جناب عبدالرحمٰن بن یزید نے بیان کیا کہ سیدنا عثمان رضی اللہ عنہ نے منیٰ میں چار رکعتیں پڑھیں تو عبداللہ بن مسعود رضی اللہ عنہ نے کہا: ”میں نے نبی کریم صلی اللہ علیہ وسلم کے ساتھ، ابوبکر رضی اللہ عنہ کے ساتھ اور عمر رضی اللہ عنہ کے ساتھ دو دو رکعتیں (قصر) پڑھی ہیں۔“ (مسدد نے) حفص بن غیاث سے مزید یہ بھی کہا: ”اور عثمان رضی اللہ عنہ کے ساتھ بھی، کہ وہ ابتدائی دور خلافت میں (قصر کرتے رہے) پھر آخر میں وہ پوری پڑھنے لگے تھے۔“ (مسدد نے) یہاں سے ابومعاویہ سے یہ اضافہ کیا کہ (ابن مسعود رضی اللہ عنہ نے کہا) ”پھر تمہاری راہیں مختلف ہو گئیں اور مجھے دو رکعتیں جو (اللہ کے ہاں) قبول ہو جائیں چار رکعتوں سے بہتر معلوم ہوتی ہیں۔“ اعمش نے کہا: مجھے معاویہ بن قرہ نے اپنے بزرگوں (اساتذہ) سے بیان کیا کہ عبداللہ بن مسعود رضی اللہ عنہ نے بھی چار رکعتیں پڑھیں تو ان سے کہا گیا کہ ”آپ عثمان رضی اللہ عنہ پر عیب لگاتے ہیں پھر بھی چار پڑھتے ہیں؟“ کہنے لگے ”اختلاف کرنا برا کام ہے۔“ [سنن ابي داود/كتاب المناسك /حدیث: 1960]

امام زہری رحمہ اللہ سے مروی ہے کہ ”سیدنا عثمان رضی اللہ عنہ نے منیٰ میں چار رکعات اس لیے پڑھی تھیں کہ انہوں نے حج کے بعد وہیں اقامت کا عزم کر لیا تھا۔“ [سنن ابي داود/كتاب المناسك /حدیث: 1961]

جناب ابراہیم نخعی رحمہ اللہ سے مروی ہے کہ ”سیدنا عثمان رضی اللہ عنہ کے چار رکعت پڑھنے کی وجہ یہ تھی کہ انہوں نے اسے وطن بنا لیا تھا۔ (یہاں انہوں نے شادی کر لی تھی۔)“ [سنن ابي داود/كتاب المناسك /حدیث: 1962]

امام زہری رحمہ اللہ سے منقول ہے کہ ”سیدنا عثمان رضی اللہ عنہ نے جب طائف میں اپنی جائیداد لے لی اور یہاں اقامت کا ارادہ کر لیا تو چار رکعتیں پڑھیں۔ ان کے بعد دیگر ائمہ (بنی امیہ) نے یہی عمل اختیار کر لیا۔“ [سنن ابي داود/كتاب المناسك /حدیث: 1963]

امام زہری رحمہ اللہ سے روایت ہے کہ ”سیدنا عثمان رضی اللہ عنہ نے منیٰ میں بدوی لوگوں کی وجہ سے پوری نماز پڑھی تھی کیونکہ وہ اس سال بہت کثیر تعداد میں آئے تھے، تو انہوں نے لوگوں کو چار رکعتیں پڑھائیں تاکہ ان بدویوں کو معلوم رہے کہ نماز چار رکعات ہے۔“ [سنن ابي داود/كتاب المناسك /حدیث: 1964]

سیدنا حارثہ بن وہب الخزاعی رضی اللہ عنہ کی ماں سیدنا عمر رضی اللہ عنہ کی زوجیت میں تھی اور ان سے ان کا بیٹا عبید اللہ بن عمر پیدا ہوا تھا۔ سیدنا حارثہ رضی اللہ عنہ نے کہا: ”میں نے رسول اللہ صلی اللہ علیہ وسلم کے ساتھ منیٰ میں نماز پڑھی۔ لوگوں کی تعداد بہت زیادہ تھی تو آپ نے ہمیں حجۃ الوداع میں دو رکعتیں پڑھائیں۔“ امام ابوداؤد رحمہ اللہ نے کہا: ”حارثہ قبیلہ خزاعہ کے فرد تھے اور ان کا گھر مکہ میں تھا۔“ [سنن ابي داود/كتاب المناسك /حدیث: 1965]

سلیمان بن عمرو بن الاحوص کی والدہ رضی اللہ عنہا بیان کرتی ہیں کہ میں نے رسول اللہ صلی اللہ علیہ وسلم کو وادی کے درمیان سے جمرہ کو کنکریاں مارتے دیکھا جبکہ آپ سواری پر تھے۔ آپ ہر کنکری کے ساتھ «اللَّهُ أَكْبَرُ» ”اللہ سب سے بڑا ہے“ کہتے تھے۔ ایک شخص آپ کے پیچھے سے آپ کو چھپائے ہوئے تھا۔ میں نے اس شخص کے متعلق پوچھا تو کہا: ”فضل بن عباس رضی اللہ عنہ ہیں۔“ لوگوں نے بہت بھیڑ کر دی تو نبی کریم صلی اللہ علیہ وسلم نے فرمایا: ”لوگو! ایک دوسرے کو قتل مت کرو۔ اور جب تم جمرے کو کنکریاں مارو تو چھوٹی چھوٹی مارو۔“ [سنن ابي داود/كتاب المناسك /حدیث: 1966]

سلیمان بن عمرو بن الاحوص کی والدہ رضی اللہ عنہا کا بیان ہے کہ ”میں نے رسول اللہ صلی اللہ علیہ وسلم کو جمرہ عقبہ کے پاس دیکھا، آپ صلی اللہ علیہ وسلم سواری پر تھے، میں نے آپ صلی اللہ علیہ وسلم کی انگلیوں میں کنکریاں دیکھیں، آپ صلی اللہ علیہ وسلم نے وہ ماریں تو پھر اور لوگوں نے بھی ماریں۔“ [سنن ابي داود/كتاب المناسك /حدیث: 1967]

یزید بن ابی زیاد نے اپنی سند سے اسی کے مثل روایت کیا اور اضافہ کیا کہ ”آپ صلی اللہ علیہ وسلم جمرہ کے پاس رکے نہیں۔“ [سنن ابي داود/كتاب المناسك /حدیث: 1968]

نافع رحمہ اللہ نے سیدنا ابن عمر رضی اللہ عنہ کے متعلق بتایا کہ وہ قربانی کے دن (یعنی دس ذوالحجہ) کے بعد تین دنوں میں جمرات کے پاس پیدل ہی آتے جاتے تھے اور بیان کرتے تھے کہ ”نبی کریم صلی اللہ علیہ وسلم ایسے ہی کیا کرتے تھے۔“ [سنن ابي داود/كتاب المناسك /حدیث: 1969]