سیدنا عبداللہ بن عمرو رضی اللہ عنہما بیان کرتے ہیں کہ ایک مرتبہ وہ نبی اکرم صلی اللہ علیہ وسلم کے ساتھ سفر کر رہے تھے، ان لوگوں کا گزر ابورغال کی قبر سے ہوا جو ثقیف قبیلے کا جدِ امجد تھا، ”یہ ایک ایسا شخص تھا جو قومِ ثمود سے تعلق رکھتا تھا، اس کی رہائش گاہ حرم کے مقام پر تھی، جب اللہ تعالیٰ نے اس کی قوم کو ہلاکت کا شکار کر دیا تو وہ ہلاکت کا شکار نہیں ہوا کیونکہ وہ حرم میں رہائش پذیر تھا، پھر وہ وہاں سے نکلا، جب وہ یہاں پہنچا تو یہاں اس کا انتقال ہو گیا، اس کے ہمراہ سونے کی ایک ٹہنی کو دفن کیا گیا۔“ (راوی کہتے ہیں:) ہم تیزی سے وہاں گئے اور سونے کی ٹہنی کو نکال لیا۔ [صحیح ابن حبان/كتاب التاريخ/حدیث: 6198]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم کے ہمراہ ہمارا گزر ”حجر“ کے مقام سے ہوا، تو نبی اکرم صلی اللہ علیہ وسلم نے ہم سے فرمایا: ”تم ان لوگوں کی رہائشی جگہ میں روتے ہوئے داخل ہو، جن لوگوں نے اپنے اوپر ظلم کیا تھا اس بات سے ڈرتے ہوئے کہ کہیں تمہیں بھی وہی عذاب لاحق نہ ہو جو انہیں لاحق ہوا تھا“، پھر نبی اکرم صلی اللہ علیہ وسلم نے اپنی رفتار تیز کی اور اس وادی سے آگے گزر گئے۔ [صحیح ابن حبان/كتاب التاريخ/حدیث: 6199]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے حجر (کی بستی سے گزرنے والوں) سے فرمایا: ”تم اس عذاب یافتہ قوم کے علاقے میں روتے ہوئے داخل ہونا، کہیں ایسا نہ ہو کہ تمہیں بھی وہی عذاب لاحق ہو جو انہیں لاحق ہوا تھا۔“ [صحیح ابن حبان/كتاب التاريخ/حدیث: 6200]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے حجر کی بستی والوں کے بارے میں فرمایا: ”تم اس عذاب یافتہ قوم کے علاقے میں روتے ہوئے داخل ہونا، تم یہاں داخل نہ ہونا (یعنی یہاں ٹھہرنا نہیں) کہیں ایسا نہ ہو کہ تمہیں بھی وہی عذاب لاحق ہو جائے جو انہیں لاحق ہوا تھا۔“ [صحیح ابن حبان/كتاب التاريخ/حدیث: 6201]

سیدنا عبداللہ بن عمر رضی اللہ عنہما بیان کرتے ہیں کہ کچھ لوگوں نے نبی اکرم صلی اللہ علیہ وسلم کے ہمراہ حجر کے علاقے میں پڑاؤ کیا جو قوم ثمود کا علاقہ تھا، انہوں نے وہاں کے کنویں سے پانی لے لیا اور اس کے ذریعہ آٹا بھی گوندھ لیا، نبی اکرم صلی اللہ علیہ وسلم کے حکم کے تحت لیا ہوا پانی بہا دیا گیا اور وہ آٹا اونٹوں کو کھلا دیا گیا، اور نبی اکرم صلی اللہ علیہ وسلم نے ان لوگوں کو یہ حکم دیا کہ ”وہ اس کنویں سے پانی حاصل کریں جہاں (سیدنا صالح علیہ السلام کی) اونٹنی پانی پینے کے لیے آتی تھی۔“ [صحیح ابن حبان/كتاب التاريخ/حدیث: 6202]

سیدنا عبداللہ بن عمر رضی اللہ عنہما بیان کرتے ہیں: غزوہ تبوک کے سال نبی اکرم صلی اللہ علیہ وسلم نے حجر کے مقام پر قومِ ثمود کے علاقے کے قریب پڑاؤ کیا، لوگوں نے وہاں کے کنوؤں سے پانی حاصل کر لیا، جہاں سے قومِ ثمود کے لوگ پانی پیا کرتے تھے، لوگوں نے وہاں ہنڈیا بھی چڑھائی اور وہاں آٹا بھی گوندھ لیا، تو نبی اکرم صلی اللہ علیہ وسلم نے فرمایا: ”تم ہنڈیا کو الٹا دو اور آٹا اونٹوں کو کھلا دو“، پھر نبی اکرم صلی اللہ علیہ وسلم وہاں سے روانہ ہوئے، یہاں تک کہ آپ صلی اللہ علیہ وسلم نے اس جگہ پڑاؤ کیا جہاں سے (سیدنا صالح علیہ السلام کی) اونٹنی پانی پیا کرتی تھی۔ نبی اکرم صلی اللہ علیہ وسلم نے ارشاد فرمایا: ”تم اس عذاب یافتہ قوم کے علاقے میں داخل نہ ہو، کہیں تمہیں بھی وہ عذاب لاحق نہ ہو جو انہیں لاحق ہوا تھا“۔ [صحیح ابن حبان/كتاب التاريخ/حدیث: 6203]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا ابراہیم علیہ السلام نے قدوم کے مقام پر 120 سال کی عمر میں اپنے ختنے کیے تھے، اس کے بعد وہ 80 سال تک زندہ رہے۔“ امام عبدالرزاق بیان کرتے ہیں: قدوم ایک گاؤں کا نام ہے۔ [صحیح ابن حبان/كتاب التاريخ/حدیث: 6204]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا ابراہیم علیہ السلام کی عمر جب 120 سال ہوئی، انہوں نے اس وقت اپنے ختنے کیے، اس کے بعد وہ 80 سال تک زندہ رہے، انہوں نے قدوم کے مقام پر ختنے کیے تھے۔“ [صحیح ابن حبان/كتاب التاريخ/حدیث: 6205]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ سیدنا یوسف علیہ السلام پر رحم کرے، اگر وہ کلمہ نہ ہوتا جو انہوں نے کہا تھا: «اذْكُرْنِي عِنْدَ رَبِّكَ» ”تم اپنے آقا کے سامنے میرا ذکر کر دینا“ تو سیدنا یوسف علیہ السلام اتنا عرصہ قید خانے میں نہ رہتے جتنا عرصہ وہ رہے تھے، اور اللہ تعالیٰ سیدنا لوط علیہ السلام پر رحم کرے، انہوں نے ایک مضبوط پناہ گاہ کی پناہ لینے کا ارادہ کیا تھا، جب انہوں نے اپنی اس قوم سے کہا: ﴿لَوْ أَنَّ لِي بِكُمْ قُوَّةً أَوْ آوِي إِلَى رُكْنٍ شَدِيدٍ﴾ [سورة هود: 80] ”یا تو میرے پاس تمہارے مقابلے میں قوت ہو گی، یا پھر میں ایک مضبوط پناہ گاہ کی پناہ لے لوں گا۔““ نبی اکرم صلی اللہ علیہ وسلم فرماتے ہیں: ”اس کے بعد اللہ تعالیٰ نے ہر نبی کو اس کی مخصوص قوم میں بھیجا۔“ [صحیح ابن حبان/كتاب التاريخ/حدیث: 6206]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو بلانے والا سیدنا یوسف علیہ السلام کو بلانے آیا تھا وہ میرے پاس آتا تو میں اس کے ساتھ چلا جاتا، سیدنا یوسف علیہ السلام نے اس سے کہا تھا: ﴿ارْجِعْ إِلَىٰ رَبِّكَ فَاسْأَلْهُ مَا بَالُ النِّسْوَةِ اللَّاتِي قَطَّعْنَ أَيْدِيَهُنَّ﴾ [سورة يوسف: 50] ”تم اپنے آقا کے پاس واپس جاؤ اور اس سے دریافت کرو کہ ان خواتین کا کیا بنا جنہوں نے اپنے ہاتھ کاٹ لیے تھے۔“ اللہ تعالیٰ سیدنا لوط علیہ السلام پر رحم فرمائے، انہوں نے ایک مضبوط پناہ گاہ کی پناہ لینے کا ارادہ کیا تھا، جب انہوں نے اپنی قوم سے کہا: ﴿لَوْ أَنَّ لِي بِكُمْ قُوَّةً أَوْ آوِي إِلَىٰ رُكْنٍ شَدِيدٍ﴾ [سورة هود: 80] ”اگر میرے پاس تمہارے مقابلے میں قوت ہوئی تو ٹھیک ہے ورنہ میں ایک مضبوط پناہ گاہ کی پناہ لے لوں گا۔“ اس کے بعد اللہ تعالیٰ نے ہر نبی کو اس کی مخصوص قوم میں مبعوث فرمایا۔“
(امام ابن حبان رحمہ اللہ فرماتے ہیں:) روایت کے یہ الفاظ کہ ”میں بلانے والے کے ساتھ چلا جاتا“ اس میں لفظی طور پر اطلاع دی گئی ہے لیکن اس کے ذریعے مراد یہ ہے کہ جس شخصیت کے بارے میں روایت کے الفاظ واقع ہوئے ہیں ان کی تعریف کی جائے۔ [صحیح ابن حبان/كتاب التاريخ/حدیث: 6207]