حضرت ابو سمح رضی اللہ عنہ سے روایت ہے، انہوں نے فرمایا: ”میں نبی صلی اللہ علیہ وسلم کا خادم ہوا کرتا تھا۔ آپ صلی اللہ علیہ وسلم کی خدمت میں حضرت حسن یا حسین رضی اللہ عنہ کو لایا گیا، (وہ اس وقت دودھ پیتے بچے تھے) انہوں نے نبی صلی اللہ علیہ وسلم کے سینہ مبارک پر پیشاب کر دیا۔ صحابہ کرام رضی اللہ عنہم نے اسے دھونا چاہا تو رسول اللہ صلی اللہ علیہ وسلم نے فرمایا: ”پانی چھڑک دو کیوں کہ لڑکی کا پیشاب دھویا جاتا ہے اور لڑکے کے پیشاب پر پانی چھڑکا جاتا ہے۔““ [سنن ابن ماجه/كتاب الطهارة وسننها/حدیث: 526]

جناب عمرو بن شعیب، ام کرز رضی اللہ عنہا سے بیان کرتے ہیں کہ رسول اللہ صلی اللہ علیہ وسلم نے فرمایا: ”لڑکے کے پیشاب پر پانی چھڑکا جاتا ہے اور لڑکی کا پیشاب دھویا جاتا ہے۔“ [سنن ابن ماجه/كتاب الطهارة وسننها/حدیث: 527]

حضرت انس رضی اللہ عنہ سے روایت ہے، انہوں نے فرمایا: ایک بدو نے مسجد میں پیشاب کر دیا۔ کچھ لوگ (اسے روکنے کے لئے) اس کی طرف بھاگے۔ رسول اللہ صلی اللہ علیہ وسلم نے فرمایا: ”اس کا پیشاب بند نہ کرو۔“ پھر پانی کا ایک ڈول منگوایا اور اس پر بہا دیا۔ [سنن ابن ماجه/كتاب الطهارة وسننها/حدیث: 528]

حضرت ابو ہریرہ رضی اللہ عنہ سے روایت ہے، انہوں نے فرمایا: اللہ کے رسول صلی اللہ علیہ وسلم (مسجد میں) تشریف فرما تھے کہ ایک بدو مسجد میں آیا۔ اس نے کہا: «اللّٰهُمَّ اغْفِرْ لِي وَلِمُحَمَّدٍ، وَلَا تَغْفِرْ لِأَحَدٍ مَعَنَا» ”اے اللہ! مجھے اور محمد ( صلی اللہ علیہ وسلم ) کو بخش دے اور ہمارے ساتھ کسی اور کی بخشش نہ کرنا۔“ رسول اللہ صلی اللہ علیہ وسلم ہنس پڑے اور فرمایا: ”تو نے ایک وسیع چیز (رحمتِ الٰہی) کو محدود کر دیا۔“ پھر وہ (اعرابی) واپس پلٹا۔ ابھی مسجد ہی کے ایک حصے میں تھا کہ (کھڑا ہو کر) پاؤں ایک دوسرے سے دور کر کے پیشاب کرنے لگا۔ اسی اعرابی صحابی رضی اللہ عنہ نے دین کی سمجھ آ جانے کے بعد (اپنا واقعہ بیان کرتے ہوئے) فرمایا: ”میرے ماں باپ آپ صلی اللہ علیہ وسلم پر قربان ہوں! آپ اٹھ کر میرے پاس آئے، مجھے نہ ڈانٹا، نہ برا بھلا کہا، بس یہ فرمایا: ”یہ مسجد ایسی جگہ ہے کہ اس میں پیشاب نہیں کیا جاتا، یہ تو اللہ کے ذکر اور نماز کے لیے تعمیر کی گئی ہے۔“”پھر آپ نے پانی کا ڈول طلب فرمایا جو پیشاب پر بہا دیا گیا۔ [سنن ابن ماجه/كتاب الطهارة وسننها/حدیث: 529]

حضرت واثلہ بن اسقع رضی اللہ عنہ سے روایت ہے، انہوں نے بیان کیا کہ ایک اعرابی نبی صلی اللہ علیہ وسلم کی خدمت میں حاضر ہوا، اس نے کہا: «اَللّٰهُمَّ ارْحَمْنِيْ وَمُحَمَّدًا، وَلَا تَرْحَمْ مَعَنَا أَحَدًا» ”اے اللہ! مجھ پر اور محمد ( صلی اللہ علیہ وسلم ) پر رحمت فرما اور ہم پر نازل ہونے والی اپنی رحمت میں کسی اور کو شریک نہ کرنا۔“ آپ صلی اللہ علیہ وسلم نے فرمایا: ”افسوس! تو نے لامحدود کو محدود کر دیا۔“ صحابہ کہتے ہیں: وہ اعرابی ٹانگیں کھول کر پیشاب کرنے لگا۔ صحابہ کرام رضی اللہ عنہم نے کہا: ”رُک، رُک۔“ رسول اللہ صلی اللہ علیہ وسلم نے فرمایا: ”اسے چھوڑ دو۔“ پھر پانی کا ایک ڈول منگوا کر اس جگہ بہا دیا۔ [سنن ابن ماجه/كتاب الطهارة وسننها/حدیث: 530]

