سالم اپنے والد (سیدنا عبداللہ بن عمر رضی اللہ عنہما) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص کچھ کھائے تو اپنے دائیں ہاتھ سے کھائے اور جب پیئے تو دائیں ہاتھ سے پیئے کیونکہ شیطان بائیں ہاتھ سے کھاتا ہے اور بائیں ہاتھ سے پیتا ہے۔“ (امام ابن حبان رحمہ اللہ فرماتے ہیں:) زہری کے تمام شاگردوں نے اس روایت کی سند میں یہ بات نقل کی ہے، زہری نے یہ روایت ابوبکر بن عبیداللہ سے ان کے والد کے حوالے سے نقل کی ہے، جبکہ معمر نے ان کے برخلاف روایت نقل کی ہے۔ وہ یہ کہتے ہیں: یہ زہری کے حوالے سے سالم کے حوالے سے ان کے والد (سیدنا عبداللہ بن عمر رضی اللہ عنہما) سے منقول ہے، تو معمر سے یہ بات کہی گئی کہ آپ دوسرے لوگوں کے برخلاف نقل کرتے ہیں تو انہوں نے کہا: زہری نے کئی افراد سے یہ حدیث سنی ہے تو بعض اوقات وہ کسی ایک کے حوالے سے نقل کر دیتے ہیں اور بعض اوقات دوسرے کے حوالے سے نقل کر دیتے ہیں۔ [صحیح ابن حبان/كتاب الأطعمة/حدیث: 5226]

سیدہ حفصہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ”اپنے دائیں ہاتھ کو کھانے کے لیے مخصوص رکھا تھا اور بائیں ہاتھ کو دیگر کاموں کے لیے رکھا ہوا تھا۔“ (امام ابن حبان رحمہ اللہ فرماتے ہیں:) ابوایوب نامی راوی کا نام عبداللہ بن علی افریقی ہے۔ [صحیح ابن حبان/كتاب الأطعمة/حدیث: 5227]

عبداللہ بن ابوقتادہ رحمہ اللہ اپنے والد (سیدنا ابوقتادہ رضی اللہ عنہ) کے حوالے سے یہ بات نقل کرتے ہیں کہ نبی اکرم صلی اللہ علیہ وسلم نے اس بات سے منع کیا ہے کہ ”آدمی بائیں ہاتھ کے ذریعے کوئی چیز دے یا کوئی چیز پکڑے“ اور آپ صلی اللہ علیہ وسلم نے ”پانی پیتے ہوئے برتن میں سانس لینے سے بھی منع کیا ہے۔“ [صحیح ابن حبان/كتاب الأطعمة/حدیث: 5228]

سالم بن عبداللہ رحمہ اللہ اپنے والد (سیدنا عبداللہ بن عمر رضی اللہ عنہما) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”کوئی شخص بائیں ہاتھ کے ذریعے نہ کھائے اور اس کے ذریعے نہ پیے کیونکہ شیطان اس کے ذریعے کھاتا ہے اور اس کے ذریعے پیتا ہے۔“ نافع رحمہ اللہ نے اپنی روایت میں یہ زائد الفاظ نقل کیے ہیں: ”اس کے ذریعے نہ پکڑے اور اس کے ذریعے نہ دے۔“ [صحیح ابن حبان/كتاب الأطعمة/حدیث: 5229]

سیدنا ابورزین عقیلی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”مومن کی مثال کھجور کے درخت کی طرح ہے، اگر وہ کھاتا ہے تو پاکیزہ چیز کھاتا ہے اور اگر رکھتا ہے تو پاکیزہ چیز رکھتا ہے۔“ [صحیح ابن حبان/كتاب الأطعمة/حدیث: 5230]

جبلہ بن سہیم بیان کرتے ہیں کہ سیدنا عبداللہ بن عمر رضی اللہ عنہما ہمارے پاس سے گزرے تو انہوں نے فرمایا: ”تم (دو کھجوریں) ملا کر نہ کھاؤ، کیوں کہ نبی اکرم صلی اللہ علیہ وسلم نے (دو کھجوریں) ایک ساتھ ملا کر کھانے سے منع کیا ہے، البتہ اگر آدمی اپنے بھائی سے اجازت حاصل کر لے (تو حکم مختلف ہے)۔“ [صحیح ابن حبان/كتاب الأطعمة/حدیث: 5231]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص لوگوں کے ساتھ کھجوریں کھا رہا ہو وہ دو کھجوریں ایک ساتھ نہ کھائے، اگر وہ ایسا کرنے کا ارادہ کرتا ہے تو اسے ان سے اجازت لینی چاہیے، اگر وہ اسے اجازت دے دیں تو ایسا کرے۔“ [صحیح ابن حبان/كتاب الأطعمة/حدیث: 5232]

سیدنا ابوہریرہ رضی اللہ عنہ بیان کرتے ہیں کہ میں اصحابِ صفہ میں شامل تھا۔ نبی اکرم صلی اللہ علیہ وسلم نے ہمیں عجوہ کھجوریں بھیجیں، وہ ہمارے درمیان انڈیل دی گئیں، تو ہم بھوک کی شدت کی وجہ سے دو کھجوریں ایک ساتھ کھانے لگے، ہم میں سے کوئی ایک شخص جب دو کھجوریں ایک ساتھ کھاتا تو وہ اپنے ساتھی سے یہ کہہ دیتا کہ میں دو ایک ساتھ کھا رہا ہوں تو تم بھی دو دو ایک ساتھ کھاؤ۔ [صحیح ابن حبان/كتاب الأطعمة/حدیث: 5233]

سیدنا ابوموسیٰ اشعری رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”مومن ایک آنت میں کھاتا ہے اور کافر سات آنتوں میں کھاتا ہے۔“ [صحیح ابن حبان/كتاب الأطعمة/حدیث: 5234]

سیدنا ابوہریرہ رضی اللہ عنہ بیان کرتے ہیں: ایک کافر نبی اکرم صلی اللہ علیہ وسلم کے ہاں مہمان کے طور پر آیا، نبی اکرم صلی اللہ علیہ وسلم کے حکم کے تحت اس کے لیے بکری کا دودھ دوہ لیا گیا، اس نے اس کا دودھ پی لیا پھر دوسری بکری کا دودھ دوہ لیا گیا تو اس نے وہ بھی پی لیا پھر ایک اور کا دوہ لیا گیا، اس نے وہ بھی پی لیا یہاں تک کہ اس نے سات بکریوں کا دودھ پی لیا۔ اگلے دن وہ مسلمان ہو گیا، نبی اکرم صلی اللہ علیہ وسلم کے حکم کے تحت اس کے لیے بکری کا دودھ دوہ لیا گیا تو اس نے اسے پی لیا پھر نبی اکرم صلی اللہ علیہ وسلم کے حکم کے تحت دوسری بکری کا دودھ دوہ لیا گیا تو وہ اسے مکمل طور پر نہیں پی سکا، نبی اکرم صلی اللہ علیہ وسلم نے ارشاد فرمایا: ”بے شک مومن ایک آنت میں پیتا ہے اور کافر سات آنتوں میں پیتا ہے۔“ [صحیح ابن حبان/كتاب الأطعمة/حدیث: 5235]