سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ” «اشْتِمَالُ الصَّمَّاءِ» اور «احْتِبَاء» کے طور پر ایک کپڑا پہننے“ سے منع کیا ہے۔ [صحیح ابن حبان/كتاب اللباس وآدابه/حدیث: 5426]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”دو طرح کا لباس پہننے سے منع فرمایا ہے: «اِشْتِمَالُ الصَّمَّاءِ» سے مراد یہ ہے کہ آدمی ایک کپڑے کو اس طرح سے لپیٹ لے کہ اس کے دونوں کنارے اس کے کندھے پر ہوں اور اس کا پہلو ظاہر ہو رہا ہو، اور دوسرا یہ ہے کہ آدمی ایک کپڑے کو «اِحْتِبَاءٌ» کے طور پر اس طرح لپیٹ لے کہ اس کپڑے کا کوئی بھی حصہ اس کی شرمگاہ پر نہ ہو۔“ [صحیح ابن حبان/كتاب اللباس وآدابه/حدیث: 5427]

سیدنا جابر بن عبداللہ رضی اللہ عنہما بیان کرتے ہیں: نبی اکرم صلی اللہ علیہ وسلم نے ایک دن ریشم کی بنی ہوئی قبا زیب تن کی جو آپ کو تحفے کے طور پر پیش کی گئی تھی، پھر آپ نے اسے اتار دیا۔ آپ نے وہ سیدنا عمر بن خطاب رضی اللہ عنہ کو بھجوا دی۔ عرض کی گئی: یا رسول اللہ صلی اللہ علیہ وسلم ! آپ نے اسے اتار کیوں دیا؟ نبی اکرم صلی اللہ علیہ وسلم نے فرمایا: ”جبرائیل میرے پاس آئے۔ انہوں نے مجھے اس سے منع کر دیا۔“ راوی بیان کرتے ہیں: پھر سیدنا عمر بن خطاب رضی اللہ عنہ روتے ہوئے آپ کی خدمت میں حاضر ہوئے۔ انہوں نے عرض کی: یا رسول اللہ صلی اللہ علیہ وسلم ! آپ نے خود اسے ناپسند کیا ہے اور پھر یہ مجھے عطا کر دی ہے۔ نبی اکرم صلی اللہ علیہ وسلم نے فرمایا: ”یہ میں نے تمہیں اس لیے عطا نہیں کی ہے کہ تم اسے پہن لو، یہ میں نے تمہیں اس لیے عطا کی ہے کہ تم اسے فروخت کرو۔“ تو سیدنا عمر رضی اللہ عنہ نے دو ہزار درہم کے عوض میں اسے فروخت کیا۔ [صحیح ابن حبان/كتاب اللباس وآدابه/حدیث: 5428]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ریشم کے بارے میں یہ فرمایا ہے: ”جو شخص دنیا میں اسے پہن لے گا وہ آخرت میں اسے نہیں پہنے گا۔“ [صحیح ابن حبان/كتاب اللباس وآدابه/حدیث: 5429]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے سیدنا عبدالرحمن بن عوف اور سیدنا زبیر بن عوام رضی اللہ عنہما کو خارش کی وجہ سے ریشم پہننے کی اجازت عطا کی تھی۔ [صحیح ابن حبان/كتاب اللباس وآدابه/حدیث: 5430]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے سیدنا عبدالرحمن بن عوف اور سیدنا زبیر بن عوام رضی اللہ عنہما کو ریشم پہننے کی اجازت دی تھی کیونکہ انہیں خارش لاحق تھی۔ [صحیح ابن حبان/كتاب اللباس وآدابه/حدیث: 5431]

سیدنا انس رضی اللہ عنہ بیان کرتے ہیں کہ سیدنا زبیر بن عوام اور سیدنا عبدالرحمن بن عوف رضی اللہ عنہما نے نبی اکرم صلی اللہ علیہ وسلم کی خدمت میں جوؤں کی شکایت کی، یہ ایک جنگ کے دوران کی بات ہے، تو نبی اکرم صلی اللہ علیہ وسلم نے ان دونوں حضرات کو ریشمی قمیض پہننے کی اجازت دے دی، تو میں نے ان دونوں صاحبان کو ریشمی قمیص پہنے ہوئے دیکھا۔ [صحیح ابن حبان/كتاب اللباس وآدابه/حدیث: 5432]

سیدنا عقبہ بن عامر رضی اللہ عنہ بیان کرتے ہیں کہ نبی اکرم صلی اللہ علیہ وسلم کی خدمت میں ریشمی جبہ پیش کیا گیا، نبی اکرم صلی اللہ علیہ وسلم نے اسے پہن لیا، پھر آپ صلی اللہ علیہ وسلم نے اس میں نماز ادا کی۔ آپ صلی اللہ علیہ وسلم نماز پڑھ کر فارغ ہوئے تو آپ صلی اللہ علیہ وسلم نے اسے ناپسند کرتے ہوئے سختی سے اتار دیا اور فرمایا: ”یہ پرہیزگاروں کے لیے مناسب نہیں ہے۔“ (امام ابن حبان رحمہ اللہ فرماتے ہیں:) «فَرُّوجُ حَرِيرٍ» (ریشمی جبہ) سے مراد وہ کپڑا ہے جس کا تانا ریشم کا ہوتا ہے، وہ سارے کا سارا ریشم نہیں ہوتا؛ اگر وہ سارے کا سارا ریشم کا ہوتا تو نبی اکرم صلی اللہ علیہ وسلم نہ اسے پہنتے اور نہ ہی اسے پہن کر نماز ادا کرتے۔ سیدنا عمر بن خطاب رضی اللہ عنہ کے حوالے سے منقول روایت کا بھی یہی مطلب ہے کہ صرف دو یا تین یا چار انگلیوں جتنی (ریشم کی پٹی لگانے) کی اجازت ہے۔ [صحیح ابن حبان/كتاب اللباس وآدابه/حدیث: 5433]

سیدنا علی بن ابوطالب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ریشم لیا، آپ صلی اللہ علیہ وسلم نے اسے اپنے دائیں ہاتھ میں رکھا اور سونا لیا اور اسے اپنے بائیں ہاتھ میں رکھا، پھر آپ صلی اللہ علیہ وسلم نے اپنے دونوں ہاتھ بلند کیے اور فرمایا: ”یہ دونوں میری امت کے مردوں کے لیے حرام ہیں۔“ (امام ابن حبان رحمہ اللہ فرماتے ہیں:) سعید بن ابوہند نے ابوموسیٰ کے حوالے سے اس بارے میں جو روایت نقل کی ہے وہ معلول ہے اور مستند نہیں ہے۔ [صحیح ابن حبان/كتاب اللباس وآدابه/حدیث: 5434]

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص دنیا میں ریشم پہن لے گا وہ آخرت میں اسے نہیں پہنے گا۔“ [صحیح ابن حبان/كتاب اللباس وآدابه/حدیث: 5435]