سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”تمہارا کیا خیال ہے؟ اگر تم میں سے کسی ایک کے دروازے پر نہر بہتی ہو اور وہ اس میں روزانہ پانچ مرتبہ غسل کرتا ہو تو تم اس بارے میں کیا کہتے ہو؟ کیا (یہ عمل) اس کے میل میں سے کوئی بھی چیز باقی رہنے دے گا؟“ لوگوں نے عرض کی: اس کے میل میں سے کوئی بھی چیز باقی نہیں رہے گی۔ نبی اکرم صلی اللہ علیہ وسلم نے فرمایا: ”یہ پانچ نمازوں کی مثال ہے جن کے ذریعے اللہ تعالیٰ گناہوں کو مٹا دے گا۔“ [صحیح ابن حبان/كتاب الصلاة/حدیث: 1726]

سیدنا واثلہ بن اسقع رضی اللہ عنہ بیان کرتے ہیں ایک شخص نبی اکرم صلی اللہ علیہ وسلم کی خدمت میں حاضر ہوا تو اس نے عرض کی: یا رسول اللہ! میں نے قابلِ حد جرم کا ارتکاب کیا ہے آپ مجھ پر حد قائم کریں۔ نبی اکرم صلی اللہ علیہ وسلم نے اس سے منہ موڑ لیا۔ پھر نماز قائم کی گئی۔ نبی اکرم صلی اللہ علیہ وسلم نے سلام پھیرا۔ اس نے عرض کیا: یا رسول اللہ! میں نے قابلِ حد جرم کا ارتکاب کیا ہے مجھ پر اسے قائم کریں۔ نبی اکرم صلی اللہ علیہ وسلم نے دریافت کیا: ”کیا جب تم آئے تھے، تو تم نے وضو کیا تھا؟“ اس نے عرض کی: جی ہاں! نبی اکرم صلی اللہ علیہ وسلم نے دریافت کیا: ”کیا تم نے ہمارے ساتھ نماز ادا کی ہے؟“ اس نے کہا: جی ہاں! [صحیح ابن حبان/كتاب الصلاة/حدیث: 1727]

سیدنا عبداللہ بن مسعود رضی اللہ عنہ بیان کرتے ہیں: ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: میں نے ایک باغ میں ایک عورت کو پکڑ لیا اور میں نے اس کے ساتھ صحبت کرنے کے علاوہ ہر عمل کیا، اب آپ جو چاہیں میرے ساتھ سلوک کریں۔ (راوی بیان کرتے ہیں) نبی اکرم صلی اللہ علیہ وسلم نے اسے کچھ نہیں فرمایا، پھر آپ صلی اللہ علیہ وسلم نے اسے بلایا اور اس کے سامنے تلاوت کیا: ﴿وَأَقِمِ الصَّلَاةَ طَرَفَيِ النَّهَارِ وَزُلَفًا مِنَ اللَّيْلِ ۚ إِنَّ الْحَسَنَاتِ يُذْهِبْنَ السَّيِّئَاتِ﴾ [سورة هود: 114] ”دن کے دونوں کناروں میں اور رات کے کچھ حصے میں نماز قائم کرو، بیشک نیکیاں گناہوں کو ختم کر دیتی ہیں۔“ (امام ابن حبان رحمہ اللہ فرماتے ہیں:) عرب بعض اوقات کسی چیز کا تذکرہ کرتے ہیں جس کا نام کئی اجزاء اور شعبوں پر مشتمل ہوتا ہے، پھر عرب ان اجزاء میں سے کسی ایک جزء کا ذکر اس پوری چیز کے نام سے کر دیتے ہیں؛ محظورات کی تمام اقسام کے ارتکاب سے بندوں کو منع کیا گیا ہے اور ان سب پر لفظ ”معصیت“ کا اطلاق ہوتا ہے، ان میں سے ایک زنا ہے جو اپنے مرتکب پر حد کو واجب کر دیتا ہے، اس کے کچھ اسباب ہیں جو اس کی طرف لے جاتے ہیں، تو یہاں ایک سبب کا اطلاق پورے فعل پر کر دیا گیا ہے اور وہ سبب بوسہ لینا اور چھونا ہے، صحبت کرنا مراد نہیں ہے۔ [صحیح ابن حبان/كتاب الصلاة/حدیث: 1728]

سیدنا عبداللہ بن مسعود رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے اس بات کا تذکرہ کیا کہ اس نے ایک عورت کا بوسہ لیا ہے، وہ شخص نبی اکرم صلی اللہ علیہ وسلم سے اس بات کا کفارہ دریافت کرنا چاہتا تھا، تو اللہ تعالیٰ نے یہ آیت نازل کی: ﴿وَأَقِمِ الصَّلَاةَ طَرَفَيِ النَّهَارِ وَزُلَفًا مِنَ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ﴾ [سورة هود: 114] ”دن کے دونوں کناروں میں اور رات کے کچھ حصے میں نماز قائم کرو، بے شک نیکیاں گناہوں کو ختم کر دیتی ہیں، یہ بات نصیحت حاصل کرنے والوں کے لیے نصیحت ہے“۔ راوی بیان کرتے ہیں: اس شخص نے دریافت کیا کہ کیا یہ حکم صرف میرے لیے ہے؟ نبی اکرم صلی اللہ علیہ وسلم نے فرمایا: ”یہ میری امت کے ہر اس شخص کے لیے ہے جو اس پر عمل کرے“۔ [صحیح ابن حبان/كتاب الصلاة/حدیث: 1729]

