سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”روحیں گروہوں کی شکل میں رہتی ہیں، ان میں سے جو (عالمِ ارواح میں) ایک دوسرے سے شناسا ہوتی ہیں وہ دنیا میں بھی ایک دوسرے سے مانوس ہوتی ہیں اور جو ایک دوسرے سے شناسا نہیں ہوتی ہیں وہ دنیا میں بھی ایک دوسرے سے لاتعلق رہتی ہیں۔“ [صحیح ابن حبان/كتاب التاريخ/حدیث: 6168]

عبداللہ بن دیلمی بیان کرتے ہیں: میں سیدنا عبداللہ بن عمر رضی اللہ عنہما کی خدمت میں حاضر ہوا اور میں نے عرض کیا: لوگ یہ کہتے ہیں کہ آپ فرماتے ہیں کہ وہ شخص بدبخت ہوتا ہے جو اپنی ماں کے پیٹ میں بدبخت ہو، تو سیدنا عبداللہ بن عمر رضی اللہ عنہما نے فرمایا: میں کسی شخص کے لیے یہ بات حلال قرار نہیں دیتا کہ وہ میری طرف کوئی جھوٹی بات منسوب کرے، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک اللہ تعالیٰ نے اپنی مخلوق کو تاریکی میں پیدا کیا، پھر ان پر اپنا نور ڈالا، تو ان میں سے جسے وہ نور ملا وہ ہدایت پا گیا اور جس تک وہ نور نہیں پہنچا وہ گمراہ ہو گیا، اسی وجہ سے میں یہ کہتا ہوں کہ اللہ تعالیٰ کے علم کے حوالے سے (تقدیر مقرر ہو چکی ہے اور) قلم خشک ہو چکا ہے۔“ [صحیح ابن حبان/كتاب التاريخ/حدیث: 6169]

ابن دیلمی بیان کرتے ہیں: میں نے سیدنا عبداللہ بن عمرو رضی اللہ عنہما سے کہا: مجھے پتہ چلا ہے کہ آپ یہ کہتے ہیں: قلم خشک ہو چکا ہے، تو سیدنا عبداللہ رضی اللہ عنہما نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک اللہ تعالیٰ نے لوگوں کو تاریکی میں پیدا کیا پھر اس نے اپنے نور میں سے نور لیا اور اسے ان لوگوں پر ڈالا، تو جسے اس نے چاہا اس تک وہ نور پہنچ گیا اور جسے اس نے چاہا اس تک نور نہیں پہنچا، حالانکہ وہ یہ بات جانتا تھا کہ یہ نور کس تک نہیں پہنچے گا اور کس تک پہنچے گا، تو جس تک وہ نور پہنچ گیا اس نے ہدایت پا لی اور جس تک نہیں پہنچا وہ گمراہ ہو گیا۔“ (سیدنا عبداللہ رضی اللہ عنہما نے فرمایا) اسی وجہ سے میں یہ کہتا ہوں قلم خشک ہو چکا ہے (یعنی تقدیر کا فیصلہ طے ہو چکا ہے)۔ [صحیح ابن حبان/كتاب التاريخ/حدیث: 6170]

