سیدنا عبداللہ بن مغفل رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو لوگ بھی ایسا کتا پالتے ہیں جو شکار کرنے کے لیے، یا کھیت کی حفاظت کے لیے، یا جانوروں کی حفاظت کے لیے نہ ہو، تو ان کے اجر میں سے روزانہ ایک قیراط کم ہوتا ہے۔“ [صحیح ابن حبان/كتاب الحظر والإباحة/حدیث: 5655]

سید بن عبید بیان کرتے ہیں: ہم لوگ ابوسفیان بن علاء کے جنازے میں شریک ہوئے، ہمارے ساتھ شعبہ بھی تھے، جب ابوسفیان کو دفن کر دیا گیا تو شعبہ نے ابوسفیان کی قبر کی طرف اشارہ کر کے کہا: ان صاحب نے مجھے حدیث بیان کی ہے، یہ کہتے ہیں: میں نے حسن سے کہا: آپ کو کس نے یہ حدیث بیان کی ہے؟ نبی اکرم صلی اللہ علیہ وسلم نے ارشاد فرمایا ہے: ”اگر کتے ایک باقاعدہ قسم کی مخلوق نہ ہوتے تو میں انہیں مار دینے کا حکم دیتا۔“ تو انہوں نے جواب دیا: سیدنا عبداللہ بن مغفل رضی اللہ عنہ نے، اس ذات کی قسم! جس کے علاوہ کوئی معبود نہیں ہے، انہوں نے اس مسجد میں مجھے یہ حدیث بیان کی تھی، حسن نے جامع مسجد کی طرف اشارہ کر کے یہ بات بیان کی تھی۔ (امام ابن حبان رحمہ اللہ فرماتے ہیں:) ابوسفیان نامی راوی کا نام سعد ہے اور ان کا لقب ”سلس“ ہے، ابوسفیان بن علاء کے حوالے سے دنیا میں اس کے علاوہ اور کوئی مسند حدیث موجود نہیں ہے، یہ ابوعمرو بن علاء کے بھائی تھے اور عمرو بن علاء کا نام زبان تھا، یہ چار بھائی تھے، (ان کے علاوہ دو بھائیوں کے نام) ابومعاذ اور عمر ہیں۔ [صحیح ابن حبان/كتاب الحظر والإباحة/حدیث: 5656]

سیدنا عبداللہ بن مغفل رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اگر کتے ایک باقاعدہ قسم کی مخلوق نہ ہوتے تو میں انہیں مار دینے کا حکم دیتا، البتہ تم ان میں سے سیاہ فام کتے کو مار دیا کرو۔“ نبی اکرم صلی اللہ علیہ وسلم نے ارشاد فرمایا: ”جو لوگ کوئی ایسا کتا پالتے ہیں جو کھیت کی حفاظت یا شکار یا جانوروں کی حفاظت کے لیے نہ ہو تو ان کے اجر میں سے روزانہ ایک قیراط کم ہوتا ہے۔“ راوی بیان کرتے ہیں کہ ہمیں اس بات کا حکم دیا گیا تھا کہ ہم بکریوں کے باڑے میں نماز ادا کر سکتے ہیں، البتہ ہم اونٹوں کے باڑے میں نماز ادا نہ کریں کیونکہ ”وہ شیاطین سے پیدا کیے گئے ہیں۔“ [صحیح ابن حبان/كتاب الحظر والإباحة/حدیث: 5657]

سیدنا جابر رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اگر کتے ایک باقاعدہ قسم کی مخلوق نہ ہوتے تو میں انہیں مار دینے کا حکم دیتا، البتہ تم ان میں سے سیاہ فام کتے کو مار دو کیونکہ وہ شیطان ہو گا۔“ [صحیح ابن حبان/كتاب الحظر والإباحة/حدیث: 5658]

سیدنا عبداللہ بن مغفل رضی اللہ عنہ بیان کرتے ہیں: نبی اکرم صلی اللہ علیہ وسلم نے ”کھیت (کی حفاظت کے لیے) کتا پالنے کی اجازت دی ہے“۔ [صحیح ابن حبان/كتاب الحظر والإباحة/حدیث: 5659]

