سیدنا عبداللہ بن عمر رضی اللہ عنہ سے روایت ہے کہ وہ رسول اللہ صلی اللہ علیہ وسلم کی جانب سے بھیجی گئی ایک مہم میں شریک تھے، تو لوگ (مجاہدین) مقابلے سے بھاگ چلے اور میں بھی ان (بھاگنے والوں) میں شریک تھا۔ جب ہم علیحدہ ہوئے، تو ہم نے کہا: ”کیسے کریں، ہم تو جہاد سے بھاگ آئے ہیں اور (اللہ کا) غضب لے کر لوٹے ہیں؟“ ہم نے کہا: ”ہم مدینے چلتے ہیں، وہاں ٹھہریں گے اور (کسی دوسری مہم میں) شریک ہو جائیں گے اور ہمیں کوئی نہیں دیکھے گا“، سو جب ہم مدینے آئے تو ہم نے سوچا: ”کیوں نہ اپنے آپ کو رسول اللہ صلی اللہ علیہ وسلم کے حضور پیش کر دیں، اگر توبہ قبول ہوئی تو (بہتر) ٹھہرے رہیں گے، ورنہ جہاد میں چلے جائیں گے۔“ چنانچہ نماز فجر سے پہلے ہم رسول اللہ صلی اللہ علیہ وسلم کے انتظار میں بیٹھ گئے۔ جب آپ صلی اللہ علیہ وسلم باہر نکلے تو ہم آپ صلی اللہ علیہ وسلم کی طرف بڑھے اور کہا: ”ہم لوگ بھگوڑے ہیں۔“ آپ صلی اللہ علیہ وسلم ہماری طرف متوجہ ہوئے اور فرمایا: ”نہیں، تم دوبارہ لڑائی میں جانے والے ہو۔“ چنانچہ ہم آپ صلی اللہ علیہ وسلم کے قریب ہوئے اور آپ صلی اللہ علیہ وسلم کے ہاتھ کو بوسہ دیا۔ آپ صلی اللہ علیہ وسلم نے فرمایا: ”میں مسلمانوں کی جائے پناہ ہوں۔“ [سنن ابي داود/كتاب الجهاد /حدیث: 2647]

سیدنا ابو سعید رضی اللہ عنہ سے مروی ہے کہ بدر کے دن یہ آیت نازل ہوئی تھی: ﴿وَمَنْ يُوَلِّهِمْ يَوْمَئِذٍ دُبُرَهُ﴾ [سورة الأنفال: 16] ”جس نے اس دن، ان (کفار) سے پیٹھ پھیری سوائے اس حال کے کہ پینترا بدلتا ہو لڑائی میں، یا کسی جماعت کی پناہ لیتا ہو۔“ (تو وہ مستثنیٰ ہے، ورنہ وہ اللہ کے غضب کے ساتھ لوٹا اور اس کا ٹھکانا دوزخ ہے اور یہ بہت برا ٹھکانا ہے)۔ «بِسْمِ اللهِ الرَّحْمٰنِ الرَّحِيْمِ» ”شروع اللہ کے نام سے جو بہت مہربان نہایت رحم والا ہے“ ہمیں خبر دی الامام الحافظ ابو بکر احمد بن علی بن ثابت خطیب بغدادی نے، کہا: ”الامام القاضی ابو عمرو قاسم بن جعفر بن عبد الواحد ہاشمی نے کہا: ہمیں خبر دی ابو علی محمد بن احمد بن عمرو لؤلؤی نے، انہوں نے کہا: ہمیں بیان کیا ابو داؤد سلیمان بن اشعث سجستانی رضی اللہ عنہ نے ماہ محرم سن دو سو پچھتر ہجری میں، فرمایا۔“ [سنن ابي داود/كتاب الجهاد /حدیث: 2648]