سیدنا خریم بن فاتک اسدی رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”لوگ چار طرح کے ہوتے ہیں اور اعمال چھ قسم کے ہوتے ہیں؛ (جنت اور جہنم کو) واجب کرنے والے اعمال، جن کا بدلہ برابر برابر ہو، جس میں ایک نیکی کا بدلہ دس گنا ہو اور ایک نیکی کا بدلہ سات سو گنا ہو۔ کچھ لوگ ایسے ہوتے ہیں جنہیں دنیا اور آخرت میں کشادگی نصیب ہوتی ہے، کچھ کو دنیا میں کشادگی نصیب ہوتی ہے اور آخرت میں تنگی نصیب ہو گی، کچھ کو دنیا میں تنگی نصیب ہوتی ہے اور آخرت میں کشادگی نصیب ہو گی، کچھ کو دنیا اور آخرت دونوں میں تنگی نصیب ہو گی، کچھ لوگ دنیا میں بدبخت ہوتے ہیں اور آخرت میں بھی بدبخت ہوتے ہیں۔ دو واجب کرنے والی چیزیں (یہ ہیں): جو شخص یہ کہے کہ اللہ تعالیٰ کے علاوہ اور کوئی معبود نہیں ہے (راوی کو شک ہے شاید یہ الفاظ ہیں) جو اللہ پر ایمان رکھے وہ جنت میں داخل ہو گا، جو شخص ایسی حالت میں مرے کہ وہ کسی کو اللہ کا شریک ٹھہراتا ہو گا وہ جہنم میں داخل ہو گا، جو شخص نیکی کا ارادہ کر کے اس پر عمل کر لے اسے اس کا دس گنا اجر ملے گا اور جو شخص کسی نیکی کا ارادہ کر کے اس پر عمل نہ کرے اس کے نامہ اعمال میں ایک نیکی نوٹ کی جائے گی، جو شخص کسی برائی کا ارادہ کر کے اس پر عمل نہ کرے اس کے نامہ اعمال میں ایک نیکی نوٹ کی جائے گی، جو شخص کسی برائی کا ارادہ کر کے اس پر عمل کر لے اس کے نامہ اعمال میں ایک برائی نوٹ کی جائے گی، اس میں کوئی اضافہ نہیں ہو گا اور جو شخص اضافی چیز کو خرچ کرے گا، تو اس کا بدلہ سات سو گنا تک ہو گا۔“ [صحیح ابن حبان/كتاب التاريخ/حدیث: 6171]

سیدنا عبداللہ بن عمر رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”لوگوں کی مثال ایسے ایک سو اونٹوں کی طرح ہے جن میں آدمی کو ایک بھی سواری نہیں ملتی۔“ [صحیح ابن حبان/كتاب التاريخ/حدیث: 6172]

ام المؤمنین سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کی خدمت میں ایک انصاری بچے کو لایا گیا تاکہ آپ صلی اللہ علیہ وسلم اس کی نماز جنازہ ادا کریں، میں نے عرض کی: یا رسول اللہ صلی اللہ علیہ وسلم ! یہ تو جنت کی ایک چڑیا ہے، نبی اکرم صلی اللہ علیہ وسلم نے فرمایا: ”کیا تم یہ بات نہیں جانتی کہ اللہ تعالیٰ نے جنت کے لیے مخصوص مخلوق کو پیدا کیا ہے، اس نے ان لوگوں کو جنت کا اہل بنایا ہے اس وقت جب وہ اپنے آباؤ اجداد کی پشتوں میں تھے، اس نے جہنم کو بھی پیدا کیا اور جہنم کے اہل افراد بھی پیدا کیے جبکہ وہ اپنے آباؤ اجداد کی پشتوں میں تھے۔“ [صحیح ابن حبان/كتاب التاريخ/حدیث: 6173]

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں یہ بات بتائی اور آپ صلی اللہ علیہ وسلم سچے ہیں اور آپ صلی اللہ علیہ وسلم کی تصدیق بھی کی گئی: ”کسی بھی شخص کے نطفے کو اس کی ماں کے پیٹ میں چالیس دن تک (نطفے کی شکل میں) رکھا جاتا ہے، پھر وہ اتنے ہی عرصے تک جما ہوا خون بن کر رہتا ہے، پھر وہ اتنے ہی عرصے تک گوشت کے ٹکڑے کی شکل میں رہتا ہے، پھر اللہ تعالیٰ اس کی طرف ایک فرشتے کو بھیجتا ہے جسے چار باتوں کا حکم دیا جاتا ہے، اللہ تعالیٰ فرماتا ہے: تم اس کے عمل، اس کی موت، اس کا رزق اور اس کے بدبخت یا نیک بخت ہونے کو نوٹ کرو۔ (نبی اکرم صلی اللہ علیہ وسلم فرماتے ہیں) ایک شخص اہل جنت کے سے عمل کرتا رہتا ہے، یہاں تک کہ اس کے اور جنت کے درمیان ایک بالشت کا فاصلہ باقی رہ جاتا ہے، پھر تقدیر کا لکھا ہوا اس پر غالب آ جاتا ہے اور اس کے لیے اہل جہنم کی مہر لگا دی جاتی ہے (یا اس کا خاتمہ اہل جہنم پر ہوتا ہے) اور ایک شخص اہل جہنم کے سے عمل کرتا رہتا ہے، یہاں تک کہ اس کے اور جہنم کے درمیان ایک بالشت کا فاصلہ رہ جاتا ہے، تو تقدیر کا لکھا ہوا اس پر غالب آ جاتا ہے اور وہ اہل جنت کا سا عمل کر کے جنت میں داخل ہو جاتا ہے۔“ [صحیح ابن حبان/كتاب التاريخ/حدیث: 6174]

