سیدنا سلیمان بن بریدہ رحمہ اللہ اپنے والد (سیدنا بریدہ رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے وضو کرتے ہوئے اپنے موزوں پر مسح کیا اور آپ صلی اللہ علیہ وسلم نے تمام نمازیں ایک ہی وضو کے ساتھ ادا کیں۔ [صحیح ابن حبان/كتاب الصلاة/حدیث: 1706]

ابن بریدہ اپنے والد (بریدہ رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم ہر نماز کے لیے وضو کیا کرتے تھے، جب فتح مکہ کا دن آیا تو آپ صلی اللہ علیہ وسلم نے ایک ہی وضو کے ساتھ تمام نمازیں ادا کیں۔ [صحیح ابن حبان/كتاب الصلاة/حدیث: 1707]

سلیمان بن بریدہ اپنے والد (بریدہ رضی اللہ عنہ) کا یہ بیان نقل کرتے ہیں: نبی اکرم صلی اللہ علیہ وسلم نے فتح مکہ کے دن تمام نمازیں ایک ہی وضو کے ساتھ ادا کیں۔ آپ نے (وضو کرتے ہوئے) اپنے موزوں پر مسح کیا، سیدنا عمر رضی اللہ عنہ نے آپ کی خدمت میں عرض کی: ”میں نے آج آپ کو ایک ایسا کام کرتے ہوئے دیکھا ہے، جو آپ آج سے پہلے نہیں کرتے تھے۔“ نبی اکرم صلی اللہ علیہ وسلم نے فرمایا: ”اے عمر! میں نے جان بوجھ کر ایسا کیا ہے۔“ [صحیح ابن حبان/كتاب الصلاة/حدیث: 1708]

سیدہ عائشہ صدیقہ رضی اللہ عنہا بیان کرتی ہیں: انہوں نے سیدہ اسماء رضی اللہ عنہا سے عارضی استعمال کے لیے ایک ہار لیا، وہ گم ہو گیا، تو نبی اکرم صلی اللہ علیہ وسلم نے اپنے اصحاب میں سے کچھ لوگوں کو اس کی تلاش میں بھیجا، ان لوگوں کو نماز کا وقت ہو گیا، انہوں نے وضو کے بغیر ہی نماز ادا کر لی، جب وہ نبی اکرم صلی اللہ علیہ وسلم کی خدمت میں حاضر ہوئے تو انہوں نے اس بات کی شکایت آپ کے سامنے کی، تو تیمم کے حکم سے متعلق آیت نازل ہو گئی، اس پر سیدنا اُسید بن حضیر رضی اللہ عنہ نے کہا (یعنی سیدہ عائشہ رضی اللہ عنہا کو مخاطب کرتے ہوئے کہا): اللہ تعالیٰ آپ کو جزائے خیر عطا کرے، اللہ کی قسم! جب بھی آپ کو کسی مشکل کا سامنا کرنا پڑا تو اللہ تعالیٰ نے اس میں سے نکلنے کا راستہ بنا دیا اور مسلمانوں کے لیے اس میں برکت رکھ دی۔ [صحیح ابن حبان/كتاب الصلاة/حدیث: 1709]

سیدنا جریر رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم ان کے پاس سے گزرے، انہوں نے اس وقت اپنے زانوں سے کپڑا ہٹایا ہوا تھا، تو نبی اکرم صلی اللہ علیہ وسلم نے فرمایا: ”اسے ڈھانپ لو، کیونکہ یہ پردے کی چیز ہے۔“ [صحیح ابن حبان/كتاب الصلاة/حدیث: 1710]

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”اللہ تعالیٰ بالغ عورت کی نماز چادر کے بغیر قبول نہیں کرتا۔“ [صحیح ابن حبان/كتاب الصلاة/حدیث: 1711]

یہی روایت ایک اور سند کے ہمراہ منقول ہے، تاہم اس میں یہ الفاظ ہیں، نبی اکرم صلی اللہ علیہ وسلم نے فرمایا: ”بالغ عورت کی نماز چادر کے ساتھ ہی ہوتی ہے۔“ [صحیح ابن حبان/كتاب الصلاة/حدیث: 1712]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کرنے لگے تو تہبند باندھ لے اور اسے موڑ لے۔“ [صحیح ابن حبان/كتاب الصلاة/حدیث: 1713]

سیدنا ابوہریرہ رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم سے سوال کیا: کیا کوئی شخص ایک کپڑے میں نماز ادا کر سکتا ہے؟ تو نبی اکرم صلی اللہ علیہ وسلم نے فرمایا: ”اگر اللہ تعالیٰ تمہیں گنجائش دے، تو تم اپنے آپ کو گنجائش دو کہ آدمی اپنے جسم پر دو طرح کے کپڑے اکٹھے کرے۔ آدمی تہبند اور چادر میں، یا تہبند اور قمیص میں، یا تہبند اور قبا میں، یا شلوار اور چادر میں، یا شلوار اور قبا میں، یا پاجامے اور قمیص میں، یا پاجامے اور قبا میں نماز ادا کرے۔“ راوی بیان کرتے ہیں کہ میرا خیال ہے انہوں نے یہ بھی فرمایا تھا: ”پاجامے اور چادر میں (نماز ادا کرے)۔“ [صحیح ابن حبان/كتاب الصلاة/حدیث: 1714]

عبداللہ بن دینار بیان کرتے ہیں کہ سیدنا عبداللہ بن عمر رضی اللہ عنہما نے یہ بات بیان کی ہے کہ ایک مرتبہ لوگ قبا میں صبح کی نماز ادا کر رہے تھے، اسی دوران ایک شخص ان کے پاس آیا اور اس نے ان سے کہا: ”اللہ کے رسول صلی اللہ علیہ وسلم پر گزشتہ رات قرآن نازل ہوا ہے اور آپ صلی اللہ علیہ وسلم کو اس بات کا حکم دیا گیا ہے کہ آپ خانہ کعبہ کی طرف رخ کر لیں، تو تم لوگ بھی اس کی طرف رخ کر لو۔“ ان لوگوں کے چہرے اس وقت شام کی طرف تھے، تو وہ گھوم کر خانہ کعبہ کی طرف ہو گئے۔ [صحیح ابن حبان/كتاب الصلاة/حدیث: 1715]