سیدنا عبداللہ بن عباس رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص تصویر بنائے گا اسے یہ عذاب دیا جائے گا کہ اس میں روح پھونکے اور وہ اس میں روح نہیں پھونک سکے گا، اور جو شخص جھوٹا خواب بیان کرے گا اسے اس بات کا پابند کیا جائے گا کہ وہ جو کے دو دانوں کے درمیان گرہ لگائے، اسے یہ عذاب دیا جائے گا اور جو شخص چھپ کر کسی کی باتیں سنے گا جب کہ وہ لوگ اسے ناپسند کرتے ہوں، تو قیامت کے دن اس شخص کے کانوں میں سیسہ ڈالا جائے گا۔“ [صحیح ابن حبان/كتاب الحظر والإباحة/حدیث: 5685]

سیدنا عبداللہ بن عباس رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جو شخص تصویر بنائے گا اللہ تعالیٰ اسے عذاب دے گا یہاں تک کہ اسے اس تصویر میں روح پھونکنی پڑے گی اور وہ نہیں پھونک سکے گا، جو شخص لوگوں کی بات سنے گا حالانکہ وہ لوگ اسے بات نہ سنانا چاہتے ہوں، اس کے کانوں میں قیامت کے دن سیسہ ڈالا جائے گا اور جو شخص جھوٹا خواب بیان کرے گا اسے اس بات کا پابند کیا جائے گا کہ وہ جو کے دو دانوں کے درمیان گرہ لگائے اور وہ ایسا نہیں کر سکے گا۔“ [صحیح ابن حبان/كتاب الحظر والإباحة/حدیث: 5686]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بدگمانی سے بچو، کیونکہ بدگمانی سب سے زیادہ جھوٹی بات ہے، ایک دوسرے کی جاسوسی نہ کرو، ایک دوسرے کے پوشیدہ معاملات جاننے کی کوشش نہ کرو، ایک دوسرے سے حسد نہ کرو، ایک دوسرے سے دوری اختیار نہ کرو، ایک دوسرے سے بغض نہ رکھو، ایک دوسرے سے منہ نہ موڑو اور اللہ کے بندے اور بھائی بھائی بن کر رہو۔“ [صحیح ابن حبان/كتاب الحظر والإباحة/حدیث: 5687]

سیدنا ابوذر غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کسی شخص کو غصہ آئے اور وہ کھڑا ہوا ہو تو اسے بیٹھ جانا چاہیے، اگر اس کا غصہ ختم ہو جائے تو ٹھیک ہے ورنہ اسے لیٹ جانا چاہیے۔“ [صحیح ابن حبان/كتاب الحظر والإباحة/حدیث: 5688]

احنف بن قیس رحمہ اللہ اپنے چچا سیدنا جاریہ بن قدامہ رضی اللہ عنہ کا یہ بیان نقل کرتے ہیں، انہوں نے عرض کی: یا رسول اللہ! آپ صلی اللہ علیہ وسلم مجھے کوئی ایسی بات بیان کیجیے جس کے ذریعے اللہ تعالیٰ مجھے فائدہ دے اور مختصر بات بتائیے گا تاکہ میں اس سے غفلت کا شکار نہ ہو جاؤں، نبی اکرم صلی اللہ علیہ وسلم نے فرمایا: «لَا تَغْضَبْ» ”تم غصہ نہ کرنا۔“ انہوں نے کئی مرتبہ نبی اکرم صلی اللہ علیہ وسلم سے یہی سوال کیا، نبی اکرم صلی اللہ علیہ وسلم ہر مرتبہ انہیں یہی جواب دیتے رہے: ”تم غصہ نہ کرنا۔“ [صحیح ابن حبان/كتاب الحظر والإباحة/حدیث: 5689]

