سیدنا ابوہریرہ رضی اللہ عنہ بیان کرتے ہیں کہ عمرو بن اقیش نے لوگوں سے اسلام سے پہلے کا سود لینا تھا، تو وہ اس کی وصول یابی تک اسلام سے دور رہا۔ آخر احد کے دن وہ آیا اور پوچھا: ”میرے چچا زاد کہاں ہیں؟“ لوگوں نے کہا: ”احد میں ہیں۔“ پھر پوچھا: ”فلاں کہاں ہے؟“ انہوں نے کہا: ”احد میں ہے۔“ پھر پوچھا: ”فلاں کہاں ہے؟“ انہوں نے کہا: ”احد میں ہے۔“ چنانچہ اس نے اپنے ہتھیار پہنے، گھوڑے پر سوار ہوا اور ان لوگوں کی جانب چلا گیا۔ مسلمانوں نے جب اس کو دیکھا، تو کہا: ”اے عمرو! ہم سے دور رہو۔“ اس نے کہا: ”یقین کرو کہ میں ایمان لا چکا ہوں“ چنانچہ وہ قتال کرنے لگا حتیٰ کہ زخمی ہو گیا۔ اسے اسی حالت میں اٹھا کر اس کے اہل میں لایا گیا، پس سعد بن معاذ رضی اللہ عنہ اس کے پاس آئے اور اس کی بہن سے کہا: ”اس سے پوچھو (کہ اس نے جنگ میں حصہ کیوں لیا ہے) اپنی قوم کی حمیت و حمایت میں، یا ان کے لیے غصہ کی بنا پر، یا اللہ کے لیے غصے کی وجہ سے؟“ تو اس نے کہا: ”بلکہ میں اللہ اور اس کے رسول صلی اللہ علیہ وسلم کے لیے غصے کی وجہ سے (اس جنگ میں شریک ہوا ہوں)“ چنانچہ وہ فوت ہو گیا اور جنت میں داخل ہوا، حالانکہ اس نے اللہ کے لیے ایک بھی نماز نہیں پڑھی تھی۔ [سنن ابي داود/كتاب الجهاد /حدیث: 2537]

سیدنا سلمہ بن اکوع رضی اللہ عنہ بیان کرتے ہیں کہ خیبر کے موقع پر میرے بھائی (عامر بن اکوع) نے خوب قتال کیا اور (اللہ کا کرنا ایسا ہوا کہ) اس کی اپنی تلوار اچٹ کر خود اس کو لگ گئی جس سے وہ قتل ہو گیا۔ اصحابِ رسول صلی اللہ علیہ وسلم اس کے بارے میں باتیں کرنے لگے اور اس (کی شہادت) کے سلسلے میں انہوں نے شک کا اظہار کیا کہ ایک آدمی اپنے ہی ہتھیار سے مارا گیا ہے (تو کیونکر شہید سمجھا جائے گا؟) رسول اللہ صلی اللہ علیہ وسلم نے فرمایا: ”یہ جہاد کرتے ہوئے فوت ہوا اور مجاہد فوت ہوا ہے۔“ ابن شہاب زہری رحمہ اللہ کہتے ہیں کہ پھر میں نے سلمہ بن اکوع رضی اللہ عنہ کے بیٹے سے دریافت کیا تو اس نے مجھے اپنے باپ کے حوالے سے اسی کی مانند بیان کیا مگر اس کے الفاظ یہ تھے۔ رسول اللہ صلی اللہ علیہ وسلم نے فرمایا: ”غلط کہتے ہیں، یہ جہاد کرتے ہوئے فوت ہوا ہے، مجاہد فوت ہوا ہے اور اس کے لیے دگنا اجر ہے۔“ [سنن ابي داود/كتاب الجهاد /حدیث: 2538]

جناب ابو سلام رحمہ اللہ نبی کریم صلی اللہ علیہ وسلم کے ایک صحابی رضی اللہ عنہ سے روایت کرتے ہیں، انہوں نے بیان کیا کہ ہم نے جہینہ کے ایک قبیلے پر حملہ کیا۔ پس مسلمانوں میں سے ایک آدمی نے ان کے ایک آدمی پر وار کیا اور اسے مارنا چاہا مگر اس کا وار خطا گیا اور اس کی تلوار خود اسے ہی لگ گئی تو رسول اللہ صلی اللہ علیہ وسلم نے فرمایا: ”اے مسلمانو! تمہارا بھائی! (اس کی خبر لو)۔“ لوگ بھاگ کر اس کی طرف گئے تو دیکھا کہ وہ فوت ہو چکا ہے، رسول اللہ صلی اللہ علیہ وسلم نے اس کو اسی کے کپڑوں میں خون سمیت لپیٹ دیا، اس کی نماز جنازہ پڑھی اور اسے دفن کر دیا۔ لوگوں نے پوچھا: ”اے اللہ کے رسول! کیا وہ شہید ہے؟“ آپ صلی اللہ علیہ وسلم نے فرمایا: ”ہاں اور میں اس کے لیے گواہ ہوں۔“ [سنن ابي داود/كتاب الجهاد /حدیث: 2539]

