سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ اپنے بندے کی توبہ سے اس شخص سے زیادہ خوش ہوتا ہے، جو بیدار ہو کر اس اونٹ کو پا لیتا ہے، جسے وہ بے آب و گیاہ زمین میں گم کر چکا تھا۔“ [صحیح ابن حبان/كتاب الرقائق/حدیث: 617]

سیدنا عبداللہ بن مسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ تم میں سے کسی ایک کے توبہ کرنے پر اس شخص سے زیادہ خوش ہوتا ہے، جو کسی ویران سنسان اور ہلاکت کا شکار کر دینے والی جگہ پر موجود ہو، اس کے ساتھ اس کی سواری بھی ہو جس پر اس کا زادِ راہ، اس کا کھانا اور اس کی ضروریات کی چیزیں موجود ہوں اور پھر وہ شخص اس سواری کو گم کر دے، پھر وہ اس کی تلاش میں نکلے یہاں تک کہ اسے موت آ جائے، تو وہ یہ سوچے کہ میں اپنی جگہ پر واپس چلا جاتا ہوں اور وہاں فوت ہو جاؤں گا، تو وہ شخص واپس اس جگہ چلا جائے جہاں اس نے اپنی سواری کو گم کیا تھا، تو اسی حالت کے دوران اس کی آنکھ لگ جائے، پھر جب وہ بیدار ہو تو اس کی سواری اس کے سر کے پاس موجود ہو جس پر اس کا زادِ راہ اور چیزیں موجود ہوں، تو اللہ تعالیٰ تم میں سے کسی ایک کی توبہ پر اس شخص سے زیادہ خوش ہوتا ہے۔“ [صحیح ابن حبان/كتاب الرقائق/حدیث: 618]

سیدنا ابوذر غفاری رضی اللہ عنہ نبی اکرم صلی اللہ علیہ وسلم کے حوالے سے اللہ تعالیٰ کا یہ فرمان نقل کرتے ہیں: ”اے میرے بندو! میں نے اپنی ذات کے لیے ظلم کو حرام قرار دیا ہے اور میں نے اسے تمہارے درمیان بھی حرام قرار دیا ہے، تو تم ایک دوسرے پر ظلم نہ کرو، اے میرے بندو! بیشک تم رات دن خطائیں کرتے ہو اور میں وہ ہوں جو گناہوں کی مغفرت کر دیتا ہوں اور میں اس کی پرواہ نہیں کرتا۔“ اس کے بعد راوی نے طویل حدیث ذکر کی ہے، جس کے آخر میں انہوں نے یہ بات بیان کی ہے۔ ابوادریس نامی راوی جب اس حدیث کو بیان کرتے تھے، تو وہ گھٹنوں کے بل جھک جایا کرتے تھے۔ [صحیح ابن حبان/كتاب الرقائق/حدیث: 619]

عطا بیان کرتے ہیں کہ میں اور عبید بن عمیر سیدہ عائشہ رضی اللہ عنہا کی خدمت میں داخل ہوئے، تو سیدہ عائشہ رضی اللہ عنہا نے عبید بن عمیر سے فرمایا: ”تمہیں اب ہمارے ہاں آنے کا موقع ملا ہے؟“ تو انہوں نے عرض کی: امی جان! میں یہ کہوں گا، جیسے پہلے لوگوں میں سے کسی نے کہا ہے: ”وقفے کے ساتھ ملا کرو، محبت میں اضافہ ہوتا ہے“۔ سیدہ عائشہ رضی اللہ عنہا نے فرمایا: ”اس طرح کی چکنی چپڑی باتیں ہمارے ساتھ نہ کرو“۔ ابن عمیر نے عرض کی: آپ ہمیں اس چیز کے بارے میں بتائیے جو آپ نے نبی اکرم صلی اللہ علیہ وسلم کے بارے میں سب سے حیرت انگیز چیز دیکھی ہو۔ راوی بیان کرتے ہیں: سیدہ عائشہ رضی اللہ عنہا خاموش ہو گئیں، پھر انہوں نے بتایا: ایک مرتبہ نبی اکرم صلی اللہ علیہ وسلم نے رات کے وقت ارشاد فرمایا: ”اے عائشہ! تم مجھے موقع دو تاکہ میں آج رات اپنے پروردگار کی عبادت کروں“، میں نے عرض کی: اللہ کی قسم! میں آپ کے ساتھ کو پسند کرتی ہوں اور میں اس چیز کو بھی پسند کرتی ہوں جو آپ کو اچھی لگے۔ سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم کھڑے ہوئے، آپ صلی اللہ علیہ وسلم نے اچھی طرح وضو کیا، پھر آپ صلی اللہ علیہ وسلم کھڑے ہو کر نوافل ادا کرنے لگے۔ سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم رونے لگے، یہاں تک کہ آپ صلی اللہ علیہ وسلم کی آنکھ کا گوشہ گیلا ہو گیا۔ سیدہ عائشہ رضی اللہ عنہا بیان کرتی ہیں: پھر آپ صلی اللہ علیہ وسلم روتے رہے اور مسلسل روتے رہے، یہاں تک کہ آپ صلی اللہ علیہ وسلم کی داڑھی مبارک بھیگ گئی۔ سیدہ عائشہ رضی اللہ عنہا بیان کرتی ہیں: پھر آپ صلی اللہ علیہ وسلم روتے رہے، پھر اتنی دیر تک روتے رہے کہ زمین بھیگ گئی۔ پھر سیدنا بلال رضی اللہ عنہ آئے اور آپ صلی اللہ علیہ وسلم کو (فجر کی) نماز کے لیے بلایا، جب انہوں نے آپ صلی اللہ علیہ وسلم کو روتے ہوئے دیکھا، تو عرض کی: یا رسول اللہ! آپ کیوں رو رہے ہیں؟ جبکہ اللہ تعالیٰ نے آپ کے گزشتہ اور آئندہ (ذنب) کی مغفرت کر دی ہے۔ نبی اکرم صلی اللہ علیہ وسلم نے ارشاد فرمایا: ”کیا میں شکر گزار بندہ نہ بنوں؟ آج رات مجھ پر ایک آیت نازل ہوئی ہے، اس شخص کے لیے بربادی ہے، جو اس کی تلاوت کرے اور اس میں غور و فکر نہ کرے“۔ (وہ آیت یہ ہے) ﴿إِنَّ فِي خَلْقِ السَّمَاوَاتِ وَالْأَرْضِ وَاخْتِلَافِ اللَّيْلِ وَالنَّهارِ لَآيَاتٍ لِأُولِي الْأَلْبَابِ﴾ [سورة آل عمران: 190] ”آسمانوں اور زمین کی تخلیق میں“ یہ مکمل آیت ہے۔ [صحیح ابن حبان/كتاب الرقائق/حدیث: 620]

