سیدنا عبداللہ بن عباس رضی اللہ عنہما بیان کرتے ہیں کہ ایک شخص نبی صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ صلی اللہ علیہ وسلم ! مجھے اپنے ذہن میں ایسا خیال محسوس ہوتا ہے کہ میں جل کر کوئلہ ہو جاؤں، یہ میرے نزدیک اس سے زیادہ پسندیدہ ہے کہ میں اس خیال کے بارے میں کوئی بات کروں، تو نبی صلی اللہ علیہ وسلم نے ارشاد فرمایا: «اللهُ أَكْبَرُ، اللهُ أَكْبَرُ، الْحَمْدُ لِلّٰهِ الَّذِي رَدَّ كَيْدَهُ إِلَى الْوَسْوَسَةِ» ”اللہ اکبر، اللہ اکبر، ہر طرح کی حمد اللہ تعالیٰ کے لیے مخصوص ہے جس نے اس کے معاملے کو وسوسے کی طرف لوٹا دیا ہے۔“ [صحیح ابن حبان/كتاب التاريخ/حدیث: 6188]

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب صبح ہوتی ہے تو شیطان اپنا لشکر پھیلا دیتا ہے اور یہ کہتا ہے: آج جو شخص کسی مسلمان کو گمراہ کرے گا میں اسے تاج پہناؤں گا۔“ نبی اکرم صلی اللہ علیہ وسلم فرماتے ہیں: ”ان میں سے ایک شخص آتا ہے اور یہ کہتا ہے: میں نے آج پوری کوشش کی، یہاں تک کہ ایک آدمی نے اپنی بیوی کو طلاق دے دی، شیطان کہتا ہے: ہو سکتا ہے وہ شخص دوسری شادی کر لے۔ پھر دوسرا شخص آتا ہے اور کہتا ہے: میں نے آج پوری کوشش کی، یہاں تک کہ ایک آدمی نے اپنے ماں باپ کی نافرمانی کی، شیطان کہتا ہے: ہو سکتا ہے کہ وہ بعد میں فرمانبردار بن جائے۔ ایک اور شیطان آتا ہے وہ یہ کہتا ہے: میں نے آج پوری کوشش کی کہ ایک آدمی نے شرک کر لیا، شیطان کہتا ہے: تم واقعی تم ہو! پھر ایک اور آتا ہے اور کہتا ہے: میں نے پوری کوشش کی، یہاں تک کہ ایک آدمی نے زنا کر لیا، شیطان کہتا ہے: تم نے واقعی کام کیا ہے! ایک اور آتا ہے وہ یہ کہتا ہے: میں نے آج پوری کوشش کی یہاں تک کہ ایک آدمی نے قتل کر دیا، تو شیطان کہتا ہے: تم نے واقعی ہی کام کیا ہے! پھر وہ اپنا تاج اسے پہنا دیتا ہے۔“ [صحیح ابن حبان/كتاب التاريخ/حدیث: 6189]

سیدنا ابوامامہ رضی اللہ عنہ بیان کرتے ہیں کہ ایک شخص نے عرض کی: یا رسول اللہ صلی اللہ علیہ وسلم ! کیا سیدنا آدم علیہ السلام نبی تھے؟ نبی اکرم صلی اللہ علیہ وسلم نے جواب دیا: ”جی ہاں، ان کے ساتھ کلام بھی کیا گیا۔“ اس نے دریافت کیا کہ ان کے اور سیدنا نوح علیہ السلام کے درمیان کتنا وقت ہے؟ نبی اکرم صلی اللہ علیہ وسلم نے فرمایا: ”دس صدیاں۔“ ابوتوبہ نامی راوی کا نام ربیع بن نافع ہے۔ [صحیح ابن حبان/كتاب التاريخ/حدیث: 6190]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”ہر نبی کے ساتھ دو فرشتے ہوتے ہیں، جس میں سے ایک اسے نیکی کا حکم دیتا ہے اور برائی سے منع کرتا ہے اور ایک کسی چیز کی پرواہ نہیں کرتا، تو جس شخص کو اس کے شر سے بچا لیا گیا اسے (خراب ہونے سے) بچا لیا گیا۔“ [صحیح ابن حبان/كتاب التاريخ/حدیث: 6191]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ نے جس نبی کو مبعوث کیا اور اس کے بعد جس کو بھی اس کا خلیفہ بنایا، تو اس کے ساتھ دو (فرشتے) ہوتے ہیں، ان میں سے ایک اسے نیکی کا حکم دیتا ہے اور اس کی ترغیب دیتا ہے اور ایک اسے برائی کا حکم دیتا ہے اور اس کی ترغیب دیتا ہے، جسے اللہ تعالیٰ محفوظ رکھے وہی محفوظ رہتا ہے۔“ [صحیح ابن حبان/كتاب التاريخ/حدیث: 6192]

