سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”لڑکیوں کے سلسلے میں عورتوں سے (ان کی ماؤں سے) مشورہ کر لیا کرو۔“ [سنن ابي داود/كتاب النكاح /حدیث: 2095]

سیدنا ابن عباس رضی اللہ عنہما سے مروی ہے کہ ایک جوان کنواری لڑکی نبی کریم صلی اللہ علیہ وسلم کے پاس آئی، اس نے بتایا کہ اس کے باپ نے اس کی شادی کر دی ہے: ”مگر میں اسے ناپسند کرتی ہوں۔“ تو نبی کریم صلی اللہ علیہ وسلم نے اسے اختیار دے دیا۔ [سنن ابي داود/كتاب النكاح /حدیث: 2096]

عکرمہ نبی کریم صلی اللہ علیہ وسلم سے یہی روایت بیان کرتے ہیں۔ امام ابوداؤد رحمہ اللہ نے کہا کہ ”(عکرمہ نے) ابن عباس رضی اللہ عنہ کا نام ذکر نہیں کیا، اور محدثین کے ہاں اس روایت کو اسی طرح مرسل روایت کرنا ہی معروف ہے۔“ [سنن ابي داود/كتاب النكاح /حدیث: 2097]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”بیوہ اپنی ذات کے بارے میں اپنے ولی کی بہ نسبت زیادہ حقدار ہے، اور کنواری سے بھی اس کے اپنے بارے میں مشورہ کیا جائے، اس کی اجازت اس کی خاموشی ہے۔“ اور یہ لفظ قعنبی (عبداللہ بن مسلمہ) کے ہیں۔ [سنن ابي داود/كتاب النكاح /حدیث: 2098]

عبداللہ بن فضل نے اپنی سند سے اور مذکورہ بالا حدیث کے ہم معنی روایت کیا اور کہا: ”بیوہ اپنے ولی کی بہ نسبت اپنے بارے میں زیادہ حقدار ہے، اور کنواری سے اس کا باپ مشورہ کرے۔“ امام ابوداؤد رحمہ اللہ فرماتے ہیں: «أَبُوهَا» ”اس کا باپ“ کا لفظ محفوظ نہیں ہے۔ [سنن ابي داود/كتاب النكاح /حدیث: 2099]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”ولی کو بیوہ کے معاملے میں کوئی دخل حاصل نہیں ہے، اور یتیم لڑکی سے مشورہ کیا جائے اور اس کی خاموشی اس کا اقرار ہے۔“ [سنن ابي داود/كتاب النكاح /حدیث: 2100]

سیدہ خنساء بنت خذام انصاریہ رضی اللہ عنہا کا بیان ہے کہ: ”ان کے والد نے ان کی شادی کر دی جبکہ وہ بیوہ تھیں، انہوں نے یہ نکاح ناپسند کیا اور پھر رسول اللہ صلی اللہ علیہ وسلم کی خدمت میں آئیں اور آپ صلی اللہ علیہ وسلم کے سامنے اس کا ذکر کیا تو رسول اللہ صلی اللہ علیہ وسلم نے ان کا نکاح رد (فسخ کر دیا) کر دیا۔“ [سنن ابي داود/كتاب النكاح /حدیث: 2101]

سیدنا ابوہریرہ رضی اللہ عنہ کی روایت ہے کہ ابوہند نے نبی کریم صلی اللہ علیہ وسلم کے سر میں سینگی لگائی۔ اور پھر آپ صلی اللہ علیہ وسلم نے فرمایا: ”اے بنی بیاضہ! ابوہند کا (اپنے میں سے کسی کے ساتھ) نکاح کر دو۔ اور اس سے (اس کی کسی عزیزہ کا) نکاح لے لو۔“ اور فرمایا: ”اگر تمہاری دواؤں میں سے کسی میں خیر ہے تو وہ سینگی لگانے ہی میں ہے۔“ [سنن ابي داود/كتاب النكاح /حدیث: 2102]

