سیدنا سلمان فارسی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص جمعہ کے دن غسل کرے اور جہاں تک ممکن ہو اچھی طرح پاکیزگی حاصل کرے، پھر وہ تیل لگائے یا اپنے گھر میں موجود خوشبو لگائے، پھر جمعہ کے لیے جائے اور دو آدمیوں کے درمیان فرق نہ کرے، پھر جتنا مناسب سمجھے نماز (یعنی سنتیں، یا نوافل) ادا کرے، پھر جب امام آ جائے تو خاموشی (کے ساتھ اس کا خطبہ سنے)، تو اس شخص کے اس جمعے اور اگلے جمعے تک کے درمیانی گناہوں کی مغفرت ہو جاتی ہے۔“ [صحیح ابن حبان/كتاب الصلاة/حدیث: 2776]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے جمعہ کے دن خطبہ دیا، آپ صلی اللہ علیہ وسلم نے لوگوں کے جسموں پر کام کاج والے کپڑے دیکھے تو نبی اکرم صلی اللہ علیہ وسلم نے ارشاد فرمایا: ”تم میں سے کسی پر کوئی (حرج) نہیں ہوگا اگر اس کے پاس گنجائش ہو، تو وہ جمعہ کے لیے دو کپڑے پہن لے جو اس کے کام کاج (یعنی محنت مزدوری) کے کپڑوں کے علاوہ ہوں۔“ [صحیح ابن حبان/كتاب الصلاة/حدیث: 2777]

سیدنا ابوہریرہ اور سیدنا ابوسعید خدری رضی اللہ عنہما بیان کرتے ہیں کہ ہم نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص جمعہ کے دن غسل کرے، مسواک کرے اور خوشبو لگائے، اگر وہ اس کے پاس ہو، اور عمدہ کپڑے پہنے، پھر وہ مسجد کی طرف جائے اور لوگوں کی گردنیں نہ پھلانگے، پھر جتنا اللہ کو منظور ہو اتنے نوافل ادا کرے، پھر خاموش رہے جب امام آ جائے، یہاں تک کہ وہ نماز ادا کر لے، تو یہ چیز اس کے اس جمعہ اور اس سے پہلے کے جمعہ کے درمیان (گناہوں) کا کفارہ بن جاتی ہے۔“ [صحیح ابن حبان/كتاب الصلاة/حدیث: 2778]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص وضو کرتے ہوئے اچھی طرح وضو کرے پھر جمعہ کے لیے آئے اور (خطبے) کو سنے خاموش رہے، تو اس شخص کے اس جمعے سے لے کر آگے جمعے تک اور مزید تین دن کے (گناہوں) کی مغفرت ہو جاتی ہے اور جو شخص کنکریوں کو چھوتا ہے وہ لغو کا مرتکب ہوتا ہے“۔ (امام ابن حبان رحمہ اللہ فرماتے ہیں:) جو شخص علم حدیث میں مہارت نہیں رکھتا، وہ اس غلط فہمی کا شکار ہوا کہ ایک جمعے سے دوسرے جمعے تک آٹھ دن بنتے ہیں، حالانکہ ایسا نہیں ہے کیونکہ نبی اکرم صلی اللہ علیہ وسلم نے یہ بات ارشاد نہیں فرمائی ہے کہ ایک جمعہ سے لے کر دوسرے جمعے تک کے (آٹھ دن ہیں بلکہ یہ کہ) اس کے گناہوں کی مغفرت ہو جاتی ہے۔ تو جمعے کا وقت سورج ڈھلنے کے بعد ہوتا ہے، تو جمعہ کے دن سورج ڈھلنے کے بعد سے اگلے جمعے کے سورج ڈھلنے تک سات دن بنتے ہیں اور نبی اکرم صلی اللہ علیہ وسلم کا یہ فرمان کہ اس کے علاوہ مزید تین دن تو اس طرح دس دن پورے ہو جاتے ہیں۔ اللہ تعالیٰ نے ارشاد فرمایا ہے: ﴿مَنْ جَاءَ بِالْحَسَنَةِ فَلَهُ عَشْرُ أَمْثَالِهَا﴾ [سورة الأنعام: 160] ”جو شخص نیکی کرتا ہے تو وہ دس گنا بن جاتی ہے“۔ یہ وہ بات ہے جس کے بارے میں ہم نے اپنی کتابوں میں یہ بات نقل کی ہے کہ آدمی جب اللہ تعالیٰ کی فرمانبرداری کے متعلق عمل کرتا ہے، اللہ تعالیٰ اس کی وجہ سے اس کے ان گناہوں کی مغفرت کر دیتا ہے جن کا ارتکاب وہ بعد میں نہیں کرتا۔ [صحیح ابن حبان/كتاب الصلاة/حدیث: 2779]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”جو شخص جمعہ کے دن غسل کرے اور اچھی طرح غسل کرے، پھر عمدہ کپڑے پہنے، اپنے گھر میں موجود خوشبو لگائے یا تیل لگائے، تو اس شخص کے اس جمعے اور اگلے جمعے کے درمیانی، مزید اس کے بعد تین دن کے (گناہوں) کی مغفرت ہو جاتی ہے۔“ [صحیح ابن حبان/كتاب الصلاة/حدیث: 2780]

