سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ نے رحمت کے ایک سو جز کیے ہیں جن میں سے ننانوے جز اس نے اپنے پاس رکھ لیے ہیں، ان میں سے ایک جز زمین پر نازل کیا ہے، اس ایک جز کی وجہ سے مخلوق ایک دوسرے پر رحم کرتی ہے، یہاں تک کہ کوئی جانور اپنا پاؤں اپنے بچے پر نہیں دیتا کہ کہیں اسے نقصان نہ پہنچا دے۔“ [صحیح ابن حبان/كتاب التاريخ/حدیث: 6148]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”ہر چیز تقدیر کے مطابق ہے، یہاں تک کہ عاجز ہو جانا اور سمجھداری بھی (راوی کو شک ہے شاید یہ الفاظ ہیں) یہاں تک کہ سمجھداری اور عاجز ہو جانا۔“ [صحیح ابن حبان/كتاب التاريخ/حدیث: 6149]

سیدنا ابودرداء رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ ہر بندے کے لیے پانچ چیزیں طے کر چکا ہے: اس کا رزق، اس کی موت، اس کا عمل، اس کا نشان اور اس کا ٹھکانہ (یعنی قبر)۔“ [صحیح ابن حبان/كتاب التاريخ/حدیث: 6150]

سیدنا ابوعزہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جب اللہ تعالیٰ کسی سرزمین پر کسی بندے کی روح قبض کرنے کا ارادہ کرتا ہے تو اس بندے کے لیے اس علاقے میں کوئی کام پیدا کر دیتا ہے۔“ [صحیح ابن حبان/كتاب التاريخ/حدیث: 6151]

سیدنا ابوذر غفاری رضی اللہ عنہ بیان کرتے ہیں: میں نے نبی اکرم صلی اللہ علیہ وسلم سے اللہ تعالیٰ کے اس فرمان ﴿وَالشَّمْسُ تَجْرِي لِمُسْتَقَرٍّ لَهَا﴾ [سورة يس: 38] ”سورج اپنی مخصوص گزرگاہ پر چلتا ہے۔“ کے بارے میں دریافت کیا۔ نبی اکرم صلی اللہ علیہ وسلم نے فرمایا: ”اس کی گزرگاہ عرش کے نیچے ہے۔“ [صحیح ابن حبان/كتاب التاريخ/حدیث: 6152]

