سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”انسان اپنے محبوب ساتھی کے دین پر ہوتا ہے۔ تو تمہیں چاہیے کہ غور کرو کس سے دوستی کر رہے ہو۔“ [سنن ابي داود/كتاب الأدب /حدیث: 4833]

سیدنا ابوہریرہ رضی اللہ عنہ مرفوعاً (نبی کریم صلی اللہ علیہ وسلم سے) بیان کرتے ہیں کہ ”روحیں (ازل میں) مجتمع لشکر تھیں، جن کا (وہاں) آپس میں تعارف ہو گیا (دنیا میں) ان کے اندر الفت ہو جاتی ہے اور جن کی (وہاں) آپس میں ناواقفی رہی ہو وہ (اس دنیا میں بھی) ایک دوسرے سے جدا جدا رہتی ہیں۔“ [سنن ابي داود/كتاب الأدب /حدیث: 4834]

سیدنا ابوموسیٰ رضی اللہ عنہ بیان کرتے ہیں کہ رسول اللہ صلی اللہ علیہ وسلم اپنے صحابہ کو جب اپنے کسی کام کے لیے بھیجا کرتے تھے تو انہیں فرماتے: ”خوشخبری دینے والے بننا، نفرت نہ دلانا، آسانی کرنا اور تنگی اور مشقت نہ ڈالنا۔“ [سنن ابي داود/كتاب الأدب /حدیث: 4835]

سیدنا سائب رضی اللہ عنہ سے مروی ہے کہ میں نبی کریم صلی اللہ علیہ وسلم کی خدمت میں حاضر ہوا تو لوگ میری مدح اور میرے اعمال کا ذکر کرنے لگے، تو رسول اللہ صلی اللہ علیہ وسلم نے فرمایا: ”میں اس کے متعلق تم سے زیادہ جانتا ہوں۔“ میں نے عرض کیا: ”آپ نے بجا فرمایا، میرے ماں باپ آپ پر قربان! آپ میرے شراکت دار تھے اور بہت ہی خوب شراکت دار تھے۔ آپ میں مخالفت کرنے یا لڑنے جھگڑنے والی کوئی بات نہیں تھی۔“ [سنن ابي داود/كتاب الأدب /حدیث: 4836]

سیدنا یوسف رضی اللہ عنہ اپنے والد سیدنا عبداللہ بن سلام رضی اللہ عنہ سے روایت کرتے ہیں کہ انہوں نے کہا: ”رسول اللہ صلی اللہ علیہ وسلم جب بیٹھے باتیں کر رہے ہوتے تو آپ صلی اللہ علیہ وسلم کی نظر اکثر آسمان کی طرف ہوتی تھی۔“ [سنن ابي داود/كتاب الأدب /حدیث: 4837]

سیدنا جابر بن عبداللہ رضی اللہ عنہ کا بیان ہے کہ ”رسول اللہ صلی اللہ علیہ وسلم کی گفتگو میں انتہائی ٹھہراؤ ہوتا تھا۔“ [سنن ابي داود/كتاب الأدب /حدیث: 4838]

ام المؤمنین سیدہ عائشہ رضی اللہ عنہا بیان کرتی ہیں کہ ”رسول اللہ صلی اللہ علیہ وسلم کی گفتگو اس قدر واضح ہوا کرتی تھی کہ ہر سننے والا اسے سمجھ لیتا تھا۔“ [سنن ابي داود/كتاب الأدب /حدیث: 4839]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”ہر گفتگو جس کی ابتدا اللہ کی حمد و ثنا سے نہ ہو وہ بے برکت ہے۔“ امام ابوداؤد رحمہ اللہ کہتے ہیں: ”اس روایت کو یونس، عقیل، شعیب اور سعید بن عبدالعزیز نے بواسطہ زہری، نبی کریم صلی اللہ علیہ وسلم سے مرسل روایت کیا ہے۔“ [سنن ابي داود/كتاب الأدب /حدیث: 4840]

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”ہر وہ خطبہ جس میں «تَشَهُّد» (اللہ کی توحید اور محمد رسول اللہ صلی اللہ علیہ وسلم کی رسالت کا ذکر) نہ ہو ایسا ہے جیسے جذام زدہ (ناقص اور عیب دار) ہاتھ۔“ [سنن ابي داود/كتاب الأدب /حدیث: 4841]

میمون بن ابوشعیب سے روایت ہے کہ ام المؤمنین سیدہ عائشہ رضی اللہ عنہا کے پاس سے ایک سائل گزرا تو آپ نے اسے ایک روٹی کا ٹکڑا دیا، پھر ایک دوسرا آدمی گزرا جس نے (اچھے) کپڑے پہنے ہوئے تھے اور اس کی حالت عمدہ تھی تو انہوں نے اس کو بٹھا کر کھلایا، ان سے اس فرق کے بارے میں پوچھا گیا تو انہوں نے کہا کہ رسول اللہ صلی اللہ علیہ وسلم نے فرمایا ہے: «أَنْزِلُوا النَّاسَ مَنَازِلَهُمْ» ”ہر شخص کو اس کے مقام پر رکھو۔“ امام ابوداؤد رحمہ اللہ فرماتے ہیں: ”یحییٰ کی حدیث مختصر ہے“، امام ابوداؤد رحمہ اللہ فرماتے ہیں: ”میمون نے سیدہ عائشہ رضی اللہ عنہا کو نہیں پایا ہے۔“ [سنن ابي داود/كتاب الأدب /حدیث: 4842]