حضرت عبداللہ بن عمر رضی اللہ عنہما سے روایت ہے، انہوں نے حضرت سعد بن مالک رضی اللہ عنہ کو موزوں پر مسح کرتے دیکھا تو فرمایا: ”کیا آپ لوگ اس طرح کرتے ہیں (مسح کر لیتے ہیں، پاؤں نہیں دھوتے؟)“ اس کے بعد حضرت عمر رضی اللہ عنہ کے پاس دونوں کی باہم ملاقات ہوگئی تو حضرت سعد رضی اللہ عنہ نے حضرت عمر رضی اللہ عنہ سے فرمایا: ”میرے بھتیجے (ابن عمر رضی اللہ عنہما) کو موزوں پر مسح کا مسئلہ بتا دیجئے۔“ حضرت عمر رضی اللہ عنہ نے فرمایا: ”ہم لوگ رسول اللہ صلی اللہ علیہ وسلم کے ساتھ ہوتے تھے اور موزوں پر مسح کر لیا کرتے تھے، اس میں کوئی حرج نہیں سمجھتے تھے۔“ حضرت ابن عمر رضی اللہ عنہما نے فرمایا: ”اگرچہ کوئی قضائے حاجت سے فارغ ہوکر آیا ہو؟“ حضرت عمر رضی اللہ عنہ نے فرمایا: ”ہاں (تب بھی مسح کر لیتے تھے۔)“ [سنن ابن ماجه/كتاب الطهارة وسننها/حدیث: 546]

حضرت سہل ساعدی رضی اللہ عنہ سے روایت ہے کہ رسول اللہ صلی اللہ علیہ وسلم نے ”موزوں پر مسح کیا اور ہمیں بھی موزوں پر مسح کرنے کا حکم دیا۔“ [سنن ابن ماجه/كتاب الطهارة وسننها/حدیث: 547]

حضرت انس بن مالک رضی اللہ عنہ سے روایت ہے، انہوں نے فرمایا: ”میں ایک سفر میں رسول اللہ صلی اللہ علیہ وسلم کے ہمراہ تھا۔ آپ صلی اللہ علیہ وسلم نے فرمایا: ”کچھ پانی ہے؟“ پھر آپ صلی اللہ علیہ وسلم نے وضو کیا اور موزوں پر مسح کیا۔ پھر لشکر سے آ ملے اور انہیں نماز پڑھائی۔“ [سنن ابن ماجه/كتاب الطهارة وسننها/حدیث: 548]

حضرت ابن بریدہ رحمہ اللہ اپنے والد رضی اللہ عنہ سے روایت کرتے ہیں کہ ”نجاشی نے نبی صلی اللہ علیہ وسلم کی خدمت میں دو سادہ سیاہ موزے تحفہ کے طور پر ارسال کیے۔ آپ صلی اللہ علیہ وسلم نے انہیں پہنا، پھر وضو کیا اور ان پر مسح کیا۔“ [سنن ابن ماجه/كتاب الطهارة وسننها/حدیث: 549]

حضرت مغیرہ بن شعبہ رضی اللہ عنہ سے روایت ہے کہ رسول اللہ صلی اللہ علیہ وسلم نے ”موزے کے اوپر بھی مسح کیا اور نیچے بھی۔“ [سنن ابن ماجه/كتاب الطهارة وسننها/حدیث: 550]

حضرت جابر رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم ایک آدمی کے پاس سے گزرے جو وضو کر رہا تھا اور (پاؤں دھونے کے بجائے پاؤں میں پہنے ہوئے) موزے دھو رہا تھا۔ رسول اللہ صلی اللہ علیہ وسلم نے (اسے متوجہ کرنے کے لیے) ہاتھ سے اسے (ہلکا سا) دھکیلا اور فرمایا: ”مجھے مسح کرنے کا حکم دیا گیا ہے۔“ اور (اس کی وضاحت کرتے ہوئے) اپنے ہاتھوں کو (پاؤں کی) انگلیوں سے شروع کر کے پنڈلی کے شروع تک لے گئے اور انگلیوں سے (گویا خط) کھینچے۔“ [سنن ابن ماجه/كتاب الطهارة وسننها/حدیث: 551]

جناب شریح بن ہانی رضی اللہ عنہ سے روایت ہے، انہوں نے فرمایا: ”میں نے حضرت عائشہ رضی اللہ عنہا سے موزوں پر مسح کا مسئلہ پوچھا تو انہوں نے فرمایا: ”حضرت علی رضی اللہ عنہ کے پاس جاؤ کیوں کہ انہیں یہ مسئلہ مجھ سے زیادہ معلوم ہے۔“ میں حضرت علی رضی اللہ عنہ کی خدمت میں حاضر ہوا اور ان سے مسح کے بارے میں دریافت کیا۔ انہوں نے فرمایا: ”رسول اللہ صلی اللہ علیہ وسلم ہمیں مسح کا حکم دیا کرتے تھے۔ مقیم کے لیے ایک دن رات اور مسافر کے لیے تین دن۔“” [سنن ابن ماجه/كتاب الطهارة وسننها/حدیث: 552]

حضرت خزیمہ بن ثابت رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے مسافر کے لیے تین دن کی مدت مقرر فرمائی ہے، لیکن اگر سائل مزید مدت کے لیے اجازت مانگتا تو آپ صلی اللہ علیہ وسلم پانچ دن کی بھی اجازت دے دیتے۔“ [سنن ابن ماجه/كتاب الطهارة وسننها/حدیث: 553]

حضرت خزیمہ بن ثابت رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”مسافر کے لیے موزوں پر مسح کی مدت تین دن ہے۔“ غالباً یہ بھی فرمایا: ”اور تین رات۔“ [سنن ابن ماجه/كتاب الطهارة وسننها/حدیث: 554]

حضرت ابوہریرہ رضی اللہ عنہ سے روایت ہے، صحابہ کرام نے عرض کیا: ”اے اللہ کے رسول! موزے پہن کر وضو کا کیا حکم ہے؟“ آپ صلی اللہ علیہ وسلم نے فرمایا: ”مسافر کے لیے تین دن رات، اور مقیم کے لیے ایک دن رات (مسح کرنا درست ہے۔)“ [سنن ابن ماجه/كتاب الطهارة وسننها/حدیث: 555]