سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”جس گھر میں کھجوریں نہ ہوں، اس کے گھر والے بھوکے ہوتے ہیں۔“ [صحیح ابن حبان/كتاب الأطعمة/حدیث: 5206]

سیدہ اسماء بنت ابوبکر رضی اللہ عنہما کے بارے میں یہ بات منقول ہے کہ جب وہ ثرید بناتی تھیں، تو اسے ڈھانپ دیتی تھیں یہاں تک کہ اس کی گرمی رخصت ہو جاتی تھی، پھر وہ یہ فرماتی تھیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”یہ برکت میں اضافے کا باعث ہے۔“ [صحیح ابن حبان/كتاب الأطعمة/حدیث: 5207]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم قضائے حاجت کر کے تشریف لائے، آپ کھانا کھانے لگے، تو آپ کی خدمت میں عرض کی گئی: آپ وضو کرنے سے پہلے ہی (کھانے لگے ہیں؟) نبی اکرم صلی اللہ علیہ وسلم نے فرمایا: ”میں کیا نماز پڑھنے لگا ہوں جو وضو کروں؟“ [صحیح ابن حبان/كتاب الأطعمة/حدیث: 5208]

سیدنا انس رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کھانا رکھ دیا جائے اور نماز کھڑی ہو جائے تو پہلے کھانا کھا لو۔“ [صحیح ابن حبان/كتاب الأطعمة/حدیث: 5209]

یہی روایت ایک اور سند کے ہمراہ سیدنا انس بن مالک رضی اللہ عنہ کے حوالے سے منقول ہے۔ [صحیح ابن حبان/كتاب الأطعمة/حدیث: 5210]

سیدنا عمر بن ابوسلمہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے مجھ سے فرمایا: ”اے میرے بیٹے! بیٹھو، «بِسْمِ اللّٰهِ» ”اللہ کے نام سے“ پڑھو اور اپنے دائیں ہاتھ سے اور اپنے آگے سے کھاؤ۔“ سیدنا عمر بن ابوسلمہ رضی اللہ عنہما فرماتے ہیں کہ اس کے بعد میں ہمیشہ اسی طرح کھاتا ہوں۔ (امام ابن حبان رحمہ اللہ فرماتے ہیں:) ابووجزہ نامی راوی یزید بن عبید سعدی ہے۔ [صحیح ابن حبان/كتاب الأطعمة/حدیث: 5211]

عبدالرحمن بن محمد اپنے والد کے حوالے سے اپنے دادا رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم نے انہیں کھانے پر بلایا اور فرمایا: ”اے میرے بیٹے! آگے آ جاؤ اور اپنے آگے سے کھاؤ، اپنے دائیں ہاتھ سے کھاؤ اور اس پر اللہ کا نام لے لو۔“ [صحیح ابن حبان/كتاب الأطعمة/حدیث: 5212]

قاسم بن عبدالرحمن اپنے والد کے حوالے سے اپنے دادا (سیدنا عبداللہ بن مسعود رضی اللہ عنہ) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کھانے کے آغاز میں اللہ کا ذکر کرنا بھول جائے تو اسے جب یاد آئے تو وہ اس وقت یہ پڑھ لے: «بِسْمِ اللَّهِ فِي أَوَّلِهِ وَآخِرِهِ» ”اللہ تعالیٰ کے نام سے برکت حاصل کرتے ہوئے آغاز میں بھی اور آخر میں بھی۔“ تو وہ گویا اپنے کھانے کو نئے سرے سے شروع کرے گا، اس سے پہلے جو خرابی اس تک پہنچی تھی اسے روک دے گا۔“ [صحیح ابن حبان/كتاب الأطعمة/حدیث: 5213]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم چھ آدمیوں کے ہمراہ کھانا کھا رہے تھے، اسی دوران ایک دیہاتی آیا اور اس نے دو لقمے لیے تو نبی اکرم صلی اللہ علیہ وسلم نے فرمایا: ”اگر اس نے بسم اللہ پڑھ لی ہوتی تو یہ کھانا تم سب کے لیے کافی ہوتا، جب کوئی شخص کھانا کھائے تو اسے اللہ کا نام لے لینا چاہیے اور اگر وہ اس کے آغاز میں اللہ کا نام لینا بھول جاتا ہے تو پھر یہ پڑھنا چاہیے: «بِسْمِ اللَّهِ فِي أَوَّلِهِ وَآخِرِهِ» ”اللہ تعالیٰ کے نام سے برکت حاصل کرتے ہوئے اس کے آغاز میں بھی اور آخر میں بھی۔““ [صحیح ابن حبان/كتاب الأطعمة/حدیث: 5214]

سیدنا عمر بن ابوسلمہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے میرے بیٹے! آگے آ جاؤ، اللہ کا نام لو، اپنے دائیں ہاتھ سے اور اپنے آگے سے کھاؤ۔“ (امام ابن حبان رحمہ اللہ فرماتے ہیں:) ابووجزہ نامی راوی کا نام یزید بن عبید سعدی ہے۔ [صحیح ابن حبان/كتاب الأطعمة/حدیث: 5215]