سیدہ عائشہ صدیقہ رضی اللہ عنہا بیان کرتی ہیں: پہلے نماز حضر اور سفر دونوں حالتوں میں دو، دو رکعت فرض ہوئی تھی، پھر سفر کی نماز کو اپنی حالت میں برقرار رکھا گیا اور حضر کی نماز میں اضافہ کر دیا گیا۔ [صحیح ابن حبان/كتاب الصلاة/حدیث: 2736]

سیدہ عائشہ صدیقہ رضی اللہ عنہا بیان کرتی ہیں: جب نماز فرض ہوئی تھی، تو حضر اور سفر کے دوران دو دو رکعت ہی فرض ہوئی تھی، پھر حضر کی نماز میں اضافہ کر دیا گیا، اور سفر کی نماز کو اس کی اسی حالت میں برقرار رکھا گیا۔ [صحیح ابن حبان/كتاب الصلاة/حدیث: 2737]

سیدہ عائشہ صدیقہ رضی اللہ عنہا بیان کرتی ہیں: سفر اور حضر کی نماز دو، دو رکعت کی شکل میں فرض ہوئی تھیں، نبی اکرم صلی اللہ علیہ وسلم دو، دو رکعات ادا کرتے رہے (پھر بعد میں نماز کی رکعات کی تعداد میں اضافہ ہوا لیکن) فجر کی نماز کو طویل قرأت کی وجہ سے ترک کر دیا گیا اور مغرب کی نماز کو اس لیے ترک کر دیا گیا کیونکہ وہ دن کے وتر ہیں۔ [صحیح ابن حبان/كتاب الصلاة/حدیث: 2738]

یعلی بن امیہ رضی اللہ عنہ بیان کرتے ہیں: میں نے سیدنا عمر بن خطاب رضی اللہ عنہ سے کہا: اللہ تعالیٰ نے یہ فرمایا ہے: ﴿تم لوگوں پر کوئی گناہ نہیں ہے﴾ [سورة النساء: 101] یعنی اس حوالے سے کہ تم اگر (دشمن کی طرف سے) اندیشے کا شکار ہو، تو تم نماز کو قصر کر لو لیکن اب تو لوگ امن کی حالت میں آ چکے ہیں، تو سیدنا عمر رضی اللہ عنہ نے فرمایا: میں بھی اس بات پر حیران ہوا جس بات پر تم حیران ہوئے ہو، میں نے اس بارے میں نبی اکرم صلی اللہ علیہ وسلم سے سوال کیا، تو آپ نے ارشاد فرمایا: ”یہ ایک صدقہ ہے جو اللہ تعالیٰ نے تم پر کیا ہے، تم لوگ اللہ تعالیٰ کے صدقے کو قبول کر لو۔“ (امام ابن حبان رحمہ اللہ فرماتے ہیں:) ابن ابوعمار نامی راوی عبدالرحمن بن عبداللہ بن عمار ہے، یہ اہل مکہ سے تعلق رکھنے والے ثقہ راویوں میں سے ایک ہیں۔ [صحیح ابن حبان/كتاب الصلاة/حدیث: 2739]

