حضرت عائشہ رضی اللہ عنہا سے روایت ہے، انہوں نے فرمایا: ”میں رات کے آخری حصے میں رسول اللہ صلی اللہ علیہ وسلم کو ہمیشہ اپنے ہاں سوئے ہوئے پاتی تھی۔“ وکیع رحمہ اللہ بیان کرتے ہیں: ”یعنی وتر کے بعد۔“ [سنن ابن ماجه/كتاب إقامة الصلاة والسنة/حدیث: 1197]

حضرت عائشہ رضی اللہ عنہا سے روایت ہے، انہوں نے فرمایا: ”نبی صلی اللہ علیہ وسلم جب فجر کی دو (سنت) رکعتیں پڑھ لیتے تو دائیں پہلو پر لیٹ جاتے۔“ [سنن ابن ماجه/كتاب إقامة الصلاة والسنة/حدیث: 1198]

حضرت ابو ہریرہ رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم جب فجر کی دو رکعتیں پڑھتے تو لیٹ جاتے۔“ [سنن ابن ماجه/كتاب إقامة الصلاة والسنة/حدیث: 1199]

حضرت سعید بن یسار رحمہ اللہ سے روایت ہے، انہوں نے کہا: ”میں حضرت عبداللہ بن عمر رضی اللہ عنہ کے ہمراہ (سفر میں) تھا، میں (راستے میں رک گیا اور) ان سے پیچھے رہ گیا اور (سواری سے اتر کر) وتر پڑھ لیے۔ (جب دوبارہ ان سے جا ملا) تو انہوں نے پوچھا: ”تم پیچھے کیوں رہ گئے تھے؟“ میں نے عرض کیا: ”میں نے وتر پڑھے ہیں۔“ فرمایا: ”کیا تمہارے لئے ﴿لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ﴾ [سورة الأحزاب: 21] (اللہ کے رسول صلی اللہ علیہ وسلم میں اچھا نمونہ) نہیں؟“ میں نے کہا: ”جی ہاں۔“ فرمایا: ”رسول اللہ صلی اللہ علیہ وسلم اپنے اونٹ ہی پر وتر پڑھ لیا کرتے تھے۔““ [سنن ابن ماجه/كتاب إقامة الصلاة والسنة/حدیث: 1200]

حضرت عبداللہ بن عباس رضی اللہ عنہ سے روایت ہے کہ ”نبی صلی اللہ علیہ وسلم سواری پر وتر پڑھ لیتے تھے۔“ [سنن ابن ماجه/كتاب إقامة الصلاة والسنة/حدیث: 1201]

حضرت جابر بن عبداللہ رضی اللہ عنہ سے روایت ہے انہوں نے کہا: رسول اللہ صلی اللہ علیہ وسلم نے حضرت ابوبکر رضی اللہ عنہ سے فرمایا: ”کس وقت وتر پڑھتے ہو؟“ انہوں نے کہا: عشاء کے بعد رات کے شروع میں پڑھ لیتا ہوں۔ آپ صلی اللہ علیہ وسلم نے فرمایا: ”عمر! تم (کب وتر پڑھتے ہو؟)“ انہوں نے کہا: رات کے آخری حصے میں (پڑھتا ہوں۔) نبی صلی اللہ علیہ وسلم نے فرمایا: ”ابوبکر! تم نے زیادہ پختہ اور قابل اعتماد کام اختیار کیا اور عمر! تم نے قوت والا کام اختیار کیا۔“ [سنن ابن ماجه/كتاب إقامة الصلاة والسنة/حدیث: 1202]

حضرت عبداللہ بن مسعود رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے نماز پڑھائی، اس میں (بھول کر) کمی بیشی ہوگئی۔“ ابراہیم نخعی رحمہ اللہ نے کہا: ”وہم مجھے ہوا ہے (یاد نہیں رہا کہ استاد محترم علقمہ رحمہ اللہ نے کمی کا لفظ فرمایا تھا یا زیادتی کا)“ عرض کیا گیا: ”اے اللہ کے رسول! کیا نماز میں کچھ اضافہ ہو گیا ہے؟“ آپ صلی اللہ علیہ وسلم نے فرمایا: ”میں ایک انسان ہی ہوں، جس طرح تم بھول جاتے ہو، (کبھی کبھار) میں بھی بھول جاتا ہوں، تو جب کسی سے بھول ہو جائے تو بیٹھے بیٹھے دو سجدے کر لیا کرے۔“ پھر نبی صلی اللہ علیہ وسلم نے (قبلے کی طرف) منہ پھیرا اور دو سجدے کیے۔ [سنن ابن ماجه/كتاب إقامة الصلاة والسنة/حدیث: 1203]

حضرت عیاض بن ہلال انصاری رضی اللہ عنہ سے روایت ہے کہ انہوں نے حضرت ابو سعید خدری رضی اللہ عنہ سے سوال کیا اور کہا: ”ایک آدمی نماز پڑھتا ہے، (لیکن نماز کے دوران میں) اسے معلوم ہی نہیں رہتا کہ اس نے کتنی نماز پڑھی ہے (وہ کیا کرے؟)“ حضرت ابو سعید خدری رضی اللہ عنہ نے کہا: رسول اللہ صلی اللہ علیہ وسلم نے فرمایا: ”جب تم میں سے کوئی نماز پڑھے اور اسے معلوم نہ رہے کہ کتنی نماز پڑھی ہے تو بیٹھے بیٹھے دو سجدے کر لے۔“ [سنن ابن ماجه/كتاب إقامة الصلاة والسنة/حدیث: 1204]

حضرت عبداللہ بن مسعود رضی اللہ عنہ سے روایت ہے، انہوں نے فرمایا: ”ایک بار نبی صلی اللہ علیہ وسلم نے ظہر کی نماز پانچ رکعتیں پڑھیں۔ آپ صلی اللہ علیہ وسلم سے کہا گیا: ”کیا نماز (کی رکعتوں) میں اضافہ کر دیا گیا ہے؟“ آپ صلی اللہ علیہ وسلم نے فرمایا: ”بات کیا ہے؟“ آپ صلی اللہ علیہ وسلم کو بتایا گیا (کہ پانچ رکعتیں پڑھی گئی ہیں۔) تب آپ صلی اللہ علیہ وسلم نے پاؤں موڑا اور دو سجدے کر لیے۔“ [سنن ابن ماجه/كتاب إقامة الصلاة والسنة/حدیث: 1205]