امام ابن شہاب زہری رحمہ اللہ کے متعلق آتا ہے کہ ان سے جب یہ ذکر کیا جاتا کہ ہفتے کے دن کا روزہ رکھنے سے منع کیا گیا ہے تو وہ کہتے: ”یہ «حَدِيثٌ حِمْصِيٌّ» ”حدیث حمصی“ ہے۔“ [سنن ابي داود/كتاب الصيام /حدیث: 2423]

امام اوزاعی رحمہ اللہ نے کہا: ”میں ایک مدت تک اس روایت کو چھپائے رہا۔ یعنی مذکورہ بالا حدیث عبداللہ بن بسر رضی اللہ عنہ جو کہ ہفتے کے دن روزہ رکھنے کے بارے میں ہے حتیٰ کہ میں نے دیکھا کہ مشہور ہو گئی ہے۔“ امام ابوداؤد رحمہ اللہ نے کہا: ”امام مالک رحمہ اللہ نے اس کو ”جھوٹ“ کہا ہے۔“ [سنن ابي داود/كتاب الصيام /حدیث: 2424]

سیدنا ابو قتادہ رضی اللہ عنہ سے مروی ہے کہ ایک شخص نبی کریم صلی اللہ علیہ وسلم کی خدمت میں آیا اور کہا: ”اے اللہ کے رسول! آپ روزے کس طرح رکھتے ہیں؟“ تو رسول اللہ صلی اللہ علیہ وسلم اس کی بات سے ناراض ہو گئے۔ جب سیدنا عمر رضی اللہ عنہ نے یہ صورت حال دیکھی تو بولے: ”ہم اللہ تعالیٰ کے رب ہونے، اسلام کے دین ہونے اور محمد صلی اللہ علیہ وسلم کے نبی ہونے پر راضی ہیں، ہم اللہ کی پناہ چاہتے ہیں کہ وہ ہم پر ناراض ہو یا اس کا رسول۔“ اور سیدنا عمر رضی اللہ عنہ اپنی یہ بات مسلسل دہراتے رہے حتیٰ کہ نبی کریم صلی اللہ علیہ وسلم کا غصہ زائل ہو گیا۔ پھر (سیدنا عمر رضی اللہ عنہ نے) کہا: ”اے اللہ کے رسول! وہ آدمی کیسا ہے جو ہمیشہ ہی روزے سے رہتا ہو؟“ آپ صلی اللہ علیہ وسلم نے فرمایا: ”اس نے روزہ رکھا نہ افطار کیا۔“ مسدد کے الفاظ تھے «لَمْ يَصُمْ وَلَمْ يُفْطِرْ، أَوْ: مَا صَامَ وَلَا أَفْطَرَ» ”نہ اس نے روزہ رکھا اور نہ افطار کیا، یا: اس نے روزہ نہیں رکھا اور نہ ہی افطار کیا“ یہ شک غیلان کو ہوا ہے۔ (سیدنا عمر رضی اللہ عنہ نے) کہا: ”اے اللہ کے رسول! وہ آدمی کیسا ہے جو دو دن روزہ رکھے اور ایک دن افطار کرے؟“ آپ صلی اللہ علیہ وسلم نے فرمایا: ”کیا بھلا کسی کو اس کی طاقت بھی ہے؟“ سیدنا عمر رضی اللہ عنہ نے کہا: ”اے اللہ کے رسول! اور وہ آدمی کیسا ہے جو ایک دن روزہ رکھے اور ایک دن افطار کرے؟“ آپ صلی اللہ علیہ وسلم نے فرمایا: ”یہ سیدنا داود علیہ السلام کا روزہ ہے۔“ انہوں نے کہا: ”اے اللہ کے رسول! اور وہ آدمی کیسا ہے جو ایک دن روزہ رکھے اور دو دن افطار کرے؟“ آپ صلی اللہ علیہ وسلم نے فرمایا: ”میرا جی چاہتا ہے کہ مجھے اس کی طاقت دی جاتی۔“ پھر رسول اللہ صلی اللہ علیہ وسلم نے فرمایا: ”تین دن ہر مہینے میں اور رمضان سے رمضان تک، (ہر رمضان میں پورے روزے رکھنا) یہ صیام الدھر ہے۔ (سدا روزے سے رہنا ہے) اور عرفہ کا روزہ۔ میں اللہ سے امید رکھتا ہوں کہ وہ اسے ایک سال گزشتہ اور ایک سال آئندہ کا کفارہ بنا دے گا۔ اور عاشورہ محرم کا روزہ، میں اللہ سے امید رکھتا ہوں کہ وہ اسے گزشتہ ایک سال کا کفارہ بنا دے گا۔“ [سنن ابي داود/كتاب الصيام /حدیث: 2425]

