حضرت ابوہریرہ رضی اللہ عنہ سے روایت ہے کہ ”رسول اللہ صلی اللہ علیہ وسلم جمعہ کے دن صبح کی نماز میں ﴿الم تَنْزِيلُ﴾ [سورة السجدة: 1] اور ﴿هَلْ أَتَى عَلَى الْإِنْسَانِ﴾ [سورة الإنسان: 1] پڑھا کرتے تھے۔“ [سنن ابن ماجه/كتاب إقامة الصلاة والسنة/حدیث: 823]

حضرت عبداللہ بن مسعود رضی اللہ عنہ سے روایت ہے کہ ”رسول اللہ صلی اللہ علیہ وسلم جمعہ کے دن صبح کی نماز میں ﴿الٓمّ تَنْزِيْلُ﴾ [سورة السجدة: 1] اور ﴿هَلْ اَتٰى عَلَي الْاِنْسَانِ﴾ [سورة الإنسان: 1] پڑھا کرتے تھے“۔ اسحاق راوی بیان کرتے ہیں: ”ہمیں عمرو نے حضرت عبداللہ بن مسعود رضی اللہ عنہ سے اسی طرح بیان کیا ہے، میں اس میں کسی قسم کا شک نہیں کرتا۔“ [سنن ابن ماجه/كتاب إقامة الصلاة والسنة/حدیث: 824]

حضرت قزعہ (بن یحییٰ بصری) سے روایت ہے، انہوں نے فرمایا: ”میں نے حضرت ابو سعید خدری رضی اللہ عنہ سے رسول اللہ صلی اللہ علیہ وسلم کی نماز کے متعلق سوال کیا، انہوں نے فرمایا: ”تیرے لیے اس میں بھلائی نہیں۔“ میں نے کہا: ”اللہ آپ پر رحم فرمائے، بیان فرما دیجیے۔“ انہوں نے فرمایا: ”رسول اللہ صلی اللہ علیہ وسلم کے حکم سے ظہر کی اقامت کہی جاتی تھی، تو ہم میں سے ایک شخص بقیع کی طرف جاتا، (وہاں پہنچ کر) حاجت سے فارغ ہوتا، پھر واپس آ کر وضو کرتا اور (جب مسجد میں پہنچتا تو) رسول اللہ صلی اللہ علیہ وسلم کو ظہر کی پہلی رکعت میں پا لیتا۔““ [سنن ابن ماجه/كتاب إقامة الصلاة والسنة/حدیث: 825]

حضرت ابو معمر رحمہ اللہ سے روایت ہے، انہوں نے فرمایا: ”میں نے حضرت خباب رضی اللہ عنہ سے کہا: آپ لوگوں کو ظہر اور عصر میں رسول اللہ صلی اللہ علیہ وسلم کی قراءت کا کس طرح علم ہوتا تھا؟ انہوں نے فرمایا: آپ صلی اللہ علیہ وسلم کی ریش مبارک کی حرکت سے۔“ [سنن ابن ماجه/كتاب إقامة الصلاة والسنة/حدیث: 826]

حضرت ابو ہریرہ رضی اللہ عنہ سے روایت ہے، انہوں نے فرمایا: ”میں نے فلاں سے زیادہ کسی کی نماز رسول اللہ صلی اللہ علیہ وسلم کی نماز سے مشابہ نہیں دیکھی۔“ سلیمان بن یسار رحمہ اللہ نے فرمایا: ”وہ صاحب ظہر کی پہلی دو رکعتوں میں طویل قراءت کرتے تھے، اور آخری دو رکعتوں میں تخفیف فرماتے تھے، اور عصر کی نماز (ظہر کے مقابلے میں) ہلکی پڑھاتے تھے۔“ [سنن ابن ماجه/كتاب إقامة الصلاة والسنة/حدیث: 827]