سیدنا اوس بن اوس رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص جمعہ کے دن غسل کرتے ہوئے اچھی طرح غسل کرے، پھر وہ جلدی جائے اور پیدل چل کر جائے اور (امام کے) قریب ہو اور غور سے خطبہ سنے اور خاموش رہے اور کسی لغو حرکت کا مرتکب نہ ہو، تو اللہ تعالیٰ اس کے ہر ایک قدم کے عوض میں اسے ایک سو سال کے (نفلی) روزوں اور نوافل کا ثواب عطا کرتا ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”جو شخص غسل دے“ اس سے آپ کی مراد یہ ہے کہ وہ شخص اپنے سر کو دھوئے، اور ”وہ شخص غسل کرے“ اس سے آپ کی مراد یہ ہے کہ وہ شخص اپنے جسم کو دھوئے، کیونکہ لوگوں کے بال بڑے ہوتے تھے، تو انہیں اہتمام کے ساتھ ان کو دھونے کی ضرورت پیش آتی تھی، اور نبی اکرم صلی اللہ علیہ وسلم کا یہ فرمان کہ ”وہ شخص جلدی جائے اور جلدی کرے“ اس سے مراد یہ ہے کہ وہ غسل کے لیے جلدی کرے اور جمعے کے لیے جلدی جائے۔ [صحیح ابن حبان/كتاب الصلاة/حدیث: 2781]

طاؤس یمانی بیان کرتے ہیں: میں نے سیدنا عبداللہ بن عباس رضی اللہ عنہما سے کہا: لوگ یہ کہتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”تم لوگ جمعہ کے دن غسل کرو اور اپنے سر کو دھو لو، ماسوائے اس کے کہ تم جنبی ہو، اور تم خوشبو بھی لگاؤ۔“ تو سیدنا عبداللہ بن عباس رضی اللہ عنہما نے فرمایا: جہاں تک خوشبو کا تعلق ہے تو اس کے بارے میں مجھے معلوم نہیں ہے، البتہ جہاں تک غسل کا تعلق ہے تو یہ بات ٹھیک ہے۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ہے کہ: ”ماسوائے اس کے کہ تم جنبی ہو“ اس میں اس بات کی دلیل موجود ہے کہ جمعہ کے دن غسل جنابت کرنا جبکہ وہ صبح صادق ہو جانے کے بعد ہو، یہ جمعہ کے لیے غسل کرنے کی جگہ کافی ہو گا۔ اس میں اس بات کی دلیل موجود ہے کہ جمعہ کے دن غسل کرنا فرض نہیں ہے؛ کیونکہ اگر یہ فرض ہوتا تو ان دونوں میں سے کوئی ایک غسل دوسرے کی جگہ کافی نہ ہوتا۔ [صحیح ابن حبان/كتاب الصلاة/حدیث: 2782]

سیدنا عمر رضی اللہ عنہ فرماتے ہیں: ”سفر کی نماز، عید الفطر کی نماز، عید الاضحی کی نماز اور جمعہ کی نماز دو رکعات ہوتی ہیں اور یہ مکمل نماز ہے، اس میں قصر نہیں ہے، یہ بات تمہارے نبی صلی اللہ علیہ وسلم کی زبانی ثابت ہے۔“ [صحیح ابن حبان/كتاب الصلاة/حدیث: 2783]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ہم قیامت کے دن سبقت لے جانے والے ہوں گے، اس کی وجہ یہ ہے کہ ان لوگوں کو ہم سے پہلے کتاب دی گئی اور ہمیں ان کے بعد دی گئی اور یہ وہ دن ہے جو ان لوگوں پر فرض قرار دیا گیا تو انہوں نے اس کے بارے میں اختلاف کیا، تو اللہ تعالیٰ نے اس کی طرف ہماری رہنمائی کی تو اس دن کے حوالے سے وہ لوگ ہمارے پیروکار ہیں، یہودیوں کا دن کل کا (یعنی ہفتے کا ہے) اور عیسائیوں کا دن پرسوں کا (یعنی اتوار کا ہے)۔“ [صحیح ابن حبان/كتاب الصلاة/حدیث: 2784]

سیدنا عبداللہ بن عمر رضی اللہ عنہما اور سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کے بارے میں گواہی دے کر یہ بات بیان کرتے ہیں کہ آپ نے منبر پر یہ بات ارشاد فرمائی: ”یا تو لوگ جمعے کو ترک کرنے سے باز آ جائیں گے یا پھر اللہ تعالیٰ ان کے دلوں پر مہر لگا دے گا اور وہ لوگ غافلین میں شامل ہو جائیں گے۔“ [صحیح ابن حبان/كتاب الصلاة/حدیث: 2785]