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک دوسرے سے بغض نہ رکھو، آپس میں حسد نہ رکھو، ایک دوسرے سے پیٹھ نہ پھیرو۔ اللہ کے بندو! بھائی بھائی بن کر رہو۔ کسی بھی مسلمان کے لیے یہ بات جائز نہیں ہے کہ وہ تین دن سے زیادہ اپنے بھائی سے لاتعلق رہے۔“ [صحیح ابن حبان/كتاب الحظر والإباحة/حدیث: 5660]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”ہر پیر اور جمعرات کے دن جنت کے دروازے کھول دیے جاتے ہیں اور اللہ تعالیٰ ہر اس بندے کی مغفرت کر دیتا ہے جو کسی کو اللہ کا شریک نہ ٹھہراتا ہو، صرف اس آدمی کی مغفرت نہیں ہوتی جس کی اپنے کسی بھائی کے ساتھ ناراضگی چل رہی ہو۔ یہ حکم دیا جاتا ہے: ان دونوں کا جائزہ لیتے رہو جب تک یہ صلح نہیں کرتے (ان کی مغفرت نہیں ہو گی)، ان دونوں کا جائزہ لیتے رہو جب تک یہ صلح نہیں کرتے (ان کی مغفرت نہیں ہو گی)۔“ [صحیح ابن حبان/كتاب الحظر والإباحة/حدیث: 5661]

عوف بن حارث جو سیدہ عائشہ رضی اللہ عنہا کے قریبی عزیز ہیں، وہ بیان کرتے ہیں کہ سیدہ عائشہ رضی اللہ عنہا نے یہ بات بتائی کہ ایک مرتبہ سیدہ عائشہ رضی اللہ عنہا کے کچھ فروخت کرنے پر یا عطیے کے طور پر کوئی چیز دینے پر سیدنا عبداللہ بن زبیر رضی اللہ عنہما نے یہ کہا کہ اللہ کی قسم! یا تو سیدہ عائشہ رضی اللہ عنہا ایسا کرنے سے باز آ جائیں گی یا میں انہیں تصرف کرنے سے روک دوں گا۔
سیدہ عائشہ رضی اللہ عنہا تک جب یہ بات پہنچی تو انہوں نے کہا کہ اللہ کے نام پر مجھ پر یہ نذر لازم ہے، اب میں عبداللہ بن زبیر کے ساتھ کبھی کلام نہیں کروں گی۔ جب سیدہ عائشہ رضی اللہ عنہا کی ان سے لاتعلقی زیادہ ہو گئی تو عبداللہ بن زبیر رضی اللہ عنہما نے ان کی خدمت میں سفارش پیش کی۔ سیدہ عائشہ رضی اللہ عنہا نے کہا کہ اللہ کی قسم! میں اس کے بارے میں کسی کی سفارش کو قبول نہیں کروں گی اور میں نے جو نذر مانی ہے کبھی اس کی خلاف ورزی نہیں کروں گی۔ جب زیادہ عرصہ گزر گیا تو سیدنا عبداللہ بن زبیر رضی اللہ عنہما نے اس بارے میں سیدنا مسور بن مخرمہ اور سیدنا عبدالرحمن بن اسود رضی اللہ عنہما سے بات کی۔ یہ دونوں صاحبان بنو زہرہ سے تعلق رکھتے تھے۔ سیدنا عبداللہ بن زبیر رضی اللہ عنہما نے ان دونوں سے کہا کہ میں آپ دونوں کو اللہ کا واسطہ دے کر یہ کہتا ہوں کہ آپ مجھے سیدہ عائشہ رضی اللہ عنہا کی خدمت میں لے جائیں کیونکہ ان کے لیے ایسی نذر ماننا جائز نہیں ہے جس میں وہ مجھ سے تعلق توڑ لیں۔ تو مسور بن مخرمہ اور عبدالرحمن بن اسود رضی اللہ عنہما، عبداللہ بن زبیر رضی اللہ عنہما کو ساتھ لے کر گئے۔ ان دونوں نے اپنی چادریں ان پر ڈال دیں اور ان دونوں نے سیدہ عائشہ رضی اللہ عنہا سے اندر آنے کی اجازت مانگی۔ ان دونوں نے کہا کہ «السَّلَامُ عَلَى النَّبِيِّ صلی اللہ علیہ وسلم » ”نبی اکرم صلی اللہ علیہ وسلم پر سلام نازل ہو“ اے ام المؤمنین! کیا ہم اندر آ جائیں؟ سیدہ عائشہ رضی اللہ عنہا نے فرمایا کہ تم دونوں آ جاؤ۔ ان دونوں نے عرض کی کہ کیا ہم سب آ جائیں؟ سیدہ عائشہ رضی اللہ عنہا نے فرمایا کہ ہاں تم سب آ جاؤ۔ سیدہ عائشہ رضی اللہ عنہا کو اس کا پتا نہیں تھا کہ ان دونوں کے ساتھ سیدنا عبداللہ بن زبیر رضی اللہ عنہما بھی ہیں۔ جب یہ حضرات اندر داخل ہوئے تو سیدنا عبداللہ بن زبیر رضی اللہ عنہما نے پردہ ہٹایا اور سیدہ عائشہ رضی اللہ عنہا کی خدمت میں حاضر ہوئے۔ انہوں نے ان کو گلے لگا لیا اور وہ روتے ہوئے سیدہ عائشہ رضی اللہ عنہا کو واسطے دینے لگے۔ سیدنا مسور بن مخرمہ اور سیدنا عبدالرحمن رضی اللہ عنہما نے بھی سیدہ عائشہ رضی اللہ عنہا کو واسطہ دیا اور ان دونوں نے ان سے کہا کہ آپ نے جو طرز عمل اختیار کیا ہے، نبی اکرم صلی اللہ علیہ وسلم نے اس سے منع کیا ہے کہ ”کسی بھی مسلمان کے لیے اپنے بھائی سے تین دن سے زیادہ لاتعلق رہنا جائز نہیں ہے۔“ جب ان دونوں صاحبان نے سیدہ عائشہ رضی اللہ عنہا کو زیادہ وعظ و نصیحت کی تو سیدہ عائشہ رضی اللہ عنہا نے انہیں یاد دلانا شروع کیا اور رونا شروع کر دیا اور یہ کہا کہ میں نے نذر مانی ہے اور نذر کا معاملہ شدید ہوتا ہے۔ لیکن وہ دونوں صاحبان ان کے ساتھ مسلسل بات کرتے رہے یہاں تک کہ سیدہ عائشہ رضی اللہ عنہا نے سیدنا عبداللہ بن زبیر رضی اللہ عنہما کے ساتھ بات چیت کرنا شروع کر دی۔ پھر سیدہ عائشہ رضی اللہ عنہا نے اپنی نذر کے عوض میں چالیس غلام آزاد کیے۔ چالیس غلام آزاد کرنے کے بعد بھی وہ روتی رہتی تھیں یہاں تک کہ ان کی چادر ان کے آنسوؤں سے تر ہو جایا کرتی تھی۔
(امام ابن حبان رحمہ اللہ فرماتے ہیں:) سیدہ عائشہ رضی اللہ عنہا، سیدنا عبداللہ بن زبیر رضی اللہ عنہما کی خالہ تھیں کیونکہ سیدنا عبداللہ بن زبیر رضی اللہ عنہما کی والدہ سیدہ اسماء بنت ابوبکر رضی اللہ عنہما، سیدہ عائشہ رضی اللہ عنہا کی بہن ہیں۔ [صحیح ابن حبان/كتاب الحظر والإباحة/حدیث: 5662]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”پیر اور جمعرات کے دن جنت کے دروازے کھولے جاتے ہیں اور ہر اس شخص کی مغفرت ہو جاتی ہے جو کسی کو اللہ کا شریک نہ ٹھہراتا ہو، ماسوائے ان دو افراد کے جو ایک دوسرے سے لاتعلق ہوں، اللہ تعالیٰ فرماتا ہے: ان دونوں کے معاملے کو یوں ہی رہنے دو جب تک یہ آپس میں صلح نہیں کرتے۔“ [صحیح ابن حبان/كتاب الحظر والإباحة/حدیث: 5663]