سیدنا سہل بن سعد رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”دو وقت کی دعائیں رد نہیں کی جاتیں یا بہت کم رد کی جاتی ہیں۔ ایک اذان کے وقت اور دوسری جنگ کے وقت، جب لوگ ایک دوسرے کے ساتھ بھڑ جاتے ہیں۔“ موسیٰ (بن یعقوب) نے کہا: مجھے رزق بن سعید بن عبدالرحمٰن نے ابوحازم سے، اس نے سہل بن سعد رضی اللہ عنہ سے اور انہوں نے نبی کریم صلی اللہ علیہ وسلم سے بیان کیا: ”بارش کے وقت (بھی دعا رد نہیں کی جاتی)۔“ [سنن ابي داود/كتاب الجهاد /حدیث: 2540]

سیدنا معاذ بن جبل رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو سنا آپ صلی اللہ علیہ وسلم فرماتے تھے: ”اگر کسی نے اونٹنی کو دوبارہ دوہنے کے وقفہ کے برابر بھی قتال کیا تو اس کے لیے جنت واجب ہے، اور جس نے اللہ سے سچے دل سے قتل فی سبیل اللہ کی دعا مانگی پھر فوت ہو گیا یا قتل کر دیا گیا تو اس کے لیے شہید کا ثواب ہے۔“ ابن المصفی نے یہاں اضافہ کیا: ”اور جسے (دشمن کی طرف سے) اللہ کی راہ میں کوئی زخم آ گیا یا کوئی چوٹ لگ گئی تو قیامت کے دن وہ زخم اسی طرح (تازہ) اور بڑا ہو گا جیسے کہ وہ تھا، اس کے خون کا رنگ زعفران کا اور خوشبو کستوری کی ہو گی، اور جسے اللہ کی راہ میں کوئی پھوڑا نکل آیا تو اس پر شہیدوں کے جیسی مہر ہو گی۔“ [سنن ابي داود/كتاب الجهاد /حدیث: 2541]

سیدنا عتبہ بن عبد سلمی رضی اللہ عنہ نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”گھوڑوں کی پیشانیوں، گردنوں اور دموں کے بال نہ کاٹو، بلاشبہ ان کی دمیں ان کے پنکھے ہیں (کہ وہ ان سے مکھیوں وغیرہ کو دور کرتے ہیں) اور گردنوں کے بالوں سے یہ اپنی سردی دور کرتے ہیں اور پیشانیوں کے بالوں کے ساتھ خیر و برکت بندھی ہوئی ہے۔“ [سنن ابي داود/كتاب الجهاد /حدیث: 2542]

سیدنا ابو وہب جشمی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”ایسے گھوڑے منتخب کیا کرو جو «كُمَيْتٌ» ”کمیت“ اور پانچ کلیان ہوں (رنگ سرخ سیاہ ہو مگر پیشانی اور چاروں پاؤں سفید ہوں) یا «أَشْقَرُ» ”اشقر“ پانچ کلیان ہوں (رنگ سرخ ہو اور پیشانی اور چاروں پاؤں سفید ہوں) یا «أَدْهَمُ» ”مشکی“ (سیاہ رنگ) اور پانچ کلیان ہوں۔“ [سنن ابي داود/كتاب الجهاد /حدیث: 2543]

سیدنا ابو وہب رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”گھوڑا ایسا منتخب کرو جو اشقر پانچ کلیان ہو (سرخ رنگ) یا کمیت سفید پیشانی۔“ اور مذکورہ حدیث کی مانند ذکر کیا۔ محمد بن مہاجر کہتے ہیں: ”میں نے اپنے شیخ سے دریافت کیا کہ اشقر کو فضیلت کیوں ہے؟“ تو انہوں نے کہا: ”کیونکہ نبی کریم صلی اللہ علیہ وسلم نے ایک مہم بھیجی تو جو شخص سب سے پہلے فتح کی خوشخبری لے کر آیا وہ اشقر گھوڑے پر سوار تھا۔“ [سنن ابي داود/كتاب الجهاد /حدیث: 2544]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”گھوڑوں میں برکت ان کے سرخ رنگ والوں میں ہے۔“ [سنن ابي داود/كتاب الجهاد /حدیث: 2545]

سیدنا ابوہریرہ رضی اللہ عنہ سے روایت ہے کہ ”رسول اللہ صلی اللہ علیہ وسلم مادہ گھوڑی کو «فَرَس» کہا کرتے تھے۔“ [سنن ابي داود/كتاب الجهاد /حدیث: 2546]