سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا: ”جو شخص «اللَّاتِ» اور «الْعُزَّىٰ» کی قسم اٹھاتا ہے اسے «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ پڑھنا چاہیے اور جو شخص اپنے ساتھی سے یہ کہتا ہے: آؤ تاکہ میں تمہارے ساتھ جوا کھیلوں اسے کوئی چیز صدقہ کرنی چاہیے۔“ [صحیح ابن حبان/كتاب الحظر والإباحة/حدیث: 5705]

سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”آدمی کوئی بات کرتا ہے، جس میں وہ کوئی حرج نہیں سمجھتا، لیکن وہ اس بات کی وجہ سے ستر برس تک جہنم میں گرتا رہے گا۔“ [صحیح ابن حبان/كتاب الحظر والإباحة/حدیث: 5706]

سیدنا ابوہریرہ رضی اللہ عنہ بیان کرتے ہیں: انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”آدمی (بعض اوقات) کوئی بات کہہ دیتا ہے جس کی وجہ سے وہ جہنم میں اس سے زیادہ گہرائی میں گرے گا جتنا مشرق اور مغرب کے درمیان فاصلہ ہے۔“ [صحیح ابن حبان/كتاب الحظر والإباحة/حدیث: 5707]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بعض اوقات بندہ کوئی بات کہتا ہے، جسے وہ بڑی بات نہیں سمجھتا، لیکن وہ اس کی وجہ سے جہنم میں اتنی گہرائی میں گرے گا جو اس سے زیادہ ہوگی جتنا مشرق اور مغرب کے درمیان فاصلہ ہے۔“ [صحیح ابن حبان/كتاب الحظر والإباحة/حدیث: 5708]

سیدنا ضحاک بن ابوجبیرہ رضی اللہ عنہ بیان کرتے ہیں کہ زمانہ جاہلیت میں ان لوگوں کے القاب ہوتے تھے۔ نبی اکرم صلی اللہ علیہ وسلم نے ایک شخص کو اس کے لقب کے ساتھ بلایا، نبی اکرم صلی اللہ علیہ وسلم کو بتایا گیا: یا رسول اللہ صلی اللہ علیہ وسلم ! یہ شخص اسے ناپسند کرتا ہے، تو اللہ تعالیٰ نے یہ آیت نازل کی: ﴿وَلَا تَنَابَزُوا بِالْأَلْقَابِ بِئْسَ الِاسْمُ الْفُسُوقُ بَعْدَ الْإِيمَانِ﴾ [سورة الحجرات: 11] ”ایک دوسرے کے برے نام نہ رکھو (کسی کے) ایمان لانے کے بعد اسے فاسق کہنا برا نام ہے۔“ راوی بیان کرتے ہیں کہ انصار کا یہ معمول تھا کہ جو اللہ کو منظور ہوتا وہ صدقہ کیا کرتے تھے اور عطیات دیا کرتے تھے یہاں تک کہ ایک مرتبہ انہیں قحط سالی لاحق ہوئی تو انہوں نے ایسا کرنا ختم کر دیا تو اللہ تعالیٰ نے یہ آیت نازل کی: ﴿وَأَنْفِقُوا فِي سَبِيلِ اللَّهِ وَلَا تُلْقُوا بِأَيْدِيكُمْ إِلَى التَّهْلُكَةِ وَأَحْسِنُوا إِنَّ اللَّهَ يُحِبُّ الْمُحْسِنِينَ﴾ [سورة البقرة: 195] ”اور تم لوگ اللہ کی راہ میں خرچ کرو اور اپنے ہاتھوں کو ہلاکت کی طرف نہ لے جاؤ اور اچھائی کرو بیشک اللہ تعالیٰ اچھائی کرنے والوں کو پسند کرتا ہے۔“ [صحیح ابن حبان/كتاب الحظر والإباحة/حدیث: 5709]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”کوئی شخص یہ بات ہرگز نہ کہے: اللہ تعالیٰ تمہارے چہرے کو قبیح کرے اور اس چہرے کو قبیح کرے جو تمہارے چہرے کے ساتھ مشابہت رکھتا ہے، اس کی وجہ یہ ہے کہ اللہ تعالیٰ نے سیدنا آدم علیہ السلام کو اپنی صورت پر پیدا کیا ہے۔“ (امام ابن حبان رحمہ اللہ فرماتے ہیں:) اس سے مراد اس آدمی کی صورت ہے جس سے یہ کہا گیا ہے: اللہ تعالیٰ تمہارے چہرے کو قبیح کرے، جو سیدنا آدم علیہ السلام کی اولاد سے تعلق رکھتا ہے، اور اس بات کی دلیل کہ یہاں خطاب اولادِ آدم کو ہے اور ان کے علاوہ کسی اور کو نہیں ہے، وہ نبی اکرم صلی اللہ علیہ وسلم کا یہ فرمان ہے: ”اور اس چہرے کو جو تمہارے چہرے کے ساتھ مشابہت رکھتا ہے،“ اس کی وجہ یہ ہے کہ سیدنا آدم علیہ السلام کا چہرہ ان کی اولاد کی شکل و صورت سے مشابہت رکھتا ہے۔ [صحیح ابن حبان/كتاب الحظر والإباحة/حدیث: 5710]

