سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”اللہ کی قسم! جنت میں کسی شخص کے کوڑا رکھنے کی جگہ اس کے لیے آسمان اور زمین کے درمیان موجود ہر چیز سے زیادہ بہتر ہے۔“ [صحیح ابن حبان/كتاب التاريخ/حدیث: 6158]

سیدنا مستورد رضی اللہ عنہ، جن کا تعلق بنو فہر سے ہے، وہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”آخرت کے مقابلے میں دنیا کی مثال اس طرح ہے جس طرح کوئی شخص اپنی شہادت کی انگلی کو سمندر میں داخل کرے اور پھر اس بات کا جائزہ لے کہ وہ کس چیز (یعنی کتنے پانی) کے ہمراہ واپس آئی ہے۔“ [صحیح ابن حبان/كتاب التاريخ/حدیث: 6159]

سیدنا ابوموسیٰ اشعری رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے سیدنا آدم علیہ السلام کو ایسی مٹی سے پیدا فرمایا ہے جو تمام روئے زمین سے اکٹھی کی گئی تھی، اس لیے سیدنا آدم علیہ السلام کی اولاد زمین کی خصوصیات کی حامل ہے؛ ان میں کچھ لوگ سرخ، کچھ سفید، کچھ سیاہ اور کچھ زرد ہوتے ہیں، کچھ ان کے درمیان ہوتے ہیں، کچھ آسان، کچھ غمگین، کچھ بدباطن اور کچھ پاکیزہ مزاج ہوتے ہیں۔“ [صحیح ابن حبان/كتاب التاريخ/حدیث: 6160]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے میرا ہاتھ پکڑا اور ارشاد فرمایا: ”اللہ تعالیٰ نے ہفتے کے دن مٹی کو (یعنی زمین کو) پیدا کیا، اتوار کے دن اس نے زمین میں پہاڑ بنائے، پیر کے دن درخت پیدا کیے، منگل کے دن ناپسندیدہ چیز کو پیدا کیا، بدھ کے دن نور کو پیدا کیا، جمعرات کے دن زمین میں جانور پھیلا دیے اور سیدنا آدم علیہ السلام کو جمعے کے دن عصر کے بعد پیدا کیا، اس نے آخری مخلوق کو جمعے کی آخری گھڑی میں پیدا کیا۔“ [صحیح ابن حبان/كتاب التاريخ/حدیث: 6161]

سیدنا ابوہریرہ رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا: ”اللہ تعالیٰ نے سیدنا آدم علیہ السلام کو ان کی اپنی صورت پر پیدا فرمایا، ان کا قد ساٹھ گز تھا، جب اللہ تعالیٰ نے انہیں پیدا فرمایا تو کہا: جاؤ اور فرشتوں کے اس گروہ کو سلام کرو جو بیٹھے ہوئے ہیں اور غور سے سنو کہ وہ تمہیں کیا جواب دیتے ہیں، کیونکہ یہی تمہارا اور تمہاری اولاد کا سلام کرنے کا طریقہ ہو گا۔“ نبی اکرم صلی اللہ علیہ وسلم فرماتے ہیں: ”چنانچہ سیدنا آدم علیہ السلام گئے اور انہوں نے کہا: «السَّلَامُ عَلَيْكُمْ» ”تم پر سلامتی ہو“، تو فرشتوں نے جواب میں «وَرَحْمَةُ اللَّهِ» ”اور اللہ کی رحمت ہو“ کا اضافہ کیا۔“ نبی اکرم صلی اللہ علیہ وسلم فرماتے ہیں: ”جنت میں جو شخص بھی داخل ہو گا وہ سیدنا آدم علیہ السلام کی صورت پر ہو گا اور اس کا قد ساٹھ گز ہو گا، اس کے بعد سے مسلسل انسانوں کے قد کم ہوتے رہے، یہاں تک کہ موجودہ صورت حال آ گئی۔