سیدہ عائشہ صدیقہ رضی اللہ عنہا کے بارے میں یہ بات منقول ہے کہ ان سے دریافت کیا گیا کہ نبی اکرم صلی اللہ علیہ وسلم گھر میں کیا کام کیا کرتے تھے؟ تو سیدہ عائشہ رضی اللہ عنہا نے بتایا کہ آپ صلی اللہ علیہ وسلم ایک عام انسان کی طرح اپنے کپڑے دھو لیتے تھے، اپنی بکری کا دودھ دوہ لیتے تھے اور اپنے کام خود کر لیتے تھے۔ [صحیح ابن حبان/كتاب الحظر والإباحة/حدیث: 5675]

عروہ بیان کرتے ہیں کہ میں نے سیدہ عائشہ رضی اللہ عنہا سے دریافت کیا: اے ام المؤمنین! جب نبی اکرم صلی اللہ علیہ وسلم آپ کے ہاں موجود ہوتے تھے تو آپ صلی اللہ علیہ وسلم کیا کرتے تھے؟ سیدہ عائشہ رضی اللہ عنہا نے بتایا: وہی کچھ جو تم میں سے کوئی بھی شخص کام کاج کرتا ہے، آپ صلی اللہ علیہ وسلم اپنا جوتا گانٹھ لیتے تھے، اپنے کپڑے سی لیتے تھے اور اپنے ڈول کی مرمت کر لیتے تھے۔ [صحیح ابن حبان/كتاب الحظر والإباحة/حدیث: 5676]

سیدہ عائشہ صدیقہ رضی اللہ عنہا کے بارے میں یہ بات منقول ہے کہ ان سے دریافت کیا گیا: نبی اکرم صلی اللہ علیہ وسلم گھر میں کیا کام کرتے تھے؟ انہوں نے بتایا: ”آپ اپنے کپڑے سی لیتے تھے، اپنے جوتے کو گانٹھ لیتے تھے اور وہ سارے کام کر لیتے تھے جو مرد گھروں میں کر لیتے ہیں۔“ [صحیح ابن حبان/كتاب الحظر والإباحة/حدیث: 5677]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اللہ تعالیٰ کے لیے ایک درجے کی تواضع اختیار کرتا ہے، اللہ تعالیٰ اس کا درجہ بلند کرتا ہے یہاں تک کہ اسے اعلیٰ علیین میں شامل کر دیتا ہے، اور جو شخص اللہ تعالیٰ کے مقابلے میں ایک درجے کا تکبر کرتا ہے، اللہ تعالیٰ اسے ایک درجہ نیچے کر دیتا ہے یہاں تک کہ اسے اسفل سافلین میں شامل کر دیتا ہے۔ اگر کوئی شخص کسی ایسی سالم چٹان کے اندر کوئی عمل کرے جس کا کوئی دروازہ اور کوئی کھڑکی نہ ہو تو اللہ تعالیٰ اس چیز کو بھی ظاہر کر دے گا، جسے آدمی نے لوگوں سے چھپایا ہوا تھا خواہ وہ کوئی بھی چیز ہو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”جو شخص اللہ تعالیٰ کے لیے ایک درجہ تواضع اختیار کرتا ہے“ اس کے ذریعے آپ کی مراد یہ ہے جو اللہ تعالیٰ کی رضا کے حصول کے لیے مخلوق کے ساتھ تواضع اختیار کرتا ہے، تو اس میں لفظ مخلوق محذوف ہے۔ نبی اکرم صلی اللہ علیہ وسلم کا یہ فرمان: ”جو شخص تکبر کرتا ہے“ اس کے ذریعے آپ کی مراد یہ ہے جو شخص اللہ تعالیٰ کی مخلوق کے ساتھ تکبر کا معاملہ کرتا ہے، یہاں پر بھی لفظ مخلوق محذوف ہے کیونکہ اللہ تعالیٰ کے خلاف تکبر کرنے والا شخص، تو کافر ہو جائے گا۔ [صحیح ابن حبان/كتاب الحظر والإباحة/حدیث: 5678]

سیدنا حارثہ بن وہب خزاعی رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”کیا میں اہل جنت کی طرف تمہاری رہنمائی نہ کروں؟ ہر کمزور اور غریب شخص (جنتی ہے)، اگر وہ اللہ تعالیٰ کے نام کی قسم اٹھا لے تو اللہ تعالیٰ اسے پوری کر دے اور ہر متکبر اور سخت مزاج شخص جہنمی ہے۔“ [صحیح ابن حبان/كتاب الحظر والإباحة/حدیث: 5679]

