سیدنا عبداللہ بن عباس رضی اللہ عنہما فرماتے ہیں: ایک آدمی نبی اکرم صلی اللہ علیہ وسلم کی بارگاہ میں حاضر ہوا، اور کہنے لگا: میری بہن نے قسم کھائی ہے کہ وہ بیت اللہ شریف تک پیدل چل کر جائے گی، لیکن وہ اتنا پیدل نہیں چل سکتی، حضور صلی اللہ علیہ وسلم نے فرمایا: جب وہ چل نہیں سکتی ہے تو اس کو کہہ دو کہ سوار ہو کر چلی جائے، اللہ تعالیٰ تیری بہن کو مشقت میں ڈالنے سے بے نیاز ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأيمان والنذور/حدیث: 8023]

ابواسحاق کہتے ہیں: ایک آدمی نے پیدل چل کر حج کرنے کی قسم کھائی تھی، وہ چلتے چلتے تھک گیا تو سوار ہو گیا، اس کے بارے میں سیدنا عبداللہ بن عباس رضی اللہ عنہما سے پوچھا گیا تو آپ نے فرمایا: تو آئندہ سال حج کرنے کے لیے جا، اور گزشتہ سال جتنا سفر پیدل کیا تھا، اتنا سوار ہو کر، کر لے اور جتنا سفر سوار ہو کر کیا تھا، اتنا پیدل کر لے۔ [المستدرك على الصحيحين/كتاب الأيمان والنذور/حدیث: 8024]

سیدنا عبداللہ بن عباس رضی اللہ عنہما فرماتے ہیں: ایک آدمی نبی اکرم صلی اللہ علیہ وسلم کی بارگاہ میں آیا اور کہنے لگا: میری بہن نے قسم کھائی ہے کہ وہ بیت اللہ شریف تک پیدل چل کر جائے گی، (وہ کیا کرے؟) حضور صلی اللہ علیہ وسلم نے فرمایا: اللہ تعالیٰ تیری بہن کو مشقت میں نہیں ڈالنا چاہتا، اس کو کہہ دو کہ سوار ہو کر حج کو جائے اور اپنی قسم کا کفارہ ادا کر دے۔ ٭٭ یہ حدیث امام مسلم رحمۃ اللہ علیہ کے معیار کے مطابق ہے لیکن شیخین نے اس کو نقل نہیں کیا۔ [المستدرك على الصحيحين/كتاب الأيمان والنذور/حدیث: 8025]