سیدنا ابوقتادہ رضی اللہ عنہ سے اس روایت میں مروی ہے کہ (موسیٰ بن اسماعیل نے) مزید کہا: ”اے اللہ کے رسول! سوموار اور جمعرات کے روزے کے بارے میں آپ کیا فرماتے ہیں؟“ آپ صلی اللہ علیہ وسلم نے فرمایا: ”اس روز میری ولادت ہوئی اور اسی میں مجھ پر قرآن نازل کیا گیا۔“ (سوموار کے دن)۔ [سنن ابي داود/كتاب الصيام /حدیث: 2426]

سیدنا عبداللہ بن عمرو بن العاص رضی اللہ عنہ کا بیان ہے کہ رسول اللہ صلی اللہ علیہ وسلم مجھ سے ملے اور فرمایا: ”مجھے بتایا گیا ہے کہ تم کہتے ہو میں رات بھر قیام اور دن کو روزہ ہی رکھا کروں گا؟“ میں نے کہا: ”ہاں اے اللہ کے رسول! میں نے ایسا کہا ہے۔“ آپ صلی اللہ علیہ وسلم نے فرمایا: ”(رات کو) قیام کرو اور آرام بھی کرو، روزے رکھو اور افطار بھی کرو (بلکہ) ہر مہینے میں تین روزے رکھا کرو، یہ «صِيَامُ الدَّهْرِ» کی مانند ہو گے۔“ (گویا زمانہ بھر روزے رکھے) میں نے کہا: ”اے اللہ کے رسول! میں اس سے زیادہ کی طاقت رکھتا ہوں۔“ آپ صلی اللہ علیہ وسلم نے فرمایا: ”ایک دن روزہ رکھا کر دو دن افطار کر لیا کرو۔“ میں نے کہا: ”میں اس سے زیادہ کی طاقت رکھتا ہوں۔“ فرمایا: ”تو ایک دن روزہ رکھا کرو اور ایک دن افطار کر لیا کرو، یہ روزے رکھنے کی معتدل صورت ہے اور یہ «صِيَامُ دَاوُدَ» ہے۔“ میں نے کہا: ”میں اس سے زیادہ کی طاقت رکھتا ہوں۔“ آپ صلی اللہ علیہ وسلم نے فرمایا: ”اس سے بڑھ کر کچھ افضل نہیں۔“ [سنن ابي داود/كتاب الصيام /حدیث: 2427]