سیدنا ہشام بن عامر رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”کسی بھی مسلمان کے لیے یہ بات جائز نہیں ہے وہ کسی مسلمان سے تین دن سے زیادہ لاتعلق رہے وہ جب تک اپنی ناراضگی پر ثابت رہتے ہیں۔ اس وقت تک حق سے منہ موڑے رہتے ہیں اور جو شخص ان میں سے (ناراضگی ختم کرنے میں) پہل کرتا ہے تو اس کا پہل کرنا اس کا کفارہ بن جاتا ہے۔ وہ دوسرے شخص کو سلام کرے اور دوسرا شخص اس کے سلام کو قبول نہ کرے تو فرشتے اسے سلام کا جواب دیتے ہیں اور دوسرے شخص کو شیطان سلام کا جواب دیتا ہے اگر وہ دونوں اپنی ناراضگی پر مسلسل رہیں تو وہ دونوں جنت میں داخل نہیں ہوں گے اور جنت میں اکٹھے نہیں ہوں گے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”وہ جنت میں داخل نہیں ہوں گے جنت میں اکٹھے نہیں ہوں گے۔“ اس کے ذریعے مراد یہ ہے: اگر اللہ تعالیٰ ان کی اس ناراضگی پر اپنے فضل کے تحت معافی نہ فرمائے۔ (تو وہ جنت میں داخل نہیں ہوں گے) [صحیح ابن حبان/كتاب الحظر والإباحة/حدیث: 5664]