حضرت ابوہریرہ رضی اللہ عنہ سے روایت ہے، اگر احرام والا شتر مرغ کا انڈا توڑ دے تو اس کے بارے میں رسول اللہ صلی اللہ علیہ وسلم نے فرمایا ہے: ”اس کی قیمت ادا کرے۔“ [سنن ابن ماجه/كتاب المناسك/حدیث: 3086]

حضرت عائشہ رضی اللہ عنہا سے روایت ہے کہ نبی صلی اللہ علیہ وسلم نے فرمایا: ”پانچ جانور فاسق ہیں، انہیں حرم سے باہر اور حرم کے اندر (ہر جگہ) قتل کیا جا سکتا ہے: سانپ، چتکبرا کوا، چوہا، کاٹنے والا کتا اور چیل۔“ [سنن ابن ماجه/كتاب المناسك/حدیث: 3087]

حضرت عبداللہ بن عمر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”پانچ جانور ہیں جن کے قتل کرنے والے پر (یا فرمایا: جن کے قتل کرنے میں) کوئی گناہ نہیں اور وہ احرام میں ہیں: بچھو، کوا، چوہا اور کاٹنے والا کتا۔“ [سنن ابن ماجه/كتاب المناسك/حدیث: 3088]

حضرت ابو سعید خدری رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”احرام والا شخص ان جانوروں کو قتل کر سکتا ہے: سانپ، بچھو، حملہ کرنے والا درندہ، کاٹنے والا کتا اور فاسق چوہیا۔“ کسی نے حضرت ابو سعید خدری رضی اللہ عنہ سے کہا: ”اسے فاسق کیوں کہا گیا ہے؟“ انہوں نے فرمایا: ”اس لیے کہ (ایک رات) رسول اللہ صلی اللہ علیہ وسلم کی آنکھ کھلی تو اس نے (چراغ کی جلتی ہوئی) بتی پکڑ رکھی تھی (اور ممکن تھا) کہ گھر کو آگ لگا دے۔“ [سنن ابن ماجه/كتاب المناسك/حدیث: 3089]

حضرت صعب بن جثامہ رضی اللہ عنہ سے روایت ہے، انہوں نے فرمایا: ”میں ابواء یا ودان کے مقام پر تھا کہ رسول اللہ صلی اللہ علیہ وسلم میرے پاس سے گزرے۔ میں نے آپ کی خدمت میں گورخر (کا گوشت) تحفے کے طور پر پیش کیا۔ رسول اللہ صلی اللہ علیہ وسلم نے وہ مجھے واپس دے دیا (قبول نہ کیا۔) جب آپ صلی اللہ علیہ وسلم نے میرے چہرے پر افسوس کے آثار دیکھے تو فرمایا: ”ہم آپ کو (یہ تحفہ) واپس تو نہ کرتے لیکن ہم احرام کی حالت میں ہیں۔““ [سنن ابن ماجه/كتاب المناسك/حدیث: 3090]

حضرت عبداللہ بن عباس رضی اللہ عنہما نے حضرت علی رضی اللہ عنہ سے روایت کیا، انہوں نے فرمایا: ”نبی صلی اللہ علیہ وسلم کی خدمت میں شکار کا گوشت پیش کیا گیا جب کہ آپ صلی اللہ علیہ وسلم احرام میں تھے تو آپ صلی اللہ علیہ وسلم نے وہ نہ کھایا۔“ [سنن ابن ماجه/كتاب المناسك/حدیث: 3091]

حضرت طلحہ بن عبید اللہ رضی اللہ عنہ سے روایت ہے کہ نبی صلی اللہ علیہ وسلم نے انہیں گورخر (کا گوشت) دیا، اور حکم دیا کہ ”اسے ساتھیوں میں تقسیم کر دیں“ جب کہ وہ سب احرام باندھے ہوئے تھے۔ [سنن ابن ماجه/كتاب المناسك/حدیث: 3092]

حضرت ابو قتادہ رضی اللہ عنہ سے روایت ہے، انہوں نے فرمایا: ”حدیبیہ (کے واقعہ) کے دنوں میں، میں بھی رسول اللہ صلی اللہ علیہ وسلم کے ساتھ روانہ ہوا۔ آپ کے ساتھیوں نے احرام باندھا جبکہ میں نے احرام نہ باندھا۔ مجھے ایک (جنگلی) گدھا نظر آیا تو میں نے اس پر حملہ کر کے اسے شکار کر لیا، پھر میں نے رسول اللہ صلی اللہ علیہ وسلم سے اس کی کیفیت عرض کی اور یہ بھی ذکر کیا کہ میں احرام میں نہیں تھا اور میں نے آپ (کو تحفہ دینے) کے لیے اسے شکار کیا ہے۔ نبی صلی اللہ علیہ وسلم نے اپنے ساتھیوں کو حکم دیا کہ اسے کھا لیں، اور خود اس میں سے (کچھ) نہ کھایا کیونکہ میں نے رسول اللہ صلی اللہ علیہ وسلم کو بتایا تھا کہ میں نے اسے آپ ( صلی اللہ علیہ وسلم ) کے لیے شکار کیا ہے۔“ [سنن ابن ماجه/كتاب المناسك/حدیث: 3093]

نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم مدینہ سے «هَدْيٌ» (قربانی کے جانور) بھیجتے تھے۔ میں آپ کی ہدی کے جانوروں کے قلادے بٹ کر تیار کرتی تھی، پھر رسول اللہ صلی اللہ علیہ وسلم کسی ایسے کام سے پرہیز نہیں کرتے تھے جس سے احرام والا پرہیز کرتا ہے۔“ [سنن ابن ماجه/كتاب المناسك/حدیث: 3094]

نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا سے روایت ہے، انہوں نے فرمایا: ”میں نبی صلی اللہ علیہ وسلم کی ہدی (قربانی کے جانوروں) کے لیے قلادے بٹتی تھی تو آپ اپنی ہدی کو قلادے پہناتے تھے۔ پھر ان (جانوروں) کو (مکہ شریف) بھیج دیتے۔ پھر آپ (مدینہ شریف میں) قیام پذیر رہتے اور کسی ایسی چیز سے پرہیز نہ کرتے جس سے احرام والا پرہیز کیا کرتا ہے۔“ [سنن ابن ماجه/كتاب المناسك/حدیث: 3095]