سیدنا عبداللہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”ایسا شخص جنت میں داخل نہیں ہوگا، جس کے دل میں رائی کے دانے جتنا تکبر ہوگا، ایسا شخص جہنم میں داخل نہیں ہوگا جس کے دل میں رائی کے دانے جتنا ایمان ہوگا۔“ (امام ابن حبان رحمہ اللہ فرماتے ہیں:) اس روایت کے دو مفہوم ہوسکتے ہیں، اس میں سے ایک وہ ہے جسے ہم نے ایک نوع میں بیان کیا ہے، پھر ”جنت میں ایسا شخص داخل نہیں ہوگا، جس کے دل میں رائی کے وزن کے جتنا تکبر ہو“ اس کے ذریعے جنت کا بلند درجہ مراد ہے جہاں وہ لوگ داخل ہوں گے جو تکبر نہیں کیا کرتے تھے اور نبی اکرم صلی اللہ علیہ وسلم کا یہ فرمان: ”وہ شخص جہنم میں داخل نہیں ہوگا، جس کے دل میں رائی کے دانے کے برابر ایمان موجود ہو“ اس کے ذریعے جہنم کا وہ نیچے والا حصہ مراد ہے جہاں وہ لوگ داخل ہوں گے جو مسلمان نہیں ہوں گے۔ اس کا دوسرا مفہوم یہ ہے: جنت میں سرے سے کوئی ایسا شخص داخل نہیں ہوگا، جس کے دل میں رائی کے دانے جتنا تکبر ہوگا اور یہاں تکبر سے مراد شرک ہے کیونکہ مشرک شخص سرے سے جنت میں کبھی بھی داخل نہیں ہوگا۔ نبی اکرم صلی اللہ علیہ وسلم کا یہ فرمان: ”وہ شخص جہنم میں داخل نہیں ہوگا، جس کے دل میں رائی کے دانے کے وزن جتنا ایمان ہو“ اس کے ذریعے آپ کی مراد یہ ہے: ہمیشہ کے لیے ایسا نہیں ہوگا، اس طرح سے دونوں مفہوم درست ہوجائیں گے۔ [صحیح ابن حبان/كتاب الحظر والإباحة/حدیث: 5680]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بے شک جو شخص تکبر کے طور پر اپنے کپڑے کو لٹکاتا ہے، اللہ تعالیٰ قیامت کے دن اس کی طرف نظرِ رحمت نہیں کرے گا۔“ [صحیح ابن حبان/كتاب الحظر والإباحة/حدیث: 5681]

سیدنا عبداللہ بن مسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم ”تہبند لٹکانے کو اور (خواتین کے) اپنے شوہر کے علاوہ کسی اور کے لیے زینت ظاہر کرنے کو اور عورت کی پچھلی شرمگاہ میں صحبت کرنے، پانسہ کھیلنے، پیتل (کی انگوٹھی پہننے یا زرد رنگ استعمال کرنے) اور بالوں کی رنگت تبدیل کرنے کو اور تعویذ لٹکانے کو اور دم کرنے کو ناپسند کرتے تھے، البتہ «مُعَوِّذَات» (یعنی معوذتین یا پناہ والی دعاؤں) کا حکم مختلف ہے“۔ [صحیح ابن حبان/كتاب الحظر والإباحة/حدیث: 5682]

سیدنا عبداللہ بن مسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم نے دس چیزوں کو ناپسندیدہ قرار دیا ہے: ”سفید رنگ (کے بالوں کی رنگت) تبدیل کرنے، سونے کی انگوٹھی پہننے، پانسہ کھیلنے، دم کرنے، تعویذ لٹکانے، تہبند لٹکانے، زرد (رنگ)، ناجائز طور پر زینت ظاہر کرنے اور پانی (یعنی مادہ تولید) کو اس کے مخصوص مقام سے الگ کرنے (ان سب کاموں کو ناپسندیدہ قرار دیا ہے)۔“ [صحیح ابن حبان/كتاب الحظر والإباحة/حدیث: 5683]

سیدنا ابورافع رضی اللہ عنہ بیان کرتے ہیں کہ قریش سے تعلق رکھنے والا ایک شخص سیدنا ابوہریرہ رضی اللہ عنہ کے پاس آیا اور بولا: آپ نبی اکرم صلی اللہ علیہ وسلم کے حوالے سے بکثرت احادیث بیان کرتے ہیں؛ کیا آپ نے نبی اکرم صلی اللہ علیہ وسلم کو میرے اس حلہ کے بارے میں کوئی بات بیان کرتے ہوئے سنا ہے؟ تو سیدنا ابوہریرہ رضی اللہ عنہ نے بتایا: اگر وہ حکم نہ ہوتا جو اللہ تعالیٰ کی کتاب میں بیان کیا ہے تو میں تم لوگوں کو کوئی حدیث بیان نہ کرتا، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”تم سے پہلے زمانے میں ایک شخص تکبر کے ساتھ چل رہا تھا، اس کے بالوں اور چادروں نے اسے خود پسندی کا شکار کیا ہوا تھا، اللہ تعالیٰ نے اسے زمین میں دھنسا دیا اور وہ قیامت کے دن تک اس میں دھنستا رہے گا۔“ [صحیح ابن حبان/كتاب الحظر والإباحة/حدیث: 5684]