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ہر نبی کے کچھ حواری ہوتے ہیں جو اس کی ہدایت کی پیروی کرتے ہیں اور اس کی سنت پر عمل پیرا ہوتے ہیں، پھر اس کے بعد کچھ لوگ آ جاتے ہیں جو ایسی باتیں کرتے ہیں جن پر وہ (خود) عمل نہیں کرتے اور ایسے کام کرتے ہیں، جنہیں وہ خود گناہ قرار دیتے ہیں، تو جو شخص اپنے ہاتھ کے ذریعے ان کے ساتھ جہاد کرے گا وہ مومن ہو گا، جو اپنی زبان کے ذریعے جہاد کرے گا وہ مومن ہو گا، جو شخص اپنے دل کے ذریعے جہاد کرے گا وہ مومن ہو گا اور پھر اس کے بعد رائی کے دانے کے وزن جتنا بھی ایمان نہیں ہے۔“ [صحیح ابن حبان/كتاب التاريخ/حدیث: 6193]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”دنیا اور آخرت میں، میں سیدنا عیسیٰ بن مریم علیہ السلام کے سب سے زیادہ قریب ہوں۔“ لوگوں نے دریافت کیا: وہ کیسے، یا رسول اللہ صلی اللہ علیہ وسلم ! نبی اکرم صلی اللہ علیہ وسلم نے فرمایا: ”انبیاء علاتی بھائی ہیں جن کی مائیں مختلف ہیں لیکن ان کا دین ایک ہے، لیکن ہمارے (یعنی میرے اور سیدنا عیسیٰ علیہ السلام کے درمیان) کوئی اور نبی نہیں ہے۔“ [صحیح ابن حبان/كتاب التاريخ/حدیث: 6194]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”میں سیدنا عیسیٰ علیہ السلام کے سب سے زیادہ قریب ہوں، انبیاء علاتی بھائی ہیں، میرے اور سیدنا عیسیٰ علیہ السلام کے درمیان کوئی اور نبی نہیں ہے۔“ [صحیح ابن حبان/كتاب التاريخ/حدیث: 6195]

سیدنا انس بن مالک رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”ہر نبی کی ایک مخصوص دعا ہے، جو وہ اپنی امت کے لیے کرتا ہے اور میں نے اپنی دعا کو اپنی امت کی شفاعت کے لیے سنبھال کے رکھا ہے۔“ [صحیح ابن حبان/كتاب التاريخ/حدیث: 6196]

سیدنا جابر رضی اللہ عنہ بیان کرتے ہیں کہ جب نبی اکرم صلی اللہ علیہ وسلم قومِ ثمود کی بستی کے پاس تشریف لائے تو آپ صلی اللہ علیہ وسلم نے ارشاد فرمایا: ”تم اپنے نبی سے معجزات کے بارے میں مطالبہ نہ کرنا کیونکہ سیدنا صالح علیہ السلام کی قوم نے اپنے نبی سے معجزے کا مطالبہ کیا، تو اس راستے سے ایک اونٹنی نکل کر ان کے پاس آئی، وہ اس راستے سے واپس چلی جایا کرتی تھی، وہ لوگ اس اونٹنی کا دودھ پیا کرتے تھے جس دن وہ اونٹنی پانی پینے کے لیے آتی تھی اتنا ہی جتنا وہ ان کے پانی پر وقفہ کے ساتھ آتی تھی ہوتا تھا، ان لوگوں نے اس اونٹنی کے پاؤں کاٹ دیے، تو ان لوگوں کے ساتھ تین دن کے اندر (عذاب آنے کا) وعدہ کیا گیا، یہ ایک ایسا وعدہ تھا جس کی خلاف ورزی نہیں ہونی تھی، تو ایک زبردست آواز نے انہیں اپنی گرفت میں لے لیا، اس وقت آسمان کے نیچے موجود ہر شخص ہلاکت کا شکار ہو گیا ماسوائے اس شخص کے جو حرم کی حدود کے اندر تھا، حرم نے انہیں اللہ کے عذاب سے محفوظ رکھا۔“ لوگوں نے عرض کی: یا رسول اللہ صلی اللہ علیہ وسلم ! وہ کون شخص تھا؟ نبی اکرم صلی اللہ علیہ وسلم نے فرمایا: ”ثقیف قبیلے کا جدِ امجد ابورغال۔“ [صحیح ابن حبان/كتاب التاريخ/حدیث: 6197]