منصور کلبی بیان کرتے ہیں کہ سیدنا دحیہ بن خلیفہ کلبی رضی اللہ عنہ ایک بار رمضان میں دمشق کی ایک بستی سے روانہ ہوئے اور اس قدر فاصلے پر گئے جو عقبہ سے فسطاط تک کے مابین ہے اور ان میں تین میل کا فاصلہ ہے۔ پھر انہوں نے افطار کر لیا اور ان کے ساتھ لوگوں نے بھی کر لیا جبکہ کچھ دوسروں نے افطار کرنے کو ناپسند کیا۔ پھر جب اپنی بستی میں واپس آئے تو کہا: ”قسم اللہ کی! میں نے آج ایک ایسی بات دیکھی ہے جس کا مجھے گمان بھی نہیں تھا کہ ایک قوم رسول اللہ صلی اللہ علیہ وسلم اور آپ کے اصحاب کی سنت سے اعراض کرے گی۔“ وہ یہ بات ان لوگوں کے بارے میں کہہ رہے تھے جو روزے سے رہے (اور افطار نہ کیا) پھر اس موقع پر (دعا کرتے ہوئے) کہا: «اَللّٰهُمَّ اقْبِضْنِيْ إِلَيْكَ» ”اے اللہ! مجھے اپنی طرف اٹھا لے۔“ [سنن ابي داود/كتاب الصيام /حدیث: 2413]

جناب نافع رحمہ اللہ سے مروی ہے کہ سیدنا ابن عمر رضی اللہ عنہ غابہ کی طرف تشریف لے جاتے تو اس سفر میں ”نہ افطار کرتے اور نہ قصر۔“ [سنن ابي داود/كتاب الصيام /حدیث: 2414]

سیدنا ابوبکرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”تم میں سے کوئی شخص ہرگز یوں نہ کہے کہ میں نے سارا رمضان روزے رکھے اور میں نے سارے رمضان کا قیام کیا۔“ راوی کہتے ہیں: ”مجھے معلوم نہیں آپ صلی اللہ علیہ وسلم نے نیکی کو نمایاں کرنا مکروہ جانا یا یہ بتانا چاہا کہ بندہ اس دوران میں لازمی طور پر سوتا بھی رہا ہے۔ (تو سارا رمضان صیام و قیام کیونکر ہو گیا؟)۔“ [سنن ابي داود/كتاب الصيام /حدیث: 2415]

ابو عبید کہتے ہیں کہ میں عید کے روز سیدنا عمر رضی اللہ عنہ کے ہاں حاضر تھا۔ آپ نے پہلے نماز پڑھائی پھر خطبہ دیا اور کہا: ”رسول اللہ صلی اللہ علیہ وسلم نے (عید کے) ان دو دنوں میں روزے سے منع فرمایا ہے۔ قربانی کے دن میں تم اپنی قربانیوں کے گوشت کھاتے ہو اور عید الفطر میں تم روزوں سے فارغ ہوتے ہو۔“ [سنن ابي داود/كتاب الصيام /حدیث: 2416]

سیدنا ابو سعید خدری رضی اللہ عنہ سے مروی ہے کہ رسول اللہ صلی اللہ علیہ وسلم نے ”دو دنوں کے روزوں سے منع فرمایا ہے، یعنی عید الفطر اور عید الاضحی کے دنوں میں۔ اور دو طرح سے کپڑے لپیٹنے سے روکا ہے۔ ایک یوں کہ کوئی پوری طرح سے کپڑے میں ایسے لپٹ جائے کہ کوئی عضو بھی اس سے باہر نہ رہے۔ اور دوسری صورت یوں کہ اپنے اوپر کپڑا لپیٹ کر اس طرح بیٹھے کہ ایک جانب سے شرمگاہ کو ننگا کر دے۔ اور دو وقت میں نماز پڑھنے سے بھی منع فرمایا ہے، یعنی نماز فجر اور نماز عصر کے بعد۔“ [سنن ابي داود/كتاب الصيام /حدیث: 2417]

ابو مرہ مولیٰ ام ہانی سے روایت ہے کہ وہ سیدنا عبداللہ بن عمرو رضی اللہ عنہ کے ساتھ ان کے والد سیدنا عمرو بن العاص رضی اللہ عنہ کے ہاں گئے تو انہوں نے دونوں کو کھانا پیش کیا اور کہا: ”کھاؤ۔“ عبداللہ رضی اللہ عنہ نے کہا: ”میں روزے سے ہوں۔“ تو عمرو رضی اللہ عنہ نے کہا: ”کھاؤ، ان دنوں کے بارے میں رسول اللہ صلی اللہ علیہ وسلم ہمیں افطار کا حکم دیا کرتے تھے اور روزوں سے منع فرماتے تھے۔“ جناب مالک رحمہ اللہ نے کہا: ”اس سے مراد ایامِ تشریق ہیں۔“ [سنن ابي داود/كتاب الصيام /حدیث: 2418]

سیدنا عقبہ بن عامر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ” «يَوْمُ عَرَفَةَ» (یوم عرفہ، نویں ذوالحجہ)، «يَوْمُ النَّحْرِ» (یوم نحر، دسویں ذوالحجہ، قربانی کا دن) اور «أَيَّامُ التَّشْرِيقِ» (ایام تشریق) ہم اہل اسلام کے عید کے ایام ہیں، یہ کھانے اور پینے کے دن ہیں۔“ [سنن ابي داود/كتاب الصيام /حدیث: 2419]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”تم میں سے کوئی شخص جمعہ کا روزہ نہ رکھے مگر یہ کہ اس سے پہلے ایک دن روزہ رکھے یا ایک دن بعد۔“ [سنن ابي داود/كتاب الصيام /حدیث: 2420]

عبداللہ بن بسر سلمی رضی اللہ عنہ کی ہمشیرہ صماء رضی اللہ عنہا سے مروی ہے کہ نبی کریم صلی اللہ علیہ وسلم نے فرمایا: ”ہفتے کے دن کا روزہ نہ رکھو، سوائے ان ایام کے جن میں تم پر یہ فرض ہوں۔ ہفتے کے دن اگر تمہیں انگور کی شاخ کا چھلکا میسر آئے یا کسی درخت کی لکڑی تو اسے ہی چبا لو۔“ (اپنے آپ کو بے روزہ بنا لو۔) امام ابوداؤد رحمہ اللہ نے کہا: ”یہ حدیث منسوخ ہے۔“ امام ابوداؤد رحمہ اللہ نے کہا: ”عبداللہ بن بسر، حمصی ہیں اور یہ حدیث منسوخ ہے۔ اس کو سیدہ جویریہ رضی اللہ عنہا کی حدیث نے (جو آگے آ رہی ہے) منسوخ کر دیا ہے۔“ [سنن ابي داود/كتاب الصيام /حدیث: 2421]

سیدہ جویریہ بنت حارث رضی اللہ عنہا سے مروی ہے کہ (ایک بار) نبی کریم صلی اللہ علیہ وسلم جمعہ کے دن ان کے ہاں تشریف لائے جبکہ یہ روزے سے تھیں۔ آپ صلی اللہ علیہ وسلم نے دریافت فرمایا: ”کیا تم نے کل (جمعرات کو) روزہ رکھا تھا؟“ کہنے لگیں کہ ”نہیں۔“ فرمایا: ”کیا کل (ہفتے) کو روزہ رکھو گی؟“ کہنے لگیں کہ ”نہیں۔“ فرمایا: ”تو افطار کر دو۔“ [سنن ابي داود/كتاب الصيام /حدیث: 2422]