سیدنا خباب بن ارت رضی اللہ عنہ کہتے ہیں کہ ہم رسول اللہ صلی اللہ علیہ وسلم کی خدمت میں حاضر ہوئے جب کہ آپ صلی اللہ علیہ وسلم ایک چادر کو تکیہ بنائے کعبہ کے سائے میں لیٹے ہوئے تھے۔ ہم نے آپ صلی اللہ علیہ وسلم سے شکایت کی اور کہا: ”کیا آپ ہمارے لیے مدد نہیں مانگتے؟ کیا آپ ہمارے لیے اللہ سے دعا نہیں فرماتے؟“ تو آپ صلی اللہ علیہ وسلم اٹھ بیٹھے، آپ صلی اللہ علیہ وسلم کا چہرہ سرخ ہو گیا اور فرمایا: ”تم سے پہلے جو لوگ تھے ان میں سے کسی کو پکڑا جاتا اور اس کے لیے گڑھا کھودا جاتا، پھر آرا لایا جاتا اور اس کے سر پر رکھ کر اسے دو حصے کر دیا جاتا مگر یہ (عذاب بھی) اسے اس کے دین سے نہ پھیرتا تھا، اور (وہ کسی کے ساتھ یوں کرتے کہ) اس کی ہڈیوں تک گوشت اور پٹھوں میں لوہے کی کنگھیاں چلاتے، یہ کارروائی بھی اسے اس کے دین سے نہ پھیرتی تھی۔ اللہ کی قسم! اللہ عزوجل اپنا یہ دین پورا کر کے رہے گا حتیٰ کہ ایک سوار صنعاء اور حضرموت کے درمیان سفر کرے گا، اسے اللہ کے سوا کسی کا خوف نہ ہو گا (زیادہ سے زیادہ) بکریوں کے متعلق اندیشہ ہو گا کہ بھیڑیا نہ حملہ کر دے لیکن تم جلدی کر رہے ہو۔“ (یعنی صبر و تحمل سے کام لو، اللہ مدد کرے گا۔) [سنن ابي داود/كتاب الجهاد /حدیث: 2649]

عبیداللہ بن ابی رافع رضی اللہ عنہ سیدنا علی بن ابی طالب رضی اللہ عنہ کے کاتب تھے، انہوں نے کہا: میں نے سیدنا علی رضی اللہ عنہ سے سنا، وہ بیان کرتے تھے کہ رسول اللہ صلی اللہ علیہ وسلم نے مجھے، زبیر اور مقداد رضی اللہ عنہم کو روانہ کیا اور فرمایا: ”جاؤ حتیٰ کہ جب تم روضہ خاخ کے مقام پر پہنچو گے تو تمہیں ایک اونٹنی سوار عورت ملے گی اس کے پاس ایک خط ہے، وہ اس سے لے آؤ۔“ چنانچہ ہم روانہ ہوئے ہمارے گھوڑے ہمیں بڑی تیزی سے لیے جا رہے تھے حتیٰ کہ ہم مقام روضہ پر پہنچ گئے، تو ہم نے وہاں ایک عورت پائی جو اپنی اونٹنی پر سوار تھی۔ ہم نے اس سے کہا: ”لاؤ خط دے دو۔“ اس نے کہا: ”میرے پاس کوئی خط نہیں ہے۔“ میں نے کہا: ”یا تو، تو خط نکالے گی یا ہم تیرے کپڑے اتار دیں گے۔“ چنانچہ اس نے اپنی چٹیا میں سے خط نکال دیا، تو اسے لے کر ہم نبی کریم صلی اللہ علیہ وسلم کے پاس آ گئے۔ وہ حاطب بن ابی بلتعہ رضی اللہ عنہ کی طرف سے مشرکین کو لکھا گیا تھا، اس میں ان کو رسول اللہ صلی اللہ علیہ وسلم کے بعض معاملات کے متعلق خبر دی گئی تھی۔ آپ صلی اللہ علیہ وسلم نے پوچھا: ”حاطب! یہ کیا ہے؟“ انہوں نے کہا: ”اے اللہ کے رسول! مجھ پر جلدی (میں فیصلہ) نہ کیجیے، دراصل میں اہل قریش میں نو آباد تھا، خاص قبیلہ قریش سے میرا تعلق نہیں تھا جبکہ (مہاجرین) قریش کے وہاں مکہ میں دیگر تعلق دار موجود ہیں جو ان کے اہل و عیال کی حفاظت کرتے ہیں، لہٰذا میں نے چاہا کہ مجھے ان کے ساتھ تعلق داری کا کوئی واسطہ حاصل نہیں ہے، تو میں ان پر ایک احسان کر دوں جس کی بنا پر وہ میرے قرابت داروں کا خیال رکھیں۔ اللہ کی قسم! اے اللہ کے رسول! مجھ میں کوئی کفر نہیں ہے اور نہ کوئی ارتداد ہے۔“ رسول اللہ صلی اللہ علیہ وسلم نے فرمایا: ”سچ کہا ہے۔“ سیدنا عمر رضی اللہ عنہ نے کہا: ”مجھے چھوڑیے میں اس منافق کی گردن اڑا دوں۔“ رسول اللہ صلی اللہ علیہ وسلم نے فرمایا: ”یہ بدر میں شریک ہو چکا ہے اور تمہیں کیا خبر، شاید اللہ تعالیٰ نے اہل بدر پر نظر فرمائی ہو اور کہا ہے: «اعْمَلُوا مَا شِئْتُمْ فَقَدْ غَفَرْتُ لَكُمْ» ”جو چاہے کرو، تحقیق میں نے تمہیں بخش دیا ہے۔““ [سنن ابي داود/كتاب الجهاد /حدیث: 2650]

