سیدنا حارثہ بن وہب خزاعی رضی اللہ عنہ بیان کرتے ہیں: میں نے حجۃ الوداع کے موقع پر مکہ مکرمہ میں نبی اکرم صلی اللہ علیہ وسلم کی اقتدا میں دو رکعات ادا کیں، حالانکہ اس وقت لوگوں کی تعداد زیادہ تھی اور وہ زیادہ امن کی حالت میں تھے۔ [صحیح ابن حبان/كتاب الصلاة/حدیث: 2756]

سیدنا حارثہ بن وہب رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کی اقتدا میں نماز پڑھی (راوی کو شک ہے) آپ صلی اللہ علیہ وسلم نے منیٰ میں ہمیں نماز پڑھائی، اس وقت ہماری تعداد زیادہ تھی لیکن آپ صلی اللہ علیہ وسلم نے ہمیں دو رکعات پڑھائی تھیں۔ [صحیح ابن حبان/كتاب الصلاة/حدیث: 2757]

سالم بن عبداللہ اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں، نبی اکرم صلی اللہ علیہ وسلم نے منیٰ میں مسافر کی نماز کی طرح دو رکعات پڑھائی تھیں۔ سیدنا ابوبکر اور سیدنا عمر رضی اللہ عنہما نے اور سیدنا عثمان رضی اللہ عنہ نے اپنے عہدِ خلافت کے ابتدائی حصے میں بھی دو رکعات پڑھائی تھیں، بعد میں وہ وہاں چار رکعات پڑھنے لگے۔ [صحیح ابن حبان/كتاب الصلاة/حدیث: 2758]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب ابن آدم آیتِ سجدہ تلاوت کرتا ہے، تو شیطان روتا ہوا الگ ہو جاتا ہے، وہ یہ کہتا ہے: ہائے افسوس! ابن آدم کو سجدہ کرنے کا حکم دیا گیا، اس نے سجدہ کر لیا تو اسے جنت مل جائے گی اور مجھے سجدہ کرنے کا حکم دیا گیا، میں نے انکار کیا تو مجھے جہنم ملے گی۔“ [صحیح ابن حبان/كتاب الصلاة/حدیث: 2759]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم قرآن کی تلاوت کرتے ہوئے جب آیت سجدہ پر پہنچتے تو سجدہ تلاوت کرتے تھے اور آپ کے ہمراہ ہم بھی سجدہ کیا کرتے تھے۔ [صحیح ابن حبان/كتاب الصلاة/حدیث: 2760]

سیدنا ابوہریرہ رضی اللہ عنہ کے بارے میں یہ بات منقول ہے کہ انہوں نے لوگوں کے سامنے سورۃ الانشقاق تلاوت کی تو اس میں سجدہ تلاوت کیا، جب وہ یہ کر کے فارغ ہوئے تو انہوں نے لوگوں کو بتایا کہ نبی اکرم صلی اللہ علیہ وسلم نے ”بھی اس میں سجدہ تلاوت کیا ہے۔“ [صحیح ابن حبان/كتاب الصلاة/حدیث: 2761]

سیدنا زید بن ثابت رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کی موجودگی میں سورہ نجم کی تلاوت کی تو آپ صلی اللہ علیہ وسلم نے سجدہ تلاوت کیا۔ [صحیح ابن حبان/كتاب الصلاة/حدیث: 2762]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سورۃ النجم میں سجدہ تلاوت کیا، آپ کے ہمراہ مسلمانوں، مشرکین، جنات اور انسانوں نے بھی سجدہ تلاوت کیا۔ [صحیح ابن حبان/كتاب الصلاة/حدیث: 2763]

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ﴿سورة النجم﴾ کی تلاوت کی تو سجدہ تلاوت کیا، حاضرین میں سے ہر شخص نے سجدہ تلاوت کیا صرف ایک شخص نے نہیں کیا، اس نے مٹھی میں کنکریاں لیں اور اپنی پیشانی کے ساتھ لگا دیں اور بولا: ”میرے لیے اتنا ہی کافی ہے۔“ سیدنا عبداللہ رضی اللہ عنہ بیان کرتے ہیں کہ بعد میں، میں نے اس شخص کو دیکھا، وہ کافر ہونے کے عالم میں قتل ہوا۔ [صحیح ابن حبان/كتاب الصلاة/حدیث: 2764]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے سورہ ﴿ص﴾ [سورة ص: 1] کی تلاوت کی، آپ اس وقت منبر پر موجود تھے، جب آپ سجدے کے مقام پر پہنچے تو منبر سے نیچے اترے، آپ صلی اللہ علیہ وسلم نے سجدہ تلاوت کیا اور آپ کے ہمراہ لوگوں نے بھی سجدہ کیا۔ جب اگلا دن آیا تو آپ صلی اللہ علیہ وسلم نے قرأت کی اور جب سجدہ تلاوت کے مقام پر پہنچے تو لوگ سجدہ کرنے کے لیے تیار ہو گئے۔ نبی اکرم صلی اللہ علیہ وسلم نے ارشاد فرمایا: ”یہ ایک نبی کی توبہ کا واقعہ ہے، لیکن میں دیکھ رہا ہوں تم لوگ سجدہ کرنے کے لیے تیار ہو۔“ پھر آپ صلی اللہ علیہ وسلم منبر سے نیچے اترے، آپ صلی اللہ علیہ وسلم نے سجدہ کیا اور لوگوں نے بھی سجدہ کیا۔ [صحیح ابن حبان/كتاب الصلاة/حدیث: 2765]