سیدنا ہیاج بن عمران سے مروی ہے، وہ کہتے ہیں کہ (میرے والد) عمران کا ایک غلام بھاگ گیا تو انہوں نے اللہ کی قسم کھائی کہ ”اگر وہ میرے ہاتھ آ گیا تو میں اس کا ہاتھ کاٹ ڈالوں گا۔“ پس انہوں نے مجھے (ہیاج کو) بھیجا کہ میں یہ مسئلہ پوچھوں۔ تو میں سیدنا سمرہ بن جندب رضی اللہ عنہ کے پاس آیا اور ان سے دریافت کیا، تو انہوں نے کہا: ”رسول اللہ صلی اللہ علیہ وسلم ہمیں صدقہ دینے کی ترغیب دیا کرتے تھے اور (مقتول کا) مثلہ کرنے سے منع فرمایا کرتے تھے۔“ میں پھر سیدنا عمران بن حصین رضی اللہ عنہ کے پاس آیا اور ان سے بھی دریافت کیا، تو انہوں نے بھی یہی کہا: ”رسول اللہ صلی اللہ علیہ وسلم ہمیں صدقہ دینے کی ترغیب دیا کرتے تھے اور مقتول کا مثلہ کرنے سے منع فرمایا کرتے تھے۔“ [سنن ابي داود/كتاب الجهاد /حدیث: 2667]

سیدنا عبداللہ بن عمر رضی اللہ عنہما سے روایت ہے کہ ”کسی غزوے میں دیکھا گیا کہ ایک عورت کو قتل کیا گیا ہے، تو رسول اللہ صلی اللہ علیہ وسلم نے عورتوں اور بچوں کے قتل کو بہت برا جانا۔“ [سنن ابي داود/كتاب الجهاد /حدیث: 2668]

سیدنا رباح بن ربیع رضی اللہ عنہ بیان کرتے ہیں کہ ہم ایک غزوے میں رسول اللہ صلی اللہ علیہ وسلم کے ساتھ تھے، آپ صلی اللہ علیہ وسلم نے دیکھا کہ لوگ کسی چیز پر اکٹھے ہو رہے ہیں۔ آپ صلی اللہ علیہ وسلم نے ایک آدمی کو بھیجا کہ دیکھ کر آئے کہ وہ کیوں جمع ہیں؟ وہ ہو کر آیا اور بتایا: ”ایک عورت قتل کی گئی ہے اور وہ اس پر جمع ہیں۔“ پس آپ صلی اللہ علیہ وسلم نے فرمایا: ”یہ تو لڑنے والی نہ تھی“، بیان کیا کہ اس فوج کے مقدمہ پر سیدنا خالد بن ولید رضی اللہ عنہ تھے۔ آپ صلی اللہ علیہ وسلم نے ایک شخص کو بھیجا کہ خالد رضی اللہ عنہ سے کہہ دو: ”کسی عورت یا کسی مزدور کو ہرگز قتل نہ کریں۔“ [سنن ابي داود/كتاب الجهاد /حدیث: 2669]

سیدنا سمرہ بن جندب رضی اللہ عنہ روایت کرتے ہیں کہ رسول اللہ صلی اللہ علیہ وسلم نے فرمایا: ”مشرکین کے بوڑھوں کو قتل کرو اور نو عمروں (نابالغ بچوں) کو زندہ رہنے دو۔“ [سنن ابي داود/كتاب الجهاد /حدیث: 2670]

ام المؤمنین سیدہ عائشہ رضی اللہ عنہا بیان کرتی ہیں کہ ”(یہودیوں کے قبیلہ) بنی قریظہ کی عورتوں میں سے صرف ایک عورت کو قتل کیا گیا تھا، وہ میرے پاس بیٹھی باتیں کر رہی تھی اور اتنا ہنستی تھی کہ اس کے پیٹ اور کمر میں بل پڑ جاتے تھے حالانکہ رسول اللہ صلی اللہ علیہ وسلم بازار میں اس کی قوم کے لوگوں کو قتل کیے جا رہے تھے۔ اچانک ایک پکارنے والے نے اس عورت کا نام پکارا کہ ”فلانی کہاں ہے؟“ وہ کہنے لگی: ”میں ہوں۔“ میں نے پوچھا: ”تیرا کیا قصہ ہے؟“ کہنے لگی: ”میں نے ایک سازشی کام کیا ہے۔“ چنانچہ وہ پکارنے والا اسے لے گیا اور پھر اس کی گردن مار دی گئی۔“ سیدہ عائشہ رضی اللہ عنہا کہتی ہیں: ”میں اسے نہیں بھولی ہوں اور اس پر تعجب ہوتا ہے کہ اسے معلوم تھا کہ وہ قتل ہونے والی ہے مگر وہ ہنس ہنس کر لوٹ پوٹ ہو رہی تھی۔“ [سنن ابي داود/كتاب الجهاد /حدیث: 2671]

سیدنا صعب بن جثامہ رضی اللہ عنہ سے منقول ہے کہ انہوں نے رسول اللہ صلی اللہ علیہ وسلم سے سوال کیا تھا کہ مشرکین کے گھر والوں کا کیا حکم ہے جبکہ ان پر شب خون مارا جاتا ہے تو چھوٹے بچے اور عورتیں بھی اس کی زد میں آ جاتے ہیں، تو نبی کریم صلی اللہ علیہ وسلم نے فرمایا: ”وہ بھی انہی میں سے ہیں۔“ اور عمرو (بن دینار) رحمہ اللہ کہا کرتے تھے: ”وہ بھی اپنے آباء میں سے ہیں۔“ زہری رحمہ اللہ نے کہا: ”رسول اللہ صلی اللہ علیہ وسلم نے اس کے بعد عورتوں اور بچوں کے قتل سے منع فرما دیا تھا۔“ [سنن ابي داود/كتاب الجهاد /حدیث: 2672]