سیدنا ابوذر غفاری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے فرمایا: ”کیا تم لوگ جانتے ہو سورج کہاں جاتا ہے؟“ لوگوں نے عرض کی: اللہ اور اس کا رسول صلی اللہ علیہ وسلم زیادہ بہتر جانتے ہیں۔ نبی اکرم صلی اللہ علیہ وسلم نے ارشاد فرمایا: ”یہ چلتا رہتا ہے، یہاں تک کہ یہ عرش کے نیچے اپنے مخصوص ٹھکانے تک پہنچ جاتا ہے، تو سجدے میں گر جاتا ہے، اس کے بعد یہ اسی حالت میں رہتا ہے، یہاں تک کہ اسے یہ کہا جاتا ہے: تم اپنے سر کو اٹھاؤ اور وہاں واپس چلے جاؤ جہاں سے تم آئے ہو، تو وہ واپس آتا ہے اور اپنے طلوع ہونے کی جگہ سے طلوع ہوتا ہے، پھر وہ آتا ہے، یہاں تک کہ اپنے مخصوص ٹھکانے تک پہنچ جاتا ہے جو عرش کے نیچے ہے، پھر وہ سجدے میں چلا جاتا ہے اور سجدے کی حالت میں رہتا ہے، یہاں تک کہ اسے یہ کہا جاتا ہے: اپنا سر اٹھاؤ اور واپس اسی جگہ چلے جاؤ جہاں سے آئے ہو، تو وہ واپس آ جاتا ہے اور اپنے مخصوص مقام سے طلوع ہوتا ہے، پھر وہ آتا ہے اور عرش کے نیچے اپنے مخصوص ٹھکانے تک پہنچ جاتا ہے اور سجدے میں چلا جاتا ہے، پھر وہ اسی حالت میں رہتا ہے، یہاں تک کہ اسے یہ کہا جاتا ہے: تم اپنے سر کو اٹھاؤ اور جہاں سے آئے ہو وہاں واپس چلے جاؤ، وہ واپس چلا جاتا ہے اور اپنے مخصوص مقام سے طلوع ہوتا ہے، پھر وہ چلتا رہتا ہے۔ لوگوں کو اس میں کوئی خرابی نظر نہیں آتی، یہاں تک کہ ایک مرتبہ وہ عرش کے نیچے اپنے مخصوص ٹھکانے تک پہنچے گا تو اسے کہا جائے گا: تم سر کو اٹھاؤ اور مغرب کی طرف سے طلوع ہو جاؤ، تو وہ مغرب کی طرف سے طلوع ہو جائے گا۔“ نبی اکرم صلی اللہ علیہ وسلم نے دریافت کیا: ”کیا تم لوگ جانتے ہو ایسا کب ہو گا؟ ﴿لَا يَنْفَعُ نَفْسًا إِيمَانُهَا لَمْ تَكُنْ آمَنَتْ مِنْ قَبْلُ أَوْ كَسَبَتْ فِي إِيمَانِهَا خَيْرًا﴾ [سورة الأنعام: 158] ”اس وقت جب کسی ایسے شخص کو ایمان لانا فائدہ نہیں دے گا جو اس سے پہلے ایمان نہیں لایا تھا جس نے اپنے ایمان میں بھلائی نہیں کمائی تھی“۔“ (امام ابن حبان رحمہ اللہ فرماتے ہیں:) اسحاق نامی راوی نے یہ روایت اسی طرح یونس بن عبید کے حوالے سے ابراہیم تیمی سے نقل کی ہے، حالانکہ مشہور یہ ہے کہ یہ روایت یونس بن خباب کے حوالے سے ابراہیم تیمی سے منقول ہے۔ [صحیح ابن حبان/كتاب التاريخ/حدیث: 6153]

سیدنا ابوذر غفاری رضی اللہ عنہ بیان کرتے ہیں: سورج غروب ہونے کے قریب میں نبی اکرم صلی اللہ علیہ وسلم کے ساتھ مسجد میں موجود تھا، آپ صلی اللہ علیہ وسلم نے دریافت کیا: ”کیا تم لوگ یہ بات جانتے ہو کہ سورج کہاں غروب ہوتا ہے؟“ میں نے عرض کی: اللہ اور اس کے رسول زیادہ بہتر جانتے ہیں۔ نبی اکرم صلی اللہ علیہ وسلم نے فرمایا: ”یہ جاتا ہے، یہاں تک کہ یہ عرش کے نیچے اپنے پروردگار کی بارگاہ میں پہنچ جاتا ہے، پھر یہ اجازت مانگتا ہے تو اسے اجازت ملتی ہے، عنقریب ایسا وقت آئے گا یہ اجازت مانگے گا تو اسے اجازت نہیں ملے گی، وہ اس سے سفارش طلب کرتا ہے اور مطالبہ کرتا ہے، جب اس طرح کی صورت حال ہوتی ہے تو اسے کہا جاتا ہے: تم اپنی جگہ سے طلوع ہو جاؤ۔“ اللہ تعالیٰ کے اس فرمان ﴿وَالشَّمْسُ تَجْرِي لِمُسْتَقَرٍّ لَّهَا ذَلِكَ تَقْدِيرُ الْعَزِيزِ الْعَلِيمِ﴾ [سورة يس: 38] ”سورج اپنے مخصوص راستے پر چلتا ہے، یہ غالب اور علم رکھنے والی ذات کا مقرر کردہ (نظام) ہے۔“ سے یہی مراد ہے۔ [صحیح ابن حبان/كتاب التاريخ/حدیث: 6154]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: ”فرشتوں کو نور سے پیدا کیا گیا ہے، جنات کو آگ سے پیدا کیا گیا ہے اور انسانوں کو اس چیز سے پیدا کیا گیا ہے جس کے بارے میں تمہیں بتایا گیا ہے۔“ [صحیح ابن حبان/كتاب التاريخ/حدیث: 6155]

