سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم خربوزے اور کھجور کو ملا کر کھا لیا کرتے تھے۔ [صحیح ابن حبان/كتاب الأطعمة/حدیث: 5246]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کھجور کے ہمراہ خربوزہ کھا لیتے تھے۔ [صحیح ابن حبان/كتاب الأطعمة/حدیث: 5247]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کھجور کے ہمراہ خربوزہ کھا لیتے تھے (یہاں ایک لفظ کے بارے میں راوی کو شک ہے)، یہ شک امام احمد بن حنبل رحمہ اللہ کو ہے۔ [صحیح ابن حبان/كتاب الأطعمة/حدیث: 5248]

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کسی شخص کا لقمہ گر جائے تو اسے اس سے گندگی صاف کر کے اسے کھا لینا چاہیے، اسے شیطان کے لیے نہیں چھوڑنا چاہیے اور تم پیالے کو پونچھ لیا کرو کیونکہ یہ بات معلوم نہیں کہ تمہارے کھانے کے کون سے حصے میں برکت ہے۔“ [صحیح ابن حبان/كتاب الأطعمة/حدیث: 5249]

سیدنا ابوہریرہ رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا: ”جب کسی شخص کے برتن میں مکھی گر جائے تو وہ اسے ڈبو دے کیونکہ اس کے دو پروں میں سے ایک میں بیماری ہوتی ہے اور دوسرے میں شفا ہوتی ہے، وہ اپنے اس پر کے ذریعے بچنے کی کوشش کرتی ہے جس میں بیماری ہوتی ہے، تو آدمی کو اسے مکمل ڈبو کر پھر باہر نکالنا چاہیے۔“ (امام ابن حبان رحمہ اللہ فرماتے ہیں:) عرب یہ لفظ ڈبونے اور اٹھانے دونوں کے لیے استعمال کرتے ہیں کیونکہ لفظ «اِتِّقَاء» ان دونوں معنی کے لیے استعمال ہوتا ہے۔ [صحیح ابن حبان/كتاب الأطعمة/حدیث: 5250]

سیدنا کعب بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم تین انگلیوں کے ساتھ کھایا کرتے تھے اور انہیں چاٹ لیا کرتے تھے۔ [صحیح ابن حبان/كتاب الأطعمة/حدیث: 5251]

سیدنا انس رضی اللہ عنہ بیان کرتے ہیں: نبی اکرم صلی اللہ علیہ وسلم جب کھانا کھاتے تھے تو آپ اپنی تین انگلیاں چاٹ لیا کرتے تھے۔ [صحیح ابن حبان/كتاب الأطعمة/حدیث: 5252]

سیدنا جابر رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”جب کوئی شخص کھانا کھا رہا ہو اور اس کا لقمہ اس کے ہاتھ سے گر جائے تو اس پر جو چیز لگی ہوئی ہو اسے صاف کر کے آدمی کو اسے کھا لینا چاہیے اور اس لقمے کو شیطان کے لیے نہیں چھوڑنا چاہیے اور آدمی کو اپنے ہاتھ رومال سے اس وقت تک نہیں پونچھنے چاہییں جب تک وہ اپنے ہاتھ کو چاٹ نہیں لیتا، کیونکہ آدمی یہ بات نہیں جانتا کہ اس کے کھانے کے کون سے حصے میں اس کے لیے برکت رکھی گئی ہے اور شیطان انسان کی گھات میں رہتا ہے (یہاں ایک لفظ کے بارے میں راوی کو شک ہے) ہر چیز کے حوالے سے رہتا ہے یہاں تک کہ کھانے کے حوالے سے بھی رہتا ہے (یہاں ایک لفظ کے بارے میں راوی کو شک ہے) آدمی کو پیالہ اس وقت تک نہیں اٹھانا چاہیے جب تک وہ اسے چاٹ نہیں لیتا یا کسی دوسرے کو چاٹنے کے لیے نہیں دے دیتا، کیونکہ کھانے کے آخری حصے میں برکت ہوتی ہے۔“ [صحیح ابن حبان/كتاب الأطعمة/حدیث: 5253]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم حلوے اور شہد کو پسند کرتے تھے۔ [صحیح ابن حبان/كتاب الأطعمة/حدیث: 5254]

ابوقلابہ بیان کرتے ہیں: ہم لوگ سیدنا ابوموسیٰ اشعری رضی اللہ عنہ کے پاس موجود تھے، انہوں نے دسترخوان منگوایا اس پر مرغی کا گوشت تھا، انہوں نے فرمایا: ”میں نے نبی اکرم صلی اللہ علیہ وسلم کو اسے کھاتے ہوئے دیکھا ہے۔“ [صحیح ابن حبان/كتاب الأطعمة/حدیث: 5255]