سیدنا ابوہریرہ رضی اللہ عنہ بیان کرتے ہیں کہ لوگوں نے نبی اکرم صلی اللہ علیہ وسلم کے سامنے خوشی کا ذکر کیا، پھر انہوں نے ایسی گمشدہ چیز کا ذکر کیا جسے کوئی شخص پا لیتا ہے، تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ تم میں سے کسی ایک کی توبہ سے اس سے زیادہ خوش ہوتا ہے جتنا کہ کوئی شخص بے آب و گیاہ جگہ پر اپنی گمشدہ چیز کو پا کر ہوتا ہے۔“ [صحیح ابن حبان/كتاب الرقائق/حدیث: 621]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ایک شخص نے گناہ کا ارتکاب کیا پھر وہ بولا: اے میرے پروردگار! میں نے گناہ کا ارتکاب کیا ہے، (راوی کو شک ہے کہ شاید یہ الفاظ ہیں:) میں نے ایک عمل کیا ہے، تو میری مغفرت کر دے، تو اللہ تعالیٰ نے فرمایا: میرے بندے نے گناہ کا ارتکاب کیا، وہ یہ بات جانتا ہے کہ اس کا ایک پروردگار ہے، جو گناہوں کی مغفرت کر سکتا ہے اور اس پر گرفت بھی کر سکتا ہے، تو میں نے اپنے بندے کی مغفرت کر دی، پھر اس شخص نے دوسرے گناہ کا ارتکاب کیا، (راوی کو شک ہے کہ شاید یہ الفاظ ہیں:) اس نے دوسرا گناہ کیا، تو اس نے عرض کی: اے میرے پروردگار! میں نے گناہ کا ارتکاب کیا ہے، تو میری مغفرت کر دے، تو اللہ تعالیٰ نے فرمایا: یہ میرا بندہ یہ بات جانتا ہے کہ اس کا ایک پروردگار ہے، جو گناہوں کی مغفرت کر سکتا ہے اور اس پر گرفت بھی کر سکتا ہے، تو میں نے اپنے بندے کی مغفرت کر دی، پھر اس شخص نے دوبارہ اس گناہ کا ارتکاب کیا، (راوی کو شک ہے کہ شاید یہ الفاظ ہیں:) کسی اور گناہ کا ارتکاب کیا، پھر اس نے عرض کی: اے میرے پروردگار! میں نے گناہ کا ارتکاب کیا ہے، تو میری مغفرت کر دے، تو اللہ تعالیٰ نے فرمایا: میرا بندہ جانتا ہے کہ اس کا ایک پروردگار ہے، جو گناہوں کی مغفرت بھی کر سکتا ہے اور اس پر گرفت بھی کر سکتا ہے۔ اے فرشتوں! میں تمہیں گواہ بنا رہا ہوں کہ میں نے اپنے بندے کی مغفرت کر دی ہے، اب وہ جو چاہے عمل کرے۔“ [صحیح ابن حبان/كتاب الرقائق/حدیث: 622]