سیدنا عبداللہ بن مسعود رضی اللہ عنہ بیان کرتے ہیں کہ ایک شخص نے عرض کی: یا رسول اللہ! میں ایک باغ میں ایک عورت کو ملا، اسے اپنے ساتھ چمٹا لیا، میں نے اس کا بوسہ لیا، میں نے اس کے ساتھ مباشرت کی، میں نے اس کے ساتھ ہر کام کیا لیکن میں نے اس کے ساتھ صحبت نہیں کی، تو نبی اکرم صلی اللہ علیہ وسلم خاموش ہو گئے۔ اللہ تعالیٰ نے یہ آیت نازل فرمائی: ﴿وَأَقِمِ الصَّلَاةَ طَرَفَيِ النَّهَارِ وَزُلَفًا مِنَّ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ﴾ [سورة هود: 114] ”دن کے دونوں کناروں میں اور رات کے کچھ حصے میں نماز قائم کرو، بیشک نیکیاں گناہوں کو ختم کر دیتی ہیں، تو یہ بات نصیحت حاصل کرنے والوں کے لیے نصیحت ہے۔“ راوی بیان کرتے ہیں کہ نبی اکرم صلی اللہ علیہ وسلم نے اس شخص کو بلایا اور اس کے سامنے اسے تلاوت فرمایا۔ سیدنا عمر رضی اللہ عنہ نے عرض کی: یا رسول اللہ! کیا یہ حکم اس کے لیے خاص ہے؟ نبی اکرم صلی اللہ علیہ وسلم نے فرمایا: ”(جی نہیں) بلکہ تمام لوگوں کے لیے ہے۔“ [صحیح ابن حبان/كتاب الصلاة/حدیث: 1730]

ابورافع بیان کرتے ہیں کہ انہوں نے سیدنا عبادہ بن صامت رضی اللہ عنہ سے یہ کہا: اے ابو ولید! سیدنا ابو محمد—جو انصار سے تعلق رکھنے والے ایک صاحب اور صحابی تھے—وہ اس بات کے قائل ہیں کہ وتر لازم ہیں۔ سیدنا عبادہ بن صامت رضی اللہ عنہ نے کہا: ابو محمد نے غلط کہا ہے، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص پانچ نمازیں ادا کرتا ہے اور انہیں مکمل ادا کرتا ہے اور ان کے حق میں کوئی کمی نہیں کرتا، تو اللہ تعالیٰ کی بارگاہ میں اس شخص کے لیے یہ عہد ہے کہ اللہ تعالیٰ اسے کوئی عذاب نہیں دے گا، اور جو شخص انہیں ادا کرتا ہے، لیکن ان کے حق میں سے کسی چیز کی کمی کرتا ہے، تو ایسے شخص کے بارے میں اللہ تعالیٰ کی بارگاہ میں کوئی عہد نہیں ہے۔ اگر وہ چاہے گا، تو اس پر رحم کرے گا اور اگر چاہے گا، تو اس کو عذاب دے گا۔“ (امام ابن حبان رحمہ اللہ فرماتے ہیں: ابو محمد نامی راوی کا نام مسعود بن زید بن سبیع انصاری ہے، یہ بنو دینار بن نجار سے تعلق رکھتے ہیں، یہ صحابی ہیں، انہوں نے شام میں سکونت اختیار کی تھی)۔ [صحیح ابن حبان/كتاب الصلاة/حدیث: 1731]