سیدنا ابوثعلبہ خشنی رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جنوں کی تین قسمیں ہیں: ایک قسم کتوں اور سانپوں کی شکل میں ہوتی ہے، ایک قسم ہوا میں اڑتے ہیں اور ایک قسم (پڑاؤ) کرتی اور (کوچ) کرتی ہے۔“ [صحیح ابن حبان/كتاب التاريخ/حدیث: 6156]

ابوسائب بیان کرتے ہیں: میں سیدنا ابوسعید خدری رضی اللہ عنہ کی خدمت میں حاضر ہوا، میں ان کے پاس بیٹھا ہوا تھا کہ اسی دوران مجھے ان کے پلنگ کے نیچے کسی چیز کے حرکت کرنے کی آواز محسوس ہوئی، میں نے جائزہ لیا تو وہاں سانپ موجود تھا، تو سیدنا ابوسعید خدری رضی اللہ عنہ نے دریافت کیا: تمہیں کیا ہوا ہے؟ میں نے کہا: یہاں سانپ موجود ہے۔ انہوں نے دریافت کیا: تم کیا کرنا چاہتے ہو؟ میں نے جواب دیا: میں اسے مارنا چاہتا ہوں، تو سیدنا ابوسعید خدری رضی اللہ عنہ نے اس محلے میں موجود ایک گھر کی طرف اشارہ کیا جو مجھے نظر آ رہا تھا۔ انہوں نے فرمایا: میرا چچازاد اس گھر میں رہتا تھا، غزوۂ احزاب کے موقع پر اس نے اپنے گھر جانے کی اجازت مانگی، اس کی نئی نئی شادی ہوئی تھی، نبی اکرم صلی اللہ علیہ وسلم نے اسے اجازت دے دی، آپ صلی اللہ علیہ وسلم نے اسے ہدایت کی کہ وہ اپنے ہتھیار ساتھ لے کر جائے۔ جب وہ اپنے محلہ میں آیا تو اس نے اپنی بیوی کو گھر کے دروازے پر کھڑا ہوا پایا، اس نے نیزے کے ذریعے اس عورت کی طرف اشارہ کیا، اس عورت نے کہا: آپ میرے بارے میں جلد بازی کا مظاہرہ نہ کیجیے، پہلے اس بات کا جائزہ لیں میں کیوں باہر آئی ہوں۔ وہ شخص گھر کے اندر گیا تو وہاں ایک عجیب و غریب سانپ موجود تھا، اس نے اپنے نیزے سے سانپ کو مارا اور پھر اسے اس نیزے میں پرو کر باہر لے آیا، وہ سانپ ہل جل رہا تھا۔ سیدنا ابوسعید خدری رضی اللہ عنہ بیان کرتے ہیں: مجھے نہیں پتہ کہ ان دونوں میں سے کون پہلے مرا؟ وہ آدمی یا سانپ۔ اس کی قوم کے افراد نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: آپ صلی اللہ علیہ وسلم اللہ تعالیٰ سے دعا کیجیے کہ ہمارے ساتھی کو واپس کر دے۔ نبی اکرم صلی اللہ علیہ وسلم نے فرمایا: ”تم اپنے ساتھی کے لیے دعائے مغفرت کرو۔“ پھر آپ صلی اللہ علیہ وسلم نے ارشاد فرمایا: ”کچھ جنات مدینہ منورہ میں رہتے ہیں جو اسلام قبول کر چکے ہیں، جب تم ان میں سے کسی کو دیکھو تو تین مرتبہ ڈراؤ، پھر (اس کے بعد بھی اگر) وہ تمہارے سامنے آ جائے، تو تم اسے قتل کرو، تم تین مرتبہ (اسے ڈرانے کے بعد) پھر قتل کرنا۔“ [صحیح ابن حبان/كتاب التاريخ/حدیث: 6157]