ام المؤمنین سیدہ عائشہ رضی اللہ عنہا اور سیدنا ابن عباس رضی اللہ عنہما سے منقول ہے کہ ”نبی کریم صلی اللہ علیہ وسلم نے قربانی کے روز طواف کو رات تک مؤخر کیا تھا۔“ [سنن ابي داود/كتاب المناسك /حدیث: 2000]

سیدنا ابن عباس رضی اللہ عنہما سے مروی ہے کہ ”نبی کریم صلی اللہ علیہ وسلم نے اپنے طوافِ افاضہ میں «رَمَل» نہیں کیا تھا (آہستہ آہستہ نہیں دوڑے تھے جیسے کہ طوافِ قدوم میں کیا تھا۔)“ [سنن ابي داود/كتاب المناسك /حدیث: 2001]

سیدنا ابن عباس رضی اللہ عنہما فرماتے ہیں کہ لوگ (حج کے بعد) ہر جانب واپس چلے جاتے تھے، تو نبی کریم صلی اللہ علیہ وسلم نے فرمایا: ”کوئی شخص ہرگز نہ جائے حتیٰ کہ اس کا آخری عمل بیت اللہ کا طواف ہو۔“ [سنن ابي داود/كتاب المناسك /حدیث: 2002]

ام المؤمنین سیدہ عائشہ رضی اللہ عنہا سے مروی ہے کہ رسول اللہ صلی اللہ علیہ وسلم نے سیدہ صفیہ بنت حیی رضی اللہ عنہا کا ذکر کیا تو بتایا گیا کہ اسے حیض آ گیا ہے تو رسول اللہ صلی اللہ علیہ وسلم نے فرمایا: ”شاید یہ ہمیں روکنے والی ہے؟“ (گھر والوں نے) کہا: ”اے اللہ کے رسول! اس نے طواف افاضہ کر لیا ہے“ تو آپ صلی اللہ علیہ وسلم نے فرمایا: ”تب نہیں۔“ [سنن ابي داود/كتاب المناسك /حدیث: 2003]

سیدنا حارث بن عبداللہ بن اوس رضی اللہ عنہ کہتے ہیں کہ میں سیدنا عمر بن خطاب رضی اللہ عنہ کے پاس آیا اور ان سے پوچھا کہ جو عورت قربانی والے دن طواف کر چکی ہو، پھر اسے حیض آ جائے تو؟ سیدنا عمر رضی اللہ عنہ نے کہا: ”چاہیے کہ اس کا آخری عمل بیت اللہ کا طواف ہو۔“ تب سیدنا حارث رضی اللہ عنہ نے کہا: ”رسول اللہ صلی اللہ علیہ وسلم نے بھی مجھ سے ایسے ہی فرمایا تھا۔“ تو سیدنا عمر رضی اللہ عنہ نے کہا: ”تیرے ہاتھ گر جائیں! مجھ سے وہ بات پوچھتا ہے جو پہلے رسول اللہ صلی اللہ علیہ وسلم سے پوچھ چکا ہے تاکہ میں ان کی مخالفت کروں؟“ [سنن ابي داود/كتاب المناسك /حدیث: 2004]

ام المؤمنین سیدہ عائشہ رضی اللہ عنہا بیان کرتی ہیں کہ ”میں نے تنعیم سے عمرے کا احرام باندھا، پھر حرم میں داخل ہوئی اور اپنا عمرہ پورا کیا۔ اور رسول اللہ صلی اللہ علیہ وسلم نے وادی ابطح میں میرا انتظار کیا حتیٰ کہ میں فارغ ہو گئی۔ اور آپ صلی اللہ علیہ وسلم نے لوگوں کو کوچ کرنے کا حکم دیا“ اور کہتی ہیں کہ ”رسول اللہ صلی اللہ علیہ وسلم بیت اللہ میں تشریف لائے، اس کا طواف کیا پھر روانہ ہو گئے۔“ [سنن ابي داود/كتاب المناسك /حدیث: 2005]

ام المؤمنین سیدہ عائشہ رضی اللہ عنہا نے بیان کیا: ”میں نبی کریم صلی اللہ علیہ وسلم کے ساتھ منیٰ سے آخری دن میں نکلی تو آپ صلی اللہ علیہ وسلم نے وادی محصب میں پڑاؤ کیا۔“ (مکہ اور منیٰ کے درمیان مقبرۃ المعلاۃ سے منیٰ کی طرف جانے والے راستے کا نام ابطح اور محصب ہے۔) امام ابوداؤد رحمہ اللہ فرماتے ہیں کہ ”ابن بشار نے اس حدیث میں ان کو تنعیم کی طرف روانہ کرنے کا ذکر نہیں کیا۔“ (سیدہ عائشہ رضی اللہ عنہا) کہتی ہیں: ”چنانچہ میں سحر کے وقت (عمرے سے فارغ ہو کر) آپ کے پاس پہنچی تو آپ نے صحابہ کو کوچ کا حکم دیا اور خود سوار ہوئے اور نماز فجر سے پہلے بیت اللہ میں آئے، طواف کیا اور پھر مدینہ کی راہ کی طرف چل نکلے۔“ [سنن ابي داود/كتاب المناسك /حدیث: 2006]

عبدالرحمٰن بن طارق اپنی والدہ رضی اللہ عنہا سے روایت کرتے ہیں کہ ”رسول اللہ صلی اللہ علیہ وسلم جب یعلیٰ کے گھر سے آگے بڑھتے تو بیت اللہ کی طرف رخ کرتے اور دعا فرماتے۔“ عبیداللہ وہ جگہ بھول گئے تھے۔ [سنن ابي داود/كتاب المناسك /حدیث: 2007]

ام المؤمنین سیدہ عائشہ رضی اللہ عنہا بیان کرتی ہیں کہ ”رسول اللہ صلی اللہ علیہ وسلم وادیِ محصب میں اس لیے اترے تھے تاکہ آپ صلی اللہ علیہ وسلم کو (مکہ سے) نکلنے میں آسانی رہے۔ یہ کوئی مشروع سنت نہیں ہے۔ جو چاہے یہاں اتر جائے اور جو چاہے نہ اترے۔“ [سنن ابي داود/كتاب المناسك /حدیث: 2008]

سیدنا ابورافع رضی اللہ عنہ (مولیٰ رسول اللہ صلی اللہ علیہ وسلم ) کہتے ہیں کہ ”رسول اللہ صلی اللہ علیہ وسلم نے مجھے یہ حکم نہیں دیا تھا کہ میں آپ صلی اللہ علیہ وسلم کے پڑاؤ کا یہاں انتظام کروں لیکن میں نے (اپنے طور پر) یہاں آپ صلی اللہ علیہ وسلم کا خیمہ لگا دیا تھا تو آپ صلی اللہ علیہ وسلم یہاں اتر پڑے تھے۔“ جناب مسدد نے کہا کہ ”ابورافع رضی اللہ عنہ نبی کریم صلی اللہ علیہ وسلم کے سامانِ سفر کے نگران اور منتظم تھے۔“ عثمان بن ابی شیبہ نے اپنی روایت میں «فِي الْأَبْطَحِ» ”ابطح میں“ کا لفظ ذکر کیا ہے۔ [سنن ابي داود/كتاب المناسك /حدیث: 2009]