ابن محیریز بیان کرتے ہیں کہ ایک شخص سیدنا عبادہ بن صامت رضی اللہ عنہ کے پاس آیا اور کہا: اے ابو ولید! میں نے سیدنا ابومحمد انصاری رضی اللہ عنہ کو یہ بیان کرتے ہوئے سنا ہے کہ وتر واجب ہیں۔ سیدنا عبادہ رضی اللہ عنہ نے فرمایا: ابومحمد نے غلط کہا ہے۔ میں نے نبی کریم صلی اللہ علیہ وسلم کو یہ بات ارشاد فرماتے ہوئے سنا ہے: ”پانچ نمازیں ہیں جن کو اللہ تعالیٰ نے اپنے بندوں پر فرض کیا ہے، جو شخص انہیں ادا کرے گا اور مکمل کرے گا اور ان کے حق کو کم سمجھتے ہوئے ان میں کمی نہیں کرے گا، تو اس کے لیے اللہ تعالیٰ کی بارگاہ میں یہ عہد ہے کہ اللہ تعالیٰ اسے جنت میں داخل کرے گا، اور جو شخص انہیں ادا کرے گا (لیکن) ان کے حق کو کم سمجھتے ہوئے ان میں کمی کرے گا، تو اس شخص کے لیے اللہ تعالیٰ کی بارگاہ میں کوئی عہد نہیں ہے، اور اگر وہ چاہے گا تو وہ عذاب دے گا اور اگر چاہے گا تو اس پر رحم کرے گا۔“ (امام ابن حبان رحمہ اللہ فرماتے ہیں: سیدنا عبادہ رضی اللہ عنہ کا یہ کہنا ”ابومحمد نے جھوٹ کہا ہے“ اس سے مراد انہوں نے غلط کہا ہے۔ اسی طرح سیدہ عائشہ رضی اللہ عنہا سے مروی ہے کہ یہ محاورہ ہے کہ جب کوئی شخص غلط بات کہے تو اس کے بارے میں کہا جاتا ہے ”اس نے جھوٹ کہا ہے“۔ اللہ تعالیٰ نے سیدنا محمد صلی اللہ علیہ وسلم کے اصحاب کو اس چیز سے محفوظ رکھا ہے کہ ان میں کوئی قابلِ اعتراض چیز ہو۔ ارشادِ باری تعالیٰ ہے: ﴿يَوْمَ لَا يُخْزِي اللَّهُ النَّبِيَّ وَالَّذِينَ آمَنُوا مَعَهُ﴾ [سورة التحريم: 8] ”اس دن اللہ تعالیٰ نبی اور اس کے ساتھ موجود اہل ایمان کو رسوا نہیں کرے گا، ان کا نور...“ تو جب اللہ تعالیٰ نے اس بات کی اطلاع دی کہ وہ قیامت کے دن انہیں رسوا نہیں کرے گا تو وہ اس بات کے زیادہ لائق ہیں کہ ان پر جرح نہ کی جائے۔) سیدنا عبادہ رضی اللہ عنہ سے سوال کرنے والا شخص ابورفیع مخدجی تھا۔ [صحیح ابن حبان/كتاب الصلاة/حدیث: 1732]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”پانچ نمازیں اور ایک جمعہ دوسرے جمعے تک (درمیان میں) کیے جانے والے گناہوں کا کفارہ بن جاتی ہیں جب تک کبیرہ گناہ کا ارتکاب نہ کیا جائے۔“ [صحیح ابن حبان/كتاب الصلاة/حدیث: 1733]

سیدنا عبداللہ بن عمر رضی اللہ عنہما کے بارے میں یہ بات منقول ہے کہ انہوں نے ایک شخص کو نماز ادا کرتے ہوئے دیکھا، اس نے طویل نماز ادا کی تھی اور اس کو خوب کھینچا تھا، سیدنا عبداللہ رضی اللہ عنہما نے دریافت کیا کہ کون شخص اسے جانتا ہے، تو ایک صاحب نے جواب دیا: میں، سیدنا عبداللہ رضی اللہ عنہما نے فرمایا: اگر میں اسے جانتا ہوتا تو میں اسے ہدایت کرتا کہ یہ رکوع اور سجدہ طویل کرے کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا: ”بندہ جب کھڑا ہو کر نماز ادا کرتا ہے، تو اس کے گناہ لائے جاتے ہیں اور وہ اس کے سر یا کندھے پر رکھ دیے جاتے ہیں اور جب وہ رکوع یا سجدہ میں جاتا ہے، تو وہ اس سے گر جاتے ہیں۔“ [صحیح ابن حبان/كتاب الصلاة/حدیث: 1734]

معدان بن طلحہ یعمری بیان کرتے ہیں کہ میری ملاقات سیدنا ثوبان رضی اللہ عنہ سے ہوئی، جو کہ نبی اکرم صلی اللہ علیہ وسلم کے آزاد کردہ غلام تھے۔ میں نے ان سے کہا: مجھے کوئی حدیث بیان کریں، تاکہ اللہ تعالیٰ اس کے ذریعے مجھے نفع عطا کرے، تو انہوں نے کہا: تم پر سجدے کرنا لازم ہے، کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو بھی شخص اللہ تعالیٰ کے لیے ایک سجدہ کرتا ہے، اللہ تعالیٰ اس کی وجہ سے اس کا ایک درجہ بلند کرتا ہے اور اس کی وجہ سے اس کا ایک گناہ ختم کرتا ہے۔“ معدان بیان کرتے ہیں کہ پھر میری ملاقات سیدنا ابودرداء رضی اللہ عنہ سے ہوئی، میں نے ان سے یہ سوال کیا، تو انہوں نے بھی اس کی مانند جواب دیا۔ [صحیح ابن حبان/كتاب الصلاة/حدیث: 1735]