سیدنا ابوعبدالرحمٰن سلمی، سیدنا علی رضی اللہ عنہ سے یہ قصہ بیان کرتے ہیں کہ سیدنا حاطب رضی اللہ عنہ نے اہل مکہ کو لکھا تھا کہ ”محمد صلی اللہ علیہ وسلم تمہاری طرف رخ کرنے والے ہیں۔“ اس روایت میں ہے کہ اس عورت نے کہا: ”میرے پاس خط نہیں ہے۔“ تو ہم نے اس کی اونٹنی کو بٹھا لیا مگر ہمیں اس کے پاس کوئی خط نہ ملا، سیدنا علی رضی اللہ عنہ بولے: ”قسم اس ذات کی جس کی قسم اٹھائی جاتی ہے! میں تجھے قتل کر ڈالوں گا، نہیں تو خط نکال دے۔“ اور حدیث بیان کی۔ [سنن ابي داود/كتاب الجهاد /حدیث: 2651]

سیدنا فرات بن حیان رضی اللہ عنہ (اپنے متعلق) بیان کرتے ہیں کہ رسول اللہ صلی اللہ علیہ وسلم نے ان کو قتل کرنے کا حکم دیا تھا جبکہ وہ ابوسفیان کی طرف سے جاسوس بن کر آیا تھا۔ یہ ایک انصاری کے حلیف بھی تھے۔ وہ انصاریوں کی ایک جماعت کے پاس سے گزرے اور کہا: ”بے شک میں مسلمان ہوں۔“ تو ایک انصاری نے کہا: ”اے اللہ کے رسول! یہ کہتا ہے کہ میں مسلمان ہوں۔“ رسول اللہ صلی اللہ علیہ وسلم نے فرمایا: «إِنَّ مِنْكُمْ رِجَالًا نَكِلُهُمْ إِلَىٰ إِيمَانِهِمْ، مِنْهُمْ فُرَاتُ بْنُ حَيَّانَ» ”تم میں سے کچھ لوگ ایسے ہیں کہ ہم ان کو ان کے ایمان کے سپرد کر دیتے ہیں، ان میں سے فرات بن حیان بھی ہیں۔“ [سنن ابي داود/كتاب الجهاد /حدیث: 2652]

سیدنا سلمہ بن اکوع رضی اللہ عنہ سے مروی ہے کہ ایک سفر میں مشرکین کا کوئی جاسوس نبی کریم صلی اللہ علیہ وسلم کے پاس آیا اور صحابہ کے ساتھ بیٹھا رہا، پھر خاموشی سے کھسک گیا تو نبی کریم صلی اللہ علیہ وسلم نے فرمایا: ”اسے ڈھونڈو اور قتل کر ڈالو۔“ سیدنا سلمہ رضی اللہ عنہ نے کہا: ”میں نے دوسروں سے پہلے اسے جا لیا اور قتل کر دیا اور اس کا سامان لے آیا، پس آپ صلی اللہ علیہ وسلم نے وہ سامان مجھے ہی بطور نفل (انعام) عنایت فرما دیا۔“ [سنن ابي داود/كتاب الجهاد /حدیث: 2653]