یعلی بن امیہ بیان کرتے ہیں: میں نے سیدنا عمر بن خطاب رضی اللہ عنہ سے کہا: مجھے اس بات پر حیرت ہوتی ہے، وہ نماز قصر ادا کرتے ہیں، جبکہ اللہ تعالیٰ نے یہ بات ارشاد فرمائی ہے: ﴿لَيْسَ عَلَيْكُمْ جُنَاحٌ أَنْ تَقْصُرُوا مِنَ الصَّلَاةِ إِنْ خِفْتُمْ أَنْ يَفْتِنَكُمُ الَّذِينَ كَفَرُوا﴾ [سورة النساء: 101] ”تم پر کوئی گناہ نہیں ہے۔“ یہ اس وقت ہے، جب تم لوگوں کو اس بات کا اندیشہ ہو، کافر لوگ تمہیں آزمائش کا شکار کر دیں گے تو اس وقت اگر تم نماز قصر کرتے ہو (تو تمہیں کوئی گناہ نہیں ہو گا) لیکن اب یہ صورتحال رخصت ہو چکی ہے، تو سیدنا عمر رضی اللہ عنہ نے فرمایا: میں بھی اس بات پر حیران ہوا تھا جس بات پر تم حیران ہوئے ہو، میں نے اس بات کا تذکرہ نبی اکرم صلی اللہ علیہ وسلم سے کیا تھا، آپ صلی اللہ علیہ وسلم نے ارشاد فرمایا: «صَدَقَةٌ تَصَدَّقَ اللهُ بِهَا عَلَيْكُمْ، فَاقْبَلُوا صَدَقَتَهُ» ”یہ وہ صدقہ ہے، جو اللہ تعالیٰ نے تم لوگوں پر کیا ہے، تو تم اس کی عطا کردہ رخصت کو قبول کرو۔“ [صحیح ابن حبان/كتاب الصلاة/حدیث: 2740]

یعلی بن امیہ رضی اللہ عنہ بیان کرتے ہیں: میں نے سیدنا عمر رضی اللہ عنہ سے کہا: لوگ قصر نماز پڑھتے ہیں جبکہ اللہ تعالیٰ نے یہ بات ارشاد فرمائی ہے: ﴿اگر تمہیں یہ اندیشہ ہو، کافر لوگ تمہیں آزمائش کا شکار کر دیں گے﴾ [سورة النساء: 101] ، تو یہ صورت حال تو اب رخصت ہو چکی ہے، تو سیدنا عمر رضی اللہ عنہ نے فرمایا: میں بھی اس بات پر حیران ہوا تھا یہاں تک کہ میں نے اس بارے میں نبی اکرم صلی اللہ علیہ وسلم سے سوال کیا، تو آپ صلی اللہ علیہ وسلم نے ارشاد فرمایا: ”یہ ایک صدقہ ہے، جو اللہ تعالیٰ نے تم لوگوں پر کیا ہے، تم اس کے صدقے کو قبول کر لو۔“ [صحیح ابن حبان/كتاب الصلاة/حدیث: 2741]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ اس بات کو پسند کرتا ہے، اس کی عطا کردہ رخصت پر عمل کیا جائے، جس طرح وہ اس بات کو ناپسند کرتا ہے، اس کی نافرمانی کا ارتکاب کیا جائے۔“ [صحیح ابن حبان/كتاب الصلاة/حدیث: 2742]

سیدنا انس بن مالک رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کی اقتدا میں مدینہ منورہ میں ظہر کی نماز میں چار رکعات ادا کی ہیں اور آپ کی اقتدا میں ذوالحلیفہ میں عصر کی نماز کی دو رکعات ادا کی ہیں، آپ صلی اللہ علیہ وسلم اس وقت سفر کر رہے تھے۔ [صحیح ابن حبان/كتاب الصلاة/حدیث: 2743]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مدینہ منورہ میں ظہر کی چار رکعات ادا کیں اور آپ نے ذوالحلیفہ میں عصر کی دو رکعات ادا کیں۔ راوی بیان کرتے ہیں کہ سیدنا انس رضی اللہ عنہ نے ہمیں بتایا تھا کہ انہوں نے لوگوں کو بلند آواز میں حج اور عمرے کا تلبیہ پڑھتے ہوئے سنا تھا۔ [صحیح ابن حبان/كتاب الصلاة/حدیث: 2744]

یحییٰ بن یزید ہنائی بیان کرتے ہیں: میں نے سیدنا انس بن مالک رضی اللہ عنہ سے قصر نماز کے بارے میں دریافت کیا تو انہوں نے فرمایا: نبی اکرم صلی اللہ علیہ وسلم جب تین میل (راوی کو شک ہے شاید یہ الفاظ ہیں:) تین فرسخ کے سفر کے لیے روانہ ہوتے تھے۔ یہ شک شعبہ نامی راوی کو ہے، تو دو رکعات ادا کرتے تھے۔ [صحیح ابن حبان/كتاب الصلاة/حدیث: 2745]