“ (امام ابن حبان رحمہ اللہ فرماتے ہیں:) یہ وہ روایت ہے جس کے ساتھ وہ شخص چمٹ گیا جو علمِ حدیث میں مہارت نہیں رکھتا اور اس نے اس روایت کی وجہ سے ان محدثین پر اعتراضات کیے جو سنت کی خدمت کرتے ہیں، اس پر ہونے والے اعتراضات کو دور کرتے ہیں اور جو شخص سنت کی خلاف ورزی کرتا ہے وہ اس کی بھرپور مخالفت کرتے ہیں۔ اس شخص نے یہ کہا کہ لفظ 'صورت' میں ضمیر یا تو اللہ تعالیٰ کی طرف منسوب ہو گی یا سیدنا آدم علیہ السلام کی طرف منسوب ہو گی، اگر اس کی نسبت اللہ تعالیٰ کی طرف کی جائے تو یہ بات کفر ہو گی کیونکہ ارشادِ باری تعالیٰ ہے: ﴿لَيْسَ كَمِثْلِهِ شَيْءٌ﴾ [سورة الشورى: 11] ”اس کی مانند کوئی چیز نہیں ہے۔“ اور اگر اس کی نسبت سیدنا آدم علیہ السلام کی طرف کی جائے تو روایت میں کوئی فائدہ حاصل نہیں ہو گا، کیونکہ اس میں کوئی شک نہیں ہے کہ تمام انسانوں کی شکل و صورت سیدنا آدم علیہ السلام جیسی ہی ہے، کسی اور جیسی نہیں ہے۔ اگر اس بات کا قائل شخص تنہائی میں بیٹھ کر اپنے پروردگار کی بارگاہ میں التجا کرتا اور اس سے حق اور ہدایت کی توفیق کا سوال کرتا، جو نبی اکرم صلی اللہ علیہ وسلم کی سنتوں کو لازم پکڑنے کی صورت میں سیدھا راستہ ہے، تو پھر اس کے لیے مناسب یہ تھا کہ وہ جس حدیث کا مفہوم نہیں جانتا اس کے حوالے سے سنت کے خادموں پر اعتراض نہ کرتا؛ اگر انسان کسی چیز کے بارے میں علم نہیں رکھتا، تو یہ چیز اس بات پر دلالت نہیں کرتی کہ اس کی ناواقفیت کی وجہ سے حق کی نفی کر دی جائے۔ ہم یہ کہتے ہیں: نبی اکرم صلی اللہ علیہ وسلم سے منقول روایت جب نقل کے اعتبار سے مستند طور پر ثابت ہو جائے تو اس میں کوئی اعتراض اور اختلاف نہیں ہو گا اور نہ ہی وہ قرآن کو منسوخ کرے گی، بلکہ ہر روایت کا اپنا مخصوص مفہوم اور پس منظر ہوتا ہے جسے اہل علم سمجھ جاتے ہیں۔ ہمارے نزدیک نبی اکرم صلی اللہ علیہ وسلم کے اس فرمان: ”اللہ تعالیٰ نے سیدنا آدم علیہ السلام کو اپنی صورت میں پیدا کیا“ کا مطلب یہ ہے کہ سیدنا آدم علیہ السلام کی دیگر تمام مخلوق پر فضیلت کو ظاہر کیا جائے، اور اس میں ضمیر سیدنا آدم علیہ السلام ہی کی طرف راجع ہے، اور ضمیر کے سیدنا آدم علیہ السلام کی طرف راجع ہونے کا فائدہ یوں ہے کہ اس ضمیر کی نسبت اللہ تعالیٰ کی طرف نہیں کی جا سکتی، کیونکہ ہمارا پروردگار اس چیز سے بلند و برتر ہے کہ اسے مخلوق میں سے کسی کے مشابہ قرار دیا جائے۔ اللہ تعالیٰ نے (دیگر انسانوں کی) تخلیق کا سبب ایک ایسی چیز کو قرار دیا ہے جو حرکت بھی کرتی ہے اور جس کے وجود میں نشوونما کی صلاحیت بھی پائی جاتی ہے، یہ مذکر اور مؤنث کے ملاپ کی صورت میں (نشوونما پاتی ہے)، اس کے بعد مادہِ تولید مذکر کے مخصوص عمل سے مؤنث کے رحم کی طرف منتقل ہو جاتا ہے، اس کے بعد وہ ایک متعین مدت تک جمے ہوئے خون کی شکل میں رہتا ہے، پھر وہ لوتھڑے کی شکل اختیار کر لیتا ہے، پھر شکل و صورت بن جاتی ہے، پھر ایک مخصوص وقت تک وہی رہتا ہے، پھر وہ اپنی جگہ سے نکلتا ہے، پھر دودھ پلانے کا مرحلہ آتا ہے، پھر دودھ چھڑانے کا مرحلہ آتا ہے، پھر دیگر مراتب ہیں جو ہم ذکر کر چکے ہیں، یہاں تک کہ اسے موت آ جاتی ہے۔ تو حرکت کرنے والے اور اپنی ذات کے اعتبار سے نشوونما کی صلاحیت رکھنے والے کی یہ صفت ہے، جبکہ اللہ تعالیٰ نے سیدنا آدم علیہ السلام کو ان کی صورت پر پیدا کیا ہے، یعنی ان کی تخلیق اس حالت میں ہوئی کہ ان کی لمبائی ساٹھ گز تھی، ان سے پہلے کسی مذکر اور مؤنث کا ملاپ نہیں ہوا تھا، مادہِ تولید کسی جگہ سے منتقل ہو کر کسی جگہ نہیں ٹھہرا تھا، نہ وہ مادہ جمے ہوئے خون یا گوشت کے لوتھڑے کی شکل میں تبدیل ہوا اور نہ ہی اس نے بعد میں جسم کی شکل اختیار کی، تو اللہ تعالیٰ نے اس چیز کے ذریعے ان کی فضیلت کو واضح کر دیا جو وہ دیگر تمام مخلوق پر رکھتے ہیں کہ وہ پہلے نطفے کی شکل میں نہیں تھے کہ پھر جما ہوا خون بن جاتے، نہ ہی جمے ہوئے خون کے بعد گوشت کا لوتھڑا بنے، نہ ہی انہیں دودھ پینے کی نوبت آئی اور نہ ہی دودھ چھڑانے کی نوبت آئی، اور نہ ہی وہ بچپن کے بعد نوجوان ہوئے جیسا کہ سیدنا آدم علیہ السلام کے علاوہ دیگر انسانوں کی صورت حال ہوتی ہے۔ یہ بات اس شخص کے موقف کے خلاف ہے جو اس بات کا قائل ہے کہ محدثین حشویہ فرقے جیسے نظریات رکھتے ہیں، وہ ایسی چیزیں روایت کر دیتے ہیں جن کا فہم حاصل نہیں ہو سکتا اور وہ ایسی چیزوں کے ذریعے استدلال کرتے ہیں جن کا انہیں علم نہیں ہوتا۔ [صحیح ابن حبان/كتاب التاريخ/حدیث: 6162]

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب اللہ تعالیٰ نے سیدنا آدم علیہ السلام کو پیدا کیا، تو ابلیس ان کے جسم کے گرد چکر لگانے لگا، جب اس نے انہیں اندر سے خالی دیکھا تو بولا: میں نے اس کو دیکھ لیا ہے، یہ مخلوق قابو میں رہنے والی نہیں ہے۔“ [صحیح ابن حبان/كتاب التاريخ/حدیث: 6163]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جب اللہ تعالیٰ نے سیدنا آدم علیہ السلام کو پیدا کیا تو انہیں چھینک آ گئی، ان کے پروردگار نے انہیں یہ الہام کیا کہ وہ «الْحَمْدُ لِلّٰهِ» ”تمام تعریفیں اللہ کے لیے ہیں“ کہیں، تو ان کے پروردگار نے ان سے فرمایا: «يَرْحَمُكَ اللهُ» ”اللہ تعالیٰ تم پر رحم کرے“، اسی وجہ سے اللہ تعالیٰ کی رحمت اس کے غضب پر سبقت لے گئی ہے۔“ [صحیح ابن حبان/كتاب التاريخ/حدیث: 6164]