سیدنا جاریہ بن قدامہ رضی اللہ عنہ بیان کرتے ہیں کہ ایک صاحب نے نبی اکرم صلی اللہ علیہ وسلم کی خدمت میں عرض کی: آپ مجھے کوئی بات ارشاد فرمائیں اور مختصر بات عنایت کیجیے گا۔ نبی اکرم صلی اللہ علیہ وسلم نے ارشاد فرمایا: ”تم غصہ نہ کرنا۔“ ان صاحب نے دوبارہ آپ سے یہی سوال کیا تو آپ نے یہی فرمایا: ”تم غصہ نہ کرنا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”تم غصہ نہ کرنا“ اس کے ذریعے آپ کی مراد یہ ہے کہ غصے میں آنے کے بعد تم کوئی ایسا کام نہ کرنا جس سے میں نے منع کیا ہے۔ اس سے یہ مراد نہیں ہے کہ نبی اکرم صلی اللہ علیہ وسلم نے غصہ کرنے سے منع کیا ہے کیونکہ غصہ انسان کی فطرت میں شامل ہے اور یہ بات ناممکن ہے کہ آدمی کو اس کی فطرت میں شامل موجود کسی چیز سے منع کیا جائے، بلکہ یہ ممانعت اس چیز کے بارے میں ہے جو غصے کے نتیجے میں سامنے آتی ہے جس کا ہم نے ذکر کیا ہے۔ [صحیح ابن حبان/كتاب الحظر والإباحة/حدیث: 5690]

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے دریافت فرمایا: ”تم پچھاڑ دینا کسے کہتے ہو؟“ راوی کہتے ہیں کہ میں نے عرض کی: یہ کہ آدمی دوسروں کو پچھاڑ دے۔ نبی اکرم صلی اللہ علیہ وسلم نے فرمایا: ”پچھڑنا (یا طاقت) یہ ہے کہ آدمی غصے کے وقت خود کو قابو میں رکھے۔“ [صحیح ابن حبان/كتاب الحظر والإباحة/حدیث: 5691]

سیدنا سلیمان بن صرد رضی اللہ عنہ بیان کرتے ہیں: نبی اکرم صلی اللہ علیہ وسلم کے سامنے دو آدمیوں کی بحث ہو گئی، ہم اس وقت نبی اکرم صلی اللہ علیہ وسلم کے پاس بیٹھے ہوئے تھے، ان میں سے ایک شخص نے غصے کے عالم میں اپنے ساتھی کو برا کہنا شروع کیا، اس شخص کا چہرہ سرخ ہو گیا، تو نبی اکرم صلی اللہ علیہ وسلم نے ارشاد فرمایا: ”مجھے ایک ایسے کلمے کے بارے میں پتہ ہے اگر یہ اسے پڑھ لے تو اسے جو غصہ آ رہا ہے وہ ختم ہو جائے گا، وہ کلمہ «أَعُوذُ بِاللّٰهِ مِنَ الشَّيْطَانِ الرَّجِيمِ» ”میں اللہ کی پناہ مانگتا ہوں شیطان مردود سے“ ہے۔“ لوگوں نے اس شخص سے کہا: کیا تم نے سنا نہیں نبی اکرم صلی اللہ علیہ وسلم نے کیا کہا ہے؟ تو اس نے کہا: میں پاگل نہیں ہوں۔ (یعنی میں نے سن لیا ہے)۔ [صحیح ابن حبان/كتاب الحظر والإباحة/حدیث: 5692]

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت کے دن مومن کے نامہ اعمال میں لکھی جانے والی سب سے زیادہ وزنی چیز اچھے اخلاق ہوں گے اور اللہ تعالیٰ فحش گفتگو اور بدزبانی کرنے والے کو ناپسند کرتا ہے۔“ [صحیح ابن حبان/كتاب الحظر والإباحة/حدیث: 5693]

عبیداللہ بن عبداللہ بیان کرتے ہیں کہ انہوں نے سیدنا اسامہ بن زید رضی اللہ عنہ کو نبی اکرم صلی اللہ علیہ وسلم کی قبر مبارک کے پاس نماز ادا کرتے ہوئے دیکھا، مروان بن حکم آیا، تو اس نے دریافت کیا کہ آپ قبر کی طرف رخ کر کے نماز ادا کر رہے ہیں؟ تو سیدنا اسامہ بن زید رضی اللہ عنہ نے فرمایا: میں نبی اکرم صلی اللہ علیہ وسلم سے محبت کرتا ہوں۔ مروان نے انہیں بری بات کہی، پھر وہ منہ پھیر کر چلا گیا تو سیدنا اسامہ بن زید رضی اللہ عنہ نے نماز ختم کی اور بولے: تم نے مجھے اذیت پہنچائی ہے، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک اللہ تعالیٰ فحش گفتگو کرنے والے اور بدزبانی کرنے والے کو ناپسند کرتا ہے“ اور تم فحش گفتگو کرنے والے اور بدزبانی کرنے والے ہو۔ [صحیح ابن حبان/كتاب الحظر والإباحة/حدیث: 5694]