ام المومنین سیدہ عائشہ رضی اللہ عنہا فرماتی ہیں کہ میرے پاس گوشت ہدیہ آیا، رسول اللہ صلی اللہ علیہ وسلم نے مجھے فرمایا کہ اس میں سے تھوڑا سا گوشت زینب کی طرف بھیج دو، میں نے اس میں سے کچھ گوشت سیدہ زینب رضی اللہ عنہا کی جانب بھیج دیا، لیکن انہوں نے وہ گوشت واپس کر دیا، حضور صلی اللہ علیہ وسلم نے مجھے فرمایا: اس میں تھوڑا گوشت اور بھی ڈال دو، میں نے کچھ گوشت اور بھی ساتھ ملایا، اور پھر بھیج دیا، لیکن انہوں نے پھر واپس کر دیا، حضور صلی اللہ علیہ وسلم نے مجھے فرمایا: اگر تو نے اس میں اضافہ نہ کیا تو میں تجھے قسم دیتا ہوں۔ میں نے مزید گوشت اس میں شامل کر کے تیسری بار پھر بھیج دیا، لیکن انہوں نے پھر واپس کر دیا، اب مجھے بہت غیرت آئی، میں نے کہا: یا رسول اللہ صلی اللہ علیہ وسلم اس نے آپ کی بے ادبی کی ہے۔ حضور صلی اللہ علیہ وسلم نے فرمایا: تم اور وہ، اللہ تعالٰی پر اس سے زیادہ آسان ہیں کہ تم میں سے کوئی میری بے ادبی کی مرتکب ہو۔ میں قسم کھاتا ہوں کہ پورا مہینہ میں تمہارے پاس نہیں آوں گا۔ حضور صلی اللہ علیہ وسلم پورے 29 دن ہم سے غائب رہے، پھر تیسویں دن کو شام کے وقت ہمارے پاس تشریف لائے، سیدہ زینب نے کہا: آپ نے تو قسم کھائی تھی کہ آپ پورا مہینہ ہمارے پاس نہیں آئیں گے، حضور صلی اللہ علیہ وسلم نے فرمایا: مہینہ ایسے ہوتا ہے، مہینہ ایسے ہوتا ہے، یہ کہتے ہوئے حضور صلی اللہ علیہ وسلم نے اپنی ہتھیلیاں پھیلا دیں اور تیسری مرتبہ کہتے ہوئے آپ صلی اللہ علیہ وسلم نے اپنا انگوٹھا بند کر لیا۔ (ایک مرتبہ دونوں ہتھیلیاں کھولیں، ایک ہاتھ میں پانچ انگلیاں ہوتی ہیں تو دونوں ہاتھوں سے دس دنوں کا اشارہ کیا، دوسری مرتبہ پھر وہی اشارہ کیا تو بیس دن کا اشارہ ہو گیا اور تیسری مرتبہ دونوں ہتھیلیاں کھولیں لیکن اب کی بار ایک ہاتھ کا انگوٹھا بند کر لیا۔ جس کا مطلب یہ ہوا کہیہ مہینہ 29 دنوں کا ہے۔) ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اور اس میں اس چیز کا بیان موجود ہے کہ ”اقسمت علی کذا“ کہنا یمین اور قسم ہے۔ [المستدرك على الصحيحين/كتاب الأيمان والنذور/حدیث: 8026]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے کوئی قسم کھائی، پھر ساتھ ہی ”ان شاء اللہ“ کہہ دیا تو اس کے لیے اس قسم میں (قسم پوری نہ کرنے کی) گنجائش موجود ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد ہمراہ نقل نہیں کیا۔ [المستدرك على الصحيحين/كتاب الأيمان والنذور/حدیث: 8027]

سیدنا عبداللہ بن عباس رضی اللہ عنہما فرماتے ہیں: جب کوئی قسم کھائے وہ پورے سال تک اس میں اس میں سے کسی چیز کا استثناء کر سکتا ہے۔ اور (سورۃ کہف کی آیت نمبر 24) وَاذْكُرْ رَبَّكَ إِذَا نَسِيتَ (الكهف: 24) اسی سلسلہ میں نازل ہوئی ہے، آپ فرماتے ہیں قسم کھانے والے کو جب بھی یاد آئے، وہ اسی وقت استثناء کر سکتا ہے۔ سیدنا علی بن مسہر فرماتے ہیں: سیدنا اعمش کا عمل اسی پر تھا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الأيمان والنذور/حدیث: 8028]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تیری قسم وہی ہے جس پر تیرا ساتھی تیری تصدیق کر دے۔ [المستدرك على الصحيحين/كتاب الأيمان والنذور/حدیث: 8029]

8030 - سیدنا ابو ہریرہ (رضی اللہ عنہ) سے روایت ہے کہ رسول اللہ صلی اللہ علیہ وسلم نے فرمایا: "تمہاری قسم کا اعتبار اسی بات پر ہوگا جس پر تمہارا ساتھی (جس کے لیے قسم کھائی جا رہی ہے) تمہیں سچا سمجھے"۔ [المستدرك على الصحيحين/كتاب الأيمان والنذور/حدیث: 8030]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: قسم، یا تو ٹوٹ جاتی ہے یا شرمندگی کا باعث بنتی ہے۔ ٭٭ امام حاکم کہتے ہیں: میں ایک زمانے تک یہی سمجھتا رہا کہ یہ بشار، مسعر کا بھائی ہے، لیکن مجھے اس پر صحیح واقفیت نہیں مل سکی۔ اور یہ کلام سیدنا عبداللہ بن عمر رضی اللہ عنہما کے قول کے مطابق صحیح ہے۔ [المستدرك على الصحيحين/كتاب الأيمان والنذور/حدیث: 8031]