جناب ابراہیم بن عبدالرحمن بن عوف کی ایک لونڈی سے روایت ہے، انہوں نے نبی صلی اللہ علیہ وسلم کی زوجہٴ مطہرہ ام المومنین ام سلمہ رضی اللہ عنہا سے مسئلہ پوچھا اور کہا: ”میں عورت ہوں، (قمیص کا) دامن لمبا رکھتی ہوں (جو چلتے وقت زمین سے چھوتا ہے)، میرا گزر گندی جگہ سے بھی ہوتا ہے (تو کیا میں دامن دھویا کروں؟)“ ام المومنین رضی اللہ عنہا نے کہا، اللہ کے رسول صلی اللہ علیہ وسلم نے فرمایا: «يُطَهِّرُهُ مَا بَعْدَهُ» ”اسے بعد والی (پاک) زمین پاک کر دیتی ہے۔“ [سنن ابن ماجه/كتاب الطهارة وسننها/حدیث: 531]

حضرت ابوہریرہ رضی اللہ عنہ سے روایت ہے کہ کسی نے عرض کیا: ”اے اللہ کے رسول! ہم مسجد کی طرف آتے ہیں تو راستے میں ناپاک جگہ پر بھی پاؤں پڑتا ہے (ہم کیا کریں؟)“ رسول اللہ صلی اللہ علیہ وسلم نے فرمایا: ”زمین کا ایک قطعہ دوسرے قطعے (سے حاصل ہونے والی نجاست سے جوتے یا قدم) کو پاک کر دیتا ہے۔“ [سنن ابن ماجه/كتاب الطهارة وسننها/حدیث: 532]

قبیلہ بنو عبدالاشہل کی ایک خاتون رضی اللہ عنہا سے روایت ہے، انہوں نے کہا: میں نے نبی صلی اللہ علیہ وسلم سے مسئلہ پوچھا، میں نے کہا: ”میرے (گھر) اور مسجد کے درمیان راستہ گندا (اور کوڑے کرکٹ والا) ہے۔“ آپ صلی اللہ علیہ وسلم نے فرمایا: ”اس کے بعد صاف راستہ بھی ہے؟“ میں نے کہا: ”جی ہاں۔“ فرمایا: ”اس سے اس کی تلافی ہو جائے گی۔“ [سنن ابن ماجه/كتاب الطهارة وسننها/حدیث: 533]

حضرت ابوہریرہ رضی اللہ عنہ سے روایت ہے کہ مدینہ کی گلیوں میں سے کسی گلی میں ان کی ملاقات نبی صلی اللہ علیہ وسلم سے ہوئی اور وہ اس وقت جنبی تھے۔ وہ خاموشی سے چلے گئے۔ نبی صلی اللہ علیہ وسلم نے ان کی عدم موجودگی کو محسوس فرمایا۔ جب وہ آئے تو آپ صلی اللہ علیہ وسلم نے فرمایا: ”ابوہریرہ! تم کہاں (چلے گئے) تھے؟“ انہوں نے کہا: اللہ کے رسول! جب آپ مجھ سے ملے تو میں جنبی تھا۔ مجھے اچھا نہ لگا کہ نہائے بغیر آپ کے پاس بیٹھوں۔ رسول اللہ صلی اللہ علیہ وسلم نے فرمایا: ”مومن ناپاک نہیں ہوتا۔“ [سنن ابن ماجه/كتاب الطهارة وسننها/حدیث: 534]

حضرت حذیفہ رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم سے میری ملاقات ہوئی جب کہ میں حالتِ جنابت میں تھا تو میں آپ سے الگ ہو گیا اور غسل کیا، پھر نبی صلی اللہ علیہ وسلم کی خدمت میں حاضر ہوا۔ آپ صلی اللہ علیہ وسلم نے فرمایا: ”تمہیں کیا ہوا تھا کہ مجھ سے الگ ہو گئے؟“ میں نے کہا: ”میں جنبی تھا“، اللہ کے رسول صلی اللہ علیہ وسلم نے فرمایا: ”یقیناً مسلمان ناپاک نہیں ہوتا۔““ [سنن ابن ماجه/كتاب الطهارة وسننها/حدیث: 535]