محمد بن حمزہ اسلمی اپنے والد (حمزہ بن عمرو اسلمی رضی اللہ عنہ) سے روایت کرتے ہیں کہ رسول اللہ صلی اللہ علیہ وسلم نے ان کو ایک دستے کا امیر بنایا تھا۔ کہتے ہیں کہ جب میں روانہ ہوا تو آپ صلی اللہ علیہ وسلم نے فرمایا: ”اگر تمہیں فلاں شخص مل جائے تو اس کو آگ سے جلا دینا۔“ میں نے پیٹھ پھیری تو آپ صلی اللہ علیہ وسلم نے مجھے بلایا، میں آپ صلی اللہ علیہ وسلم کے پاس واپس آیا تو آپ صلی اللہ علیہ وسلم نے فرمایا: ”اگر تم فلاں کو پاؤ تو اسے قتل کر دینا، جلانا نہیں، بلاشبہ آگ سے عذاب، آگ کا رب ہی دے سکتا ہے۔“ [سنن ابي داود/كتاب الجهاد /حدیث: 2673]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ہم کو ایک مہم پر روانہ کیا اور فرمایا: ”اگر تم فلاں فلاں کو پاؤ۔“ اور مذکورہ بالا حدیث کے ہم معنی بیان کیا۔ [سنن ابي داود/كتاب الجهاد /حدیث: 2674]

سیدنا عبدالرحمٰن بن عبداللہ اپنے والد (سیدنا عبداللہ بن مسعود رضی اللہ عنہ) سے روایت کرتے ہیں کہ ایک سفر میں ہم رسول اللہ صلی اللہ علیہ وسلم کے ساتھ تھے۔ آپ صلی اللہ علیہ وسلم قضائے حاجت کے لیے گئے تو ہم نے ایک چڑیا دیکھی، اس کے ساتھ دو بچے بھی تھے، ہم نے اس کے دونوں بچے پکڑ لیے تو چڑیا آئی اور (بچوں کے اوپر اردگرد) منڈلانے لگی۔ نبی کریم صلی اللہ علیہ وسلم تشریف لائے اور فرمایا: ”کس نے اس کو اس کے بچوں سے پریشان کیا ہے؟ اس کے بچوں کو چھوڑ دو۔“ (ایک دوسرے موقع پر) آپ صلی اللہ علیہ وسلم نے دیکھا کہ چیونٹیوں کے بڑے بل کو ہم نے جلا ڈالا ہے، آپ صلی اللہ علیہ وسلم نے پوچھا: ”اس کو کس نے جلایا ہے؟“ ہم نے کہا: ”ہم نے جلایا ہے۔“ آپ صلی اللہ علیہ وسلم نے فرمایا: ”آگ کے رب کے سوا کسی کو روا نہیں کہ آگ سے عذاب دے۔“ [سنن ابي داود/كتاب الجهاد /حدیث: 2675]

سیدنا واثلہ بن اسقع رضی اللہ عنہ کا بیان ہے کہ غزوہ تبوک کے موقع پر رسول اللہ صلی اللہ علیہ وسلم نے اعلانِ جہاد فرمایا تو میں اپنے گھر والوں کے پاس گیا، واپس آیا تو رسول اللہ صلی اللہ علیہ وسلم کے صحابہ کا پہلا قافلہ روانہ ہو چکا تھا۔ میں مدینے میں گھومنے لگا اور اعلان کرتا تھا: ”کوئی ہے جو ایک آدمی کو اپنے ساتھ سوار کرا لے اور اس کی غنیمت کا حصہ پائے؟“ تو ایک انصاری بوڑھے نے کہا: ”اس کی غنیمت کا حصہ ہمارا ہو گا اور ہم اسے باری سے اپنے ساتھ سوار کرائیں گے اور وہ کھانا بھی ہمارے ساتھ کھائے گا؟“ میں نے کہا: ”بہت بہتر۔“ اس نے کہا: ”تو چلیے اللہ تعالیٰ کی برکت کے ساتھ۔“ چنانچہ میں ایک بہترین ساتھی کے ساتھ روانہ ہوا۔ حتیٰ کہ اللہ نے ہمیں مالِ غنیمت سے بہرہ ور فرمایا اور مجھے کچھ اونٹنیاں ملیں، میں انہیں اپنے ساتھی کے پاس ہانک لایا، چنانچہ وہ اپنے اونٹ کے کجاوے کے پچھلے حصے پر بیٹھا اور مجھے کہا: ”انہیں چلاؤ کہ میں انہیں پیچھے کی طرف سے دیکھوں۔“ پھر کہا: ”انہیں چلاؤ کہ میں انہیں آگے کی طرف سے دیکھوں۔“ وہ بولا: ”تمہاری اونٹنیاں بہت عمدہ ہیں۔“ میں نے عرض کیا: ”یہ تو آپ کی غنیمت ہیں جس کی میں آپ سے شرط کر چکا ہوں۔“ اس نے کہا: ”بھتیجے! اپنی اونٹنیاں لے جاؤ، ہم نے تیرے دوسرے حصے کا ارادہ کیا ہے۔“ (اجر و ثواب میں حصے داری کا۔) [سنن ابي داود/كتاب الجهاد /حدیث: 2676]