حضرت عبدالرحمٰن بن عوف رضی اللہ عنہ سے روایت ہے، انہوں نے فرمایا: میں نے رسول اللہ صلی اللہ علیہ وسلم سے یہ ارشاد سنا: ”اچکنے والے کی سزا ہاتھ کاٹنا نہیں ہے۔“ [سنن ابن ماجه/كتاب الحدود/حدیث: 2592]

حضرت رافع بن خدیج رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”پھل چرانے یا کھجور کا گودا چرانے پر ہاتھ نہیں کاٹا جائے گا۔“ [سنن ابن ماجه/كتاب الحدود/حدیث: 2593]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”پھل چرانے یا کھجور کا گودا چرانے پر ہاتھ نہیں کاٹا جائے گا۔“ [سنن ابن ماجه/كتاب الحدود/حدیث: 2594]

حضرت عبداللہ بن صفوان رحمہ اللہ اپنے والد (حضرت صفوان بن امیہ رضی اللہ عنہ) سے روایت کرتے ہیں کہ وہ مسجد میں سو رہے تھے اور اپنی چادر سر کے نیچے رکھی ہوئی تھی۔ کسی نے ان کے سر کے نیچے سے چادر نکال لی۔ وہ چور کو پکڑ کر نبی صلی اللہ علیہ وسلم کی خدمت میں لے گئے۔ نبی صلی اللہ علیہ وسلم نے اس کا ہاتھ کاٹنے کا حکم دے دیا۔ حضرت صفوان رضی اللہ عنہ نے کہا: ”اے اللہ کے رسول صلی اللہ علیہ وسلم ! میرا ارادہ یہ نہیں تھا (کہ اس کا ہاتھ کٹوا دوں)، میری چادر اس پر صدقہ ہے۔“ رسول اللہ صلی اللہ علیہ وسلم نے فرمایا: ”تم نے اسے میرے پاس لانے سے پہلے کیوں (یہ صدقہ) نہ کیا؟“ [سنن ابن ماجه/كتاب الحدود/حدیث: 2595]

حضرت عبداللہ بن عمرو بن عاص رضی اللہ عنہ سے روایت ہے کہ قبیلہ مزینہ کے ایک آدمی نے نبی صلی اللہ علیہ وسلم سے پھلوں (کی چوری) کے بارے میں دریافت کیا تو آپ صلی اللہ علیہ وسلم نے فرمایا: ”جو پھل خوشوں میں سے (نکال کر) اٹھا کر لے جایا جائے تو (اس کا جرمانہ) اس کی قیمت اور اس کے ساتھ اتنی ہی رقم مزید (جرمانہ وصول کیا جائے گا) اور جو سکھانے کے میدان سے (لے جایا گیا) ہو تو وہ اگر ڈھال کی قیمت تک پہنچتا ہو تو اس کی سزا میں ہاتھ کاٹا جائے گا، اگر اس نے کھایا ہے اور ساتھ نہیں لے گیا تو اسے کوئی سزا نہیں۔“ اس نے عرض کیا: اے اللہ کے رسول صلی اللہ علیہ وسلم ! جو بکری (رات کو) باڑے سے باہر رہ جائے (اور اسے کوئی چرا لے تو؟) رسول اللہ صلی اللہ علیہ وسلم نے فرمایا: ”اس کی قیمت اور اس کے ساتھ اتنی ہی رقم مزید اور (جسمانی) سزا بھی، اور جو (بکری) باڑے میں سے چرائی جائے تو اس کی سزا ہاتھ کاٹنا ہے جب کہ وہ ڈھال کی قیمت تک پہنچتی ہو۔“ [سنن ابن ماجه/كتاب الحدود/حدیث: 2596]

حضرت ابو امیہ رضی اللہ عنہ سے روایت ہے کہ رسول اللہ صلی اللہ علیہ وسلم کی خدمت میں ایک چور پیش کیا گیا، اس نے اعترافِ جرم کر لیا جب کہ اس کے پاس سامان نہ ملا۔ رسول اللہ صلی اللہ علیہ وسلم نے فرمایا: ”میرے خیال میں تو نے چوری نہیں کی۔“ اس نے کہا: ”کیوں نہیں (بلکہ کی ہے)۔“ پھر رسول اللہ صلی اللہ علیہ وسلم نے فرمایا: ”میرے خیال میں تو نے چوری نہیں کی۔“ اس نے کہا: ”کیوں نہیں (بلکہ کی ہے)۔“ چنانچہ رسول اللہ صلی اللہ علیہ وسلم کے حکم سے اس کا ہاتھ کاٹ دیا گیا، پھر نبی صلی اللہ علیہ وسلم نے فرمایا: ”کہہ! «أَسْتَغْفِرُ اللهَ وَأَتُوبُ إِلَيْهِ» ”میں اللہ سے بخشش طلب کرتا ہوں اور اس کے حضور توبہ کرتا ہوں۔“”اس نے کہا: «أَسْتَغْفِرُ اللهَ وَأَتُوبُ إِلَيْهِ» ”میں اللہ سے بخشش طلب کرتا ہوں اور اس کے حضور توبہ کرتا ہوں۔“ رسول اللہ صلی اللہ علیہ وسلم نے دو بار فرمایا: ”اے اللہ! اس کی توبہ قبول فرما۔“ [سنن ابن ماجه/كتاب الحدود/حدیث: 2597]

عبدالجبار بن وائل نے اپنے والد وائل بن حجر رضی اللہ عنہ سے روایت کی ہے کہ ”رسول اللہ صلی اللہ علیہ وسلم کے زمانے میں ایک عورت سے زبردستی بدکاری کا ارتکاب کیا گیا تو رسول اللہ صلی اللہ علیہ وسلم نے اسے حد سے بری کر دیا، اور اس شخص پر حد جاری کی جس نے اس سے بدکاری کی تھی۔“ صحابی نے یہ ذکر نہیں کیا کہ نبی صلی اللہ علیہ وسلم نے اس عورت کو مہر دلوایا تھا (یا نہیں۔) [سنن ابن ماجه/كتاب الحدود/حدیث: 2598]

حضرت عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”مسجدوں میں حدیں نہ لگائی جائیں۔“ [سنن ابن ماجه/كتاب الحدود/حدیث: 2599]

حضرت عمرو بن شعیب رضی اللہ عنہ نے اپنے والد سے، اور انہوں نے اپنے دادا (حضرت عبداللہ بن عمرو رضی اللہ عنہ) سے روایت کیا ہے کہ رسول اللہ صلی اللہ علیہ وسلم نے ”مسجدوں میں حد لگانے سے منع فرمایا۔“ [سنن ابن ماجه/كتاب الحدود/حدیث: 2600]

حضرت ابوبردہ بن نیار رضی اللہ عنہ سے روایت ہے کہ رسول اللہ صلی اللہ علیہ وسلم فرمایا کرتے تھے: ”اللہ کی مقرر کردہ حدوں میں سے کسی حد کے علاوہ کسی (مجرم) کو دس سے زیادہ کوڑے نہ مارے جائیں۔“ [سنن ابن ماجه/كتاب الحدود/حدیث: 2601]