حضرت ابو سعید خدری رضی اللہ عنہ سے روایت ہے، انہوں نے فرمایا: (ایک بار) تیس بدری صحابہ رضی اللہ عنہم (ایک جگہ) جمع ہو گئے۔ انہوں نے (آپس میں) کہا: ”آیئے، رسول اللہ صلی اللہ علیہ وسلم کی سری نمازوں میں قراءت (کی مقدار) کا اندازہ کریں۔“ ان میں سے کسی دو میں اختلاف نہیں ہوا، (اور انہوں نے بالاتفاق فیصلہ دیا) ان کا اندازہ یہ تھا کہ رسول اللہ صلی اللہ علیہ وسلم کی قراءت ظہر کی پہلی رکعت میں تیس آیتوں کے برابر ہوتی تھی اور دوسری رکعت میں اس سے نصف، اور عصر کی نماز کے بارے میں ان کا اندازہ یہ تھا کہ وہ ظہر کی آخری رکعتوں سے نصف ہوتی تھی۔ [سنن ابن ماجه/كتاب إقامة الصلاة والسنة/حدیث: 828]

حضرت ابو قتادہ رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم ہمیں نماز پڑھاتے ہوئے ظہر کی پہلی دو رکعتوں میں قرأت کرتے تھے اور کبھی کبھی ہمیں کوئی آیت سنا دیتے تھے۔“ [سنن ابن ماجه/كتاب إقامة الصلاة والسنة/حدیث: 829]

حضرت براء بن عازب رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم ہمیں ظہر کی نماز پڑھاتے تھے، اور ہمیں چند آیتوں کے بعد ایک آیت سورہ لقمان اور سورہ ذاریات کی سنائی دیتی تھی۔“ [سنن ابن ماجه/كتاب إقامة الصلاة والسنة/حدیث: 830]

حضرت عبداللہ بن عباس رضی اللہ عنہ نے اپنی والدہ (حضرت لبابہ رضی اللہ عنہا) سے روایت کیا کہ انہوں نے ”رسول اللہ صلی اللہ علیہ وسلم کو مغرب کی نماز میں ﴿وَالْمُرْسَلٰتِ عُرْفًا﴾ [سورة المرسلات: 1] پڑھتے سنا۔“ [سنن ابن ماجه/كتاب إقامة الصلاة والسنة/حدیث: 831]

حضرت جبیر بن مطعم رضی اللہ عنہ سے روایت ہے، انہوں نے فرمایا: ”میں نے نبی صلی اللہ علیہ وسلم کو مغرب کی نماز میں سورہٴ طور پڑھتے سنا۔“ حضرت جبیر رضی اللہ عنہ نے ایک اور حدیث کے دوران میں فرمایا: ”جب میں نے رسول اللہ صلی اللہ علیہ وسلم کو یہ آیات ﴿أَمْ خُلِقُوا مِنْ غَيْرِ شَيْءٍ أَمْ هُمُ الْخَالِقُونَ * أَمْ خَلَقُوا السَّمَاوَاتِ وَالْأَرْضَ بَلْ لَا يُوقِنُونَ * أَمْ عِنْدَهُمْ خَزَائِنُ رَبِّكَ أَمْ هُمُ الْمُصَيْطِرُونَ * أَمْ لَهُمْ سُلَّمٌ يَسْتَمِعُونَ فِيهِ فَلْيَأْتِ مُسْتَمِعُهُمْ بِسُلْطَانٍ مُبِينٍ﴾ [سورة الطور: 35-38] پڑھتے سنا: ”کیا وہ بغیر کسی (پیدا کرنے والے) کے (خود بخود) پیدا کیے گئے ہیں؟ یا وہ خود پیدا کرنے والے ہیں؟ کیا انہوں نے آسمانوں اور زمین کو پیدا کیا ہے؟ بلکہ وہ لوگ یقین نہیں رکھتے، یا کیا ان کے پاس تیرے رب کے خزانے ہیں؟ یا وہ (ان خزانوں کے) داروغے ہیں؟ یا کیا ان کے پاس کوئی سیڑھی ہے کہ وہ اس پر (چڑھ کر آسمان کی باتیں) سن لیتے ہیں؟ (اگر ایسا ہے) تو پھر چاہیے کہ ان کا سننے والا کوئی روشن دلیل پیش کرے“ تو قریب تھا کہ میرا دل اڑ جائے۔“ [سنن ابن ماجه/كتاب إقامة الصلاة والسنة/حدیث: 832]