سیدنا جندب بن عبداللہ بجلی رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”ایک شخص نے کہا: اللہ کی قسم! اللہ تعالیٰ فلاں شخص کی مغفرت نہیں کرے گا، تو اللہ تعالیٰ نے فرمایا: میں نے فلاں کی مغفرت کر دی اور تمہارے عمل کو ضائع کر دیا۔“ [صحیح ابن حبان/كتاب الحظر والإباحة/حدیث: 5711]

سیدنا ضمضم بن جوس رضی اللہ عنہ بیان کرتے ہیں کہ میں نبی اکرم صلی اللہ علیہ وسلم کی مسجد میں داخل ہوا تو وہاں ایک عمر رسیدہ شخص تھا جس کے بالوں کا رنگ زرد تھا اور اس کے سامنے کے دانت انتہائی چمکدار تھے، اس کے ساتھ ایک نوجوان تھا جو بہت خوبصورت اور جوان تھا، اس بوڑھے شخص نے کہا: اے یمامی! تم آگے آؤ، تم کسی بھی شخص کو یہ کبھی نہ کہنا کہ ”اللہ تعالیٰ تمہاری مغفرت نہ کرے“ یا ”اللہ کی قسم! اللہ تعالیٰ تمہیں کبھی جنت میں داخل نہیں کرے گا“۔ میں نے دریافت کیا: آپ کون ہیں؟ اللہ تعالیٰ آپ پر رحم کرے! انہوں نے جواب دیا: میں ابوہریرہ (رضی اللہ عنہ) ہوں۔ میں نے کہا: اس طرح کا کلمہ تو ہم میں سے کوئی شخص اپنی بیوی یا خادم کے لیے استعمال کرتا ہے جب وہ اس پر غصے کا اظہار کرتا ہے، تو سیدنا ابوہریرہ رضی اللہ عنہ نے فرمایا: تم یہ نہ کہنا کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بنی اسرائیل میں دو آدمی تھے جو ایک دوسرے کے بھائی بنے ہوئے تھے، ان میں سے ایک شخص عبادت میں اہتمام کرتا تھا اور دوسرا گنہگار تھا، عبادت گزار شخص نے گناہ کرنے والے شخص کو دیکھا تو اس سے کہا: تم اس میں کمی کر دو، تو دوسرے شخص نے کہا: تم یہ معاملہ میرے اور میرے پروردگار کے درمیان رہنے دو۔ نبی اکرم صلی اللہ علیہ وسلم فرماتے ہیں کہ اس شخص نے اپنی بات اس کے سامنے دہرائی تو اس شخص نے آگے سے یہی جواب دیا: تم مجھے اور میرے پروردگار کو چھوڑ دو، یہاں تک کہ عبادت گزار نے ایک دن اسے گناہ کرتے ہوئے دیکھا تو اسے اس کا گناہ بڑا لگا، اس نے کہا: تمہارا ستیاناس ہو! تم گناہ کرنے سے باز آ جاؤ۔ دوسرے شخص نے کہا: تم مجھے اور میرے پروردگار کو چھوڑ دو، کیا تمہیں مجھ پر نگران بنا کر بھیجا گیا ہے؟ تو عبادت گزار نے کہا: اللہ کی قسم! اللہ تعالیٰ تمہاری مغفرت کبھی نہیں کرے گا (راوی کو شک ہے شاید یہ الفاظ ہیں) اس نے کہا: اللہ تعالیٰ تمہیں کبھی جنت میں داخل نہیں کرے گا۔ (نبی اکرم صلی اللہ علیہ وسلم فرماتے ہیں) پھر ان دونوں کی طرف فرشتے کو بھیجا گیا، اس نے ان دونوں کی ارواح کو قبض کر لیا، وہ دونوں اللہ تعالیٰ کی بارگاہ میں اکٹھے ہوئے تو پروردگار نے عبادت گزار سے دریافت کیا: کیا تم عالم ہو یا تم اس بات پر قدرت رکھتے ہو کہ جو کچھ میرے اختیار میں ہے؟ یا تم میری رحمت کو میرے بندے پر ہونے سے روکتے ہو؟ تم جنت کی طرف جاؤ۔ (راوی کہتے ہیں: یعنی اللہ تعالیٰ نے گنہگار شخص سے یہ فرمایا) اور دوسرے سے فرمایا: اسے جہنم کی طرف لے جاؤ۔ (نبی اکرم صلی اللہ علیہ وسلم یا شاید سیدنا ابوہریرہ رضی اللہ عنہ نے فرمایا:) اس ذات کی قسم جس کے دستِ قدرت میں میری جان ہے! اس نے ایک ایسی بات کہی ہے جس نے اس کی دنیا اور آخرت کو برباد کر دیا۔“ [صحیح ابن حبان/كتاب الحظر والإباحة/حدیث: 5712]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”کوئی بھی شخص یہ نہ کہے: زمانے کا ستیاناس ہو کیونکہ اللہ تعالیٰ ہی زمانے (کو چلانے والا) ہے۔“ [صحیح ابن حبان/كتاب الحظر والإباحة/حدیث: 5713]

سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ فرماتا ہے: ”انسان زمانے کو برا کہتا ہے، حالانکہ میں زمانہ ہوں، رات اور دن میرے دستِ قدرت میں ہیں۔“” [صحیح ابن حبان/كتاب الحظر والإباحة/حدیث: 5714]