سیدنا جابر بن عبداللہ رضی اللہ عنہ بیان کرتے ہیں، میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم قربانی والے دن اپنی سواری پر سے کنکریاں مار رہے تھے اور فرماتے تھے: ”مجھ سے اپنے اعمال حج سیکھ لو، میں نہیں جانتا، شاید میں اپنے اس حج کے بعد حج نہ کر سکوں۔“ [سنن ابي داود/كتاب المناسك /حدیث: 1970]

سیدنا جابر بن عبداللہ رضی اللہ عنہ بیان کرتے ہیں: ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم قربانی والے دن چاشت کے وقت اپنی سواری پر سے رمی کر رہے تھے، مگر اس کے بعد کے دنوں میں سورج ڈھلنے کے بعد کی۔“ [سنن ابي داود/كتاب المناسك /حدیث: 1971]

وبرہ (بن عبدالرحمٰن سلمی) کہتے ہیں، میں نے سیدنا ابن عمر رضی اللہ عنہ سے پوچھا کہ ”میں کس وقت جمرات کو کنکریاں ماروں؟“ انہوں نے کہا: ”جب تمہارا امام مارے تم بھی مار لو۔“ میں نے اپنا سوال دہرایا تو بولے: ”ہم سورج ڈھلنے کا انتظار کیا کرتے تھے۔ جب سورج ڈھل جاتا تو رمی کرتے تھے (قربانی والے دن کے بعد کے ایام میں)۔“ [سنن ابي داود/كتاب المناسك /حدیث: 1972]

ام المؤمنین سیدہ عائشہ رضی اللہ عنہا کا بیان ہے کہ ”رسول اللہ صلی اللہ علیہ وسلم نے (دس تاریخ کو قربانی والے دن) ظہر پڑھ لینے کے بعد دن کے آخری حصے میں طوافِ افاضہ کیا۔ پھر آپ صلی اللہ علیہ وسلم منیٰ لوٹ آئے اور ایامِ تشریق کی راتیں یہیں ٹھہرے رہے۔ سورج ڈھلنے کے بعد جمرات کو کنکریاں مارتے تھے۔ ہر جمرے کو سات کنکریاں مارتے اور ہر کنکری کے ساتھ «اللهُ أَكْبَرُ» ”اللہ سب سے بڑا ہے“ کہتے تھے۔ پہلے اور دوسرے جمرے کے پاس کافی لمبی دیر رکتے اور اپنی عاجزی اور تضرع کا اظہار کرتے (دعائیں کرتے)، پھر تیسرے جمرے کو کنکریاں مارتے مگر اس کے پاس نہیں رکتے تھے۔“ [سنن ابي داود/كتاب المناسك /حدیث: 1973]

سیدنا عبداللہ بن مسعود رضی اللہ عنہ بیان کرتے ہیں کہ جب آپ صلی اللہ علیہ وسلم جمرہ کبریٰ (جمرہ عقبہ) کے پاس پہنچے تو آپ صلی اللہ علیہ وسلم نے بیت اللہ کو اپنے بائیں جانب اور منٰی کو دائیں جانب کیا اور پھر جمرے کو سات کنکریاں ماریں۔ سیدنا ابن مسعود رضی اللہ عنہ نے کہا: ”اور اس طرح سے رمی کی اس ذات نے جس پر سورۃ البقرہ نازل کی گئی تھی۔“ [سنن ابي داود/كتاب المناسك /حدیث: 1974]

ابو البداح بن عاصم رضی اللہ عنہ اپنے والد سے روایت کرتے ہیں کہ ”رسول اللہ صلی اللہ علیہ وسلم نے اونٹوں کے چرواہوں کو منیٰ میں راتیں گزارنے سے رخصت دی تھی (کہ) یہ لوگ قربانی والے دن رمی کریں، پھر اگلے دن (گیارہویں تاریخ کو) اس کے بعد اگلا دن چھوڑ کر روانگی والے دن دو دن کی رمی کریں۔“ [سنن ابي داود/كتاب المناسك /حدیث: 1975]

ابوالبداح بن عدی اپنے والد رضی اللہ عنہ سے روایت کرتے ہیں کہ ”نبی کریم صلی اللہ علیہ وسلم نے چرواہوں کو رخصت دی تھی کہ ایک دن رمی کریں اور ایک دن چھوڑ دیں۔“ [سنن ابي داود/كتاب المناسك /حدیث: 1976]

ابومجلز بیان کرتے ہیں کہ میں نے سیدنا ابن عباس رضی اللہ عنہ سے رمی جمار کے بارے میں پوچھا تھا تو انہوں نے کہا: ”مجھے معلوم نہیں کہ رسول اللہ صلی اللہ علیہ وسلم نے چھ کنکریاں ماری تھیں یا سات۔“ [سنن ابي داود/كتاب المناسك /حدیث: 1977]

سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”جب تم میں سے کوئی (دسویں تاریخ کو) جمرہ عقبہ کی رمی کر لے تو اس کے لیے بیویوں کے سوا ہر شے حلال ہو گئی۔“ امام ابوداؤد رحمہ اللہ نے کہا: ”یہ حدیث ضعیف ہے۔ حجاج (حجاج بن ارطاۃ) نے زہری کو نہ دیکھا ہے اور نہ اس سے کچھ سنا ہے۔“ [سنن ابي داود/كتاب المناسك /حدیث: 1978]

سیدنا عبداللہ بن عمر رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ” «اللَّهُمَّ ارْحَمِ الْمُحَلِّقِينَ» اے اللہ! سر منڈوانے والوں پر رحم فرما۔“ صحابہ رضی اللہ عنہم نے کہا: ”اے اللہ کے رسول! اور کتروانے والوں کے لیے بھی (دعا فرمائیں)۔“ آپ صلی اللہ علیہ وسلم نے فرمایا: ” «اللَّهُمَّ ارْحَمِ الْمُحَلِّقِينَ» اے اللہ! سر منڈوانے والوں پر رحم فرما۔“ صحابہ رضی اللہ عنہم نے کہا: ”اے اللہ کے رسول! اور کتروانے والوں کے لیے بھی۔“ تب آپ صلی اللہ علیہ وسلم نے فرمایا: ” «وَالْمُقَصِّرِينَ» اور بال کتروانے والوں پر بھی (رحم فرما)۔“ [سنن ابي داود/كتاب المناسك /حدیث: 1979]