جناب عمرو بن میمون رحمہ اللہ سے روایت ہے، انہوں نے فرمایا: ”میں نے حضرت سلیمان بن یسار رحمہ اللہ سے سوال کیا کہ اگر کپڑے کو منی لگ جائے تو کیا ہم صرف اسی حصے کو دھو لیں یا پورا کپڑا دھوئیں؟“ حضرت سلیمان رحمہ اللہ نے فرمایا: حضرت عائشہ رضی اللہ عنہا نے فرمایا: ”نبی صلی اللہ علیہ وسلم کے کپڑے کو بھی وہ چیز لگ جاتی تھی تو ہم کپڑے کو دھو کر اسے اتار دیتے تھے، پھر وہی کپڑا پہن کر نماز پڑھنے تشریف لے جاتے، اور مجھے کپڑے میں دھونے کا نشان نظر آ رہا ہوتا تھا۔“ [سنن ابن ماجه/كتاب الطهارة وسننها/حدیث: 536]

حضرت عائشہ رضی اللہ عنہا سے روایت ہے، انہوں نے فرمایا: ”بعض اوقات میں اس چیز کو رسول اللہ صلی اللہ علیہ وسلم کے کپڑے پر سے خود اپنے ہاتھ سے کھرچتی تھی۔“ [سنن ابن ماجه/كتاب الطهارة وسننها/حدیث: 537]

ہمام بن حارث رحمہ اللہ سے روایت ہے انہوں نے فرمایا: ”حضرت عائشہ رضی اللہ عنہا کے ہاں ایک مہمان آ گیا۔ انہوں نے (رات کو سونے کے لیے) اسے ایک زرد لحاف دلوا دیا۔ اسے احتلام ہو گیا۔ (صبح کے وقت) اسے اس بات سے شرم محسوس ہوئی کہ وہ کپڑا اس حال میں (ام المومنین کے پاس) بھیجے کہ اس میں احتلام کا نشان ہو۔ اس نے لحاف پانی میں ڈبو کر (گیلا کر کے) بھیج دیا (تاکہ سارا لحاف گیلا ہونے کی وجہ سے وہ نشان نظر نہ آئے۔ صرف متاثرہ حصہ دھونے پر اکتفا نہ کیا)۔ حضرت عائشہ رضی اللہ عنہا نے فرمایا: ”اس نے ہمارا کپڑا کیوں خراب کر دیا؟ (اب یہ اتنا موٹا کپڑا کب خشک ہو گا؟) اگر وہ اسے انگلی سے کھرچ ڈالتا تو کافی ہوتا۔ میں بھی بعض اوقات رسول اللہ صلی اللہ علیہ وسلم کے کپڑے سے یہ چیز اپنی انگلی سے کھرچ دیا کرتی تھی“۔“ [سنن ابن ماجه/كتاب الطهارة وسننها/حدیث: 538]

حضرت عائشہ رضی اللہ عنہا سے روایت ہے، انہوں نے فرمایا: ”بعض اوقات مجھے رسول اللہ صلی اللہ علیہ وسلم کے کپڑے پر وہ چیز نظر آتی تو میں اسے کھرچ کر اتار دیتی تھی۔“ [سنن ابن ماجه/كتاب الطهارة وسننها/حدیث: 539]

حضرت معاویہ بن ابو سفیان رضی اللہ عنہ سے روایت ہے کہ انہوں نے اپنی ہمشیرہ، یعنی نبی صلی اللہ علیہ وسلم کی زوجہ مطہرہ ام حبیبہ رضی اللہ عنہا سے سوال کیا: ”کیا رسول اللہ صلی اللہ علیہ وسلم اس کپڑے میں نماز پڑھ لیتے تھے جس میں صحبت کی ہوتی؟“ انہوں نے کہا: ”ہاں، اگر اس میں ناپاکی کا اثر نہ ہوتا۔“ [سنن ابن ماجه/كتاب الطهارة وسننها/حدیث: 540]

حضرت ابو درداء رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم (گھر سے) باہر تشریف لائے اور آپ کے سر سے پانی ٹپک رہا تھا۔ آپ نے ایک ہی کپڑا زیب تن کر کے ہمیں نماز پڑھائی جبکہ آپ نے اس کے دونوں کنارے مخالف سمتوں میں ڈال رکھے تھے۔ جب آپ صلی اللہ علیہ وسلم نماز سے فارغ ہوئے تو حضرت عمر بن خطاب رضی اللہ عنہ نے عرض کیا: ”اے اللہ کے رسول! آپ ہمیں ایک کپڑا اوڑھ کر نماز پڑھا دیتے ہیں؟“ آپ صلی اللہ علیہ وسلم نے فرمایا: ”ہاں، میں اس کو پہن کر نماز پڑھ لیتا ہوں، اگرچہ اسے پہن کر مباشرت بھی کی ہو۔““ [سنن ابن ماجه/كتاب الطهارة وسننها/حدیث: 541]

حضرت جابر بن سمرہ رضی اللہ عنہ سے روایت ہے، انہوں نے فرمایا: ”ایک آدمی نے نبی صلی اللہ علیہ وسلم سے سوال کیا: کسی نے بیوی کے پاس جاتے وقت جو کپڑا پہن رکھا ہو، کیا وہی پہن کر نماز پڑھ سکتا ہے؟ آپ صلی اللہ علیہ وسلم نے فرمایا: ”ہاں، اگر اس میں کوئی چیز نظر آئے (جو دھونے کے لائق ہو) تو اسے دھولے۔““ [سنن ابن ماجه/كتاب الطهارة وسننها/حدیث: 542]

جناب ہمام بن حارث رحمہ اللہ سے روایت ہے، انہوں نے کہا: حضرت جریر بن عبداللہ رضی اللہ عنہ نے پیشاب کیا، اس کے بعد وضو کیا اور موزوں پر مسح کیا، انہیں کہا گیا: ”آپ بھی یہ کام کرتے ہیں؟“ انہوں نے فرمایا: ”مجھے کیا رکاوٹ ہے؟ (میں کیوں نہ کروں؟) جب کہ میں نے رسول اللہ صلی اللہ علیہ وسلم کو اس طرح کرتے دیکھا ہے۔“ ابراہیم رحمہ اللہ نے کہا: ”لوگوں کو حضرت جریر رضی اللہ عنہ کی حدیث بہت پسند آئی کیونکہ وہ سورۃ المائدہ کے نازل ہونے کے بعد اسلام لائے تھے۔“ [سنن ابن ماجه/كتاب الطهارة وسننها/حدیث: 543]

حضرت حذیفہ رضی اللہ عنہ سے روایت ہے کہ رسول اللہ صلی اللہ علیہ وسلم نے ”وضو کیا اور موزوں پر مسح کیا۔“ [سنن ابن ماجه/كتاب الطهارة وسننها/حدیث: 544]

حضرت مغیرہ بن شعبہ رضی اللہ عنہ سے روایت ہے کہ ”رسول اللہ صلی اللہ علیہ وسلم قضائے حاجت کے لیے تشریف لے گئے۔ حضرت مغیرہ رضی اللہ عنہ ایک برتن میں پانی لے کر آپ کے ساتھ گئے۔ رسول اللہ صلی اللہ علیہ وسلم نے قضائے حاجت سے فارغ ہو کر وضو کیا اور موزوں پر مسح کیا۔“ [سنن ابن ماجه/كتاب الطهارة وسننها/حدیث: 545]