سیدہ مجیبہ باہلیہ رضی اللہ عنہا اپنے والد یا چچا سے روایت کرتی ہیں کہ وہ رسول اللہ صلی اللہ علیہ وسلم کی خدمت میں آئے۔ پھر ایک سال کے بعد (دوبارہ) آئے تو اس کی حالت و کیفیت بدلی ہوئی تھی۔ انہوں نے کہا: ”اے اللہ کے رسول! کیا آپ نے مجھے پہچانا نہیں؟“ آپ صلی اللہ علیہ وسلم نے فرمایا: ”تم کون ہو؟“ اس نے کہا: ”میں وہی باہلی ہوں جو پچھلے سال آیا تھا۔“ آپ صلی اللہ علیہ وسلم نے پوچھا: ”تمہاری حالت اس طرح غیر کیوں ہو رہی ہے، حالانکہ تم اچھے بھلے تھے؟“ کہنے لگا: ”جب سے میں آپ کے پاس سے گیا ہوں میں نے یہ معمول بنا لیا ہے کہ بس رات ہی کو کھانا کھاتا ہوں۔“ رسول اللہ صلی اللہ علیہ وسلم نے فرمایا: ”تم نے اپنے آپ کو عذاب میں کیوں ڈال رکھا ہے؟“ پھر فرمایا: ”ماہ صبر (رمضان) کے روزے رکھا کرو اور پھر ہر مہینے ایک روزہ۔“ اس نے کہا: ”مجھے مزید کی اجازت دیجیے، یقیناً میں طاقت رکھتا ہوں۔“ آپ صلی اللہ علیہ وسلم نے فرمایا: ”دو دن روزے رکھو۔“ اس نے کہا: ”مجھے زیادہ کی اجازت دیجیے،“ آپ صلی اللہ علیہ وسلم نے فرمایا: ”تین دن رکھ لیا کرو۔“ اس نے کہا: ”میرے لیے زیادہ کیجیے۔“ آپ صلی اللہ علیہ وسلم نے فرمایا: ”حرمت کے مہینوں میں روزے رکھو اور چھوڑ دو، حرمت کے مہینوں میں روزے رکھو اور چھوڑ دو، حرمت کے مہینوں میں روزے رکھو اور چھوڑ دو۔“ اور آپ صلی اللہ علیہ وسلم نے تین انگلیوں سے اشارہ فرمایا، پہلے ان کو بند کیا پھر کھول دیا۔ [سنن ابي داود/كتاب الصيام /حدیث: 2428]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”سب سے افضل روزے ماہ رمضان کے بعد، اللہ کے مہینے محرم کے روزے ہیں، اور سب سے افضل نماز فرضوں کے بعد رات کی نماز ہے۔“ قتیبہ بن سعید نے «شَهْر» کا لفظ استعمال نہیں کیا، بلکہ صرف «رَمَضَان» کہا۔ [سنن ابي داود/كتاب الصيام /حدیث: 2429]

عثمان بن حکیم کہتے ہیں کہ ”میں نے سعید بن جبیر رحمہ اللہ سے رجب کے روزے کے متعلق سوال کیا“ تو انہوں نے کہا: ”مجھے ابن عباس رضی اللہ عنہما نے خبر دی ہے کہ رسول اللہ صلی اللہ علیہ وسلم روزے رکھا کرتے تو ہم کہتے: ”اب نہیں چھوڑیں گے“ اور کبھی چھوڑ دیتے تو ہم کہتے: ”اب نہیں رکھیں گے۔““ [سنن ابي داود/كتاب الصيام /حدیث: 2430]

ام المؤمنین سیدہ عائشہ رضی اللہ عنہا بیان کرتی ہیں کہ ”روزے رکھنے کے لیے رسول اللہ صلی اللہ علیہ وسلم کو شعبان کا مہینہ سب سے زیادہ پسند تھا، پھر آپ اسے (گویا) رمضان ہی سے ملا دیتے تھے۔“ [سنن ابي داود/كتاب الصيام /حدیث: 2431]

عبیداللہ بن مسلم قرشی اپنے والد سے روایت کرتے ہیں، کہتے ہیں کہ «صِيَامُ الدَّهْرِ» ”ہمیشہ روزے رکھنے“ کے متعلق میں نے نبی کریم صلی اللہ علیہ وسلم سے سوال کیا یا کسی اور نے پوچھا تو آپ صلی اللہ علیہ وسلم نے فرمایا: ”بلاشبہ تمہارے گھر والوں کا تم پر حق ہے، رمضان میں روزے رکھو اور اس کے ساتھ والے مہینے میں (شوال میں) اور ہر بدھ اور جمعرات کو (بھی) تو اس طرح تم زمانہ بھر روزے رکھنے والے ہو گے۔“ امام ابوداؤد رحمہ اللہ نے کہا (راویِ حدیث عبیداللہ بن مسلم کے نام میں) زید بن حباب عکلی نے عبیداللہ بن موسیٰ کی تائید کی ہے اور ابونعیم نے مخالفت کی ہے۔ (بعض مسلم بن عبیداللہ کہتے ہیں اور کچھ نے مسلم بن عبداللہ کہا ہے)۔ [سنن ابي داود/كتاب الصيام /حدیث: 2432]