سیدنا ایاس بن سلمہ رحمہ اللہ کہتے ہیں مجھ سے میرے والد (سیدنا سلمہ بن اکوع رضی اللہ عنہ) نے بیان کیا، کہا کہ: ”میں نے رسول اللہ صلی اللہ علیہ وسلم کے ساتھ قبیلہ ہوازن پر جہاد کیا۔ اتفاق سے ہم چاشت کے وقت کھانا کھا رہے تھے اور ہم میں اکثر مجاہدین پیدل تھے اور کچھ لوگ کمزور بھی تھے، اتنے میں ایک شخص آیا جو سرخ اونٹ پر سوار تھا، اس نے اونٹ کی کمر سے رسی نکالی، اس سے اس کو باندھا اور آ کر لوگوں کے ساتھ کھانے میں شریک ہو گیا۔ جب اس نے دیکھا کہ مجاہدین میں کمزور لوگ ہیں اور ان میں سواریوں کی بھی کمی ہے تو وہاں سے نکلا، بھاگتا ہوا اپنے اونٹ کے پاس پہنچا اور اسے کھولا، اس کو بٹھایا، خود اس پر بیٹھا اور پھر اسے دوڑاتے ہوئے چل دیا۔ (اس وقت ہم کو یقین ہو گیا کہ یہ جاسوس ہے) چنانچہ قبیلہ اسلم کا ایک شخص اپنی خاکستری اونٹنی پر اس کے تعاقب میں گیا، اور یہ اونٹنی ہماری سب سواریوں سے عمدہ سواری تھی۔“ سلمہ رضی اللہ عنہ کہتے ہیں: ”میں پیدل ہی بھاگتا ہوا اس کے پیچھے گیا اور اسے جا لیا جبکہ اونٹنی کا سر اونٹ کی ران کے پاس تھا اور میں اونٹنی کی پچھلی ٹانگوں کے ساتھ تھا۔ پھر میں آگے بڑھا حتیٰ کہ اونٹ کی پچھلی ٹانگوں کے پاس پہنچ گیا۔ میں اور آگے بڑھا حتیٰ کہ اونٹ کی نکیل پکڑ لی اور پھر اس کو بٹھا لیا۔ جب اس نے اپنا گھٹنا زمین پر رکھا تو میں نے اپنی تلوار نکالی اور اس سوار کے سر پر دے ماری تو وہ کٹ کر دور جا گرا، چنانچہ میں اس کا اونٹ اور جو اس پر تھا سب ہانک کر لے آیا۔ تو رسول اللہ صلی اللہ علیہ وسلم نے لوگوں سے آگے بڑھ کر میرا استقبال کیا اور پوچھا: ”اس آدمی کو کس نے قتل کیا ہے؟“ صحابہ رضی اللہ عنہم نے کہا: ”سلمہ بن اکوع رضی اللہ عنہ نے۔“ آپ صلی اللہ علیہ وسلم نے فرمایا: ”اس کا سارا اسباب اسی کا ہے۔““ (امام ابوداؤد رحمہ اللہ کے شیخ) ہارون نے کہا: ”اس روایت کے الفاظ ہاشم بن قاسم کے ہیں۔“ [سنن ابي داود/كتاب الجهاد /حدیث: 2654]

سیدنا نعمان بن مقرن رضی اللہ عنہ بیان کرتے ہیں: ”میں رسول اللہ صلی اللہ علیہ وسلم کے ہاں حاضر رہا ہوں، آپ صلی اللہ علیہ وسلم اگر دن کے ابتدائی حصے میں قتال نہ کرتے تو اس میں اتنی تاخیر فرماتے کہ سورج ڈھل جاتا، ہوائیں چلنے لگتیں اور نصرت نازل ہوتی۔“ [سنن ابي داود/كتاب الجهاد /حدیث: 2655]

سیدنا قیس بن عباد رضی اللہ عنہ بیان کرتے ہیں کہ ”نبی کریم صلی اللہ علیہ وسلم کے صحابہ قتال کے دوران میں آوازیں نکالنے کو ناپسند کرتے تھے۔“ [سنن ابي داود/كتاب الجهاد /حدیث: 2656]