نبی اکرم صلی اللہ علیہ وسلم نے فرمایا: ”اس نے ٹھیک کہا ہے۔“ اس شخص نے کہا: آپ کو اس ذات کی قسم! جس نے آپ کو مبعوث کیا ہے، کیا اللہ تعالیٰ نے آپ کو اس بات کا حکم دیا ہے؟ نبی اکرم صلی اللہ علیہ وسلم نے فرمایا: ”جی ہاں!۔“
(امام ابن حبان رحمہ اللہ فرماتے ہیں: اس نوعیت کے احکام جیسے وضو، تیمم، غسل جنابت، پانچ نمازیں، فرض روزہ اور اس جیسے دیگر احکام مخاطب افراد پر بعض حالتوں میں فرض ہوتے ہیں، تمام حالتوں میں فرض نہیں ہوتے۔) [صحیح ابن حبان/كتاب الإيمان/حدیث: 155]

سیدنا عبداللہ بن عباس رضی اللہ عنہما بیان کرتے ہیں کہ جب نبی اکرم صلی اللہ علیہ وسلم نے سیدنا معاذ رضی اللہ عنہ کو یمن بھیجا، تو آپ صلی اللہ علیہ وسلم نے ارشاد فرمایا: ”تم اہل کتاب سے تعلق رکھنے والے لوگوں کی طرف جا رہے ہو، تم انہیں سب سے پہلے اللہ کی عبادت کی دعوت دینا، جب وہ اللہ تعالیٰ کی معرفت حاصل کر لیں، تو تم انہیں بتانا کہ اللہ تعالیٰ نے ان پر روزانہ پانچ نمازیں فرض کی ہیں، جب وہ ایسا کر لیں، تو انہیں بتانا کہ اللہ تعالیٰ نے ان پر زکاۃ فرض کی ہے، جو ان کے اموال میں سے وصول کی جائے گی اور ان کے غریب لوگوں کی طرف لوٹا دی جائے گی، جب وہ اس حکم کی فرمانبرداری کریں، تو تم ان سے زکاۃ وصول کر لینا اور لوگوں کے عمدہ مال حاصل کرنے سے بچنا۔“ (امام ابن حبان رحمہ اللہ فرماتے ہیں:) یہ قسم جیسے حج اور زکاۃ اور ان جیسے دیگر فرائض (وہ ہیں) جو بعض عاقل و بالغ لوگوں پر بعض مخصوص حالتوں میں فرض قرار دیے گئے ہیں، یہ ہر حال میں فرض نہیں ہیں (یعنی زکاۃ اس پر فرض ہو گی جو صاحب نصاب ہو اور اس نصاب پر ایک سال گزر جائے اور حج اس پر فرض ہو گا جس کے لیے حج کے مخصوص ایام میں مکہ تک جانا ممکن ہو، یہ ہر مسلمان پر ہر حال میں فرض نہیں ہے۔) [صحیح ابن حبان/كتاب الإيمان/حدیث: 156]

سیدنا عبداللہ بن عباس رضی اللہ عنہما بیان کرتے ہیں کہ عبدالقیس قبیلے کا وفد نبی اکرم صلی اللہ علیہ وسلم کی خدمت میں حاضر ہوا، ان لوگوں نے عرض کی: یا رسول اللہ! ہمارا تعلق ربیعہ قبیلے سے ہے، ہمارے اور آپ کے درمیان مضر قبیلے کے کفار رکاوٹ بن جاتے ہیں، اس لیے ہم صرف حرمت والے مہینوں میں آپ کی خدمت میں حاضر ہو سکتے ہیں، آپ ہمیں کسی ایسی چیز کا حکم دیں جس پر ہم عمل کریں اور اپنے پیچھے لوگوں کو اس کی دعوت دیں۔ نبی اکرم صلی اللہ علیہ وسلم نے فرمایا: ”میں تمہیں چار باتوں کا حکم دیتا ہوں: اللہ تعالیٰ پر ایمان رکھنا، یعنی اس بات کی گواہی دینا کہ اللہ تعالیٰ کے علاوہ اور کوئی معبود نہیں اور بے شک سیدنا محمد صلی اللہ علیہ وسلم اللہ کے رسول ہیں، اور نماز قائم کرنا اور زکوٰۃ دینا اور مالِ غنیمت میں سے خمس کی ادائیگی کرنا، اور تمہیں «الدُّبَّاءِ»، «الْحَنْتَمِ»، «النَّقِيرِ» اور «الْمُقَيَّرِ» ”دباء، حنتم، نقیر اور مقیر“ سے منع کرتا ہوں۔“ یہ روایت قتادہ نے سعید بن مسیب اور عکرمہ کے حوالے سے سیدنا عبداللہ بن عباس رضی اللہ عنہما سے نقل کی ہے، جبکہ ابونضرہ کے حوالے سے سیدنا ابوسعید خدری رضی اللہ عنہ سے نقل کی ہے۔ [صحیح ابن حبان/كتاب الإيمان/حدیث: 157]