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب اللہ تعالیٰ نے سیدنا آدم علیہ السلام میں روح پھونکی اور وہ ان کے سر تک پہنچی تو ان کو چھینک آ گئی، تو انہوں نے کہا: «الْحَمْدُ لِلّٰهِ رَبِّ الْعَالَمِينَ» ”ہر طرح کی حمد اللہ تعالیٰ کے لیے مخصوص ہے جو تمام جہانوں کا پروردگار ہے“، تو اللہ تعالیٰ نے ان سے فرمایا: «يَرْحَمُكَ اللّٰهُ» ”اللہ تم پر رحم کرے“۔“ [صحیح ابن حبان/كتاب التاريخ/حدیث: 6165]

مسلم بن یسار جہنی بیان کرتے ہیں: سیدنا عمر بن خطاب رضی اللہ عنہ سے اس بارے میں دریافت کیا گیا: ﴿اور جب تمہارے پروردگار نے اولادِ آدم کو ان کی پشتوں سے ان کی ذریت کو نکالا اور ان لوگوں کو اپنی ذات کے بارے میں گواہ بنایا (اور دریافت کیا) کیا میں تمہارا پروردگار نہیں ہوں انہوں نے جواب دیا: جی ہاں﴾ [سورة الأعراف: 172] ۔ سیدنا عمر بن خطاب رضی اللہ عنہ نے فرمایا: میں نے نبی اکرم صلی اللہ علیہ وسلم کو سنا آپ صلی اللہ علیہ وسلم سے اس آیت کے بارے میں دریافت کیا گیا، تو آپ صلی اللہ علیہ وسلم نے ارشاد فرمایا: ”بے شک اللہ تعالیٰ نے سیدنا آدم علیہ السلام کو پیدا کیا پھر اس نے ان کی پشت پر اپنا دستِ قدرت پھیرا اور ان کی پشت میں سے ان کی ذریت کو نکال دیا اور فرمایا میں نے ان لوگوں کو جنت کے لیے اور اہل جنت ہی کے سے عمل کرنے کے لیے پیدا کیا ہے پھر اللہ تعالیٰ نے ان کی پشت پر ہاتھ پھیرا اور اس میں سے ان کی ذریت کو نکالا اور فرمایا میں نے ان لوگوں کو جہنم کے لیے اور اہل جہنم ہی کے سے عمل کرنے کے لیے پیدا کیا ہے۔“ ایک صاحب نے عرض کی: یا رسول اللہ صلی اللہ علیہ وسلم ! پھر عمل کیوں کیا جائے۔ نبی اکرم صلی اللہ علیہ وسلم نے ارشاد فرمایا: ”جب اللہ تعالیٰ نے کسی بندے کو جنت کے لیے پیدا کیا ہو، تو اس سے اہل جنت کے سے عمل کرواتا ہے، یہاں تک کہ وہ شخص اہل جنت کے سے عمل کرتے ہوئے مرتا ہے، تو اللہ تعالیٰ اسے جنت میں داخل کر دیتا ہے، جب اللہ تعالیٰ نے کسی بندے کو جہنم کے لیے پیدا کیا ہو، تو اس سے اہل جہنم کے سے عمل کرواتا ہے، یہاں تک کہ وہ بندہ اہل جہنم کے سے عمل کرتے ہوئے مر جاتا ہے، تو اللہ تعالیٰ اس وجہ سے اسے جہنم میں داخل کر دیتا ہے۔“ [صحیح ابن حبان/كتاب التاريخ/حدیث: 6166]

سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا: ”جب اللہ تعالیٰ نے سیدنا آدم علیہ السلام کو پیدا کیا اور ان میں روح کو پھونکا تو انہیں چھینک آ گئی انہوں نے «اَلْحَمْدُ لِلّٰهِ» ”تمام تعریفیں اللہ ہی کے لیے ہیں“ کہا، انہوں نے اللہ کے حکم کے تحت اللہ کی حمد بیان کی تھی، تو ان کے پروردگار نے ان سے فرمایا تمہارا پروردگار تم پر رحم کرے اے آدم تم ان فرشتوں کے گروہ کے پاس جاؤ جو بیٹھے ہوئے ہیں اور انہیں سلام کرو، تو سیدنا آدم علیہ السلام نے کہا: «اَلسَّلَامُ عَلَيْكُمْ» ”تم پر سلامتی ہو“، فرشتوں نے جواب دیا: «وَعَلَيْكُمُ السَّلَامُ وَرَحْمَةُ اللّٰهِ» ”اور تم پر بھی سلامتی اور اللہ کی رحمت ہو“، پھر سیدنا آدم علیہ السلام اپنے پروردگار کے پاس واپس آئے تو پروردگار نے فرمایا: یہ تمہارا اور تمہاری اولاد کا سلام کرنے کا طریقہ ہے۔ اللہ تعالیٰ کے دو ہاتھ بند تھے اللہ تعالیٰ نے فرمایا: تم ان دونوں میں سے جسے چاہو اختیار کر لو، تو سیدنا آدم علیہ السلام نے کہا: میں اپنے پروردگار کے دائیں ہاتھ کو پسند کرتا ہوں ویسے میرے پروردگار کے دونوں ہاتھ دائیں اور برکت والے ہیں، پھر پروردگار نے دونوں ہاتھوں کو پھیلایا تو ان میں سیدنا آدم علیہ السلام اور ان کی ذریت موجود تھی۔ سیدنا آدم علیہ السلام نے دریافت کیا: اے میرے پروردگار یہ کون لوگ ہیں؟ اللہ تعالیٰ نے فرمایا: یہ تمہاری اولاد ہے ان میں سے ہر شخص کی عمر اس کی دونوں آنکھوں کے درمیان لکھی ہوئی ہے ان لوگوں میں ایک شخص تھا جو چمکدار چہرے کا مالک تھا اس کی عمر صرف چالیس سال لکھی ہوئی تھی سیدنا آدم علیہ السلام نے کہا: اے میرے پروردگار یہ کون ہے؟ اللہ تعالیٰ نے فرمایا: یہ تمہاری اولاد میں سے ایک شخص داؤد ہے، اللہ تعالیٰ نے اس کی عمر چالیس برس مقرر کی ہے۔ سیدنا آدم علیہ السلام نے عرض کی: اے میرے پروردگار اس کی عمر میں اضافہ کر دے۔ پروردگار نے فرمایا: وہ میں نے اس کے لیے مقرر کر دی ہے۔ سیدنا آدم علیہ السلام نے عرض کی: میں اپنی عمر کے ساٹھ سال اسے دیتا ہوں۔ اللہ تعالیٰ نے فرمایا: تم اور وہ (یعنی تمہاری بیوی) جنت میں رہو، تو جب تک اللہ تعالیٰ کو منظور تھا وہ جنت میں رہے پھر انہیں وہاں سے نکالا گیا۔ سیدنا آدم علیہ السلام اپنی عمر شمار کرتے رہے پھر ملک الموت ان کے پاس آیا تو سیدنا آدم علیہ السلام نے کہا: کیا تم جلدی نہیں آ گئے؟ میری عمر تو ایک ہزار سال تھی۔ ملک الموت نے کہا: جی ہاں، لیکن آپ نے اس میں سے ساٹھ سال اپنے بیٹے داؤد کو دے دیے تھے، تو سیدنا آدم علیہ السلام نے اس بات کو تسلیم نہیں کیا اسی وجہ سے ان کی اولاد بھی انکار کرتی ہے۔ سیدنا آدم علیہ السلام بھول گئے اسی وجہ سے ان کی اولاد بھی بھول جاتی ہے، تو اس دن (کیے گئے معاہدے) کو تحریر کرنے یا گواہ قائم کرنے کا حکم دیا گیا۔“ [صحیح ابن حبان/كتاب التاريخ/حدیث: 6167]