جناب علقمہ رحمہ اللہ کا بیان ہے کہ میں منیٰ میں سیدنا عبداللہ بن مسعود رضی اللہ عنہ کے ساتھ جا رہا تھا کہ انہیں سیدنا عثمان رضی اللہ عنہ ملے، پس سیدنا عثمان رضی اللہ عنہ نے ان کو علیحدگی میں بلایا (اور ان کو نکاح کرنے کی ترغیب دی) لیکن سیدنا عبداللہ بن مسعود رضی اللہ عنہ نے بتایا کہ انہیں نکاح کی حاجت نہیں ہے۔ تب سیدنا عبداللہ رضی اللہ عنہ نے مجھ سے کہا: ”علقمہ! ادھر آؤ۔“ میں حاضر ہو گیا (کیونکہ اب تخلیے کی ضرورت نہ رہی تھی) تو سیدنا عثمان رضی اللہ عنہ نے ان سے کہا: ”اے ابو عبد الرحمن! (سیدنا عبداللہ بن مسعود رضی اللہ عنہ) کیا ہم تمہاری ایک کنواری لڑکی سے شادی نہ کرا دیں؟ (اس طرح) شاید تمہاری (جوانی کی طاقت) پھر لوٹ آئے۔“ تو سیدنا عبداللہ رضی اللہ عنہ کہنے لگے: ”آپ یہ کہتے ہیں حالانکہ میں نے تو رسول اللہ صلی اللہ علیہ وسلم سے سنا ہے: ”جو تم میں سے طاقت رکھتا ہو اسے چاہیے کہ شادی کر لے۔ بلاشبہ اس سے نظر نیچی اور شرمگاہ محفوظ ہو جاتی ہے (دامنِ عفت پر داغ نہیں آتا) اور جو طاقت نہ رکھتا ہو تو وہ روزے رکھے، یہ اس کے (شہوانی) جذبات کو کمزور کر دیں گے۔“” [سنن ابي داود/كتاب النكاح /حدیث: 2046]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”عورتوں سے چار باتوں کی بنا پر نکاح کیا جاتا ہے: اس کے مال، حسب و نسب، حسن و جمال اور اس کے دین کی بنا پر، پس تو دیندار کو اختیار کر، «تَرِبَتْ يَدَاكَ» ”تیرے ہاتھ خاک آلود ہوں۔““ [سنن ابي داود/كتاب النكاح /حدیث: 2047]

سیدنا جابر بن عبداللہ رضی اللہ عنہ کا بیان ہے کہ رسول اللہ صلی اللہ علیہ وسلم نے مجھ سے پوچھا: ”کیا تو نے شادی کر لی ہے؟“ میں نے عرض کیا: ”ہاں!“ آپ صلی اللہ علیہ وسلم نے فرمایا: ”کنواری سے یا بیوہ سے؟“ میں نے کہا: ”بیوہ سے۔“ فرمانے لگے: ”کنواری سے کیوں نہیں کی؟ تم اس سے کھیلتے وہ تم سے کھیلتی۔“ [سنن ابي داود/كتاب النكاح /حدیث: 2048]

امام ابوداؤد رحمہ اللہ کہتے ہیں کہ حسین بن حریث مروزی نے مجھے لکھ بھیجا کہ ہمیں فضل بن موسیٰ نے حسین بن واقد سے، انہوں نے عمارہ بن ابی حفصہ سے، انہوں نے عکرمہ سے، انہوں نے سیدنا ابن عباس رضی اللہ عنہما سے روایت کی ہے کہ ایک شخص نبی کریم صلی اللہ علیہ وسلم کی خدمت میں آیا اور کہنے لگا: ”میری بیوی کسی چھونے والے کا ہاتھ رد نہیں کرتی۔“ آپ صلی اللہ علیہ وسلم نے فرمایا: ”اسے دور کر دو (طلاق دے دو)۔“ اس نے کہا: ”مجھے اندیشہ ہے کہ میرا دل اس کے ساتھ لگا رہے گا۔“ آپ صلی اللہ علیہ وسلم نے فرمایا: ”تب اس سے فائدہ اٹھاؤ۔“ [سنن ابي داود/كتاب النكاح /حدیث: 2049]