سیدنا علی رضی اللہ عنہ بیان کرتے ہیں: جب میں نبی اکرم صلی اللہ علیہ وسلم کی زبانی کوئی بات سنتا تھا، تو اللہ تعالیٰ کو جو منظور ہوتا تھا وہ اس کے ذریعے مجھے نفع عطا کر دیتا تھا، یہاں تک کہ سیدنا ابوبکر رضی اللہ عنہ نے مجھے حدیث بیان کی۔ نبی اکرم صلی اللہ علیہ وسلم کے اصحاب میں سے کوئی شخص جب بھی نبی اکرم صلی اللہ علیہ وسلم کے حوالے سے کوئی حدیث میرے سامنے بیان کرتا تھا، تو میں اس سے حلف لیا کرتا تھا، اگر وہ حلف اٹھا لیتا، تو میں اس کی بات کی تصدیق کرتا تھا۔ سیدنا ابوبکر رضی اللہ عنہ نے مجھے حدیث بیان کی اور سیدنا ابوبکر رضی اللہ عنہ نے سچ بیان کیا۔ انہوں نے بتایا: نبی اکرم صلی اللہ علیہ وسلم نے یہ بات ارشاد فرمائی ہے: ”جو بھی بندہ کسی گناہ کا ارتکاب کرے اور پھر وہ وضو کر کے دو رکعت نماز ادا کر لے اور پھر اس گناہ کی مغفرت اللہ تعالیٰ سے طلب کرے، تو اللہ تعالیٰ اس کو مغفرت عطا کر دیتا ہے۔“ [صحیح ابن حبان/كتاب الرقائق/حدیث: 623]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ان سے فرمایا: ”اے عائشہ! اگر تم نے گناہ کا ارادہ کیا تھا، تو تم اللہ تعالیٰ سے مغفرت طلب کرو اور توبہ کرو، کیونکہ بندہ جب گناہ کا ارتکاب کرتا ہے اور پھر وہ اللہ تعالیٰ سے مغفرت طلب کرتا ہے، تو اللہ تعالیٰ اس کی مغفرت کر دیتا ہے۔“ وائل نے اپنے صاحبزادے کے حوالے سے صرف تین روایات ذکر کی ہیں۔ یہ بات شیخ نے بیان کی ہے۔ [صحیح ابن حبان/كتاب الرقائق/حدیث: 624]

سیدنا ابوہریرہ رضی اللہ عنہ نبی اکرم صلی اللہ علیہ وسلم کے حوالے سے ان کے پروردگار کا یہ فرمان نقل کرتے ہیں: ”میرا بندہ کسی گناہ کا ارتکاب کرتا ہے، پھر وہ یہ کہتا ہے: اے میرے پروردگار! میں نے گناہ کا ارتکاب کر لیا ہے، تو اللہ تعالیٰ فرماتا ہے: میرے بندے نے گناہ کا ارتکاب کیا اور وہ یہ بات جانتا ہے کہ اللہ تعالیٰ گناہوں کی مغفرت بھی کر سکتا ہے اور گناہوں پر گرفت بھی کر سکتا ہے۔ پھر وہ بندہ دوبارہ گناہ کا ارتکاب کرتا ہے اور کہتا ہے: اے میرے پروردگار! میں نے گناہ کا ارتکاب کر لیا ہے، تو اللہ تعالیٰ فرماتا ہے: میرے بندے نے گناہ کا ارتکاب کر لیا ہے اور وہ یہ بات جانتا ہے کہ اللہ تعالیٰ گناہوں کی مغفرت بھی کر سکتا ہے اور گناہوں پہ گرفت بھی کر سکتا ہے۔ (اے میرے بندے!) تم جو چاہو عمل کرو، میں نے تمہاری مغفرت کر دی ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کے یہ الفاظ: ”تم جو چاہو عمل کرو۔“ یہ تہدید کے الفاظ ہیں جس کے عقب میں وعدہ ہے۔ اور نبی اکرم صلی اللہ علیہ وسلم کے اس قول سے مراد: ”تم جو چاہو عمل کرو۔“ اس سے مراد یہ ہے: تم نافرمانی نہ کرو اور نبی اکرم صلی اللہ علیہ وسلم کے الفاظ ”میں نے تمہاری مغفرت کر دی ہے“ اس سے مراد یہ ہے، جب تم توبہ کر لو۔ [صحیح ابن حبان/كتاب الرقائق/حدیث: 625]

سیدنا ابوذر غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ اپنے بندے کی مغفرت کرتا رہتا ہے، جب تک حجاب واقع نہیں ہوتا۔“ دریافت کیا گیا: حجاب واقع ہونے سے مراد کیا ہے؟ نبی اکرم صلی اللہ علیہ وسلم نے ارشاد فرمایا: ”یہ کہ آدمی ایسی حالت میں مرے کہ وہ مشرک ہو۔“ [صحیح ابن حبان/كتاب الرقائق/حدیث: 626]