سیدہ میمونہ بنت کردم رضی اللہ عنہا بیان کرتی ہیں کہ ”میں اپنے والد کے ساتھ چلی، اس حج کے موقع پر جبکہ رسول اللہ صلی اللہ علیہ وسلم نے حج کیا تو میں نے رسول اللہ صلی اللہ علیہ وسلم کو دیکھا، میرے والد ان کے قریب ہوئے۔ آپ صلی اللہ علیہ وسلم اپنی اونٹنی پر تھے۔ آپ صلی اللہ علیہ وسلم ان کی خاطر رک گئے، میرے والد نے آپ سے مفید مطلب باتیں سنیں۔ آپ کے پاس درہ تھا جیسے کہ معلم لوگوں کے پاس ہوتا ہے۔ میں نے بدویوں کو اور لوگوں کو سنا کہ وہ کہہ رہے تھے «الطَّبْطَبِيَّةَ الطَّبْطَبِيَّةَ الطَّبْطَبِيَّةَ» ”چلتے ہوئے پاؤں پڑنے کی آواز، طب طب، یا کوڑا مارنے کی آواز۔“ میرے والد آپ صلی اللہ علیہ وسلم کے قریب ہوئے، آپ کے قدم مبارک پکڑ لیے، آپ کی رسالت کا اقرار کیا، آپ کے پاس کھڑے رہے اور آپ کے ارشادات سنے۔ میرے والد نے بتایا کہ میں لشکر عشران میں شریک ہوا تھا۔ ابن مثنی نے اس کو غثران کہا: (غین منقوط کے ساتھ) (یہ دور جاہلیت کی ایک جنگ کا واقعہ ہے۔) اس دوران میں طارق بن مرقع نے کہا: ”کون ہے جو مجھے اپنا نیزہ دے اور اس کا بدلہ پائے؟“ میں نے کہا: ”اس کا بدلہ کیا ہے؟“ کہا: ”میں اس کے ساتھ اپنی اس بیٹی کا نکاح کر دوں گا جو سب سے پہلے پیدا ہو گی۔“ چنانچہ میں نے اس کو اپنا نیزہ دے دیا، پھر اس سے غائب رہا حتیٰ کہ مجھے علم ہوا کہ اس کے ہاں لڑکی پیدا ہوئی ہے اور اب بالغ ہو چکی ہے۔ پھر میں اس کے پاس گیا، اور اس سے کہا کہ ”میرے گھر والوں (میری بننے والی بیوی) کو میری طرف تیار کر دو۔“ تو اس نے قسم اٹھائی کہ وہ ایسا نہیں کرے گا حتیٰ کہ میں اسے نیا مہر پیش کروں، بخلاف اس کے جو میرے اور اس کے درمیان ہو چکا تھا۔ اور میں نے بھی قسم اٹھا لی کہ جو دے چکا ہوں بس وہی ہے اور نہیں دوں گا۔ تو رسول اللہ صلی اللہ علیہ وسلم نے پوچھا: ”اور اب وہ لڑکی کس عمر میں ہے؟“ کہا کہ ”اب تو اس کے بالوں میں سفیدی آ گئی ہے۔“ آپ نے فرمایا: ”میرا خیال ہے کہ تو اسے چھوڑ دے۔“ آپ کی یہ بات مجھے پریشان کر گئی۔ اور میں نے رسول اللہ صلی اللہ علیہ وسلم کی طرف دیکھا۔ جب آپ نے میری یہ کیفیت دیکھی تو فرمایا: ”نہ تم گناہ گار بنو اور نہ تمہارا ساتھی گناہ گار بنے۔“ امام ابوداؤد رحمہ اللہ فرماتے ہیں: «الْقَتِيرُ» کا معنی ”بالوں کی سفیدی (بڑھاپا)“ ہے۔ [سنن ابي داود/كتاب النكاح /حدیث: 2103]

ابراہیم بن میسرہ رحمہ اللہ نے بیان کیا کہ ان کی خالہ نے ایک خاتون سے خبر سنائی جو کمال کی سچی عورت تھی، وہ بیان کرتی تھی کہ ”دورِ جاہلیت میں میرے والد ایک جنگ میں گئے۔ ان لوگوں کو گرمی لگنے لگی تو ایک شخص نے کہا: ”کون ہے جو مجھے اپنے جوتے دے دے، میں اس کا اپنی پہلی پیدا ہونے والی بیٹی سے نکاح کر دوں گا۔“ چنانچہ میرے باپ نے اپنے جوتے اتار کر اس کی طرف پھینک دیے۔ پھر اس کے ہاں لڑکی پیدا ہوئی اور بالغ ہو گئی۔“ اور گزشتہ قصہ کی مانند بیان کیا مگر سفیدی ظاہر ہونے کا ذکر نہیں کیا۔ [سنن ابي داود/كتاب النكاح /حدیث: 2104]