سیدنا سہل بن سعد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک شخص اہل جنت کے سے عمل کرتا ہے جو اس کے اور لوگوں کے درمیان معاملے کے حوالے سے ہوتے ہیں، حالانکہ وہ شخص جہنمی ہوتا ہے اور ایک شخص اپنے اور لوگوں کے درمیان معاملے کے حوالے سے اہل جہنم کا سا عمل کرتا ہے، حالانکہ وہ اہل جنت میں سے ہوتا ہے۔“ [صحیح ابن حبان/كتاب التاريخ/حدیث: 6175]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک شخص طویل عرصے تک اہل جنت کے سے عمل کرتا رہتا ہے، لیکن پھر اللہ تعالیٰ اس کا خاتمہ اہل جہنم کے سے عمل پر کرتا ہے اور اسے اہل جہنم میں شامل کر دیتا ہے، اور ایک شخص طویل عرصے تک اہل جہنم کے سے عمل کرتا ہے، پھر اللہ تعالیٰ اس کا خاتمہ اہل جنت کے سے عمل کے ذریعے کرتا ہے اور اسے اہل جنت میں شامل کر دیتا ہے۔“ [صحیح ابن حبان/كتاب التاريخ/حدیث: 6176]

سیدنا عبداللہ بن مسعود رضی اللہ عنہ بیان کرتے ہیں: ”بدبخت شخص وہ ہوتا ہے جو ماں کے پیٹ میں بدبخت ہو، نیک بخت وہ ہوتا ہے جسے دوسرے کے ذریعے نصیحت کی جا سکے۔“ نبی اکرم صلی اللہ علیہ وسلم کے اصحاب میں سے ایک صاحب تشریف لائے ان کا نام سیدنا حذیفہ بن اسید غفاری رضی اللہ عنہما تھا، انہیں یہ بات سیدنا عبداللہ بن مسعود رضی اللہ عنہ کے قول کے طور پر بتائی گئی، تو انہوں نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جب نطفے کو بیالیس (42) دن گزر جاتے ہیں تو اللہ تعالیٰ اس کی طرف ایک فرشتے کو بھیجتا ہے جو اس کی شکل و صورت متعین کرتا ہے، اس کی سماعت و بصارت، اس کی کھال، اس کا گوشت اور اس کی ہڈیاں بناتا ہے، پھر وہ دریافت کرتا ہے: اے پروردگار! کیا یہ لڑکا ہو گا یا لڑکی ہو گی؟ تو تمہارے پروردگار نے جو چاہا ہوتا ہے وہ فیصلہ سنا دیتا ہے، فرشتہ اسے نوٹ کر لیتا ہے، پھر وہ دریافت کرتا ہے: پروردگار! اس کی موت کا وقت کیا ہو گا؟ تمہارے پروردگار نے جو چاہا ہوتا ہے وہ فیصلہ سنا دیتا ہے، فرشتہ اسے نوٹ کر لیتا ہے، پھر وہ عرض کرتا ہے: پروردگار! اس کا رزق کتنا ہو گا؟ تو تمہارے پروردگار نے جو چاہا ہوتا ہے وہ فیصلہ بتا دیتا ہے، تو فرشتہ وہ صحیفہ اپنے ہاتھ میں لے لیتا ہے، اب اس معاملے میں کوئی اضافہ یا کمی نہیں ہو سکتی۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”اس نے اس کی سماعت کو پیدا کیا“ یہ الفاظ لوگوں کے محاورے کے اعتبار سے ہیں، اس کا یہ مطلب نہیں ہے کہ فرشتہ اس چیز کو پیدا کرتا ہے۔ [صحیح ابن حبان/كتاب التاريخ/حدیث: 6177]