سیدنا معقل بن یسار رضی اللہ عنہ سے روایت ہے کہ ایک شخص نبی کریم صلی اللہ علیہ وسلم کی خدمت میں آیا اور کہا: ”مجھے ایک عورت ملی ہے جو عمدہ حسب اور حسن و جمال والی ہے مگر اس کے اولاد نہیں ہوتی، تو کیا میں اس سے شادی کر لوں؟“ آپ صلی اللہ علیہ وسلم نے فرمایا: ”نہیں“ پھر وہ دوبارہ آیا، تو آپ صلی اللہ علیہ وسلم نے منع فرما دیا۔ پھر وہ تیسری بار آیا تو آپ صلی اللہ علیہ وسلم نے فرمایا: ”ایسی عورتوں سے شادی کرو جو بہت محبت کرنے والی اور بہت بچے جننے والی ہوں۔ بلاشبہ میں تمہاری کثرت سے دیگر امتوں پر فخر کرنے والا ہوں۔“ [سنن ابي داود/كتاب النكاح /حدیث: 2050]

جناب عمرو بن شعیب اپنے والد (شعیب) سے اور وہ اپنے دادا (عبداللہ بن عمرو) رضی اللہ عنہ سے روایت کرتے ہیں کہ جناب مرثد بن ابی مرثد غنوی رضی اللہ عنہ مکہ سے (مسلمان) قیدیوں کو اٹھا کر لایا کرتے تھے۔ اور مکہ میں ایک بدکار عورت تھی جس کا نام عناق تھا اور وہ (قبل از اسلام) ان کی آشنا تھی۔ وہ بیان کرتے ہیں کہ میں نبی کریم صلی اللہ علیہ وسلم کی خدمت میں حاضر ہوا اور عرض کیا: ”اے اللہ کے رسول! کیا میں عناق سے شادی کر لوں؟“ آپ صلی اللہ علیہ وسلم نے مجھے اس کا جواب نہ دیا۔ تب یہ آیت نازل ہوئی ﴿وَالزَّانِيَةُ لَا يَنْكِحُهَا إِلَّا زَانٍ أَوْ مُشْرِكٌ﴾ [سورة النور: 3] ”یعنی بدکار عورت سے کوئی بدکار مرد یا مشرک ہی نکاح کرتا ہے۔“ آپ صلی اللہ علیہ وسلم نے مجھے بلوایا، مجھ پر یہ آیت پڑھی اور فرمایا: ”اس سے نکاح مت کرو۔“ [سنن ابي داود/كتاب النكاح /حدیث: 2051]

سیدنا ابوہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”کوئی زانی، جسے زنا کی حد لگی ہو، کسی اپنے جیسی عورت ہی سے نکاح کرتا ہے۔“ ابومعمر نے اپنی سند میں یوں کہا «حَدَّثَنِي حَبِيبٌ الْمُعَلِّمُ، عَنْ عَمْرِو بْنِ شُعَيْبٍ» ”مجھ سے حبیب معلم نے بیان کیا، انہوں نے عمرو بن شعیب سے روایت کیا۔“ [سنن ابي داود/كتاب النكاح /حدیث: 2052]

سیدنا ابوموسیٰ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”جو شخص اپنی لونڈی کو آزاد کر کے خود ہی اس سے نکاح کر لے، تو ایسے شخص کے لیے دہرا اجر ہے۔“ [سنن ابي داود/كتاب النكاح /حدیث: 2053]

سیدنا انس بن مالک رضی اللہ عنہ سے منقول ہے کہ ”نبی کریم صلی اللہ علیہ وسلم نے صفیہ رضی اللہ عنہا کو آزاد فرمایا (اور پھر اپنے حرم میں داخل کرنے کا شرف بخشا) اور ان کے آزاد کرنے ہی کو ان کا حق مہر ٹھہرایا۔“ [سنن ابي داود/كتاب النكاح /حدیث: 2054]